ანჩელოტი: „გამარჯვება უფრო მნიშვნელოვანია, ვიდრე ის, თუ როგორ მოიპოვებ ამ გამარჯვებას“
ესპანეთის პრიმერადივიზიონის 27-ე ტურში მადრიდის „რეალმა“ ვალენსიური „ლევანტე“ ანგარიშით 3:0 გაანადგურა. მატჩის შემდეგ „სამეფო კლუბის“ მთავარმა მწვრთნელმა კარლო ანჩელოტიმ საკუთარი გუნდის მიმართ კმაყოფილება გამოხატა.
„კონცენტრირება სრულად ამ მატჩზე მოვახდინეთ. ძალიან კარგი თამაში იყო. ბევრი მომენტი გვქონდა, თუმცა „ლევანტეს“ მეკარემ ფანტასტიური შეხვედრა ჩაატარა. მომდევნო მატჩზე ფიქრი უნდა დავიწყოთ, დამდეგ შეხვედრაშიც უნდა გავიმარჯვოთ. პირველადგილოსან გუნდს ექვსი ქულით ჩამოვრჩებოდით, ახლა კი ლიდერები ჩვენ ვართ.
„რეალი“ კარგ მდგომარეობაშია როგორც ეროვნულ ჩემპიონატში, ასევე სხვა ტურნირებზე. გუნდში კარგი ატმოსფეროა. თამაში ასეთივე სულისკვეთებით უნდა გავაგრძელოთ.
მთავარია, თავი ზედმეტი ფიქრებით არ გადავიტვირთოთ და კონცენტრირება კონკრეტულ მატჩზე მოვახდინოთ. ჩემპიონატში გამარჯვება უფრო მნიშვნელოვანია, ვიდრე ის, თუ როგორ მოიპოვებ ამ გამარჯვებას“, – ანჩელოტის სიტყვები „რეალის“ ოფიციალურ ვებ-გვერდზე გამოქვეყნდა.
ბექა დოგრაშვილი
