ჭდე: სუპერლიგა

ფინალური სერიიდან სტარტს აიღებს სუპერლიგის ტრადიციული გათამაშება მაყურებლებისთვის. მასში მონაწილეობის მიღება და სხვადასხვა პრიზის მოგება ნებისმიერ მსურველს შეეძლება, ვინც სუპერლიგის ფინალური სერიის თამაშებზე მივა და იღბალი გაუმართლებს.

ფინალური სერიის თამაშებზე გათამაშების ორგანიზატორები მაყურებლებში ბურთებს ისვრიან და მათი დამჭერები გათამაშებაში მონაწილეობის უფლებას მოიპოვებენ. ისინი ერთმანეთს საჯარიმო სროლებში შეეჯიბრებიან, გამარჯვებულები ფინალური ეტაპის საგზურს მოიპოვებენ. გადამწყვეტი შეჯიბრიც საჯარიმო სროლებში გაიმართება. საბოლოოდ, სუპერლიგის წამახალისებელ გათამაშებას 3 გამარჯვებული ეყოლება.

გამარჯვებული გულშემატკივრები სუპერლიგის სპონსორებისგან დაწესებულ სხვადასხვა პრიზებს მიიღებენ.

სუპერლიგის გულშემატკივართა შორის წამახალისებელი გათამაშების პარტნიორები არიან და გამარჯვებულებისთვის პრიზებს აწესებენ:

კალათბურთის ეროვნული ნაკრების გენერალური სპონსორი –   კომპანია ნატახტარი,

სუპერლიგის გენერალური სპონსორი აზარტული თამაშების კომპანია ევროპაბეთი,  სუპერლიგის გენერალური პარტნიორი კომპანია  ვიტაბიოტიქსი,

აკვა პარკი   ,,ჯინო ფერედაისი“.

გათამაშება ფინალური სერიის(დინამო – შსს აკადემია) პირველივე თამაშზე, 22 მაისს დაიწყება.

საკვალიფიკაციო სერია „ქუთასისა“ და „სოხუმს“ შორის მესამე, გადამწყვეტ მატჩამდე მივიდა. მეოთხედფინალიდან გავარდნილი ეს 2 გუნდი 5-8 ადგილებისთვის ბრძოლაში გადაერთო და საწყის სერიაში, რომელიც 2 მოგებამდე გრძელდება, ანგარიში 1:1-ია.

სოხუმელებმა, რომლებმაც სერიის პირველი შეხვედრა ქუთაისში 2 დღის წინ 25 ქულით წააგეს, დღეს იმერულ კლუბს რევანში აუღეს. საკალათბურთო აკადემიაში გამართულ მატჩში ვაჟა კვარაცხელიას გუნდი დომინირებდა, რომელმაც მეტ-ნაკლებად თანაბარი პირველი ტაიმის შემდეგ მძლავრი მესამე პერიოდი ჩაატარა და უპირატესობა 19 ქულამდე გაზარდა.

დარჩენილ 10-წუთეულში ქუთაისელებმა მოინდომეს, თუმცა მაქსიმუმი, რაც შეძლეს, ჩამორჩენის 6 ქულამდე შემცირება იყო. საბოლოოდ კი „სოხუმმა“ 79:66 იმარჯვეს და სერიაში ანგარიში გაათანაბრა. მასპინძლებს ირაკლი ჩლაიძემ 28 ქულით და 9 მოხსნით ულიდერა. პელე პეილეიმ 22 ქულა და 16 მოხსნა მიითვალა, ხოლო გიორგი ჯგერენაიას ანგარიშზე 14 ქულა და 11 მოხსნა დაგროვდა. ქუთაისელთაგან 12 ქულით ბომბარდირი ანატოლი ბოისა გახდა, ლევან გრძელიძემ და ვახტანგ ქადარიამ 11-11 ქულა მოაგროვეს.

სერიის გადამწყვეტი, მე-3 შეხვედრა 19 მაისს,18:00 საათზე, ქუთაისის სპორტის სასახლეში გაიმართება. ამ წყვილში გამარჯვებული მოიპოვებს მე-5 ადგილისთვის მატჩში მონაწილეობის უფლებას, სადაც უკვე გასულია „მგზავრები-არმია“, რომელმაც თავის მხრივ საკვალიფიკაციო სერია „ოლიმპს“ მოუგო.

სუპერლიგაში შესანარჩუნებელი საკვალიფიკაციო მატჩები დაიწყო „ქუთაისისა“ და „სოხუმის“ წყვილშიც. მეოთხედფინალიდან გავარდნილი ეს გუნდები ერთმანეთში საუკეთესოს 2 მოგებამდე მიმდინარე სერიაში გაარკვევენ და გამარჯვებული მე-5 ადგილისთვის სერიაში მონაწილეობის უფლებას მოიპოვებს.

მე-5 ადგილისთვის სერიაში უკვე გასულია „მგზავრები-არმია“, რომელმაც „ოლიმპს“ 2 მატჩის ჯამში სძლია. ქუთაისელებმა ნახევარი საქმე უკვე გააკეთეს და „სოხუმს“ შინ 25 ქულით – 79:54 მოუგეს. მხოლოდ პირველ მეოთხედში იყო დაძაბული თამაში, რომელიც სოხუმელებმა 13:11 მოიგეს. მეორე პერიოდიდან მასპინძლებმა თამაშზე სრული კონტროლი დააწესეს და დარჩენილ დროში უპირატესობას პერმანენტულად ზრდიდნენ.

საბოლოოდ „ქუთაისმა“ იოლ გამარჯვებას მიაღწია და სერიაში 1:0 დაწინაურდა. მასპინძელთაგან 21 ქულით და 8 პასით ზაურ ფაშაევი გამოირჩა. 15 ქულა დააგროვა ლევან გრძელიძემ, ხოლო ბუბა კვიმსაძემ შეხვედრა 10 ქულით დაასრულა. სოხუმელთაგან 14 ქულით საუკეთესო ირაკლი ჩლაიძე გახლდათ, 11 ქულა და 12 მოხსნით დაასრულა შეხვედრა გიორგი ჯგერენაიამ.

სერიის მეორე მატჩი თბილისში, საკალათბურთო აკადემიაში, 17 მაისს გაიმართება.

მესამე ნახევარფინალისტი დღეს აჭარაში გამოვლინდა. დავით უსტიაშვილის გაწვრთნილმა „ბათუმმა“ მეოთხედფინალური სერიის მე-4 მატჩში 86:84 სძლია „ქუთაისს“ და სერია 3:1 მოიგო. ამერიკელი ლეგიონერებით გაძლიერებულმა აჭარულმა გუნდმა, რომელმაც რეგულარულ ჩემპიონატში მე-6 ადგილი გაიკავა, პელი ოფის პირველი რაუნდიდან მესამეადგილოსანი და მოედნის უპირატესობის მქონე „ქუთაისი“ გააგდო.

გუშინდელის მსგავსად დღევანდელი მატჩიც საკმაოდ დაძაბული გამოდგა. ბათუმლებმა დებიუტში მცირე უპირატესობა მოიპოვეს, მაგრამ მესამე პერიოდიდან თამაშიც გათანაბრდა, ანგარიშიც და ლიდერიც ხშირად იცვლებოდა. ყველაფერი ბოლო წუთებზე გადაწყდა, რომელიც მასპინძლებმა მეტი მობილიზებით ჩაატარეს.

გადამწყვეტ მომენტში აღსანიშნავია ნიკ კელოგის, ბიჯეი იანგის, ირაკლი მიქელაძის და ლევან რევაზაშვილის სიზუსტე. ამ მოთამაშეების ქულებმა ბათუმელებს ბოლო წუთზე ხელჩასაჭიდი ლიდერობა დაუბევეს – 83:76. ქუთაისელებმა დარჩენილ დროში ვერ მოახერხეს ვითარების შეცვლა და მატჩთან ერთად სერიაც წააგეს.

გასული წლის ვერცხლისმედალოსანი „ქუთაისი“ პლეი ოფს მეოთხედფინალიდან გამოეთიშა, რაც ბოლო 6 წლის განმავლობაში არ მომხდარა. ბათუმელებს 20 ქულით და 20 მოხსნით კრის ფელჩრმა ულიდერა, დიდად სარგებლიანი იყო ირაკლი მიქელაძე, რომელმაც 17 ქულა, 7 პასი და 5 მოხსნა მიითვალა. რაც „ბათუმში“ ჩაირიცხა, პირველად მოხდა, რომ ბიჯეი იანგი გუნდის ბომბარდირი არ გახდა. ამერიკელმა უკანახაზელმა 16 ქულა დააგროვა, ხოლო ნიკ კელოგმა თავი 14 ქულს მოუყარა. ქუთაისელთაგან საუკეთესო იყო აზერბაიჯანელი ზაურ ფაშაევი, რომელმაც სამმაგი დუბლი – 22 ქულა, 16 პასი და 10 მოხსნა გაიფორმა. 20 ქულით და 12 მოხსნით დაასრულა შეხვედრა სენეგალელმა აბდულაი ნდოემ.

„ბათუმი“ ნახევარფინალში გავიდა და „შსს-აკადემიასა“ და „სოხუმს“ შორის გამარჯვებულს ელოდება. მეორე ნახევარფინალში „დინამო“ და „რუსთავი“ დაუპირისპირდებიან.

რეგიონებში მეოთხედფინალური სერიების მატჩები საინტერესო და დაძაბულ ბრძოლებით აღინიშნა. რუსთავში „ოლიმმა“ დამატებით დროში წააგო, ხოლო „ქუთაისმა“ სერიის პირველ მატჩში შინ „ბათუმთან“ შეხვედრა 75:78 დათმო.

რუსთავში დრამატულ და საინტერესო ბროლაში გაილია ძირითადი 40 წუთი. „ოლიმპი“ მესამე პერიოდში 13 ქულას აგებდა, თუმცა ბოლო წუთებზე ლიდერობის მოპოვებაც მოახერხა და როცა ძირითადი დრო ფრედ – 72:72 დასრულდა, მოგების კარგი შანსი ჰქონდა.

საქმე იმაში გახლდათ, რომ 5 პერსონალურის გამო რუსთაველებს გუნდის 3 წამყვანი მოთამაშე აკლდათ. მიხეილ ჭოჭუამ, ტერენს ოგლზბიმ და ქაქუცა აბაიშვილმა მოედანი დატოვეს, რაც ოვერტაიმში წარმატების შანსს ოლიმპს უზრდიდა. რუსთავ ელებმა მოედანზე რეზო ჩაჩანიძე შეუშვეს, რომელსაც ძირითად 40-წუთეულში არ უთამაშია. ჩაჩანიძემ მიჯრით 11 ქულა მიითვალა – მან 3 ორქულიანი, 1 სამიანი და 2 საჯარიმო ზედიზედ ჩააგდო და „რუსთავმა“ ოვერტაიმის 13:0 მოგებით შთამბეჭდავი გამარჯვება მოიპოვა – 85:72.

„რუსთავის“ შემადგენლობაში 22 ქულით ბომბარდირი მიხეილ ჭოჭუა გახდა. ლევან ცეკვავამ 15 ქულა დააგროვა, 14 ტენერნს ოგლზბის ანგარიშზეა, ხოლო აკაკი დვალიშვილმა ორმაგი დუბლი – 14 ქულა და 13 მოხსნა მიითვალა. „ოლიმპში“ 17 ქულით და 17 მოხსნით საუკეთესო შედეგი მარკო დუიკოვიჩს ჰქონდა. ნოდარ გოგოძის ანგარიშზე კი 14 ქულა დაგროვდა.

სერიაში რუსთავე;ები 2:0 დაწინაურდნენ, მორიგი მატჩი კი 8 მაისს თბილისში გაიმართება.

მატჩისშემდგომი კომენტარები

მიხეილ ბერუაშვილი, „რუსთავის“ მთავარი მწვრთნელი:

„ვულოცავ ჩემს გუნდს გამარჯვებას. ძალიან დაძაბული და აინტერესო მატჩი გამოდგა. დამატებით დროში ჩვენმა გუნდმა მეტი შემართება გამოავლინა და ამ გამარჯვების წყალობით სერიაში 2:0 დავწინაურდით. ვეცდებით, სერია ჩვენს სასარგებლოდ თბილისში დავსრულოთ“.

გია კაზანჯიანი, „ოლიმპის“ მთავარი მწვრთნელი:

„კარგი მატჩი გამოვიდა. დამატებით დროში ვერ მოვახერხეთ მობილიზება. ვულოცავ მეტოქეს გამარჯვებას და თბილისში დიდ ბრძოლას ვპირდებით“.