სუარესმა “ბარსელონაში” აგუეროს გადასვლაზე კომენტარი გააკეთა
მადრიდის “ატლეტიკოს” თავდამსხმელმა ლუის სუარესმა “ბარსელონაში” სერხიო აგუეროს გადასვლის შესახებ კომენტარი გააკეთა. შეგახსენებთ, რომ 32 წლის არგენტინელმა ფეხბურთელმა “მანჩესტერ სიტი” დატოვა და კატალონიურ გუნდს თავისუფალი აგენტის სტატუსით შეუერთდა.
“საუკეთესოებთან შეხვედრა ყოველთვის დიდი გამოწვევაა. უკვე დიდი ხანია, კუნი უმაღლეს დონეზე თამაშობს და თავისი ყველა გუნდის წარმატებაში აქვს მნიშვნელოვანი წვლილი შეტანილი. მისთვის კარგი იქნება მსოფლიოს საუკეთესო ფეხბურთელთან ერთად თამაში. ის მესის მეგობარია. სერხიო ლეოსთან გამართულ წვეულებაზე ვნახე. მოხარული ვარ, რომ “ბარსელონამ” აგუეროს სახით შესანიშნავი ფეხბურთელი დაიმატა”, – ციტირებს სუარესის სიტყევბს “მუნდო დეპორტივო”.
შეგახსენებთ, რომ ლუის სუარესი “ბარსელონას” ღირსებას 2014-დან 2020 წლამდე იცავდა. ურუგვაელი ფეხბურთელის სურვილის მიუხედავად, 2020 წელს კლუბის ხელმძღვანელობამ მისი გაშვების გადაწყვეტილება მიიღო.
