ტატა მარტინო: „ჩემპიონობისთვის ბრძოლა გრძელდება“

ესპანეთის პრიმერადივიზიონის 27-ე ტურში „ბარსელონა“ სტუმრად „ვალიადოლიდთან“ ანგარიშით 0:1 დამარცხდა. კატალონიური გუნდის მთავარმა მწვრთნელმა ხერარდო მარტინომ განაცხადა, რომ „ბარსა“ სასურველ ფორმაში არ არის, თუმცა მისი ფეხბურთელები ჩემპიონობისთვის ბოლომდე იბრძოლებენ.

„სანამ მათემატიკური შანსი გვექნება, ტიტულისთვის ვიბრძოლებთ. „ვალიადოლიდის“ წინააღმდეგ გამართულ მატჩში მარდად ვერ ვმოქმედებდით, მით უფრო მეტოქის ნახევარზე. სათამაშო უპირატესობა ხელთ ვერ ვიგდეთ. ბურთს კი ვფლობდით, მაგრამ სიღრმეში ვერ ვიწევდით.

გასაგებია, რომ ჩემი გუნდი სასურველ ფორმაში არ არის. „რეალთან“ კონკურენციისთვის სრულყოფილად უნდა მოქმედებდე“, – ციტირებს ტატა მარტინოს სიტყვებს ესპანური პრესა.

ბექა დოგრაშვილი