ჭდე: ს.კ. ზესტაფონი

ხუთშაბათს, 5 მარტს, საქართველოს XXVI ეროვნული ჩემპიონატის მეთვრამეტე ტურის შეხვედრაში საფეხბურთო კლუბი ”ზესტაფონი” ქვეყნის მოქმედ ჩემპიონს, თბილისის “დინამოს” დაუპირისპირდება. თბილისის სტადიონ “დინამო-არენაზე” მარგველთა და დინამოელთა რიგით ოცდამეთხუთმეტე საჩემპიონატო დაპირისპირება გაიმართება.

რაც შეეხება დინამოელებთან საფეხბურთო კლუბ “ზესტაფონის” ურთიერთობათა ისტორიას – სადღეისოდ ეროვნულ ჩემპიონატში გუნდებმა ერთმანეთში 34 შეხვედრა გამართეს. ამ მატჩებში 19-ჯერ გაიმარჯვეს თბილისელებმა, 6 დასრულდა ფრედ, 9 კი მოიგეს ზესტაფონელებმა. გატანილი და გაშვებული ბურთების სხვაობაშიც თბილისელი ფეხბურთელები ფლობენ უპირატესობას – 51:33.

ხშირი გახლდათ თბილისურ-ზესტაფონური “დუელები” დავით ყიფიანის სახელობის ეროვნული თასის გათამაშებაშიც. უნდა ითქვას, რომ აქ უპირატესობა იმერლების მხარესაა: სადღეისოდ გამართულ 8 სათასო შეხვედრაში 3-ჯერ იმერლებმა იმარჯვეს, 2-ჯერ დედაქალაქელებმა, 3 მატჩიც ფრედ დასრულდა, ბურთების სხვაობა 5:4 ”ზესტაფონის” სასარგებლოდ. ერთხელ (2008 წელს) გუნდები სუპერთასისათვის მატჩში შეხვდნენ ერთმანეთს და ის შეხვედრა თბილისელთა მინიმალური გამარჯვებით (1-0) დასრულდა.

სულ, 2004 წლის შემდეგ, “დინამოსა” და “ზესტაფონს” შორის 43 შეხვედრაა ჩატარებული, აქედან 22-ში დედაქალაქელებმა იმარჯვეს, 12-ში იმერლებმა, 9 მატჩი კი დასრულდა ფრედ, ბურთების სხვაობა 56:38 ”დინამოს” სასარგებლოდ.

საინტერესოა ის, რომ ზესტაფონელთაგან დინამოელთა კარში სხვაზე ხშირად ჯაბა დვალს გაუტანია – ჯაბას “დინამოს” კარში 5 გოლი აქვს გატანილი. 2-2-ჯერ თბილისელთა კარის ბადე ერთბაშად 6 ზესტაფონელ ფეხბურთელს (შოთა ბაბუნაშვილი, თორნიკე გორგიაშვილი, ზურაბ იონანიძე, ბექა გოცირიძე, ზაალ ელიავა და ნიკოლოზ გელაშვილი) შეურხევია.

თბილისის “დინამოსთან” ხუთშაბათს გასამართი შეხვედრა, რომელსაც თბილისელი ფიფას არბიტრი ლაშა სილაგავა განსჯის, 17:00 საათზე დაიწყება. მატჩის პირდაპირი ტელერეპორტაჟი კი საზოგადოებრივი მაუწყებლის “მეორე არხის” ეთერში გადაიცემა.

ჩვენ კი “ზესტაფონსა” და თბილისის “დინამოს” შორის გამართული რამდენიმე დასამახსოვრებელი მატჩის საარქივო კადრებს გთავაზობთ…

FCZestafoni.GE

საფეხბურთო კლუბი ”ზესტაფონი” საქართველოს XXVI ეროვნული ჩემპიონატის მეორე წრის სტარტისთვის მზადებას შეუდგა. გუნდი დღეს, 27 იანვარს, თბილისში შეიკრიბა – ზამთრის არდადეგებისა და კლუბში განვითარებული უსიამოვნო ამბების შემდეგ გამართული პირველი ვარჯიში თბილისის ზღვის მახლობლად მდებარე კლუბის ბაზაზე გაიმართა.

როგორც მოგეხსენებათ, ერთ თვეზე მეტია, რაც ზემოიმერულ კლუბში (სახელმწიფოს მხრიდან კლუბების არათანაბარი დაფინანსების გამო) უმძიმესი ფინანსური მდგომარეობა შეიქმნა. ზესტაფონის მუნიციპალურ ორგანოთა ხელმძღვანელ პირებთან კლუბის მენეჯმენტის ხანგრძლივი მოლაპარაკების შედეგად, ჯერ კიდევ 2014 წლის მიწურულს იქნა მიღწეული შეთანხმება ზესტაფონში არსებული ინფრასტრუქტურული ობიექტების (სტადიონი და ბაზა) შესანახად, 2015 წლის ადგილობრივ ბიუჯეტში 300 000 ლარის გათვალისწინების შესახებ. უნდა ითქვას, რომ ეს თანხა საკრებულოს გადაწყვეტილებით ახალი წლის ბიუჯეტში უკვე ასახულია.

რაც შეეხება თავად საფეხბურთო კლუბ “ზესტაფონის” სპორტული შემადგენელის (პირველი, მეორე და ჭაბუკთა გუნდები) ფინანსირებას, რამდენიმე დღის წინ მუნიციპალური ორგანოების ხელმძღვანელებმა გააჟღერეს მზაობა გუნდის საჭიროებისათვის 200 000 ლარის გამოყოფის შესახებ. თუმცა, იმის გათვალისწინებით, რომ ჯერაც მოსაგვარებელია მუნიციპალიტეტისათვის ქონების გადაცემასთან დაკავშირებული საკითხები, გუნდიც და ინფრასტრუქტურაც ისევ ფინანსური დახმარების მოლოდინშია.

ამის მიუხედავად, მიმდინარე ჩემპიონატის მეორე წრის მოახლოებული მატჩებისათვის გუნდის მოსამზადებლად, კლუბის მენეჯმენტის მიერ იქნა მიღებული გადაწყვეტილება გუნდის შეკრებისა და საწვრთნელი პროცესის დაწყების შესახებ. იქიდან გამომდინარე, რომ სხვადასხვა აუცილებელი საორგანიზაციო ხასიათის საკითხის (სასტუმრო, გუნდის კვება და ა.შ.) ფინანსირება ჯერაც მოუგვარებელია, მზადების პირველი ეტაპი თბილისის ზღვასთან არსებულ “ზესტაფონის” ბაზაზე დაიგეგმა…

დღეიდან საფეხბურთო კლუბ ”ზესტაფონს” გიორგი მიქაძე უხელმძღვანელებს. 34 წლის სპეციალისტი გასულ ორ სეზონში “ზესტაფონის” დუბლშემადგენლობას ხელმძღვანელობდა. აღსანიშნავია, რომ “ზესტაფონის” ახალ თავკაცს ზურგს საქართველოს ცხრამეტწლამდელთა ნაკრებში წარმატებით მუშაობის გამოცდილებაც უმაგრებს.

საფეხბურთო კლუბ “ზესტაფონის” მთავარი მწვრთნელის ასისტენტთა პოზიციებზე დანიშნულნი არიან ლევან ბაჯელიძე და ბორის გონჩაროვი. ზემოიმერელთა მეკარეებს კი არჩილ ღურწკაია გაწვრთნის.

იქიდან გამომდინარე, რომ გუნდის სამწვრთნელო შტაბს საკმაოდ მძიმე, მათ შორის სასელექციო ხასიათის სამუშაო მოუწევს, ჯერაც რთული სათქმელია თუ რა სახით წარსდგება მაყურებლის წინაშე სეზონის მეორე ნაწილში იმერული კლუბი. რაც შეეხება 27 იანვარს თბილისის ზღვის მახლობლად მდებარე სპორტული კომპლექსის “მინდორზე გამართულ ვარჯიშს, მასში მონაწილეობა გიორგი ილურიძემ, ნოდარ გაჩეჩილაძემ, გია მახათაძემ, დავით კუპატაძემ, მიხეილ ვაჭარაძემ, დემურ კანდელაკმა, მირიან რობაქიძემ, ალექსი ბენაშვილმა, არჩილ მესხმა, ივანე ხაბელაშვილმა, დავით ლომაიამ, გია ჭედიამ, ავთო ეგუტიძემ, ვალტერ და პავლე ხორგუაშვილებმა და სხვა ფეხბურთელებმა მიიღეს. უახლოეს დღეებში მზადების პროცესს ოთარ ხიზანეიშვილი, მალხაზ გაგოშიძე და კიდევ რამდენიმე ფეხბურთელი შეუერთდება…

საფეხბურთო კლუბ “ზესტაფონის” პრეს-სამსახური გთავაზობთ ფოტორეპორტაჟს, რომელიც, ზამთრის არდადეგებისა და კლუბში განვითარებული ამბების შემდეგ, ზესტაფონელთა პირველი ვარჯიშის მიმდინარეობას ასახავს …

FCZestafoni.GE

დღეს დინამო თბილისის ლეგენდარული მარჯვენა გარემარბი– გაიოზ ჯეჯელავა 100 წლის გახდებოდა. იგი ჩვენი კლუბის ღირსებას 1937 წლიდან 1948 წლამდე იცავდა. 157 ჩატარებულ შეხვედრაში 73– ჯერ მოახერხა მეტოქეთა დამწუხრება. არის სსრკ– ს პირველობის ორგზის ვიცე-ჩემპიონი 1939 და 1940 წლებში და ორგზის ბრინჯაოს მედლების მფლობელი 1946 და 1947 წლებში. 1938 წელს მოხვდა 55 საუკეთესო ფეხბურთელთა შორის პირველ ნომრად. თამაშობდა ქალაქის, საქართველოს და ამიერკავკასიის ნაკრებ გუნდებში. სპორტის დამსახურებული ოსტატი 1956-57 წლებში მუშაობდა დინამოს მწვრთნელად.
გაიოზ ჯეჯელავა 2005 წლის 16 მარტს გარდაიცვალა.

FCDinamo.GE

ორდღიანი დასვენების შემდეგ, დღეს იმერლები ზესტაფონში შეიკრიბნენ და საკუთარ საწვრთნელ ბაზაზე ვარჯიშს შეუდგნენ. საქართველოს XXVI ეროვნული ჩემპიონატის მეთხუთმეტე ტურის შეხვედრას მარგველები 7 დეკემბერს გამართავენ – ქალაქ ზუგდიდის საფეხბურთო კლუბ “ბაიას” ბაზის ხელოვნურსაფარიან მოედანზე ჩვენი გუნდი ადგილობრივ “ზუგდიდს” დაუპირისპირდება.

საფეხბურთო კლუბ “ზესტაფონის” პრეს-სამსახური გთავაზობთ ფოტორეპორტაჟს, რომელიც ზესტაფონის ბაზაზე დღეს გამართული ვარჯიშის მიმდინარეობას ასახავს …

საფეხბურთო კლუბ ”ზესტაფონის” პრეს-სამსახური

17 ნოემბერს საფეხბურთო კლუბი “ზესტაფონი” დავით ყიფიანის სახელობის საქართველოს ეროვნული თასის მიმდინარე გათამაშების მერვედფინალური სტადიის პირველ მატჩს გამართავს – ზესტაფონელები საქართველოს სუპერთასის მოქმედ მფლობელ საჩხერის საფეხბურთო კლუბ “ჩიხურას” ესტუმრებიან.

საჩხერელებთან ორშაბათს გასამართი მნიშვნელოვანი მატჩისთვის მზადებას ზესტაფონელები საკუთარ საწვრთნელ ბაზაზე გადიან. თუ არ ჩავთვლით ტრავმირებული კახა მეშველიანის არყოფნით გამოწვეულ დანაკლისს, ყველა დანარჩენი ფეხბურთელი მწყობრშია და მოახლოვებული მატჩისთვის სრული პასუხისმგებლობით ემზადება.

აქამდე დავით ყიფიანის სახელობის ეროვნული თასის გათამაშებაში ამ გუნდების გზები ერთხელ, 2008-2009 წლების გათამაშებაში, გადაიკვეთა. 2008 წლის 30 აგვისტოს გამართულ პირველი მერვედფინალურ მატჩში ზესტაფონელებმა საჩხერელი სტუმრები დიდი ანგარიშით 5-0 დაამარცხეს. იმ შეხვედრაში გატანილი გოლები ბექა გოცირიძის, ერიკ რომეო ჩასემის, ნიკა კვასხვაძის და ორჯერ ნიკოლოზ გელაშვილის (3-0 და 5-0) ანგარიშზეა. საპასუხო შეხვედრა კი იმავე წლის 17 სექტემბერს საჩხერეში გაიმართა და მირიან მიქაძის მიერ გატანილი ერთადერთი გოლის წყალობით გამარჯვება “ჩიხურას” ფეხბურთელებმა მოიპოვეს – 1-0.

“ჩიხურასთან” მორიგი დაპირისპირება, რომელსაც თბილისელი არბიტრი დავით ხარიტონაშვილი განსჯის, საჩხერის მუნიციპალიტეტის სოფელ ივანწმინდის სტადიონზე გაიმართება და 14:00 საათზე დაიწყება. აქვე გეტყვით იმასაც, რომ მატჩის პირდაპირი ონლაინ-რეპორტაჟი საფეხბურთო კლუბ “ზესტაფონის” ინტერნეტ-საიტზე გადაიცემა.

ჩვენ კი “ზესტაფონის” დღევანდელი ვარჯიშის ამსახველ მცირე ფოტორეპორტაჟს გთავაზობთ …

FCZestafoni.GE

2014 წლის 12 ნოემბერს საფეხბურთო კლუბმა ”ზესტაფონმა”, რომელიც ეროვნული თასისა და ჩემპიონატის კარსმომდგარი მატჩებისათვის მზადებას განაგრძობს, სპარინგ-შეხვედრა გამართა – დავით აბაშიძის სახელობის ზესტაფონის სტადიონზე მარგველებმა ფოთის საფეხბურთო კლუბ ”კოლხეთს” უმასპინძლეს.

“ზესტაფონი”: პავლოვიჩი (კუპატაძე, 46), თედორე გრიგალაშვილი, ხიდეშელი (ვაჭარაძე, 68), ფერეირა (რობაქიძე, 46), ენდელაძე (გაგოშიძე, 46), გვალია, შარიქაძე (ჭანტურიშვილი, 46), სარდალიშვილი (მიქელთაძე, 46), ფანცულაია (ჭანკოტაძე, 46), ილურიძე (სამუშია, 62), დვალი (კაპანაძე, 46).

“კოლხეთი” (ფოთი): სეფიაშვილი (ძაგანია, 46), ფარულავა (ლემონჯავა, 62), თევზაძე, კილასონია, თ. კაკულია (ჩადუნელი, 62), გოგონაია, ბარამიძე, ამბროლაძე (სარსანია, 46), სიჭინავა, ლ. კაკულია, გუგუშვილი (სიჭინავა, 46).

მიუხედავად იმისა, რომ “კოლხეთთან” დღევანდელი მატჩი მოსამზადებელი ხასიათისა გახლდათ, მაინც უნდა ითქვას, რომ მასპინძლებმა ის არადამაჯერებლად ჩაატარეს და შემართებით მოასპარეზე მეტოქესთან დუელი დიდი ანგარიშით 0-3 დათმეს. აქვე მოგახსენებთ იმასაც, რომ გამარჯვებულთა რიგებში გატანილი გოლებით თავი ლევან კაკულიამ, ომარ გოგონაიამ და დათა სიჭინავამ გამოიჩინეს.

17 ნოემბერს “ზესტაფონი” დავით ყიფიანის სახელობის საქართველოს ეროვნული თასის მიმდინარე გათამაშებაში ჩაერთვება – მერვედფინალური სტადიის პირველ მატჩს ჩვენი გუნდი საჩხერის მუნიციპალიტეტის სოფელ ივანწმინდის სტადიონზე ადგილობრივი საფეხბურთო კლუბ “ჩიხურას” წინააღმდეგ გამართავენ. მატჩი 14:00 საათზე დაიწყება.

საფეხბურთო კლუბ ”ზესტაფონის” პრეს-სამსახური

ორდღიანი დასვენების შემდეგ, გუშინ იმერლები ზესტაფონში შეიკრიბნენ და საკუთარ საწვრთნელ ბაზაზე ვარჯიშს შეუდგნენ. საქართველოს XXVI ეროვნული ჩემპიონატის მეთერთმეტე ტურის შეხვედრას მარგველები 2 ნოემბერს გამართავენ – მცხეთის სტადიონ “მცხეთა-პარკზე” საფეხბურთო კლუბი “ზესტაფონი” თბილისის “ვიტ-ჯორჯიას” დაუპირისპირდება.

ვეტერინარებთან დაპირისპირებისათვის ზემოიმერლები ფაქტიურად სრული შემადგენლობით ემზადებიან. ერთადერთი გამონაკლისია კახა მეშველიანი, რომელიც ტრავმას ჯერაც იშუშებს. სასიამოვნო სიახლეთა რიცხვს მიეკუთვნება ის გარემოება, რომ გუნდთან ერთად ვარჯიშს შეუდგა ლაშა გვალია, რომელსაც კუნთის დაზიანების გამო ერთი თვე გაუცდა.

საფეხბურთო კლუბ “ზესტაფონის” პრეს-სამსახური გთავაზობთ მცირე ფოტორეპორტაჟს, რომელიც ზესტაფონის ბაზაზე გამართული ვარჯიშის მიმდინარეობას ასახავს…

საფეხბურთო კლუბ ”ზესტაფონის” პრეს-სამსახური

კვირას, 26 ოქტომბერს, საფეხბურთო კლუბი ”ზესტაფონი” საქართველოს XXVI ეროვნული ჩემპიონატის მორიგ მატჩს გამართავს. ეროვნული პირველობის მეათე ტურის შეხვედრაში ზემოიმერლები მარტვილის საფეხბურთო კლუბ “მერანს” დავით აბაშიძის სახელობის სტადიონზე დაუპირისპირდებიან.

ამ ორი გუნდის ოფიციალურ შეხვედრათა ისტორია 2011 წლის 10 სექტემბერს იწყება – “ზესტაფონისა” და მარტვილის “მერანის” პირველ მატჩს დავით აბაშიძის სახელობის სტადიონმა უმასპინძლა და ის შეხვედრა მასპინძლებმა 3-1 მოიგეს. მასპინძელთაგან გოლები შოთა გრიგალაშვილმა, ჯაბა დვალმა და რატი წინამძღვრიშვილმა გაიტანეს, ხოლო სტუმართაგან პრესტიჟის გოლი გიგა ამბროლაძემ გაიტანა.

შემდეგი მატჩი 2011 წლის 22 დეკემბერს მარტვილის ცენტრალურ სტადიონზე გაიმართა – გოგი ფიფიასა და შოთა ბაბუნაშვილის გოლების წყალობით გამარჯვება (2-0) მეორე საჩემპიონო ტიტულის მოსაპოვებლად მებრძოლმა იმერლებმა მოიპოვეს.

“მერანისა” და “ზესტაფონის” რიგით მესამე დაპირისპირება 2012 წლის 14 აპრილს ისევ მარტვილში გაიმართა. შეხვედრა ზესტაფონელთა უპირატესობით წარიმართა და სტუმრები ძალიან ახლოს იყვნენ გამარჯვებასთან, თუმცა მატჩის ბოლოს განვითარებული მოვლენების შედეგად (მატჩის მიწურულს მატჩის არბიტრმა სტუმართა კარში ზედიზედ 2 პენალტი დანიშნა), საბოლოოდ ის ფრედ 4-4 დასრულდა. გოლები: ჯაბა დვალი – 2 (0-1; 0-2), დავით მუჯირი (1-3), თორნიკე გორგიაშვილი (3-4); პაპუნა ფონიავა (1-2), გიგა ჟვანია – 3 (2-3, 3-3, 4-4).

აღსანიშნავია ამ მეტოქეების მეოთხე ოფიციალური მატჩიც – ის 2012 წლის 20 მაისს გაიმართა და სწორედ ამ შეხვედრაში მოპოვებული გამარჯვების შემდეგ საფეხბურთო კლუბმა “ზესტაფონმა” ზედიზედ მეორე ჩემპიონობა იზეიმა. ის შეხვედრა 3-0 დასრულდა და მასში შოთა გრიგალაშვილმა თავი “ჰეთ-თრიკით” (1-0, 2-0, 3-0) გამოიჩინა.

2012 წლის 11 აგვისტოს “ზესტაფონმა” “მერანს” “დავით აბაშიძეზე” 3-1 მოუგო. ანგარიში ზესტაფონელთა მიერ იმ პერიოდში “მერანში” განათხოვრებულმა საბა ლომიამ გახსნა, თუმცა მასპინძლებმა თორნიკე გორგიაშვილის, თორნიკე აფციაურისა და პატრიკ მილხრაუმის გოლებით უპასუხეს. მორიგი მატჩი 2012 წლის 31 ოქტომბერს შედგა. ზესტაფონელებმა ლევან შარიქაძის, თორნიკე გრიგალაშვილისა და თორნიკე გორგიაშვილის გოლებით მეტოქე დიდი ანგარიშით 3-0 დაამარცხეს.

მორიგი მატჩი გასული წლის 26 ოქტომბერს შედგა. ეს მატჩი სამტრედიაში გაიმართა და ზესტაფონელებმა ვახტანგ ჭანტურიშვილისა და საბა ლომიას გოლების წყალობით ანგარიშით 2-0 გაიმარჯვეს. ამავე ანგარიშით დასრულდა მარტვილელთა და ზემოიმერელთა შორის გამართული სადღეისოდ ბოლო შეხვედრა – მიმდინარე წლის 9 მარტს გამართული მატჩი ზესტაფონელებმა ნიკა საბანაძისა და გრიგოლ დოლიძის გოლების წყალობით მოიგეს.

ეროვნული ჩემპიონატის ეგიდით გამართულ დაპირისპირებებს თუ ვიანგარიშებთ, სულ, საფეხბურთო კლუბ “ზესტაფონსა” და მარტვილის “მერანს” ერთმანეთში 8-ჯერ იასპარეზეს – 7 შეხვედრაში გაიმარჯვეს ზესტაფონელებმა, 1 კი დასრულდა ფრედ. შესაბამისად, გატანილი და გაშვებული ბურთების სხვაობაში დიდ უპირატესობას ზემოიმერლები ფლობენ – 22:6.

მარტვილელებთან 26 ოქტომბერს გასამართი შეხვედრა, რომელსაც ქუთაისელი არბიტრი გოგა კიკაჩეიშვილი იმსაჯებს, 17:00 საათზე დაიწყება. მატჩის პირდაპირი ინტერნეტ-ტრანსლაცია საფეხბურთო კლუბ ”ზესტაფონის” ოფიციალურ ვებ-გვერდზე გადაიცემა.

FCZestafoni.GE