ჭდე: ტოტენჰემი

ლონდონის “ტოტენჰემის” ინგლისელმა ლიდერმა, ჰარი კეინმა “საუთჰემპტონის” კარში ჰეთ-ტრიკის გაფორმებით მსოფლიო კიდევ ერთხელ გააკვირა და ფეხბურთის ისტორიაშიც შევიდა. 2017 წელი კეინისთვის მართლაც რომ გამორჩეული იყო (თუმცა, მხოლოდ ინდივიდუალური თვალსაზრისით და არა გუნდური).

• კეინმა ოქტომბრის თვეში გადაასწრო კრიშტიან რონალდუს პრემიერ ლიგაში გატანილი გოლების რაოდენობით. თანაც, ბრიტანულ ლიგაში 84 გოლის გასატანად მას 73-ით ნაკლები მატჩის ჩატარება დასჭირდა.

• კეინი პირველი ინგლისელია 60-იანი წლების შემდეგ, რომელმაც ერთ კალენდარულ წელიწადში 50-ზე მეტი გოლი გაიტანა.

• მიუხედავად იმისა, რომ გაზაფხულზე ერთი თვე გაუცდა, კეინმა მესისა და შირერს მაინც გადაუსწრო.

• ზედიზედ მესამე სეზონია, რაც კეინს 20-ზე მეტი გოლი გააქვს პრემიერ ლიგაში. ასეთი შედეგი მხოლოდ აგუეროს, შირერს, ანრისა და ვან ნისტერლოის აქვთ დაფიქსირებული.

• კეინი პირველი ფეხბურთელია 2009 წლის შემდეგ, რომელმაც კალენდარულ წელიწადში გატანილი გოლების ოდენობით მესისა და რონალდუს გადაუსწრო. ბოლოს ეს დავიდ ვილიამ შეძლო (43 გოლი “ბარსას” მაისურით)

• კალენდარულ წელიწადში გატანილი გოლების რეკორდი, რომელიც კეინმა ახლახან დაამხო, შირერს 22 წლის მანძილზე ეკუთვნოდა. ახლა კი ის ჰარის საკუთრებაშია.

ლონდონის “ტოტენჰემის” ინგლისელმა თავდამსხმელმა, ჰარი კეინმა პრესასთან საკუთარ ფორმასა და მომავალ მსოფლიო ჩემპიონატზე ისაუბრა, სადაც მან ინგლისის ნაკრები უნდა წარმოადგინოს.

“ვფიქრობ, რომ ყოველ წელს უფრო ძლიერი ვხდები. რა თქმა უნდა, მინდა, საუკეთესო ფეხბურთელის სტატუსისთვის ვიბრძოლო, ვის არ უნდა ეს? ჩემი მიზანი ყოველთვის ერთია – პირველობა.

რაც შეეხება მსოფლიო ჩემპიონატს, ჩვენ მომავალს ოპტიმისტურად ვუყურებთ. ვიცით, რომ ძალიან ბევრი შრომა მოგვიწევს და ამისთვის მზად ვართ.

ეს პირველი მსოფლიო ჩემპიონატი იქნება ჩემთვის და მოუთმენლად ველი მის დაწყებას. ბედნიერი ვარ, რომ ასეთი დონის ტიტულზე თამაშის შანსი მეძლევა, ყველაფერს გავაკეთებთ წარმატების მისაღწევად,” – აცხადებს კეინი.

ლონდონის “ტოტენჰემის” ინგლისელი შემტევი, დელე ალი, რომელიც მსოფლიოს ერთ-ერთ ყველაზე პერსპექტიულ მოთამაშედ ითვლება, აღიარებს, რომ მაურისიო პოჩეტინო მის კარიერაში უდიდეს როლს ასრულებს.

“პოჩეტინო ჩემთვის უმნიშვნელოვანესი ადამიანია, ის ძალიან ბევრჯერ დამეხმარა და მისი ხელშეწყობით მოვედი აქამდე. მოედნის გარეთაც ძალიან მადგება და მეხმარება მისი რჩევები.

პოჩეტინო ჩემს კარიერაში უდიდეს როლს თამაშობს. ახალგაზრდა ფეხბურთელებისთვის ძალიან მნიშვნელოვანია, როდესაც იციან, რომ გვერდით ისეთი მწვრთნელი უდგათ, რომელსაც სჯერა მათი შესაძლებლობების.

გუნდის თითოეული წევრი ენდობა მას. დარწმუნებულები ვართ, რომ მის მიერ მიღებული ყოველი გადაწყვეტილება მართებულია და სწორ გზაზე მივყავართ,” – აცხადებს ალი.

სტატისტიკისთვის გეტყვით, რომ პრემიერ ლიგის მიმდინარე სეზონში დელე ალიმ 11 მატჩი ჩაატარა და ამ დროის მანძილზე 3-ჯერ შეძლო მეტოქის კარის აღება.