უქმეებზე გული გვატკინეს ოლიმპიური რაგბის ნაკრებებმა: შვიდკაცა ლიონშიც ფიალას დაჯერდა, შვიდქალამ კი კაუნასში დაასრულა რიოს ოლიმპიადაზე მოსახვედრად წამოწყებული ლაშქრობა.

შაბათს, “თბილისის თასის” პირველ დღეს, როცა საშვიდკაცოდ ცოტა ვინმეს თუ ეცალა, საფრანგეთშიცა და ლიტვაშიც უიმედოდ წავაგეთ სამ-სამი თამაში, პულთა ფსკერზე დავიძირეთ და კვირას ფიალების ასაღებადღა გავაგრძელეთ შეჯიბრი.

ჩვენებრ სუსტების კომპანიაში ვაჟებმა მოსკოვსავით ივარგეს, ორივე თამაში მოიგეს და ისევ IX ადგილი დაიკავეს, ქალებმა კი ბოლო მატჩშიღა რომ ძლიეს ლიტვა, თუმც ოლიმპიადის შერჩევიდან გამოვარდნენ, საგაისოდ “ბ” (მესამე) ევროპულ დონეზე დაქვეითებას კი გადაურჩნენ. არადა, ქართველმა მანდილოსნებმა შარშან მეოთხე ადგილი დაიკავეს ამავე ჯგუფში და თუ პოზიციას შეინარჩუნებდნენ, შუა ივლისში, ლისაბონში ელოდათ შემდეგი შესარჩევი ეტაპი –  რეგიონული რეპეშაჟი.

7-კაცა

კიბე: 1 საფრანგეთი (თასი), 2 ესპანეთი, 3 ბელგია, 4 გერმანია – 5 ინგლისი (სინი), 6 რუსეთი, 7 პორტუგალია, 8 იტალია – 9 საქართველო (ფიალა), 10 ლიტვა, 11 უელსი, 12 რუმინეთი

7-ქალა

კიბე: 1 ბელგია (თასი), 2 ფინეთი, 3 შვედეთი, 4 რუმინეთი (გავიდნენ რეგიონულ რეპეშაჟში) – 5 პოლონეთი (სინი), 6 შვეიცარია, 7 ჩეხეთი, 8 ნორვეგია – 9 უნგრეთი (ფიალა), 10 მოლდოვა, 11 საქართველო, 12 ლიტვა (დაქვეითდა “ბ” ჯგუფში = მესამე დონეზე)

ნათლობა გადაიდო

ვაჟთა შტაბმა კიდევ რამდენიმე ახალბედა გამოსცადა. იოსებ კიკვაძემ ლელო სამ მატჩში გაიტანა, ირაკლი სვანიძემ – ორში, ანზორ სიჭინავამ – ერთში. გადაიდო ოქსფორდელი მეთ ჯენის ბორჯღალოსნური ნათლობა – ტფილელი პაპის, ბეცალელ ჯანაშვილის ბადიში “მსოფლიო რაგბმა” სულ ბოლო მომენტში აღარ დაუშვა “ევრო სერიაზე”, რაღაი გაარკვია, რომ ბრიტი მორაგბე ჯერ ვერაა საქართველოს მოქალაქე, რაც ოლიმპიური ქარტიით აუცილებელია.

ლუჟნიკისგან განსხვავებით, ლიონური სთრიმის სურათი ხან ქვავდებოდა, ხან მოზაიკდებოდა და ხანაც ძიგძიგებდა. “რაგბი ევროპის” საითმა არც ჩვენების ნომრები გადაამოწმა, რის გამოც ნეთში გამოქვეყნებულ ოქმებში ლელოთა გამტანები ზოგჯერ არ დაემთხვევა ქვემოთ მოტანილებს. რაც შეეხება ლიტვას, იქ მთლად ჩააფლავეს გაშუქება – ვერც სთრიმი მოაწყვეს და არც ოქმები ატვირთეს.

საქართველოს შვიდქალა: 5 ანა პოღოსიანი^კაპ, 7 ანა კვაჭაძე, 8 ქრისტინე გვაზავა, 9 სალომე საღარაძე,10 ნინო ტაბატაძე, 11 ანა ანდღულაძე, 13 სალომე მაკასარაშვილი, 14 ნინო ელოშვილი, 15 ქეთევან მოდებაძე, 17 ბელა გოგსაძე, 19 შორენა გამსახურდია, 20 ნათია ცინცქილაძე

ლისაბონის იმედად

რაკი რიოში “გრან პრიდან” პირდაპირ ვერ გავდივართ და ახლავე ვერც მსოფლიო რეპეშაჟში ვხვდებით, ივლისში ბოლო, ექსეთერის ეტაპსაც ალბათ ისევ რაზმის დასაწურად გამოვიყენებთ, მერე კი, ლისაბონში, რეგიონულ რეპეშაჟში, უკან უნდა მოვიტოვოთ სამი გუნდი, ვინც სერიაში ამჟამად ქულებით გვისწრებს.

ლიონშიც საფრანგეთმა შემართა თასი და დიდი ალბათობით, აღარავის დაუთმობს რიოს საგზურს, ესპანეთმა კი მეორე ადგილიდან ჩამოსვა რუსეთი. აქედან გამომდინარე, თუ ფინიშზე არაფერი შეიცვალა, ლისაბონში ჩვენი კონკურენტები იქნებიან რუსეთი, გერმანია, მასპინძელი პორტუგალია, ბელგია, ლიტვა და ირლანდიაც, ვინაც დამდეგ ვიქენდზე, ზაგრებში (ხორვატია) ნაღდად მოიგებს “ბ” (მეორე) ჯგუფს.

ლისაბონიდან სამი მოწინავე გავა საგაისო, დასკვნით, მსოფლიო, 16-გუნდა რეპეშაჟში, აქედან კი ოლიმპიადაზე მხოლოდ გამარჯვებული მოხვდება.

@

Rugby.GE

‘მსოფლიო რაგბის’ თბილისის თასის 2015 წლის გათამაშებამდე 2 დღე რჩება. ტრადიციულად, მატჩამდე ერთი დღით ადრე, 12 ივნისს, ავჭალის სარაგბო სტადიონზე კაპიტნის ვარჯიშები გაიმართება.

პირველ ვარჯიშს ურუგვაი 10 საათზე გამართავს, 11 საათზე ავჭალის სარაგბო სტადიონს ირლანდია დაიკავებს, უფრო მოგვიანებით კი, 5 საათზე ლევან დათუნაშვილი უკაპიტნებს ბორჯღალოსნების ვარჯიშს.

რაც შეეხება მზარდი იტალიის განრიგს, მათი კაპიტნის ვარჯიში თამაშის დღეს, 13 ივნისს, მარტყოფის სტადიონზე 10 საათზე გაიმართება.

თბილისის თასისთვის მონაწილე გუნდებმა შეკრება 8 ივნისს, ეტაპობრივად დაიწყეს. ქართული რაზმი მოსამზადებელ პერიოდს „შევარდენის“ სარაგბო სტადიონზე შეუდგა, ურუგვაი „ვისოლის“ ბაზაზე დაბანაკდა, მზარდი ირლანდია რუსთავში, ხოლო მზარდი იტალია კი მარტყოფის სარაგბო სტადიონზე მხოლოდ და მხოლოდ დღეს შეუდგა მზადებას.

კაპიტნის ვარჯიშების განრიგი ავჭალის სარაგბო სტადიონზე:

12 ივნისი

10:00 – ურუგვაისეროვნული ნაკრები

11:00 – მზარდი ირლანდია

17:00 – საქართველოს ეროვნული ნაკრები

13 ივნისი

10:00 – მზარდი იტალია (მარტოფის სარაგბო სტადიონი)

Rugby.GE

11 ივნისს, 11:30 საათზე, თბილისის თასის პირველ მატჩამდე 2 დღით ადრე, ავჭალის სტადიონის საპრესკონფერენციო დარბაზში გუნდების მთავარი მწვრთნელები და კაპიტნები თბილისის თასის წინა სატურნირო პრესკონფერენციას გამართავენ.

თბილისის თასისთვის მონაწილე გუნდებმა შეკრება 8 ივნისს დაიწყეს. ქართული რაზმი მოსამზადებელ ეტაპს „შევარდენის“ სარაგბო ბაზაზე შეუდგა. ურუგვაი და მზარდი ირლანდიაც უკვე თბილისში არიან, მზარდ იტალიას კი 11 ივნისის დილას ველოდებით.

სამივე გუნდი საქართველოს მეორედ სტუმრობს. 2013 წელს თბილისმა ურუგვაისა და მზარდ ირლანდიას პირველად უმასპინძლა, გასული წლის ‘თბილისის თასზე’ კი მზარდი იტალია იღებდა მონაწილეობას.

სააკრედიტაციო მედია საშვები

სპორტულ ჟურნალისტებს და ფოტოგრაფებს, რომლებსაც შევსებული აქვთ სააკრედიტაციო ფორმები, მედია აკრედიტაციებს და ფოტო-მოსაცმელებს მიიღებენ პრეს-კონფერენციის დასრულებისთანავე.

Rugby.GE

საქართველოს 7-ქალა ხვალ ევროპის ჩემპიონატზე, კაუნასში (ლიტვა) მიემგზავრება, სადაც 13 და 14 ივნისს “ა” (მეორე) დივიზიონში იასპარეზებს. გოგონები ჯგუფში შვეიცარიას, ნორვეგიასა და რუმინეთს ერკინებიან.

მოსამზადებელი ეტაპის ფარგლებში, 7-ქალა დღეს, 18:00 საათზე შევარდენის სტადიონზე ღია ვარჯიშს გამართავს.

ჩვენი გოგონებისთვის ერთ-ერთ ყველაზე რთულ მეტოქედ რუმინელები ითვლებიან. მათთან თამაშის გამოცდილება ჩვენმა გუნდმა ‘ამსტერდამ სევენსზე’ დააგროვა, სადაც შვეიცარიისა და ნორვეგიის ქალთა ნაკრებებიც ასპარეზობდნენ.

ევროპის ჩემპიონატის “ა” დივიზიონის პირველი ოთხეული ევროპის 12-გუნდა რეპეშაჟში მიდის,  იქ დაწინაურებული სამეული 16-გუნდა მსოფლიო რეპეშაჟის (2016) საგზურს იღებს, რიოს ოლიმპიადაზე კი მხოლოდ და მხოლოდ ამ ბოლო შეჯიბრის გამარჯვებული მოხვდება.

საქართველოს 7-ქალა ევროპის “ა” დივიზიონში:

სამწვრთნელო შტაბი:

ჯაბა მალაღურაძე – მთავარი მწვრთნელი

ილია ლათიბაშვილი – ექიმი

ია ხურცილავა – მენეჯერი

Rugby.GE

თბილისის თასი 2015 – ის, საქართველოს ეროვნული ნაკრების მატჩების პირდაპირი ტრანსლაცია საზოგადოებრივი მაუწყებლის მეორე არხის მეშვეობით გაშუქდება. შეგახსენებთ, საქართველოს ეროვნული ნაკრების მატჩები გაიმართება ყველა სატურნირო დღეს(13,17 და 21 ივნისი) 19:00 საათზე.

ტურნირის ყველა მატჩი კი სტრიმის მეშვეობით გადაიცემა, რომლის ბმულსაც 12 ივნისს ჩვენს გვერდზე იხილავთ.

თბილისის თასი 2015 –ის  მატჩების განრიგი:

შაბათი, 13 ივნისი

17:00 – მზარდი იტალია – მზარდი ირლანდია
19:00 – საქართველო – ურუგვაი

ოთხშაბათი, 17 ივნისი

17:00 – ურუგვაი – მზარდი ირლანდია
19:00 – საქართველო – მზარდი იტალია

კვირა, 21 ივნისი

17:00 – ურუგვაი – მზარდი იტალია
19:00 – საქართველო – მზარდი ირლანდია

Rugby.GE

თბილისის თასის დაწყებამდე რამდენიმე დღე რჩება და მალე სარაგბო სამყარო ივნისის ყოველწლიურ სატურნირო ციებ-ცხელებაში ჩაერთვება. 13, 17 და 21 ივნისს ტურნირს ტრადიციულად ავჭალის სარაგბო სტადიონი უმასპინძლებს. ტურნირი ზედეზედ მესამედ იმართება. პირველ გათამაშებაში სამხრეთ აფრიკის საპრეზიდენტო 15-ეულმა იმარჯვა, შარშან არგენტინელმა იაგუარებმა იყოჩაღეს, ხოლო წელს თასის მოსაპოვებლადსაქართველოს ეროვნულ ნაკრებს ურუგვაის ეროვნული ნაკრები, მზარდი ირლანდიისა და მზარდი იტალიის ნაკრებები შეეჯიბრებიან.

ქართული რაზმი თბილისის თასისთვის მოსამზადებელ პერიოდს გუშინ, 8 ივნისსშეუდგა და „შევარდენის“ სარაგბო ბაზაზე შეკრება დაიწყო.  მიუხედავად იმისა, რომ სატურნირო შემადგენლობას რამდენიმე მოთამაშე ჯერ კიდევ არ შეერთებია, პირველი ვარჯიშებით კმაყოფილები არიან მწვრთნელები.

საქართველოს ეროვნული ნაკრების მთავარი მწვრთნელი, მილტონ ჰეიგი: „თბილისის თასისთვის მოსამზადებელი პერიოდი ნამდვილად მოკლეა. კიდევ უფრო მოკლდება ეს პერიოდი იმ მოთამაშეებისთვის, რომლებიც ჯერ არ ჩამოსულან საფრანგეთიდან. თუმცა დღევანდელი შეკრება წარმატებით დავიწყეთ. დღეს გვქონდა პირველი ვარჯიშები და კმაყოფილი ვარ. ვფიქრობ, მოწინააღმდეგეები საკმაოდ კარგად არიან მომზადებული, ამიტომ ჩვენც შესაბამისად უნდა დავხვდეთ.“

საქართველოს ეროვნული ნაკრების მწვრთნელი, ილია მაისურაძე: „გარკვეული მიზეზების გამო რამდენიმე მოთამაშე დასაწყისშივე გამოგვაკლდა – კოლელიშვილი და ჟვანია ჩამოსვლას აგვიანებენ, მათი კლუბები ფინალში არიან და ვალდებულები არიან ფინალის ბოლომდე საფრანგეთში იყვნენ. დამატებულ მოთამაშეებს ველოდებით ხვალ, რაც ძალიან საინტერესოა, რადგანაც ბევრ მოთამაშეს მიეცემა საშუალება საკუთარი თავი გამოავლინოს. თბილისის თასი წელს განსაკუთრებით მნიშვნელოვანია ჩვენთვის – ეს იქნება ბოლო თამაშები მსოფლიო თასამდე. ასე, რომ ვფიქრობ, თითოეული მოთამაშე გამოიყენებს თავის შანსს და მაქსიმუმს დადებს იმისთვის, რომ მსოფლიო თასის 36 კაციან შემადგენლობაში მოხვდეს. ჩვენი მიზანია, რომ მოვიგოთ თბილისის თასი და რაც შეიძლება გავზარდოთ მოთამაშეთა სასელექციო რაოდენობა მსოფლიო თასისთვის. მანამდე ისე ეხდებოდა, რომ ძლივს ვავსებდით ამ 36 კაცს, წელს კი დიდი კონკურენცია შევქმენით მოთამაშეებისთვის, რაც მსოფლიოსთვის სასელექციო პერიოდში პირველად ხდება.“

ფოტოები>>>

აქამდე გამოცხადებულ კაცნაკლულ 26-კაციან სატურნირო შემადგენლობას კიდევ 4 დაემატა: არჩილ ბეჟიაშვილი(ლოკომოტივი), გიორგი თეთრაშვილი(აჟენი), ნოდარ ჭეიშვილი(ლელო), საბა შუბითიძე(ჯიქები).

თუმცა შემადგენლობის 27- კაციანი რაზმი ჯერ კიდევ არ დასტურდება.  სამწვრთნელო შტაბის განცხადებით საბოლოო გაფართოებული შემადგენლობა 12 ივნისს გახდება ცნობილი.

გამოძახებულნი არიან:

ბექა წიკლაური (ლოკომოტივი), გიორგი აფციაური (აია), მურაზ გიორგაძე (არმაზი), ალექსანდრე ხუციშვილი (ბოლნისის ყოჩები), გიორგი ფრუიძე (აია), რევაზ გიგაური (მონსულონ), მერაბ შარიქაძე (ორიაკ), თამაზ მჭედლიძე (აჟენი),  გიორგი ტალახაძე (ლელო სარასენს), ლაშა მალაღურაძე (ბანიერი), ვაჟა ხუციშვილი (ხარები), გიორგი ბეგაძე (ბოლნისის ყოჩები), ჯაბა ბრეგვაძე (ბოლნისის ყოჩები), სიმონ მაისურაძე (ვალანსი), ვასილ კაკოვინი (ტულუზა), ზურაბ ჟვანია (სტად ფრანსე), ანტონ ფეიქრიშვილი (ბრივე), ირაკლი მირცხულავა (ტარბ), ნიკოლოზ ხატიაშვილი (ორიაკ), გიორგი ჩხაიძე (ლილი), კონსტანტინე მიქაუტაძე (ტულონ), ლევან დათუნაშვილი (ორიაკ), ვიქტორ კოლელიშვილი (კლერმონი), ლაშა ლომიძე (ბეზიე), დიმიტრი ბასილაია (პერპინიან), ბექა ბიწაძე (ლოკომოტივი),არჩილ ბეჟიაშვილი(ლოკომოტივი), გიორგი თეთრაშვილი(აჟენი), ნოდარ ჭეიშვილი(ლელო), საბა შუბითიძე(ჯიქები).

Rugby.GE

გუშინ რუსთავის სარაგბო სტადიონზე მზარდი საქართველოსა და უელსური‘ქროშეიზის’ 2 მატჩიანი ამხანაგური სერიის პირველი შეხვედრით ზაფხულის სარაგბო სეზონი გაიხსნა, რომელშიც სტუმრებმა გაიმარჯვეს (24:17)

ქალთა მიმართ ძალადობასთან ბრძოლას ეძღვნებოდა

წუხანდელი შეხვედრა ეძღვნებოდა ქალთა და გოგონათა მიმართ ძალადობის წინააღმდეგ ბრძოლას. მატჩის დაწყებამდე ძალადობის წინააღმდეგ ხმის ასამაღლებლად და მორაგბეებისთვის წარმატების სასურველად, მოედანზე გავიდნენ საქართველოს პირველი ლედი მაკა ჩიჩუა, საქართველოში გაეროს ქალთა ორგანიზაციის ხელმძღვანელი ელენა კვაპილოვა, დიდი ბრიტანეთის ელჩი საქართველოში ალექსანდრა ჰოლ ჰოლი და უელსის პარლამეტის სპიკერი დეიმ რომზარი ბათლერი. შეხვედრას ასევე ესწრებოდა უელსის რაგბის კავშირის პრეზიდენტი – დენის გეთინი.

ვიდრე მთავარი არბიტრი, ნილ ჰენესი მატჩს დაიწყებდა, ცოცხლად შესრულდა ორივე ქვეყნის ეროვნული ჰიმნი. უელსის ჰიმნი ქროშეიზის ვიცე-პრეზიდენტებმა და ბრიტანულმა სამხედრო ბენდმა შეასრულეს, ხოლო საქართველოს ჰიმნი, ქართული რაგბის მეგობრებმა, ანსამბლმა ‘იმერმა’ შეასრულა.

სერიის პირველი შეხვედრა

სტუმრებმა ჩვენ მორაგბეებს შედარებით აჯობეს სისწრაფეში. აღსანიშნავია ის ფაქტიც, რომ უელსელთა ნაკრების საშუალო ასაკს 27 წელი წარმოადგენდა, ჩვენი საშუალო ასაკი კი 23 იყო. მზარდ საქართველოს ეტყობოდა ნაუცბათევად რომ შეიკრიბა და შეთამაშების პრობლემა თვალსაჩინო იყო. გარდა ამისა, შეიძლება ითქვას, რომ ჩვენი ბიჭები უელსელებზე უფრო მალე დაიღალნენ. სტუმრები  კარგად იყვნენ მომზადებული ფიზიკურად. უკეთესად შლიდნენ თამაშს და მეორე ტაიმში იმძლავრეს შერკინებასა და მოლში.

და მაინც, ეს თამაში სიკეთის მომტანი უნდა იყოს იმ მოთამაშეებისთვის, რომელთაც მსგავსი დონის გუნდის წინააღმდეგ თამაშის შესაძლებლობა ხშირად არ ეძლევათ. ისინი უკეთ დაინახავდნენ საკუთარ შეცდომებს და გამოჩნდა პლიუსებიც. კარგად ითამაშა ‘ლასენის’ მეორეხაზელმა ნოდარ ჭეიშვილმა, რომელიც ჯანითაც არავის ჩამოუვარდებოდა, ბურთიც კარგად მიჰქონდა, რაქებშიც დაუღალავად იმუშავა და ბურთს ყველა დერეფანში დაეუფლა. ირაკლი სვანიძემ აჩვენა, რომ ჭკვინი მოთამაშეა, სისწრაფითაც არავის ჩამოუვარდება და ინდივიდუალური გარღვევით უელსელებს ლამაზი ლელოც გაუტანა.

ბევრი იშრომა სანდრო ქოიავამ, რომელსაც მატჩის ბოლოს თანაგუნდელებზე მეტი ენერგია შემორჩა, მაგრამ მთლიანობაში, გუნდს აკლდა შეკვრა და შეთამაშება და მარცხიც დიდწილად ამან განაპირობა.

მატჩის პერიპეტიები

თამაში სტუმრების აქტიურობით დაიწყო, უელსელები ბურთის გაშლას ცდილობდნენ და ფრთაზე უპირატესობასაც ქმნიდნენ, მაგრამ ბოლო მომენტში ქართველები თავდაუზოგავი ბოჭვებით სხარტი მეტოქეების შეკავებას ახერხებდნენ. ამით რომ არაფერი გამოვიდა, ქროშეიზმა მოლით სცადა ფონს გასვლა და საქართველოს ნაკრები კვლავ დადგა, მე-15 წუთზე კი, გერენტ ოდრისქოლმა ჯარიმით სცადა ანგარიშის გახსნა, მაგრამ უელსელებს დარტყმელები აშკარად არ უვარგოდათ. ტაიმის შუაში ბურთზე კონტროლი ქართველებმა დაამყარეს, ვაჟა ხუციშვილმა ფეხით გადაკიდა, ლევან გოგოლაშვილმა ფეხით დაბრუნებული ბურთი კარგად აიტანა, გიორგი ფრუიძემ ხაზი გაჭრა და ნელ-ნელა თამაში გათანაბრდა. მერე ჭეიშვილმა იარა მაგრად, ზურგზე ჩამოკიდებული ოთხი უელსელი დაახლოებით 15 მეტრი ატარა, სტუმრები საკუთარ 22-ში დაჯარიმდნენ და მამუკანინიძემ ანგარიში გახსნა.

ქროშეიზმა ზეიმი არ გვაცალა და თამაშის განახლებისთანავე ხელდახელ კარის პირდაპირ შეგვიტია, მიმყოლებმა ივარგეს, დაცვამ გადაწყობა ვერ მოახერხა და თომ ჯეიმზმალელო, ხოლო დევიდ ლენგდონმა გარდასახვა გაიტანეს. ლელომ უელსელები კიდევ უფრო აათამაშა და ტემპს უმატეს, რასაც გივი ბერიშვილის ტრავმა მოყვა და ის საკაცით გაიყვანეს. შესვენებამდე რამდენიმე წუთით ადრე იოსებ კიკვაძე ფრთაზე გაიქცა,ჭეიშვილმა და ქოიავამ მეტოქის 22-ში მოლით იარეს, უელსელები დაჯარიმდნენ, რასაც 5-მეტრა დერეფანი მოყვა და იქიდან ბრეგვაძემ ალამთან ლელო გაიტანა, მაგრამ მანამდე უელსელმა რეფერიმ თანამემამულეებს ჩაქცევაზე თამაში არ აპატია და საჯარიმო ლელოთი დასაჯა. ნინიძემ ზუსტად გარდასახა, თამაშის განახლების შემდეგ კი, ბრეგვაძეუბურთოსთან თამაშისთვის დაჯარიმდა, მაგრამ ლენგდონმა კარის წინ 35 მეტრიდან არაზუსტად დაარტყა და ტაიმი მზარდმა საქართველომ 10:7 მოიგო.

შესვენებისას მზარდ საქართველოში რამდენიმე შეცვლა განხორციელდა, მაგრამ რადგან შეცვლილ მორაგბეთა დიდი ნაწილი მერე მოედანს დაუბრუნდა, ოქმის წარმოებამ აზრი დაკარგა. მეორე ტაიმის დასაწყისში არეული თამაში გაჩაღდა და ირაკლი გეგენავა ორ მცველს გაექცა, მაგრამ ფეხით თამაშისას შეცდა. მერე ჭეიშვილი დაშავდა, მის ნაცვლად შესულმა გურამ შენგელიამ მოედანზე შესვლიდან დაახლოებით 10 წამში სახიფათოდ შეუტია, მაგრამ მეტოქის ზორბა გარემარბთან პირისპირ დარჩენილმა მისი გადათელვა განიზრახა და კონტაქტისას ისე დაშავდა, რომ მოედნის დატოვება საკაცით მოუწია.

მერე ინიციატივას კვლავ სტუმრები დაეუფლნენ, რომელთაც თამაშის გაშლით არაფერი გამოუვიდათ, რადგან გადამწყვეტ მომენტებში ბურთი წინ უვარდებოდათ. სამაგიეროდ, მათ 5-მეტრა დერეფნიდან მოლი ააგორეს და ლელო გაიტანეს. გარდასახვა არაზუსტი იყო და 10:12. ამის შემდეგ ქართველები კიდევ ერთხელ გაიჭრნენ წინ. სვანიძემ რაქიდან მიიღო ბურთი, თავად დაიძრა, ცრუ მოძრაობით მცველები დააბნია და ხაზი სუფთად გაჭრა, ბოლო ორ მცველს სისწრაფეში ჩაუქროლა და ძელებს შუა შეგირდა. ნინიძემგარდასახა – 17:12.

სამწუხაროდ, ეს უპირატესობა ძალიან ცოტა ხნით შენარჩუნდა. უელსელებმა ჯარიმა აუტში გადაუტანეს, იქიდან კვლავ მოლი ააგორეს და ახლა საქართველოს ნაკრები დაისაჯა ტექნიკური ლელოთი და გარდასახვაც ზუსტი იყო. მერე მიხეილ გაჩეჩილაძესინბინით დაისაჯა, ქროშეიზმა სწრაფად ცვალა ფლანგები და საბოლოოდ დევიდ ლოქიარი ლელოში ალამთან შეხტა. რადგან გარდასახვა არაზუსტი იყო, მზარდ საქართველოს ანგარიშის გათანაბრების იმედი მიეცა და თავისი ნახევრიდან ხელით უტია, მაგრამ მიზანს ვერ მიაღწია, 17:24 დამარცხდა და 6 ივნისს რევანშის აღებას ეცდება.

ლევან მაისაშვილი, მზარდი საქართველოს მთავარი მწვრთნელი: “ძალიან ბევრ კომპონენტში შეუთამაშებლობის გამო შეცდომები დავუშვით, რაც არ გვაპატია ჩვენმა მეტოქემ. ცოტა არ გაგვიმართლა კიდეც. ბევრი ტრავმები იყო, პირველივე ტაიმში მძიმე ტრავმა მიიღო გუნდის კაპიტანმა და ყველაფერმა ამ თამაშზე იქონია გავლენა. ვეცდებით შემდეგ თამაშში უკეთ წარმოვაჩინოთ ჩვენი შესაძლებლობები”.

ირაკლი სვანიძე, მზარდი საქართველოს მორაგბე: “რთული მეტოქე იყო, რომელიც სწრაფ, დინამიურ რაგბის თამაშობდა და ცოტა გაგვიჭირდა. შევეცდებით 6-ში უკეთ ვითამაშოთ”.

მეორე  შეხვედრა 6 ივნისს კვლავ რუსთავის სტადიონზე

2 მატჩიანი ამხანაგური სერიის მეორე მატჩი მზარდ საქართველოსა და ქროშეიზს შორის 6 ივნისს, შაბათს კვლავ რუსთავის სარაგბო სტადიონზე გაიმართება. მატჩი 18:00 საათზე დაიწყება და პირველი შეხვედრის მსგავსად დასწრება თავისუფალია.

უხვტრავმიანობა

როგორც ზემოთ ვახსენეთ, მატჩის მსვლელობისას სამი მოთამაშე დაგვემტვრა – გივი ბერიშვილმა კოჭი მოიტეხა. ექიმების თქმით, იგი ვარჯიშს სავარაუდოდ  ხუთ თვეში დაიწყებს. გურამ შენგელიას შედარებით მძიმე ტვინის შერყევა აღმოაჩნდა და სამ კვირას დაისვენებს, ხოლო რეზი ჯინჭველაშვილს ერთ კვირაში შეეძლება ვარჯიშის დაწყება.

სერიის მეორე შეხვედრისათვის მზარდი საქართველოს სამწვრთნელო შტაბმა სამ მორაგბეს – ოთარ ბარკალაიას (ლელო სარასენს), გიორგი ჭყოიძესა (ლელო სარასენს) დაგიორგი მჭედლიშვილს (გორის ჯიქი) უხმო. გუნდს სერიის მეორე მატჩში ჯაბა ბრეგვაძეუკაპიტნებს, ხოლო სანდრო ქოიავა ვიცე-კაპიტანი იქნება.

Rugby.GE

ზაფხულის სარაგბო სეზონის გახსნამდე 2 დღე რჩება – 3 და 6 ივნისს რუსთავის სარაგბო სტადიონზე მზარდი საქართველო ორ-მატჩა ამხანაგურ სერიაში უელსურ ‘ქროშეიზ XV’-ს (უელსის საშინაო პირველობის ნაკრები) ერკინება.

სპორტულ ჟურნალისტთა საყურადღებოდ

ხვალ, 2 ივნისს, სერიის პირველ მატჩამდე ერთი დღით ადრე მზარდი საქართველო დაქროშეიზი რუსთავის სარაგბო სტადიონზე კაპიტნის ვარჯიშებსა და ერთობლივ წინა სამატჩო პრესკონფერენციას გამართავენ.

ღონისძიებების განრიგი

კაპიტნის ვარჯიშები (რუსთავის სარაგბო სტადიონის მინდორი):

მზარდი საქართველო 10:00სთ

ქროშეიზ XV 14:30სთ

წინა სამატჩო ერთობლივი პრესკონფერენცია (რუსთავის სარაგბო სტადიონის საპრესკონფერენციო):

მზარდი საქართველო და ქროშეიზი 14:00სთ

რაზმი:

ხაზი: ირაკლი სვანიძე (გორის ჯიქი), იოსებ კიკვაძე (აია), ლევან გოგოლაშვილი (ბოლნისის ყოჩები), ირაკლი გეგენავა (ბოლნისის ყოჩები), ანზორ სიჭინავა (აკადემია), გიორგი ფრუიძე (აია), გიორგი ტალახაძე (ლელო სარასენს), ბადრი ლიპარტელიანი (არმაზი), რეზი ჯინჭველაშვილი (აია), მამუკა ნინიძე (გორის ჯიქი), ვაჟა ხუციშვილი (ხარები), სანდრო მინდიაშვილი (ლელო სარასენს)

შერკინება: ზურაბ ჯულაყიძე (ლელო სარასენს), არჩილ ბეჟიაშვილი (ლოკომოტივი), ნიკოლოზ ხატიაშვილი (ორიაკ, საფ.), ირაკლი მირცხულავა (ტარბ, საფ.), ჯაბა ბრეგვაძე (ბოლნისის ყოჩები), ბადრი ალხაზიშვილი (ლელო სარასენს), ნოდარ ჭეიშვილი (ლა’სენ, საფ.), სანდრო ქოიავა (ლელო სარასენს), ოთარ გიორგაძე (აია), დაჩი კოპაძე (ლელო სარასენს), გურამ შენგელია (გორის ჯიქი), მიხეილ გაჩეჩილაძე (კარკერან, საფ.), ვახტანგ ამირანაშვილი (არმაზი), დავით პაპავაძე (გორის ჯიქი), გივი ბერიშვილი (ლოკომოტივი).

სამწვრთნელო შტაბი:

ლევან მაისაშვილი – მთავარი მწვრთნელი, მიხეილ სუჯაშვილი – მწვრთნელი, ივანე ერგემლიძე – ფიზ.მომზადება, სერგო ბერიაშვილი – ექიმი, გიორგი მურადაშვილი – ფიზიო, დავით რამიშვილი – ვიდეო ანალიტიკოსი, პაატა მაისურაძე – მენეჯრი

Rugby.GE