ზიდანი: “მინდა, “რეალის” თავკაცის პოსტზე მრავალი წლის განმავლობაში ვიმუშაო”

პრესაში გავრცელდა ინფორმაცია, რომლის თანახმადაც, მადრიდის “რეალის” მთავარმა მწვრთნელმა ზინედინ ზიდანმა შესაძლოა, დაკავებული პოსტი დატოვოს. ჟურნალისტებმა ფრანგ სპეციალისტს აღნიშნულის შესახებ ჰკითხეს, რაზეც ზიდანმა უპასუხა, რომ “სამეფო კლუბში” თავს ბედნიერად გრძნობს.

“მსოფლიოს საუკეთესო კლუბში ვმუშაობ. წნეხს არ ვგრძნობ. ვაკეთებ იმ საქმეს, რომელიც მომწონს. შესაბამისად, თავს ბედნიერ ადამიანად მივიჩნევ. ჩემთვის “რეალში” მუშაობა საკუთარი თავის რეალიზების შესაძლებლობაა. შესანიშნავ ფეხბურთელებთან ვმუშაობ და მათთან ერთად ვსწავლობ. იმედი მაქვს, რომ “რეალის” თავკაცის პოსტზე კიდევ მრავალი წლის განმავლობაში ვიმუშავებ”, – ზიდანის კომენტარი ესპანურმა გამოცემა “ასმა” გამოაქვეყნა.