მოდრიჩი: “ეს ფრე გამარჯვებას ჰგავს”
ესპანეთის პრიმერადივიზიონის მე-14 ტურში “ბარსელონასა” და მადრიდის “რეალს” შორის “ნოუ კამპზე” გამართული მატჩი ფრედ, ანგარიშით 1:1 დასრულდა. ქულა “სამეფო კლუბმა” ბოლო წუთზე სერხიო რამოსის მიერ გატანილი გოლით გადაარჩინა. მატჩი მადრიდელთა ნახევარმცველმა ლუკა მოდრიჩმა შეაჯამა.
“ძალზედ მნიშვნელოვანია, რომ ქულა მოვიპოვეთ. არ დავნებდით და ბოლომდე ვიბრძოლეთ.
კარგად ვითამაშეთ, განსაკუთრებით პირველ ტაიმში. მეორე ნახევარში მოედანზე მეტოქე უფრო იყო დომინანტი და დაწინაურდა კიდეც, მაგრამ ჩვენ არ დავნებდით. ასეთ ბრძოლაში მოპოვებული ფრე გამარჯვებას ჰგავს.
ძალიან მნიშვნელოვანია, რომ სატურნირო ცხრილში ლიდერობა შევინარჩუნეთ. ასევე უნდა გავაგრძელოთ ასპარეზობა. კარგ ფორმაში ვართ და თავდაჯერებულად ვთამაშობთ. 33 მატჩია, არ წაგვიგია და ეს შემთხვევითი არ არის. გუნდში მსოფლიო დონის ფეხბურთელები არიან, ხარისხიან ფეხბურთს ვუჩვენებთ და თუ გუნდურად ვითამაშებთ და მოედანზე ძალისხმევას არ დავიშურებთ, ჩვენი დამარცხება ძალიან რთული იქნება”, – მოდრიჩის კომენტარი “რეალის” ოფიციალურ ვებგვერდზე გამოქვეყნდა.
