არგენტინული კლუბი ანდრეს ინიესტასთან მოლაპარაკებას აწარმოებს

იაპონური “ვისელ კობეს” კაპიტანმა ანდრეს ინიესტამ კარიერა შესაძლოა არგენტინის ჩემპიონატში გააგრძელოს.

Goal.com-ის ცნობით, “ესტუდიანტესის” პრეზიდენტმა ხუან სებასტიან ვერონმა დაადასტურა გავრცელებული ინფორმაცია, რომლის თანახმადაც, არგენტინული კლუბი ესპანელ ფეხბურთელთან შესაძლო ტრანსფერის თაობაზე მოლაპარაკებას აწარმოებს.

შეგახსენებთ, რომ 35 წლის ნახევარმცველი “ვისელ კობეში” “ბარსელონადან” 2018 წლის ზაფხულში გადავიდა. მხარეებს შორის გაფორმებულ შრომით ხელშეკრულებას ვადა 2021 წლის 31 იანვრის ჩათვლით აქვს. ამ დროის განმავლობაში ინიესტამ იაპონური კლუბის რიგებში 39 მატჩი ჩაატარა, ათი გოლი გაიტანა და ცხრა შედეგიანი გადაცემა მიითვალა.

სპეციალიზებული ინტერნეტპორტალი Transfermarkt-ი ანდრეს ინიესტას სატრანსფერო ღირებულებას 5,5 მილიონ ევროდ აფასებს.