ჭდე: სუპერლიგა

საინტერესო და დაძაბული გამოდგა სუპერლიგის ბოლო ტურის მორიგი შეხვედრა ,,ქუთაისსა’’ და ,,შსს აკადემიას’’ შორის. სატურნირო ცხრილის ლიდერი აკადემია მიმდინარე სეზონში უკვე მესამედ დამარცხდა ,,ქუთაისთან’’.  შეხვედრის პირველი მეოთხედი თანაბარი გამოდგა, თუმცა სტუმრებმა 3-ქულიანი ლიდერობის მოპოვება მაინც მოახერხეს – 17:20. მეორე მეოთხედში კი მასპინძლები გაცილებით შედეგიანად ათამაშდნენ, მეტოქეს 13:0 გაქცევა მოუწყვეს და დიდი შესვენებისთვის საიმედო 11-ქულიანი უპირატესობა მოიპოვეს – 43:32.

მეორე ნახევრის დასაწყისში კვლავ აკადემიელები გააქტიურდნენ და მესამე პერიოდის შუაში სხვაობა 3-ქულამდე შეამცირეს – 47:44. თუმცა, გიორგი ბარბაქაძის და ზაურ ფაშაევის შედეგიანობით ქუთაისელებმა ისევ მოახერხეს წინ გასვლა და ბოლო პერიოდს 10-ქულიანი ლიდერობით შეხვდნენ – 62:52.

მაყურებელმა დაძაბული 10-წუთეული იხილა, ,,შსს აკადემიამ’’ ბოლო მეოთხედის დასაწყისში კვლავ შეამცირა სხვაობა და თუმცა ,,ქუთაისი’’ რამდენიმე ქულით ლიდერობდა, ეს უპირატესობა საიმედო არ ყოფილა. ეს მალევე დამტკიცდა – მატჩის დასრულებამდე ორწუთნახევრით ადრე როგავას, ჩიკვილაძის და ლომოურის ზუსტი თამაშის წყალობით სტუმრებმა სხვაობა მინიმუმამდე დაიყვანეს – 69:68. ცხადი იყო, რომ ყველაფერი ბოლო წამებზე გადაწყდებოდა და ასეც მოხდა.

ბოლო წამებში კი, როცა სიტუაცია ძალიან დაიძაბა, ნაკლები შეცდომა დაუშვეს და მეტი სიზუსტე გამოავლინეს ქუთაისელებმა და შეხვედრა მათ სასარგებლოდ – 76:74 დასრულდა.

ქუთაისელებს გამარჯვებისკენ გიორგი ბარბაქაძე გაუძღვა 19 ქულით. ,,შსს აკადემიას’’ ასევე 19 ქულით კაკი ლომოურმა ულიდერა, 16 ქულა ჰქონდა რევაზ როგავას, 12 ქულა მიითვალა გიორგი ცინცაძემ, გიორგი შარაბიძემ და ბექა წივწივაძემ კი შეხვედრა 10-10 ქულით დაასრულეს. გიორგი შარაბიძემ 10 მოხსნაც მოაგროვა და ორმაგი დუბლის ავტორი გახდა.

სუპერლიგის პირველი წრის ბოლო ტურის დარჩენილი 2 შეხვედრა ხვალ რუსთავსა და თბილისში გაიმართება.

მატჩისშემდგომი კომენტარები

მედეა მხეიძე („ქუთაისის“ მთავარი მწვრთნელის ასიისტენტი):  იყო გარკვეული შეცდომები, როგორც ჩვენი, ასევე მოთამაშეების მხრიდან, თუმცა მთავარია ყველაფერი მშვიდობით და ჩვენი დადებითი რეზულტატით დასრულდა. დაძაბული ფონი იყო და  მეორე ტაიმში, როცა წინ სოლიდური სხვაობით გავედით, დიდი ენერგია წაგვართვა ემოციებმა. ეს ჩვენს ფიზიკურ კონდიციებზე აისახა, თუმცა ჩვენმა ბიჭების მონდომების, ძალისხმევის, პროფესიონალიზმისა და კლასის ხარჯზე უმნიშვნელოვანესი გამარჯვება მოვიპოვეთ. ვფიქრობ, წინ გაცილებით საინტერესო მე-2 წრე გველოდება. მადლობა გულშემატკივრებს, რომლებიც  ყოველთვის გვერდით გვიდგანან. მივულოცავ ამ წარმატებას მათ და ზოგადად ყველას, ვისაც ჩვენი მოგება გაუხარდა.

კოტე ტუღუში (შსს აკადემიის მთავარი მწვრთნელი): ქუთაისში მოსაგებად ჩამოვედით და ყველაფერი გავაკეთეთ ამისთვის. მთელი სამი მეოთხედი ვიბრძოლეთ და გადამწყვეტი მეოთხე მეოთხედი გამოდგა, რომელიც ძალიან ცუდად ჩავატარეთ. დავუშვით შეცდომები და არც გაგვიმართლა. ასევე მინდა აღვნიშნო ცუდი მსაჯობა. ვფიქრობ, მსაჯებმა გადამწყვეტ და სადაო მომენტებში არასწორი გადაწყვეტილებები მიიღეს.

superleague.ge

სუპერლიგის მე-6 ტური მოულოდნელი შედეგით დასრულდა. ჩემპიონატში 1 წაგების მქონე ,,რუსთავი’’ 1 მოგების მქონე ,,ოლიმპთან’’ დამარცხდა. გია კაზანჯიანის გაწვრთნილმა ოლიმპელებმა გმირულად ითამაშეს და ჩემპიონატის ერთ-ერთ ფავორიტს მწარე მარცხი აგემეს.

,,რუსთავი’’ უპირობო ფავორიტად მიიჩნეოდა, თუმცა ,,ოლიმპი’’ რომ იოლად არაფერს დათმობდა, ეს წინასწარ იყო ცნობილი. გია კაზანჯიანის გუნდი ხომ ნებისმიერ მეტოქესთან მატჩში ბოლომდე იბრძოდა და, ძირითადად, ბოლო წუთებში აგებდა.

სწორედ ამ მომენტზე გააკეთა ნამატჩევს კომენტარი გია კაზანჯიანმა, ,,ოლიმპის’’ მთავარი მწვრთნელის თქმით, არსებობდა საფრთხე, რომ ბოლო წუთებზე, სადამდეც თამაში თანაბარი იყო, შედარებით გამოცდილი ,,რუსთავი’’ იმარჯვებდა. კაზანჯიანის გუნდს გამოუცდელობის გამო არაერთი მატჩი წაუგია ,,რუსთავზე’’ არანაკლებ ძლიერ მეტოქეებთან.

,,ოლიმპის’’ კალათბურთელებმა მხოლოდ ბრძოლის ხარჯზე როდი მოიგეს. კაზანჯიანის გუნდის წევრებმა გამორჩეული სიზუსტე გამოავლინეს და მატჩში მთლიანობაში 13 3-ქულიანი ჩააგდეს. ზუსტმა შორმა სროლებმა გადაფარა ის ხარვეზი, რომელიც ოლიმპელებს საჯარიმო სროლების დროს ჰქონდათ – 27-დან 12 საჯარიმოს ჩამგდებ გუნდს მოგებაზე პრეტენზია არ უნდა ჰქონდეს, თუმცა, ამის მიუხედავად, ,,ოლიმპმა’’ ზუსტი სამქულიანების ხარჯზე მაინც მოახერხა გამარჯვების მოპოვება.

თანაბარი ბრძოლა ბოლო მეოთხედამდე გაგრძელდა. ,,ოლიმპმა’’ ხელჩასაჭიდი უპირატესობა რამდენჯერმე მოიპოვა, თუმცა რუსთაველებმა ჩამორჩენის გაბათილება მყისიერად მოახერხეს. როცა თამაშის დასრულებამდე 4 წუთით ოლიმპელების უპირატესობამ 10 ქულას გადააჭარბა, რუსთაველები სერიოზული საფრთხის წინაშე აღმოჩნდნენ, მაგრამ მიხეილ ბერუაშვილის გუნდმა ვითარების შეცვლა ვერ მოახერხა.ეს, რა თქმა უნდა, ოლიმპელთა საზრიანი თამაშის გამო მოხდა – გადამწყვეტ მომენტში მოედანზე მყოფმა თითოეულმა ოლიმპელმა თავგანწირულ ბრძოლას სროლათა სიზუსტეც მოაყოლა და თამაში ისე ჩამთავრდა, ,,რუსთავს’’ მისი გადარჩენის შანსი არ მისცემია.

,,ოლიმპს’’ გამარჯვებისკენ 5 სამქულიანის ჩამგდები ნოდო გოგოძე გაუძღვა, მან მთლიანობაში 26 ქულა დააგროვა, 3 სამიანი და 11 ქულა ჩააგდო ოლიმპელთა გამთამაშებელმა ნუგზარ აბულაძემ, კოკა ტომარაძემ კი შეხვედრა 10 ქულით დაასრულა.

რუსთაველთა შორის 21 ქულით საუკეთესო იყო გოგა ცეკვავა, მიხეილ ჭოჭუამ 18 ქულა დააგროვა, აკაკი დვალიშვილმა კი ორმაგი დუბლი გაიფორმა – 16ქულა, 12 მოხსნა.

სუპერლიგის პირველი წრის ბოლო ტური 26-27 დეკემბერს საქართველოს 4 ქალაქში – რუსთავში, ქუთაისში, ბათუმსა და თბილისში გაიმართება.

მატჩისშემდგომი პრესკონფერენცია

გია კაზანჯიანი(,,ოლიმპის’’ მთავარი მწვრთნელი): პირველ რიგში, ვულოცავ ჩემს ბიჭებს გამარჯვებას, მადლობა მათ მონდომებისთვის და ბოლომდე ბრძოლისთვის. წინა თამაშებში 30-35 წუთი კარგად ვთამაშობდით და ბოლო წუთებში ვაგებდით ხოლმე, დღესაც გვქონდა შიში, რომ იგივე ბავშვური შეცდომები არ გაგვემეორებინა. საბედნიეროდ, დღეს ბოლომდე მოვახერხეთ შედარებით კარგი და ნორმალური თამაში. მინდა აღვნიშნო, რომ 13 3-ქულიანი ჩავაგდეთ და ეს დიდი პლიუსია, ამის დამსახურებაცაა, რომ მოვუგეთ ჩვენზე ბევრად ძლიერ და გამოცდილ გუნდს. თუმცა წინ კიდევ გვაქვს რთული შეხვედრა ,,ბათუმის’’ წინააღმდეგ. 3 იანვარს ლატვიაში მივემგზავრებით შეკრებაზე სუპერლიგის და 20-წლამდელთა გუნდები. შესაძლოა, ახალგაზრდა ლეგიონერიც დავიმატოთ. ეს ყველაფერი დაგვეხმარება მეორე წრეში კიდევ უფრო უკეთესად ვიასპარეზოთ.

ბადრი კიკვიძე(,,რუსთავის’’ მწვრთნელი): მივულოცავ ,,ოლიმპს’’ გამარჯვებას. რაც შეეხება თამაშს, საშინლად ვიასპარეზეთ, განსაკუთრებით, თავდასხმაში. ძალიან ბევრი გვაქვს სამუშაო.

ნოდო გოგოძე(,,ოლიმპი’’): მივულოცავ ჩვენს გუნდს გამარჯვებას. დაძაბული შეხვედრა გამოდგა და ასეც ველოდით. ძალიან სასიხარულოა, რომ ამდენი წაგების შემდეგ მოვახერხეთ მოგება, წინა თამაშებისგან განსხვავებით, ბოლომდე შევინარჩუნეთ კონცენტრაცია, სამქულიანებიც წაგვივიდა და გავიმარჯვეთ. იყო შეცდომები, თუმცა შევეცდებით გამოვასწოროთ და უფრო მოვუმატოთ.

superleague.ge

გასულ სეზონთან შედარებით „სოხუმი“ დასუსტებულია. ვაჟა კვარაცხელიას გუნდმა სუპერლიგის მიმდინარე გათამაშებაში ზედიზედ მე-4 მატჩი წააგო – ამჯერად „ქუთაისთან“.

არადა, თავიდან სოხუმელები ტოლს არაფერში უდებდნენ ქუთაისელებს. პირველი მეოთხედი სტუმრებმა მხოლოდ 1 ქულის სხვაობით – 16:15 მოიგეს. მეორე პერიოდში კი ვიცე-ჩემპიონმა ქუთაისელებმა თამაში გამოასწორეს და ზაურ ფაშაევის, გიორგი ბარბაქაძის და ბუბა კვიმსაძის შედეგიანობით დიდ შესვენებაზე 5-ქულიანი უირატესობით გავიდნენ – 38:33.

მესამე პერიოდიდან ვითარება შეიცვალა. ქუთაისელებმა მოახერხეს სათამაშო უპირატესობის მოპოვება და ლიდერობა ხელჩასაჭიდი გახადეს. იმერული კლუბის უპირატესობამ მესამე მეოთხედში 15 ქულას მიაღწია, რის შემდეგაც სოხუმელებს წარმატების შანსი აღარ ჰქონიათ.

საბოლოოდ“ქუთაისმა“ 83:67 გაიმარჯვა. ფაშაევმა 17 ქულით ბომბარდირობა შეითავსა, 15 ქულა დააგროვა გიორგი ბრბაქაძემ, ხოლო კვიმსაძის ანგარიშზე 13 ქულა დაგროვდა. სოხუმელთაგან 23 ქულითა და 13 მოხსნით გრიგოლ შვანგირაძე გამოირჩა, ხოლო ირაკლი ჩლაიძემ 13 ქულა დააგროვა.

მატჩისშემდგომი პრესკონფერენცია

ვაჟა კვარაცხელია(,,სოხუმის’’ მთავარი მწვრთნელი): ვულოცავ ,,ქუთაისს’’ გამარჯვებას. მე აღვნიშნე მატჩისწინა პრესკონფერენციაზე, რომ შანსი მეტი ჰქონდათ. ძლიერი მოთამაშეებით დაკომპლექტებული გუნდია, ყველა კომპონენტში დალაგებული არიან და მომზადებაც ყველაზე ადრე დაიწყეს. ამიტომ, ლოგიკურია, რომ გაიმარჯვეს. ჩვენ ძიებაში ვართ, ფორმაში შესვლას ვცდილობთ. ვეცდებით, გამოვასწოროთ შეცდომები და გავძლიერდეთ, ალბათ, პირველ და მეხუთე ნომერს ჩამოვიყვანთ, სხვა გზა არ გვაქვს.

მედეა მხეიძე(,,ქუთაისის’’ მწვრთნელი): პირველ რიგში, მივულოცავ ჩემს გუნდს და გულშემატკივრებს ამ წარმატებას, მაგრამ მაინც ვთვლი, რომ კრიტიკა აუცილებელია.  მიუხედავად დადებითი შედეგისა, გუნდი, ფაქტობრივად, ვერ აჩვენებს იმას, რასაც მისგან სამწვრთნელო შტაბი მოითხოვს. არასრულყოფილი სავარჯიშო ბაზის გამო ჩვენი შედეგი არის არასახარბიელო და არასაკმარისი იმისთვის, რომ შემდგომში ვისაუბროთ დადებით შედეგებზე. მინდა ვისურვო, რომ  ეს თამაში იყოს ამ სეზონში ჩვენი ყველაზე ცუდი მატჩი.

ვატო ბააკაშვილი(,,სოხუმი’’): ოთხიდან ოთხივე შეხვედრა წავაგეთ და ერთ-ერთი აუტსაიდერები ვართ. ასეთი რამ მაშინაც არ მომხდარა, როცა ძალიან რთულ პირობებში იყო გუნდი. იმედია, მწვრთნელები შეძლებენ გუნდში ცვლილებების განხორციელებას და გამარჯვებებსაც მოვიპოვებთ.

superleague.ge

„დინამოსა“ და „ოლიმპის“ საინტერესო დაპირისპირებით დასრულდა სუპერლიგის მე-3 ტური. ანგარიშში სხვაობა კი საკმაოდ დიდი, თუმცა თამაშის მსვლელობაზე, ტემპსა და სისწრაფეზე აუგს ვერავინ იტყვის. მაყურებელმა სწრაფი, ლაღი და ჟინიანი ორთაბრძოლა იხილა.

საბოლოოდ გამარჯვებულმა „დინამომ“ ხელჩასაჭიდი უპირატესობა ბოლო მეოთხედში მოიპოვა, მანამდე კი სამაგალითოდ მებრძოლი ოლიმპელები მეტოქეს ტოლს არაფერში უდებდნენ. ის კი არა, გია კაზანჯიანის გაწვრთნილმა „ოლიმპმა“ პირველი ტაიმი 2 ქულით – 49:47 მოიგო. ახალგაზრდები გუნდურად და შემართებით თამაშობდნენ და მოქმედ ჩემპიონს საქმე სანერვიულოდ გაუხადეს.

მესამე მეოთხედში დინამოელებმა მაინც თავისი გაიტანეს. ირაკლი ხოშტარიას გაწვრთნილმა გუნდმა ძირითადად კლასის ხარჯზე მოახერხა მეტოქის ჩამოტოვება. შეუჩერებელი იყო ეროვნული ნაკრების წევრი ბესო ლეჟავა, რომელმაც მიმდინარე სუპერლიგის რეკორდი დაამყარა. „დინამოს“ უკანახაზელმა 11-დან 7 ორქულიანი, 9-დან 6 სამიანი და 5-დან 5 საჯარიმო ჩააგდო, რამაც ჯამში 37 ქულა შეადგინა.

ამ შედეგიანობას ის მოჰყვა,რომ ლეჟავას გუნდმა მესამე მეოთხედი 27:12 მოიგო და გადამწყვეტი პერიოდის წინ 13 ქულით დაწინაურდა. მიუხედავად ჩამორჩენისა, „ოლიმპი“ არ ტყდებოდა და ბოლომდე იბრძოდა. საბოლოოდ ყველაფერი ლოგიკას დაემორჩილა და ბევრად გამოცდილმა და ძლიერმა გუნდმა მრგვალი ანგარიშით იმარჯვა – 100:80.

„დინამოში“ ზემოთხსენებულ ლეჟავასთან ერთად ლაშა გამყრელიძე გამოირჩა, რომელმაც ორმაგი დუბლი – 20 ქულა და 10 პასი მიითვალა. 13 ქულით დაასრულა შეხვედრა ილია ლონდარიძემ. „ოლიმპში“ 15 ქულით საუკეთესო კოკა ტომარაძე გახდლათ, 10-10 ქულა კი სამმა მოთამაშემ – გეგი ბაქრაძემ, ნოდარ გოგოძემ და ზუკა მაჩალაძემ დააგროვეს.

სუპერლიგის მომდევნო, მე-4 ტური 15 ნოემბერს, თბილისის სპორტის სასახლეში გაიმართება.

მატჩისშემდგომი პრესკონფერენცია

ირაკლი ხოშტარია(,,დინამოს’’ მთავარი მწვრთნელი): მოვიგეთ, რაც სასიხარულოა, თუმცა სტატისტიკას თუ გადავხედავთ, კატასტროფული შედეგი გვაქვს. ფარი წავაგეთ, 14 დაკარგვა გვაქვს, 49 ქულა მივიღეთ პირველ ნახევარში… ამის შემდეგ რთულია თამაშის შემობრუნება, თუმცა მობილიზების და გამოცდილების ხარჯზე მოვახერხეთ დაცვაში თამაში დაგველაგებინა. მე-3 შეხვედრა იყო და ბიჭები ნელ-ნელა უმატებენ, უკეთესად გამოიყურებიან ბოლო პერიოდში, ვიდრე ეს წინა თამაშებში იყო. ,,ოლიმპს’’ წარმატებებს ვუსურვებ, საინტერესოა მათ წინააღმდეგ ასპარეზობა, დალაგებულად თამაში რთულია, რადგან ხშირად ცვლიან ტაქტიკას. იმედია, ჩვენ უკეთეს კონდიციებში შევალთ.

superleauge.ge

გია კაზანჯიანია(,,ოლიმპის’’ მთავარი მწვრთნელი): მივულოცავ ირაკლის და მთელ ,,დინამოს’’ დამსახურებულ გამარჯვებას. გამოცდილების ხარჯზე გვაჯობეს, მინდა აღვნიშნო ლაშა გამყრელიძის გამორჩეული თამაში, ყოველთვის იცის, როდის გასცეს პასი, როდის შეუტიოს… მეორე ტაიმში ვეღარ მოვახერხეთ თამაშის შემობრუნება. ამ შეცდომებს აუცილებლად გამოვასწორებთ და მომავალში უფრო სანახაობრივ თამაშს ვაჩვენებთ.

ნუგო აბულაძე(,,ოლიმპი’’): პირველ რიგში, ვულოცავ ,,დინამოს’’ გამარჯვებას. მე, როგორც კაპიტანი, ჩემს თავზე ვიღებ ამ დამარცხებას, ვერ დავაწყვე გუნდი ისე, რომ მოგვეგო. არადა, პირველ ტაიმში ძალიან კარგად გამოვიყურებოდით, პირველ შეტევაში ვჯობდით მეტოქეს. ვიმედოვნებ, მომავალში ასეთ რამ აღარ მოხდება.

გუშინ რუსთავში დაწყებული მე-3 ტური დღეს თბილისში გრძელდება.  3 მატჩიდან პირველი უკვე დასრულდა. „ბათუმმა“ დაგეგმილი გამარჯვება მოიპოვა „მგზავრები-არმიასთან“, რომელიც ანგარიშით 72:57 დაამარცხა.

„მგზავრები-არმია“ ახალგაზრდა კალათბურთელებითაა დაკომპლექტებული და როგორც ჩანს, ჩემპიონატში მოკრძალებული ამბიცია აქვს. არც „ბათუმს“ აკლია ახალგაზრდები, თუმცა მიხეილ კობეშავიძის გუნდი 2 ლეგიონერითაა გაძლიერებული და გაცილებით შორსმიმავალი გეგმები აქვს.

ამ გუნდების დაპირისპირებაში რომ ზღვისპირელებს ჰქონდათ უპირატესობა, ყველამ კარგად იცოდა და ეს თამაშის მსვლელობამაც გამოაჩინა. პირველი მეოთხედი ბათუმელებმა 24:15 მოიგეს, ხოლო დიდი შესვენებისთვის უპირატესობა 16 ქულამდე გაზარდეს.

ისევე როგორც გასულ სეზონში, ბათუმელთა გამწევი ძალა ახლაც ლეგიონერები არიან. მართალია, უცხოელები მხოლოდ ორნი არიან, თუმცა საკმაოდ მაღალი კლასისანი და გუნდში ლიდერის ფუნქციებიც აკისრიათ. გამთამაშებელმა ნიკოლას კელოგმა 23 ქულა დააგროვა, ხოლო ცენტრმა კრისტოფერ ფელჩერმა პირად ანგარიშზე 20 ქულა, 16 მოხსნა და 4 დაფარება ჩაიწერა.

მატჩის მეორე ტაიმი 20-ქულიანი სხვაობის ზღვარზე მიდიოდა. სტუმართა ლიდერობა ხან აცდებოდა აღნიშნულ ნიშნულს, ხან – ჩამოცდებოდა. საბოლოოდ, ზღვისპირელებმა 17 ქულით იმარჯვეს და მიმდინარე ჩემპიონატში მეორე გამარჯვება მოიპოვეს. რაც შეეხებათ „მგზავრებს“, გუნდს დავით მაისურაძემ ულიდერა, რომელმაც ორმაგი დუბლი – 16 ქულა და 10 მოხსნა მიითვალა.

მატჩისშემდგომი პრესკონფერენცია

ანატოლი ბერიშვილი(,,მგზავრები-არმიის’’ მთავარი მწვრთბელი): მივულოცავ მოწინააღმდეგეს ღირსეულ გამარჯვებას, ძალიან ძლიერი გუნდია, ორი ლეგიონერი ჰყავთ. ჩვენ ბევრი შეცდომა გვქონდა როგორც დაცვაში, ისე შეტევაში, თუმცა წინა თამაშებთან შედარებით მაინც კმაყოფილი ვარ. მაქსიმალურად ვცდილობთ, თითოეული დღე გამოვიყენოთ და შეცდომები შევამციროთ. იმედია, მომავალში უკეთეს თამაშს ვაჩვენებთ.

მიხეილ კობეშავიძე(,,ბათუმის’’ მთავარი მწვრთნელი): შედეგით კმაყოფილი ვარ, მაგრამ თამაში ხარისხით არ ვარ კმაყოფილი. ,,მგზავრები-არმია’’ ახლადშეკრებილი გუნდია და მეტს ველოდი ჩემი მოთამაშეებისგან. თუმცა, ამხანაგური მატჩები არ ჩაგვიტარებია, ჯერ შეთამაშება ძალიან გვაკლია, ფაქტობრივად, ახალი გუნდი ვართ. წინა წლის შემადგენლობიდან მხოლოდ 2 მოთამაშეა დარჩენილი და ძნელია, ასეთ პირობებში მალე აჩვენო შედეგი.

ლევან რევაზაშვილი(,,ბათუმი’’): მივულოცავ ჩემს გუნდს გამარჯვებას, ძალიან გვინდოდა მოგება და მიზანს მივაღწიეთ. მართალია, გვქონდა ხარვეზები, თუმცა იმედია მოვახერხებთ მათ გამოსწორებას.

superleague.ge

დღეს, სპორტკომპლექს “არენაში” სუპერლიგის მეორე ტურის დასკვნითი ორი შეხვედრა შედგა. პირველები მოედანზე “სოხუმის” და “ოლიმპის” კალათბურთელები გავიდნენ. შეხვედრა კაზანჯიანის გუნდის უპირატესობით დაიწყო და მათივე დამაჯერებელი გამარჯვებით დასრულდა. თბილისელებმა პირველივე მეოთხედში მოიპოვეს უპირატესობა, რომელიც მესამე მეოთხედში კიდევ უფრო გაზარდეს და მეტოქეც საბოლოოდ გატეხეს.

“ოლიმპის” შემადგენლობაში ლერი კვანტალიანი (18 ქულა) და გიორგი ალხანაიძე (17 ქულა) გამოირჩეოდნენ, ხოლო მატჩის საუკეთესო ბომბარდირი სოხუმელი ლაშა ფარღალავა გახდა, რომლის ანგარიშზე 27 ქულაა.

ტურის უკანასკნელ შეხვედრაში კი, რომელშიც ერთმანეთს თბილისი “დინამო” და “მგზავრები-არმია” დაუპირისპირდნენ ერთი გუნდის დომინირება აშკარა იყო. მოქმედმა ჩემპიონებმა თამაში აგრესიულად დაიწყო და უპირატესობაც მატჩის დებიუში მოიპოვეს. პირველი ტაიმი დინამოელებმა 46:19 მოიგეს, რის გამოც მეორე ნახევარში მოეშვნენ და შეხვედრაც გათანაბრდა. საბოლოოდ “დინამომ” 89:61 მოიგო.

ორი ტურის შემდეგ სატურნირო ცხრილს “დინამო”, “რუსთავი” და “ქუთაისი” ლიდერობენ.

სოხუმი 75:98 ოლიმპი

დინამო 89:61 მგზავრები-არმია

სუპერლიგა დღეს რეგიონებშიც დაიწყო. მეორე ტურის მატჩებს ბათუმმა და რუსთავმა უმასპინძლეს. ზღვისპირეთში მასპინძლები კიდევ ერთ რეგიონის გუნდ „ქუთაისთან“ დამარცხდნენ, ხოლო რუსთაველებმა „შსს-აკადემია“ თბილისში წაგებული გაუშვა.

რუსთავში თამაში მასპინძელთა დიდი უპირატესობით დაიწყო. სწრაფი გარღვევებითა და ზუსტი შორი სროლებით ქვემოქართველებმა პირველივე მეოთხედში 20-ქულიანი უპირატესობა მოიპოვეს. განსაკუთრებით ამერიკელი ჰეიდენ ჰამსი გამოირჩეოდა, რომელიც რუსთაველთა გუნდის შესანიშნავი დანამატია.

ჰამსმა პირველ მეოთხედში 11 ქულა ჩააგდო და რუსთაველების სოლიდურად დაწინაურებას ხელი დიდად შეუწყო. პირველი მეოთხედი მასპინძლებმა 26:5 მოიგეს და მიუხედავად იმისა, რომ მეორე მეოთხედში ჩავარდნა ჰქონდათ, ლიდერობა არ დაუთმიათ. თბილისელები მასპინძლებს მეორე პერიოდში 7 ქულით მიუახლოვდნენ, თუმცა რუსთაველები სტაბილურად თამაშობდნენ და საბოლოოდ გამარჯვებამდეც იოლად მივიდნენ.

ჰამსთან ერთად გამორჩეულად ითამაშეს აკაკი დვალიშვილმა და მიხეილ ჭოჭუამ. დვალიშვილმა ფარქვეშ შესანიშნავად გაისარჯა, მასთან ორთაბრძოლაში აკადემიელმა ცენტრმა გიორგი შარაბიძემ ადრიანად მიიღო ჯარიმები დ ამან მასპინძელთა ცენტრს ასპარეზი კიდევ უფრო გაუფართოვა.

გამარჯვებულებს აკაკი დვალიშვილმა ულიდერა, რომელსაც სამმაგ დუბლამდე 2 პასი დააკლდა – 26 ქულა, 16 მოხწსნა, 8 პასი. თამაშიდან 13-დან 11 სროლა ჩააგდო და 26 ქულას მოუყარა თავი ჰეიდენ ჰამსმა, ხოლო გოგა ცეკვავამ პირად ანგარიშზე 14 ქულა, 10 მოხსნა და 6 პასი ჩაიწერა. აკადემიელთაგან 21 ქულით საუკეთესო ბექა ჩიკვილაძე იყო, გიორგი შარაბიძემ კი შეხვედრა 15 ქულით დაასრულა.

ბათუმში უფრო დაძაბული მატჩი ჩატარდა. მიუხედავად იმისა, რომ მასპინძლებმა მესამე პერიოდი ძალიან კარგად ითამაშეს და მეტოქეს 10-წუთეული 14:1 მოიგეს, საბოლოოდ მაინც დამარცხდნენ. ქუთაისეებმა ბოლო პერიოდი საიმედო დაცვითა და სწრაფი შეტევებით ჩაატარეს და ათწუთეულის 19:5 მოგებით შეხვედრაში გაიმარჯვეს – 63:55.

სტუმრებს ძმებმა ბარბაქაძეებმა ულიდერეს – დავითმა 15 ქულა დააგროვა, გიორგიმ კი – 14. 7 ქულითა და 14 მოხსნით დაასრულა მატჩი ავთანდილ ლომინაშვილმა. ბათუმელებში კი ლეგიონერები გამოირჩნენ – ნიკოლას კელოგმა 18 ქულა მიითვალა, კრისტოფერ ფელჩერმა კი 14 ქულა და 12 მოხსნა.

სუპერლიგის მე-2 ტურის დარჩენილი 2 მატჩი ხვალ, 1 ნოემბერს, სპორტკომპლექს „არენაში“ გაიმართება.

მატჩიშემდგომი კომენტარები

ბათუმი- ქუთაისი  55:63

მიხეილ კობეშავიძე(,,ბათუმის’’ მთავარი მწვრთნელი): ვულოცავ ,,ქუთაისს’’ გამარჯვებას. დღეს ფაქტობრივად, 6 კაცით ვითამაშეთ. ტრავმირებული მოთამაშეები ვერ გამოვიყვანე, მხოლოდ ელიაძემ ითამაშა. ,,ქუთაისს’’ ძალიან კარგი გუნდი ჰყავს, დღეს ნამდვილად გვაჯობეს და დამსახურებულად გაიმარჯვეს.

მედეა მხეიძე(,,ქუთაისის’’ მწვრთნელი): საკმაოდ დაძაბული და კარგი თამაში იყო. პირველ ტაიმში უპირატესობა გვქონდა, შეგვეძლო გაგვეზარდა სხვაობა, მაგრამ ბევრი ბურთი დავკარგეთ. მეორე ტაიმის დასაწყისში კი ფიზიკურად ვერ ჩავაგდეთ ვერაფერი. საბედნიეროდ, მოვახერხეთ მობილიზება, ანგარიშის გათანაბრება მეოთხე პერიოდში და კარგი დაცვის ხარჯზე ლიდერობაც დავიბრუნეთ. საბოლოო ჯამში, კმაყოფილები ვართ. წინ ძალიან სერიოზული თამაში გველის რუსთავის წინააღმდეგ, დარბაზის პრობლემების გამო გასვლითი თამაშები გვაქვს. დღევანდელი მატჩი ნამდვილად გამოგვადგება ამ შეხვედრისთვის მოსამზადებლად. შევეცდებით, ეს კვირა მაქსიმალურად გამოვიყენოთ და მომდევნო თამაშშიც წარმატებას მივაღწიოთ.

რუსთავი-შსს  95:76

კოტე ტუღუში (შსს-აკადემიას“ მთავარი მწვრთნელი): თავის გასამართლებლად არ ვამბობ, თუმცა ფაქტია რომ ჩვენი გუნდი უვარჯიშებელია. ერთი კვირაა, რაც სრულფასოვანი ვარჯიში დავიწყეთ და ოპტიმალურ ფორმამდე ბევრი გვაკლია. ამ წაგებიდან დასკვნებს გამოვიტანთ და ვეცდებით, უახლოეს მომავალში დღეს დაშვებული შეცდომები გამოვასწოროთ.

მიხეილ ბერუაშვილი („რუსთავის“ მთავარი მწვრთნელი): აშკარად ეტყობოდა „შსს-აკადემიას“, რომ ოპტიმალური ფორმისგან შორსაა. ჩვენ საკუთარ მოედანზე ვთამაშობდით და ეს შანსი გამოვიყენეთ. დარწმუნებული ვარ, მეორე წრეში ამ გუნდთან გაცილებით რთული მატჩი გვექნება. ვულოცავ ჩვენს გუნდს სეზონის მეორე გამარჯვებას და ვეცდებით, თამაში კიდევ უფრო გავაუმჯობესოთ.

superleauge.ge

სუპერლიგის პირველი ტური დასრულდა. ბოლო შეხვედრაში ერთმანეთს „სოხუმი“ და „რუსთავი“ დაუპირისპირდნენ. მატჩი ქვემოქართლური გუნდის იოლი გამარჯვებით – 84:68 დასრულდა.

შედეგი მოულოდნელი არ ყოფილა. რუსთაველებმა რამდენიმე დღის წინ დუდუ დადიანის მემორიალი მოიგეს და საკუთარი ამბიციები თვალნათლივ წარმოაჩინეს. სოხუმელებს კი ძლიერ მოთამაშეებთან ერთად შეთამაშებაც აკლიათ – ვაჟა კვარაცხელიას გუნდმა ვარჯიში ახლახანს დაიწყო, „რუსთავი“ კი თითქმის 2 თვეა, ვარჯიშობს და შემადგენლობაც რუსთაველ კალათბურთელებთან ერთად ამერიკელი ლეგიონერით – ჰეიდენ ჰამსითაც გაიძლიერეს.

მიხეილ ბერუაშვილის გაწვრთნილმა ქვემოქართლელებმა დამაჯერებლად ითამაშეს და პირველივე წუთებიდან რომ დაწინაურდნენ, არც ლიდერობა და არც სათამაშო ინიციატივა არ დაუთმიათ. საბოლოოდ „რუსთავმა“ 16 ქულის სხვაობით იმარჯვა და დუდუ დადიანის მემორიალის მოგებით შექმნილი იმიჯი გაიმყარა.

ფარქვეშ შეუჩერებელი იყო აკაკი დვალიშვილმა, რომელმაც საბოლოოდ 30 ქულადა 15 მოხსნა მიითვალა 14 ქულითა, 7 მოხსნით და 5 პასით თავი გოგა ცეკვავამ გამოიჩინა, ხოლო ლეგიონერმა ჰეიდენ ჰამსმა რუსთაველებს 12 ქულა შესძინა. სოხუმელთაგან 17 ქულით ირაკლი ჩლაიძე გამოირჩა, 12 ქულა და 9 მოხსნა მიითვალა გიორგი ჯგერენაიამ.

მომდევნო, მე-2 ტური 31 ოქტომბერს რუსთავსა და ბათუმში დაიწყება და 1 ნოემბერს თბილისში 2 მატჩით დასრულდება.

მატჩისშემდგომი პრესკონფერენცია

ვაჟა კვარაცხელია(,,სოხუმის’’ მთავარი მწვრთნელი): როგორც წინასამატჩო პრესკონფერენციაზე აღვნიშნე, მოგების შანსი ,,რუსთავს’’ უფრო ჰქონდა – 70-30-ზე. ,,რუსთავი’’ კარგად დაკომპლექტებული გუნდია, ისეთი ძლიერი მოთამაშეები ჰყავთ, როგორებიც ჭოჭუა, დვალიშვილი, ცეკვაა.. ისინი,  ნაკრების კანდიდატებიც არიან, ჭოჭუა ნაკრების წევრია, ამიტომ მოსალოდნელი იყო ეს დამარცხება. მათ უფრო ადრე დაიწყეს მომზადება, ჩვენ კი – გვიან. ახალბედა მოთამაშეები გვყავს, რომლებიც უნდა გაიზარდნონ. ისინი პერსპექტიულები არიან, თუმცა თამაში მოგება რთულია. იანვრისთვის უფრო სერიოზულად მოვემზადებით.

მიხეილ ბერუაშვილი(,,რუსთავის’’ მთავარი მწვრთნელი):  მივულოცავ ჩემს მოთამაშეებს გამარჯვებას. შეასრულეს ის, რაზეც ვმუშაობდით მთელი ეს თვეები. გამომდინარე იქიდან, რომ ეს მხოლოდ მესამე თამაში იყო, ხარვეზები გვქონდა და ბოლომდე კმაყოფილი არ ვარ. თუმცა, შევეცდებით გამოვასწოროთ. რაც შეეხება ,,სოხუმს’’, მას ახალგაზრდა მოთამაშეებიც ჰყავს და გამოცდილებიც და, ალბათ, თანდათან შეთამაშდებიან და დალაგდებიან. წელს არ იქნება ისეთი ჩემპიონატი, რომელსაც ერთი გამოკვეთილი ფავორიტი ჰყავს, ყველა გუნდი მოგებისთვის იბრძოლებს და აუცილებელია, ყველა თამაშზე მობილიზებული და მონდომებული გახვიდე, ეს მეტოქის პატივისცემაა.

superleague.ge