“რეალი” ესპანეთის თასის გათამაშებიდან მოკვეთეს

ესპანეთის ფეხბურთის ფედერაციამ მადრიდის “რეალი” ქვეყნის თასის 2015-16 წლების სეზონის გათამაშებიდან მოკვეთა.

შეგახსენებთ, რომ ტურნირის მეთექვსმეტედფინალურ ეტაპზე “კადისის” წინააღმდეგ გამართულ პირველ მატჩში (3:1) “სამეფო კლუბმა” რუსი ნახევარმცველი დენის ჩერიშევი ათამაშა, რომელსაც გასული წლის გათამაშებიდან დისკვალიფიკაცია ჰქონდა გადმოყოლილი. ჩერიშევმა სამი ყვითელი ბარათი 2014-15 წლების სეზონში მიიღო, როდესაც იჯარის წესით “ვილიარეალის” ღირსებას იცავდა. ამის გამო “კადისმა” დაიჩივლა, ქვეყნის ფეხბურთის ფედერაციამ კი სარჩელი დააკმაყოფილა.

აღსანიშნავია, რომ “კადისთან” გამართული მატჩის მე-3 წუთზე ანგარიში სწორედ დენის ჩერიშევმა გახსნა.

ანალოგიური შემთხვევა გასულ წელსაც მოხდა. მაშინ “ოსასუნას” “მირანდესთან” დაპირისპირებაში ტექნიკური მარცხი ჩაუთვალეს.