“აიაქსს” ლუის საურესის დაბრუნება სურს
“ბარსელონას” თავდამსხმელმა ლუის სუარესმა პროფესიული კარიერა შესაძლოა, ნიდერლანდებში გააგრძელოს.
ურუგვაელი ჟურნალისტი ენსო ოლივეირა იუწყება, რომ 33 წლის ფეხბურთელის დაბრუნებით ამსტერდამის “აიაქსი” არის დაინტერესებული. ნიდერლანდური კლუბი შესაძლო ტრანსფერის თაობაზე “ბარსელონას” მიმართავს, თუმცა ყველაფერი თავად სუარესსა და “ბლაუგრანაზე” იქნება დამოკიდებული.
შეგახსენებთ, რომ ლუის სუარესი “აიაქსის” ღირსებას 2007-დან 2011 წლამდე იცავდა, რა დროის განმავლობაშიც ნიდერლანდების ჩემპიონატი და ქვეყნის თასი მოიგო. რამდენიმე დღის ხნის წინ გავრცელებული ინფორმაციით, “ბარსელონა” გუნდიდან ურუგვაელი ფეხბურთელის გაშვებას აპირებს.
ლუის სუარესი კატალონიურ გუნდში 2014 წლიდან თამაშობს. მან 2019-2020 წლების სეზონში ყველა საკლუბო ტურნირზე ერთად 36 მატჩი ჩაატარა, 21 გოლი გაიტანა და ათი შედეგიანი გადაცემა მიითვალა. მას “ბარსელონასთან” შრომითი ხელშეკრულება 2021 წლის ზაფხულში ეწურება.
