მანუელ პელეგრინი “ბეტისს” უთავკაცებს

ცნობილი ჩილელი სპეციალისტი მანუელ პელეგრინი უახლოეს პერიოდში ესპანურ “ბეტისს” ჩაუდგება სათავეში.

მხარეებს შორის მოლაპარაკების პროცესი დაახლოებით სამი კვირის განმავლობაში მიმდინარეობდა და შეთანხმებით დასრულდა. Onda Cero-ს ინფორმაციით, პელეგრინი ანდალუსიურ კლუბთან ორწლიან შრომით ხელშეკრულებას გააფორმებს.

შეგახსენებთ, რომ 66 წლის სპეციალისტი ბოლოს “ვესტ ჰემ იუნაიტედს” ედგა სათავეში, საიდანაც გასული წლის დეკემბერში გაათავისუფლეს. პელეგრინის ისეთ კლუბებში უმუშავია, როგორებიცაა მადრიდის “რეალი”, “მალაგა”, “ვილიარეალი” და “მანჩესტერ სიტი”.

“ბეტისს” ესპანეთის პრიმერადივიზიონის სატურნირო ცხრილში მე-14 პოზიცია უკავია და გათამაშების დასრულებამდე ოთხი ტურით ადრე გასავარდნ ზონას 9 ქულით უსწრებს.