ჭდე: რაგბი

 

იაპონია ‘წყნარი ოკეანის თასზე’ ზედიზედ ორჯერ რომ დამარცხდა, იმდენად იზარალა, რომ საქართველოზე ქვემოთ დაეშვა.

‘მსოფლიო რაგბის’ რეიტინგი ყოველ ორშაბათს, გრინვიჩის დროით შუადღეზე ახლდება.

დღესდღეისობით ‘მსოფლიო რაგბში’ 119 ქვეყანაა გაერთიანებული. სარეიტინგო მაჩვენებელი რთული, მაგრამ ლოგიკური ფორმულით ითვლება. ერთობ ფასობს გუნდის სტაბილურობა, რის გამოც დიდი აღმასვლა-ვარდნა იშვიათობაა, ადგილი კი შეიძლება შეგეცვალოს შენი თამაშის შედეგისა გამო ან უქმობის დროს.

ამჯერად მეორე სცენარი გათამაშდა. ბორჯღალოსნები მსოფლიო თასისთვის თავგამოდებით რომ ემზადებიან, ამ დროს ‘მეორე დონის’ 6 ქვეყანა ‘მსოფლიო რაგბის’ შეჯიბრში მონაწილეობს. უკვე მოეწყო სამი ჯვარედინი რაუნდი, ამაღამ კი ფინალებია ვანქუვერში (კანადა)

იაპონიამ სან-ხოსეში (აშშ) 20:6 ძლია კანადა, მაგრამ შემდეგ საკრამენტოში 18:23 წააგო შტატებთან და ტორონტოში (კანადა) ფიჯთანაც 22:27. ამით “ალუბლებმა” 139 და 73 მეასედი ქულით იზარალეს, რამაც ჯამში 212 შეადგინა. რაკი ამასობაში საქართველოს მაჩვენებელი არ შეცვლილა, იაპონიას მონაგარი ჩვენზე ნაკლები გაუხდა.

ასე და ამგვარად, დავბრუნდით მე-13 ადგილზე, რომელიც ერთი ხანობა გვეკავა 2007 წლის მსოფლიო თასის დასრულების.  იაპონია ამაღამ ტონგას ეთამაშება მესამე ადგილისთვის და თუ წააგებს, იტალიაზე დაბლაც დაეშვება, ჩემპიონობაზე კი ითამაშებენ ფიჯი და სამოა, რომელთა პულური რკენაც საკრამენტოშივე, 25 ივლისს, ფრედ, 30:30 დასრულდა.

“მსოფლიო რაგბის” რეიტინგი (3/08)

1.   ზელანდია 9433, 2 აფრიკა 8637, 3 ირლანდია 8576,
4.   ინგლისი 8540, 5 ავსტრალია 8523, 6 უელსი 8407,
7.   საფრანგეთი 7974, 8 არგენტინა 7717, 9 სამოა 7615,
10. ფიჯი 7602, 11 შოტლანდია 7479, 12 ტონგა 7451

13 (14) საქართველო 7216, 14(13) იაპონია 7189, 15 იტალია 7185,
16  შტატები 6804, 17 რუმინეთი 6673, 18 კანადა 6561,
19  ურუგვაი 6211, 20 ესპანეთი 6154, 21 ნამიბია 6128,
22  რუსეთი 6110, 23 ჩილე 5734, 24 ჰონკონგი 5731

+/-:  ფიჯ 73 იაპ, ტონ 44 აშშ, სამ 31 კან

(რეიტინგის პრინციპით, რამდენიც ემატება მოგებულს, იმდენი აკლდება წაგებულს. სწორედ ეს რიცხვი წერია გუნდებს შორის)

Rugby.GE

ჩვენი ნაკრები მსოლიო თასისთვის მზადების მეორე ფაზას, 9 დღიან თბილისურ შეკრებას შეუდგა. ბორჯღალოსნები 5 აგვისტომდე შევარდენზე მოემზადებიან, ხოლო შემდეგ პოლონეთში გაემგზავრებიან, სადაც 10 დღის განმავლობაში კრეოთერაპიის დახმარებით გააგრძელებენ ფიზ-მომზადებას ვიდრე მეორედ ერთი კვირით დაისვენებენ და 24 აგვისტოს ინგლისში გაემგზავრებიან.

დღეს ბორჯღალოსნებმა შევარდენის სანაკრებო ბაზაზე ღია ვარჯიში გამართეს.

თამუნა ყულუმბეგაშვილის ფოტო-რეპორტაჟი >>>

Rugby.GE

2015 წლის მსოფლიო თასამდე 50 დღით ადრე, ბორჯღალოსნები ღია ვარჯიშს შევარდენის სანაკრებო ბაზაზე გამართავენ,  რომელიც ხვალ, 30 ივლისს, 17:15 საათზე დაიწყება.

ღია ვარჯიშზე ქომაგებისა და მედია საშუალებების წარმოადგენლებისთვის დასწრება თავისუფალია.

 

ჟურნალისტების საყურადღებოდ:

ვარჯიშის დროს ფოტო-ვიდეო გადაღების დრო არ შეიზღუდება, თუმცა სინქრონების ჩაწერა 17 საათიდან,  ვარჯიშის დაწყებამდე იქნება შესაძლებელი;

 

შეგახსენებთ, რომ საქართველოს ეროვნული ნაკრები შევარდენზე ივნისის ბოლოს შეიკრიბა. მზადების ფარგლებში მათ 3 კვირიანი ფიზ-მომზადებაზე ორიენტირებული შეკრება გაიარეს, რომლის შემდეგ ერთი კვირა დაისვენეს. მსოფლიოსთვის მზადების მეორე ფაზისათვის ნაკრები 27 ივლისს კვლავ შეიკრიბა. 5 აგვისტოს ბორჯღალოსნები პოლონეთში გაემგზავრებიან, სადაც 2015 წლის მსოფლიო თასისათვის მზადებას კრიოთერაპიის დახმარებით განაგრძობენ.

Rugby.GE

25-26 ივლისს ბათუმის ქვიშის რაგბის მოედანი ქვიშის რაგბის 2-დღიან ტრადიციულ ფესტივალს უმასპინძლებს, სადაც მონაწილეობას 10 სამოყვარულო გუნდი მიიღებს, მათ შორის იქნება ბრიტანელ მორაგბეთა გუნდი – “ბრიტანელი ბულდოგები”.

ბათუმის ტურნირი საქართველოს ქვიშის რაგბის კავშირის, საქართველოს რაგბის კავშირის და სპორტისა და ახალგაზრდობის საქმეთა სამინისტროს ორგანიზებით იმართება. ფესტივალთან დაკავშირებით, 22 ივლისს სპორტისა და ახალგაზრდობის საქმეთა სამინისტროში ქვიშის რაგბის კავშირის პრეზიდენტმა – ზურაბ დუგლაძემ, სპორტის და ახალგაზრდობის საქმეთა მინისტრის მოადგილე – შალვა გოგოლაძემ, ასევე  “ბრიტანელი ბულდოგების” წარმომადგენლებმა – ენტონი ლინმა და სტუარდ გრინმა პრესკონფერენცია გამართეს.
პრესკონფერენციის ფოტოები >>>

ქვიშის რაგბის ფესტივალი 25 ივნისს 15:00 საათზე დაიწყება, 16:00 საათზე დაგეგმილია ტურნირის გახსნის ცერემონიალი, 26 ივლისს კი ფინალები გაიმართება.

ბათუმი 2015-ის გუნდები

1) ბრიტანელი ბულდოგები
2) ქართველი ბულდოგები
3) მეკობრეები
4) პროკრედიტბანკი
5) ბანკი რესპუბლიკა
6) სპორტის სამინისტრო
7) ვითიბი
8) ლოკომოტივი
9) დევები
10) დევები ვიზარდსი

Rugby.GE

‘რედ ბულ ლელოს’ ახალი სამოყვარულო სარაგბო ტურნირია, რომელიც ‘რედ ბულის’ ორგანიზებით წელს პირველად გაიმართა საქართველოში. ტურნირში 32 გუნდი მონაწილეობდა. თითოეული გუნდი 5 ძირითადი და 2 სათადარიგო მორაგბისგან შედგებოდა.

რედ ბულ ლელოს პირველ გათამაშებაში, რომელიც 12 ივლისს ვისოლის სარაგბო სტადიონზე გაიმართა, ‘აკადემიამ’ გაიმარჯვა. გუნდმა ფინალში ‘ჩილდრენი’ დაამარცხა, რომელიც ლელო სარასენსის ‘ა’ ლიგის მოთამაშეებით იყო დაკომპლექტებული.

ტურნირს ხალისს ისიც მატებდა, რომ გუნდებს ნებისმიერი სახელწოდების დარქმევა შეეძლოთ და სატურნირო ცხრილში ისეთ სახელებს წააწყდებოდით, როგორებიცაა: ‘ჯანმრთელი ბიჭები’, ‘ვიზარდები’, ‘გუდრონა’ და ა.შ. განსაკუთრებული კრეატივით საქმეს ‘გშსშშ’ მიუდგა, რომელიც იშიფრება, როგორც ‘გოშა შკინინის სახელობის შესანიშნავი შვიდეული’. ეს გუნდი რაგბის კლუბ ‘ხულიგანას’ სხვა და სხვა თაობის მორაგბეებისგან შედგებოდა.

2016 წელს რედ ბულ ლელო უკვე რეგიონალურ მასშტაბს შეიძენს და საქართველოს რამდენიმე დიდ ქალაქში მოხდება საუკეთესო გუნდების შერჩევა. პროექტის მიზანია გახდეს პრესტიჟული ყოველწლიური სამოყვარულო ტურნირი რაგბში.

Rugby.GE

საქართველოს ნაკრები მთელი ძალებით ემზადება მსოფლიო თაისისთვის და შევარდენზე შეკრებას აგრძელებს. მილტონ ჰეიგის თაოსნობით და ქელვინ მორისის ფიზ.მომზადების პროგრამით, ბორჯღალოსნებმა ინსტენსიური, ფიტნესზე ორიენტირებული შეკრების პირველი ორი კვირა ჩაამთავრეს. მზადების პროცესის პირველ შესვენებამდე ბიჭებს კიდევ ერთი კვირის გავლა მოუწევთ, რომელიც სამწვრთნელო შტაბის თქმით უფრო დატვირთული იქნება.

შეკრების მეორე კვირის ფოტოები >>>

მილტონ ჰეიგი პირველ ორ კვირას აფასებს

“ძალიან რთული და დატვირთული პირველი კვირა გვქონდა, რომელის დროსაც მოთამაშეებიც და მწვრთნელებიც გვარიანად დავიღალეთ. მაგრამ ასეთი შეკრების პირველი კვირისთვის ეს გასაკვირი არაა. რიგ შემთხვევებში დღეში ოთხი ვარჯიშიც კი გვქონდა, რომლებსაც ადრე ვიწყებდით და გვიან ვამთავრებდით. ბიჭებმა პროცესზე ადაპტირება ბრწყინვალედ შეძლეს და უკვე მეორე კვირას საგრძნობლად გააუმჯობესეს მაჩვენებლები. ახლა ყველა ვარჯიშს პირველ კვირასთან შედარებით ბევრად უკეთესად ასრულებენ.

“რა თქმა უნდა, პროგრესით კმაყოფილნი ვართ და მიმაჩნია, რომ ვუახლოვდებით დასახულ მიზანს. ციფრებსა და სტატისტიკურ მონაცემებსაც, რომ ვუყურებთ, გაუმჯობესება სახეზეა. დილაობით უფრო მხნედ არიან, ბევრად გვიან იღლებიან და შესაბამისად მეტსაც ძლებენ.

უფრო ინსტენსიური მესამე კვირა

“მესამე კვირა ბევრად უფრო რთული იქნება. ზოგიერთ მოთამაშეს შედარებით უჭირს ზოგ დავალებასთან გამკლავება, მაგრამ ეს სავსებით მისაღებია, რადგან ზოგს ტრავმის დიდხნიანი რეაბილიტაციის პროცესი, ზოგსაც ბოლო პერიოდის განმავლობაში ინტენსიური ვარჯიშები არ ჰქონია, მაგრამ ხაზგასმით მინდა ავღნიშნო, რომ ყველა ბოლომდე იხარჯება და ვარჯიშზე ძალ-ღონეს არ ზოგავს.

“ვარჯიშში ახალი ელემენტებიც გვაქვს, მაგალითად ჭიდაობის ელემენტები, რომელსაც ყველა ენთუზიაზმით ეკიდება. საჭიდაო დარბაზში ბოჭვის ტექნიკასა და კონტაქზე მუშაობისას აღარ ფიქრობ დავარდნაზე და ზიანის მიღებაზე.

“მაღალი დონის ფოზ.მომზადება, რა თქმა უნდა, მოთამაშეების სარაგბო ოსტატობაზეც დადებითად მოქმედებს. როდესაც ძალა გამოცლილნი არ არიან უფრო სხარტადაც აზროვნებენ და ბურთის ტექნიკას უკეთ აქცევენ ყურადღებას. ტექნიკის გასაუმჯობესებლად სხვა და სხვა თამაშებს და სავარჯიშოებს ვასრულებთ.”

პირველი ფაზის დასრულებისას

“პირველი ფაზის დამაგვირგვინებელი კვირის ბოლოსკენ იგივე შედეგს ველით, რომ მოთამაშეები გვარიანად დაიღალნონ. რა თქმა უნდა, დატვირთვას შედარებით მოვუმატებთ. შეკრების დასაწყისში გარკვეული მიზანი დავისახეთ და დარწმუნებული ვარ, რომ კვირის ბოლოსკენ ამ მიზანს მივუახლოვდებით.”

 

მსოფლიო თასის წინა შეკრების პირველი, სამ კვირიანი ფაზის დასრულების შემდეგ, ბორჯღალოსნები ერთ კვირას დაისვენებენ. მომზადების მეორე ფაზა შევარდენის სანაკრებო ბაზაზე 9 დღიანი შეკრებით განახლდება, რომლის შემდეგ ნაკრები პოლონეთში გაემზავრება, სადაც 10 დღის განმავლობაში კრეოთერაფიის დახმარებით განაგრძობენ მომზადებას. სპეციალური კრიო კაბინები ფორმაში ჩადგომის მაქსიმალურად სწრაფ ეფექტს იძლევა. ეს ეტაპი ასევე ფიზ. მომზადებას დაეთმობა. რაც შეეხება სარაგბო კუთხით ვარჯიშს, ის მხოლოდ ინგლისში შეკრებაზე გამგზავრების შემდეგ დაიწყება, როდესაც ნაკრები საბოლოო მოსამზადებელ ეტაპზე გადავა.

პოლონეთის შემდეგ ბორჯღალოსნების ერთ კვირას შინ დაისვენებენ და 24 აგვისტოს, მსოფლიოსთვის მოსამზადებელი ეტაპის ბოლო ფაზის გასავლელად ინგლისში გაემგზავრებიან.

Rugby.GE

მსოფლიო რაგბის აღმასრულებელმა კომიტეტმა შემოიღო სტანდარტიზირებული მიდგომა ელიტურ სარაგბო ტურნირებზე საბაზო მოთხოვნების განხორციელების მიმართ, რაც მოთამაშეთა კეთილდღეობაზე ზრუნვის თვალსაზრისით მნიშვნელოვანი წინ გადადგმული ნაბიჯია.

მოთამაშეთა კეთილდღეობის უპრეცედენტო 10-პუნქტიანი სტანდარტები, რომლებიც მსოფლიო რაგბმა 2014 წლის ნოემბერში გამოაქვეყნა, პირველად 2015 წლის მსოფლიო თასზე შევა პრაქტიკაში. მსოფლიო რაგბის სამედიცინო კომისიის მიერ შემუშავებული ეს სისტემა ახლა მსოფლიო რაგბის ეგიდით გამართულ ყველა საერთაშორისო ტურნირზე დაინერგება.

აღმასრულებელმა კომიტეტმა სხვა საერთაშორისო ტურნირებსაც მოუწოდა ამ სტანდარტების პრაქტიკაში გამოყენებისკენ; მსოფლიო რაგბი უკვე აწარმოებს შესაბამის მოლაპარაკებებს ძირითადი სარაგბო ღონისძიებების ორგანიზატორებთან.

სტანდარდების სისტემა მოიცავს ტვინის შერყევის პრევენციისა და მენეჯმენტის 6 ძირითად ფუნქციას, რომელიც თავის მხრივ ტვინის შერყევის სავალდებულო შემოწმებას, დაზიანების ამოსაცნობი ტექნიკის გამოყენებას, სწავლებასა და ინცინდენტის განხილვის სისტემას გულისხმობს.

2015 წლის რაგბის მსოფლიო თასზე მორაგბეთა კეთილდღეობის 10-პუნქტიანი სტანდარტების შემდეგი სისტემა იმოქმედებს:

1.      ტურნირამდე, თითეული გუნდის ექიმმა ან კავშირის სამედიცინო სამსახურის უფროსმა უნდა დაადასტუროს, რომ თითოეული მოთამაშე, ნებისმიერი სამედიცინო თვალსაზრისით, გონებრივად თუ ფიზიკურად, მზად არის ტურნირში მონაწილეობის მისაღებად.

2.      თითოეულმა მოთამაშემ უნდა შეავსოს კარდიოლოგიური სქრინინგის კითხვარი და გაიაროს შესაბამისი შემოწმება, სავალდებულო ელექტროკარდიოლოგიური ტესტის ჩათვლით.  ამ ყველაფრის განხორციელება მოთამაშის ტურნირზე გამგზავრებამდე უნდა მოხდეს.

3.      ყველა გუნდის და მატჩის სამედიცნო პერსონალმა უნდა გაიაროს მსოფლიო რაგბის სასწავლო კურსები ტვინის შეყევასთან, დოპინგ-კონტროლთან და კორუფციის წინააღმდეგ ბრძოლასთან დაკავშირებულ საკითხებზე.

4.      ყველა გუნდის და მატჩის სამედიცნო პერსონალს ტურნირამდე გავლილი უნდა ჰქონდეს მსოფლიო რაგბის მე-2 დონის გადაუდებელი სამედიცინო დახმარების კურსი (მინიმალური მოთხოვნა: მე-2 დონის სერტიფიკატი) ან მისი ექვივალენტი.

5.      ტურნირამდე ერთი წლის განმავლობაში, ყველა მოთამაშემ და გუნდის მენეჯმენტმა უნდა გაიაროს ტვინის შერყევასთან დაკავშირებული საგანმამათლებლო სესია. ეს ტრენინგი მინიმუმ ძირითად ინფორმაციას უნდა მოიცავდეს, რომელიც თავის ტრავმების შეფასების ოქმშია მოცემული.

6.      თითოეულმა მოთამაშემ უნდა გაიაროს ტვინის შერყევის ბაზისური შეფასებასპორტში ტვინის შერყევის შეფასების პროცედურის (SCAT 3) მიხედვით. ასევე რეკომენდირებულია ყველა გუნდის მიერ ნევროკოგნიტური კომპიუტერული შეფასების გავლა.

7.      გუნდებმა უნდა დაადასტურონ, რომ მათ თითოეულ მოთამაშეს გავლილი აქვს ტვინის შერყევის რისკის შეფასების ეტაპობრივი სწავლება, რომელიც ხელს უწყობს ტვინის შერყევის შემთხვევაში სწორი თვითკონტროლის ჩამოყალიბებას.

8.      გუნდებმა უნდა დაადასტურონ, რომ მათი სამედიცინო პერსონალი, მწვრთნელები და მენეჯმენტი შეასრულებს მსოფლიო რაგბის მიერ დადგენილ პროტოკოლს ტვინის შერყევის შემთხვევაში მოთამაშის მოედნიდან დროებით ან საბოლოოდ გაყვანასთან დაკავშირებით.

9.      გუნდებმა უნდა იცოდნენ, რომ პოტენციური პრობლემების თავიდან ასაცილებლად, ტურნირს აქვს არამართებული სამედიცინო მომსახურეობის შემთხვევების გადახედვის სისტემაც, რომელიც კონკრეტულად ამახვილებს ყურადღებას იმ ინციდენტებზე, რომლებიც  თავის დაზიანების ოქმს არ მიყვება. გუნდის პერსონალს უნდა ესმოდეს, რომ მათ შეიძლება მოუწიოთ არამართებულ სამედიცინო მომსახურეობასთან დაკავშირებულ განხილვებში მონაწილეობა, რასაც, საჭიროების შემთხვევაში, შეიძლება მოყვეს საჯარიმო სანქცია.

10.  გუნდმა უნდა იცოდეს, რომ მატჩის ექიმს უფლება აქვს მიიღოს ერთპიროვნული გადაწყვეტილება ტრავმიანი მოთამაშის მოედნიდან გამოყვანის შესახებ.

 

მსოფლიო რაგბის მთავარი სამედიცინო ოფიცერი ექიმი მარტინ რაფთერი აცხადებს:

„მოთამაშეთა კეთილდღეობა მსოფლიო რაგბის ნომერი პირველი პრიორიტეტია და ეს საერთო სტანდარტები, რომლებიც 2015 წლის რაგბის მსოფლიო თასისთვის დაწესდა, მნიშვნელოვნად წინგადადგმულ ნაბიჯს წარმოადგენს ჩვენი ელიტური მოთამაშეების დასაცავად და მხადასაჭერად.

„ჩვენი მოვალეობაა შევამციროთ რისკები და პრიორიტეტად პრევენცია მივიჩნიოთ, მითუმეტეს,  როცა 2002 წლიდან მოყოლებული, ელიტურ დონეზე დაზიანებების რიცხვი არ იზრდება და ზოგადად სტაბილურია. ჩვენი ძალისხმევა ამ სტანდარტებში კარგადაა გამოხატული, განსაკუთრებული ყურადღება ექცევა ტვინის შერყევის პრევენციას.

„მსოფლიო რაგბის აღმასრულებელმა კომიტეტმა მკაცრი რეკომენდაცია გაუწია ამ სტანდარტების დანერგვას ელიტურ შეჯიბრებებში (სადაც შესაძლებელია). ეს ყველაფერი კი იმის გარანტია, რომ, მაღალი კლასის სტანდარტების მდგრადობას ერთობლივად ვუზრუნველყოფთ.“

 

საერთაშორისო მორაგბეთა ასოციაციის აღმასრულებელი დირექტორი რობ ნიკოლი ასევე მხარს უჭერს ამ გადაწყვეტილებას:

“ეს ნაბიჯი ნამდვილად პოზიტიური წინსვლაა მორაგბეთა კეთილდღეობის თვალსაზრისით.ეს დებულებები ნათლად წარმოაჩენს, თუ როგორი დონის მომსახურეობას ვითხოვთ მოთამაშეთა კეთილდღეობის რამდენიმე კრიტიკულ საკითხთან მიმართებაში, უზრუნველყოფს ყველაზე მნიშვნელოვან საგანმანათლებლო ელემენტების არსებობას და შეიცავს არასათანადო სამედიცინო მომსახურების შემთხვევების გადახედვის მექანიზმს, რომელიც შექმნის მიმდინარე სწავლებისა და განვითარების საფუძველს.

„ჩვენ ვაგრძელებთ მუშაობას თამაშის ადმინისტრაციასთან, ზემოთქმულის განვითარების კუთხით და ასევე სხვა დამატებითი სტანდარტების შემუშავების მხრივ, რომელიც მოთამაშეთა კეთილდღეობისთვისაა საჭირო“.

Rugby.GE

მსოფლიო თასისთვის მოსამზადებელი ფიზმომზადების მისიის შესრულება დაიწყო

თარგმანი

წყარო: http://tier2rugby.blogspot.com/

სტატიის ბმული: http://tier2rugby.blogspot.com/2015/07/georgia-embark-on-urgent-fitness.html

 

მიუხედავად იმისა, რომ ბორჯღალოსანთა რიგებში ბევრი პოზიტიური სიახლეა  და უამრავი მათგანი ფრანგულ გუნდებში თამაშობს, არსებობს უარყოფითი მხარეც, რაც რამდენიმე კლუბის დაბალი დონის ფიზიკურ მომზადებაში გამოიხატება.

 

4 წლის განმავლობაში, ხანგრძლივი პერიოდით მხოლოდ ერთხელ შეკრებილი გუნდის წინსვლისათვის, მთავარ აქცენტად მილტონ ჰეიგი ფიზ. მომზადების გაუმჯობესებას მიიჩნევს.

 

არსებობს უამრავი დადებითი მხარე იმისა, რომ ქართველ მორაგბეთა უმრავლესობა საფრანგეთში აგრძელებს კარიერას. ამით პირველ რიგში მოთამაშეები აღიარებას, ფინანსურ მხარდაჭერასა და ელიტური დონის სარაგბო გამოცდილებას იღებენ.

 

თუმცა ამ ყველაფერს მეორე მხარეც აქვს. მორაგბეთა დასვენება მომზადების ერთ-ერთი მხარეა, რომელსაც საქართველოს ნაკრები აქტიურად იყენებს. ბორჯღალოსანთა მთავარმა მოთამაშეებმა ივნისში გამართული ნაკლებად მნიშნელოვანი ტურნირის დროსაც დაისვენეს და რაგბი ევროპის ჩემპიონატის დროსაც, გარანტირებული მოგების იმედით, ასევე არ ათამაშეს გამოცდილი მორაგბეები, რათა მათი ძალები უფრო მნიშნელოვანი მატჩებისთვის და ტურნირისთვის შემოენახათ.

 

არსებობს საკითხები, რომლებიც ბოლო პერიოდში საკმაოდ წინ წავიდა. კონკრეტულად კი ის ფაქტი, რომ ფრანგული ფიზ. მომზადება საკმაოდ ფართო ფენებში ისე განიხილება, როგორც არასაკმარისად მაღალი დონის სარაგბო მზადება.

 

ეჭვგარეშეა, რომ დადებითი მხარეები ამ მინუსებს თავისკენ გადაწონიან, მაგრამ ის პრობლემა, რომელსაც მილტონ ჰეიგი რაზმის შეკრების ყოველ ჯერზე ეჯახება, კვლავ გადაუწყვეტავია.

 

ზოგადი კონსესუსი კი იმაში მდგომარეობს, რომ საფრანგეთში ფიზიკური მომზადება მხოლოდ კონტაქტურ ვარჯიშზეა ორიენტირებული და ფინტესი ძალიან დაბალ საფეხურზე დგას. სწორედ ეს უკანასკნელი საკითხი ხშირად ყოფილა მწვავე დისკუსიის საგანი და ფრანგული მომზადება სამოყვარულო დონეზეც კი შეუფასებიათ.

 

ჯიმ ჰამილტონი საფრანგეთის კლუბების ფიზ. მომზადებას როგორც „დიდი ხნის წინანდელ ამბავს“, ისე აფასებს და ამ აზრს ბევრი სხვა მორაგბეც იზიარებს. 

 

ეს ყველაფერი, რა თქმა უნდა, განზოგადებულია და  სხვადასხვა გუნდში განსხვავებული მიდგომაა ამ საკითხის მიმართ – მათ შორის ტულონი და კლერმონი ფიზ. მომზადების თვალსაზრისით ორ საკმაოდ ძლიერ გუნდად განიხილება. ეს ფაქტი წლების განმავლობაში იმ მოთამაშეებისგან მიღებული ცნობებით მყარდებოდა, რომლებსაც საფრანგეთში უთამაშიათ.

 

გევინ მორტიმერმა –  ფრანგულ რაგბზე მომუშავე ჟურნალისტმა რამდენჯერმე აღნიშნა, რომ ფრანგული დამოკიდებულება ფიტნეს მზადების მიმართ მისაბაძი მართლაც არ არის >>>> წყარო

 

მცირე ჩამონათვალს არ წარმოადგენს იმ ადამიანების რიცხვი, რომლებიც ჯიმ ჰამილტონის აზრს იზიარებენ: წყარო

 

დანიელ ლეო საუბრობს ამავე პრობლემაზე : წყარო

 

რამდენიმე წლის წინ ბენ კოენმაც შეაფასა ბრივის მეთოდი, როგორც „უპასუხისმგებლო“ და “დაძველებული“ სტრატეგია: წყარო

 

უელსის დაცვის მწვრთნელმა შონ ედვარდმაც გამოთქვა უკმაყოფილება საფრანგეთიდან დაბრუნებული მოთამაშეების ფიზ. მომზადებაზე: წყარო

 

გრენობლის მწვრთნელი ბერნარ ჯეკმენი იმაზე საუბარში, თუ რამხელა მნიშვნელობას ანიჭებს საკუთარ კლუბში ფიზიკურ მზადებას აღნიშნავს, რომ საფრანგეთში ეს საკითხი ჯერჯერობით დღის წესრიგში არ დგას: წყარო

 

ჯეიმს ჰესკელმაც ისაუბრა იმავე დეტალებზე, რაც საფრანგეთის კლუბებს აკლია: წყარო

 

ამჟამად ქართველთა 41 კაციან რაზმში არსებული მორაგბეები 18 სხვადასხვა ფრანგულ კლუბებში თამაშობენ. ეს იმაზე დიდი რაოდენობაა, ვიდრე მსოფლიო თასში მონაწილე რომელიმე  გუნდისა. ასე, რომ ეს ფაქტორი მინიმუმ გარკვეულ მოთამაშეებზე მაინც იქონიებს გავლენას.

 

ირლანდიისა და ბორჯღალოსნების ფიზიკური მზადების დონეებს შორის დიდი უფსკრულია, რაზეც თავად ჰეიგმაც ისაუბრა

 

ჩვეულებრივ ქართველები საფრანგეთის კლუბებში სათამაშოდ ყოველთვის კარგად მომზადებულები არიან, თუმცა ისინი ვერ აღწევენ საერთაშორისო რაგბის დონეს. როდესაც ნოემბერში ბორჯღალოსნები ირლანდიას ეთამაშნენ, ისინი ხვდებოდნენ ქვეყანას, რომელსაც სრულიად განსხვავებული მიდგომა აქვს მზადების მიმართ და მოთამაშეებს საერთაშორისო ასპარეზისათვის ამზადებენ. მთავარ მორაგბეებს კი საშინაო ლიგებში მუდმივად ასვენებენ (ამაშიც არის გარკვეულწილად უარყოფითი მხარეები, თუმცა ეს სხვა დისკუსიას წარმოშობს).

 

მომზადების თვალსაზრისით გუნდებს შორის უდიდესი უფსკრულია. საერთაშორისო ფანჯარამდე ირლანდიელებს რამდენიმე კვირიანი შეკრება ჰქონდათ, რომელსაც ისინი ფიზიკური მზადებისთვის იყენებდნენ.

 

 

ქართველებმა კი პირველ თამაშამდე მხოლოდ რამდენიმე დღიანი შეკრება გაიარეს. ნაკრების ძირითად მოთამაშეებს გავლილი ჰქონდათ დაბალხარისხიანი ფიზ.მომზადების პროგრამა საფრანგეთში, რასაც ემატებოდა საფრანგეთის ჩემპიონატის ყოველკვირეული თამაშების უმოწყალო ფიზიკური დატვირთვა და არავის უზრუნია იმაზე, რომ ნოემბრის ტესტებისთვის ამ სპორტსმენებს დაესვენათ და საუკეთესო ფიზიკურ ფორმაში ყოფილიყვნენ.

 

გასაკვირი არ არის, რომ მატჩის პირველი ნახევარი უფრო მეტად კონკურენტუნარიანი იყო, ვიდრე მეორე. სიტუაცია კიდევ უფრო გაამძაფრა იმ ფაქტმა, რომ ბოლო 30 წუთის განმავლობაში ქართველები 13-14 კაცით თამაშობდნენ. ეს მოხდა დაახლოებით 50-ე წუთზე, როდესაც მილტონ ჰეიგმა ყველა შეცვლა ერთბაშად შეიყვანა მოედანზე – ალბათ გრძნობდა, რომ სასტარტო თხუთმეტეულის ფიზიკური კონდიციები ვერ შეედრებოდა მეტოქისას. მწვრთნელის ჩანაფიქრი მალევე ჩაიშალა: ჯერ ერთი მოთამაშე გასინბინდა, ორიოდ წუთში კი მეორემ ისეთი ტრავმა მიიღო, რომ მოედნიდან საკაცით გაიყვანეს. გადაღლილი გუნდი, რომელსაც თითქმის 10 წუთის განმავლობაში ორი კაცი აკლდა, ვეღარაფერს გახდებოდა.

 

 

მონაცემები გვიჩვენებს, რომ ქართველთა სამწვრთნელო შტაბი მაქსიმუმს აკეთებს გუნდის ფიზიკური მდგომარეობის გასაუმჯობესებლად

 

ცოტა ხნის წინ თბილისის თასზე, გარდა იმისა, რომ შედეგი სხვა ბევრი ფაქტორიდან გამომდინარე აისახა, ჰეიგმა აღნიშნა, რომ ოპონენტების ფიზიკური დონე ბევრად აღემატებოდა ჩვენსას, განსაკუთრებით კი ირლანდიელების მზადებას გაუსვა ხაზი.

 

მოქნილი ფიზ. მომზადების სისტემა სწორედ ის არის, რასაც ქართველთა სამწვრთნელო შტაბმა უნდა მოკიდოს ხელი და მაქსიმუმი გააკეთოს ამ კუთხით.

 

 

ერთ გუნდად ყოფნის მოკლე პერიოდებში ჰეიგს და მის მენეჯმენტს დიდი შანსი არ ჰქონდათ იმისა, რომ ყველაფრისთვის ერთნაირად კარგად გაერთვათ თავი. თუმცა ამჟამინდელი წინასამსოფლიო პერიოდი სწორედ ასეთი იშვიათი შემთხვევაა, როცა გუნდი ერთ რაზმად 2 თვით იკრიბება და დროც დიდი აქვთ იქამდე, სანამ ფოკუსი თამაშის სტრატეგიისკენ გადაინაცვლებს.

 

 

ქელვინ მორისი – საქართველოს ფიზ.მომზადების (მაწრთობი) მწვრთნელი და ადამიანი შთამბეჭდავი პროფესიული წარსულით, რომელმაც ინგლისის ნაკრები სამი მსოფლიო თასისთვის მოამზადა

 

ბორჯღალოსნების წინა სატურნირო სამზადისიდან ჩანს, რომ ფიტნესი ამ მზადების მთავარი პრიორიტეტია და სწორედ ამისთვის მათ ფიზ. მომზადების მწვრთნელი ქელვინ მორისიაიყვანეს, რომლის პროფესიული წარსულიც საკმაოდ შთამბეჭდავია >> წყარო

 

2002-2012 წლებში ის ინგლისის ფიზ.მომზადებას ემსახურებოდა და ამ პერიოდში 2003 წლის მსოფლიო თასის მოგება სწორედ ინგლისმა მოახერხა. ასევე დიდია მისი როლი ცნობილი ინგლისელი ათლეტების წარმატებებშიც – მათ შორის არის ისეთი სპორტის სახეობები, როგორებიცაა კალათბურთი, ველოსპორტი და ინგლისის სპორტის ინსტიტუტი.

 

ბორჯღალოსნების მსუბუქი მზადების პერიოდისა და გრძელვადიანი სესიის დასრულების შემდეგ, ქართველთა რაზმი 3 კვირით პოლონეთში მიემგზავრება, სადაც კრიოთერაპიას გაივლიან და ძალებს უფრო ძლიერი დატვირთვისთვის აღიდგენენ. მეთოდს, რომელიც საკმაოდ ცნობილი და აღიარებულია, ბოლო წლების განლავლობაში უელსის ნაკრები ხშირად იყენებს>>> წყარო

 

მეთოდი გამოიყენება საკონტროლო მატჩებამდე და უშუალოდ თამაშის სტრატეგიაზე ორიენტირებამდე. ასეთი ტიპის მზადება ასევე კარგად გამოყენებადია პირველი დონის სარაგბო ნაკრებებში, თუმცა კრიოთერაპიას თითქმის არავინ იყენებს ისეთი დონის გუნდებში, როგორიც საქართველოა.

 

 

ფიტნესი ამჯერად ქართველების ერთ-ერთი პრიორიტეტია და საინტერესოა, როგორ წარმართავს მსგავსი მეთოდი მათ თამაშს და როგორ აისახება ის მათ მომზადებაზე.

Rugby.GE

შევარდენის სანაკრებო ბაზაზე გაილია ბორჯღალოსანთა მსოფლიო თასის წინა შეკრების პირველი კვირა.

 

მილთონ ჰეიგის შეგირდები თავს არ ზოგავენ – საქვეყნოდ ცნობილი ფიზ.მომზადების მწვრთნელის ქელვინ მორისის ხელმძღვანელობით ამ პაპანაქებაში ოფლს ორმაგად ღვრიან, რათა ინგლისში საკადრისად დაიცვან ქართული რაგბის ღირსება.

 

ვარჯიშის ფოტოები >>>

 

წინდაწინ დათქმული პირობით, საზოგადო მედიას გუნდთან ჯერჯერობით ვერ მიესვლება, რადგან დატვირთვა იმდენად მძიმეა, რომ მის გასაძლებად ბიჭებს ფიზიკური და მენტალური რესურსის სრულად მობილიზება ჭირდებათ.

 

მოვარჯიშენი ვაჟკაცურად იტანენ განსაცდელს, სამწვრთნელო შტაბი ჰპირდებათ, რომ მზადების ინტენსიობა კიდევ იმატებს და ამ გაგანია ზაფხულში მიღებული წრთობა შემოდგომაზე, მსოფლიო თასზე გამოადგებათ.

 

ბანაკიდან დამაიმედებელი ცნობები მოგვდის – ყველანი ყოჩაღად არიან. ვარჯიშები მრავალფეროვანია. ყურადღება ექცევა ამტანობას, ღონეს, სიჩქარეს, სისხარტესა და მოქნილობას.

 

თასზე ბორჯღალოსნები გაწაფულ მეტოქეებს რომ უნდა შეებან, ფიზიკურ ვარჯიშთა უმეტესობა ბურთით სრულდება და ამით კონტაქტში თამაშის ელემენტები იხვეწება.

 

ერთი სიტყვით, ჩვენი რჩეულნი ისე ემზადებიან, როგორც არასდროს, რათა ინგლისში მიაღწიონ შედეგს, რომელიც ქართულ რაგბს ახალ ორბიტაზე გაიყვანს.

 

რაზმში ერთი სიახლეა – 20-წლამდელთა ერთ-ერთ გამორჩეულ მოთამაშეს, ფულბეკირაკლი სვანიძეს, რომელმაც პირველი სანაკრებო კეპი თბილისის თასზე მოიხვეჭა, ძველმა ფეხის ტრავმამ შეახსენა თავი, რის გამოც მას სამ-ოთხ კვირიანი რეაბილიტაციის გავლა მოუწევს.

 

ქართული რაგბის ქომაგებისა და სპორტულ ჟურნალისტებს შეგახსენებთ, რომსამწვრთნელო შტაბის გადაწყვეტილებით შეკრების პირველი სამკვირიანი ეტაპისგანმავლობაში ღია ვარჯიშები არ გაიმართება. მზადების მომდევნო ეტაპების დროსდანიშნული ღია ვარჯიშებისა და სიახლეების შესახებ ინფორმაციას გაცნობებთსაქართველოს რაგბის კავშირის ოფიციალური ვებგვერდის და სოციალური მედიისპლათფორმების  ( > Facebook > Twitter) მეშვეობით

Rugby.GE