ერთი კვირის წინ სებასტიან ჯოვინკოს კანადურ „ტორონტოში“ ტრანსფერი დადასტურდა. ხვალ, 26 იანვარს, სებას 28 წელი შეუსრულდება. ასაკიდანვე ჩანს, რომ სებასტიან ჯოვინკო აშშ-ში სათამაშოდ გადასასვლელად ჯერ ახალგაზრდაა. სხვა მხვრივ, იგი არც კაკა, არც ტიერი ანრი და არც დევიდ ბექჰემია – სებას იტალიის ნაკრების შემადგენლობაში სულ ათი მატჩი აქვს ჩატარებული, ხოლო „იუვენტუსში“ მას, ძირითადად, სათადარიგოთა სკამზე ჯდომა უწევს.
„პარმადან“ მშობლიურ კლუბში დაბრუნების შემდეგ „ატომური ჭიანჭველა“ მოედანზე იშვიათად ჩნდებოდა, მასიმილიანო ალეგრის მოსვლის შემდეგ კი მისთვის სიტუაცია კიდევ უფრო დამძიმდა. მიმდინარე სეზონში ჯოვინკომ სერია ა-ში სულ შვიდი მატჩი ჩაატარა, აქედან ძირითად შემადგენლობაში მან ორი შეხვედრა დაიწყო, თუმცა ვერც ერთი გოლი ვერ გაიტანა. ერთადერთხელ სებამ თავი იტალიის თასის მატჩში გამოიჩინა. თუ „პარმაში“ მეორე სეზონს არ ჩავთვლით, შედეგიანობით ჯოვინკო ვერც ადრე გამოირჩეოდა. სებასტიანი იმ ფეხბურთელის კლასიკური მაგალითია, რომელიც მშობლიურ კლუბში თავს ვერაფრით იმკვიდრებს. მაშინაც კი, როდესაც, თითქოს, მას უკვე ხშირად თამაში უნდა დაეწყო, კლუბის ხელმძღვანელობამ სებას პოზიციაზე ახალი მოთამაშეები მოიყვანა და მას ახალი გამოცდა მოუწყო. თანაც, „იუვეს“ სათამაშო სქემაში მისი პოზიციის მოთამაშე ვერც ხვდებოდა. პატარა და ტექნიკური სება ბევრ გუნდს გამოადგებოდა, რომელთა შორისაც „იუვენტუსი“ ნამდვილად არ არის. ძირითად შემადგენლობაში ვიდალის ან პირლოს შეცვლა სებასტიანს ვერ გამოუვიდოდა, ხოლო მეტოქის კართან ხიფათის შექმნაზე თუ ვისაუბრებთ, ამ კომპონენტში იგი ვერც კარლოს ტევესს სჯობნიდა.
მასიმილიანო ალეგრი „ატომურ ჭიანჭველას“ პირლოს ან ტევესის ნაცვლად ათამაშებდა. ხშირად ეს მაშინ ხდებოდა, როდესაც მატჩის ბედი უკვე გადაწყვეტილი იყო. ასეთ სიტუაციაში ფეხბურთელის გუნდიდან წასვლასთან დაკავშირებული საუბრები არავის უკვირს. ჯოვინკოს გვარს სხვადასხვა კლუბებს უკავშირებდნენ, იყო „ტორინოში“ გადასვლის ვარიანტიც, რათა მას მშობლიური ქალაქი არ დაეტოვებინა, თუმცა მისი ხილვა თავად „ხარების“ გულშემატკივრებმაც არ ისურვეს, მათთვის „იუვეს“ აღზრდილის საყვარელი გუნდის მაისურში ხილვა მიუღებელი აღმოჩნდა. იყვნენ ისეთ კლუბებიც, რომლებიც ჯოვინკოს კონტრაქტს სთავაზობდნენ, თუმცა შემდეგომ კლუბს სათანადო თანხას ვერ უხდიდნენ. „
„ტორონტო“ MLS-ის ყველაზე ცნობილი და მდიდარი კლუბი ნამდვილად არ არის, თუმცა მას გულშემატკივრები და ფინანსები საკმარისად გააჩნია. სხვათაშორის, კანადური კლუბის კაპიტანი მაიკლ ბრედლია, რომელსაც „კიევოში“ და „რომაში“ თამაშის გამოცდილება გააჩნია. ეს კი ძალიან მნიშვნელოვანია, რამეთუ თავისი გამოცდილებით იგი ახალ თანაგუნდელს ადაპტაციაში ხელს შეუწყობს. ჯოვინკოს დახმარებით, „ტორონტო“ აღმოსავლეთ კონფერენციაში უფრო მაღლა აიწევს და წარმატებას მიაღწევს. მსგავსი რამ „ლოს-ანეჯეს გალაქსის“ ერთ-ერთ ლიდერ რობი კინს გამოუვიდა, რომელმაც გუნდთან ერთად ჩემპიონატიც მოიგო. ჯოვინკო, ალბათ, მსგავს წარმატებას ვერ მიაღწევს, თუმცა მას წარმატებული სათამაშო მონაკვეთის ჩატარება ნამდვილად შეუძლია. სებას წარუმატებლობაში „იუვენტუსის“ დადანაშაულება არ შეუძლია – კლუბმა მას მეორე შანსი მისცა, რომლის გამოყენებაც მან, უბრალოდ, ვერ შეძლო.
როგორც ჩანს, სებამ უკკე თვითონაც აღიარა, რომ მისი კლასი ამბიციებს ვერ შეესაბამებოდა, ამიტომაც კონტინენტის შეცვლა ასე ადრე გადაწყვიტა. დიახ, ჯოვინკომ მიზანს ვერ მიაღწია, თუმცა მას ახალი ცხოვრების დაწყება შეუძლია. „ატომურ ჭიანჭველას“ MLS-ის ვარსკვლავად ჩამოყალიბების შანსიც უჩნდება. იტალიასა და ევროპის სხვა ქვეყნებში ვერ იპოვით კლუბს, რომელიც ჯოვინკოს, ხელფასის სახით, ხუთ მილიონ ევროს გადაუხდიდა. ტურინში მის თამაშს 2,2 მილიონ ევროდ აფასებდნენ. ასე რომ, სებასტიანის გადაწყვეტილების გაგება სავსებით შესაძლებელია. ახალ ქვეყანაში ჯოვინკო მუდმივი ყურადღების ცენტრში იქნება, მის სახელს გულშემატკივრები ადგილობრივ გამოცემებში ხშირად ნახავენ. „ტორონტოში“ თამაშის კიდევ ერთი დადებით მხარე ქალაქი უნდა იყოს, რომელშიც სება თავისუფალ დროს საინტერესოდ უნდა ატარებდეს.
ვინ იცის, იქნებ, კომპიუტერთან მჯდომმა ანტონიო კონტემ ერთ დღესაც „ტორონტოს“ თამაშის ყურება გადაწყვიტოს და თავისი ყოფილი ფეხბურთელის გამოსვლა ნახოს. რა თქმა უნდა, ამის საშუალება მას ადრეც ჰქონდა, თუმცა მაშინ იგი გუნდთან ერთად მუსაობდა და მთლიან დროს ჯოვინკოს ყოველთვის ვერ უთმობდა, თანაც მოედანზე იგი მუდმივად სათადარიგოთა სკამიდან ჩნდებოდა, ამიტომაც სრულყოფილად მისი გამოსვლის შეფასება არც თუ ისე ადვილი იქნებოდა.
ახალ გუნდში ჯოვინკოს გაცილებით მეტი მოვალეობა ექნება. ასე რომ, ვარსკვლავობა მას გარანტირებული სულაც არ აქვს. გამორიცხული არაა, „ატომურმა ჭიანჭველამ“ ფსიქოლოგიურ წნეხს ვერ გაუძლოს და ლიდერის როლი ვერ შეასრულოს. ასეა თუ ისე, ყველაფერს მალე გავიგებთ, თანაც, სებას „იუვენტუსიდან“ ლამაზად და დასამახსოვრებლად წასვლის შანსი ჯერ არ დაუკარგავს – „ტორონტოს“ იგი მხოლოდ მიმდინარე ევროპული სეზონის დამთავრების შემდეგ შეუერთდება.
