კრისტიან ვიერი: “როდესაც მესი კარიერას დაასრულებს, ტელევიზორს გადავაგდებ”
იტალიის ნაკრების ყოფილმა თავდამსხმელმა კრისტიან ვიერიმ “ბარსელონას” ლიდერ ლიონელ მესის შესახებ ისაუბრა. შეგახსენებთ, რომ არგენტინელმა ფეხბურთელმა ჩემპიონთა ლიგის ჯგუფურ ეტაპზე ტურინის “იუვენტუსის” წინააღმდეგ წუხელ ჩატარებულ მატჩში (2:0) საგოლე გადაცემა მიითვალა და თერთმეტმეტრიანიც გაიტანა.
ვიერიმ CBS Sports-ის ეთერში თქვა:
“მესი ჯადოქარია, ის ფეხბურთის ჰარი პოტერია. როდესაც ლეო კარიერას დაასრულებს, ტელევიზორს გადავაგდებ. Netflix-ზე სერიალების ყურებას დავიწყებ, რადგან ფეხბურთიდან მესის წასვლის შემდეგ საყურებელი აღარაფერი იქნება.
“ბარსელონა” სრულიად ახალ დონეზე თამაშობს. ვერ ვიგებ, როგორ წააგო ამ გუნდმა მადრიდის “რეალთან”, მაგრამ “იუვენტუსთან” ჩატარებულმა მატჩმა დატოვა შთაბეჭდილება, თითქოს ამ სეზონში “ბარსას” დამარცხება არცერთ სხვა გუნდს არ შეუძლია. სრული სიგიჟეა, როდესაც გუნდში გყავს მესის მსგავსი “ათიანი”.
