საქართველოს ნაკრების მცველმა, გურამ კაშიამ შვედეთთან მატჩის წინ კომენტარი გააკეთა.

“ბათუმში გამართული ბოლო ორი მატჩი, ისე გამოვიდა, რომ ფაქტობრივად ნეიტრალურ მოედანზე ვითამაშეთ და ფეხბურთელებიც ვერ ვგრძნობდით, რომ საშინაო შეხვედრას ვმართავდით. მაგალითად ესპანეთის ნაკრების წინააღმდეგ გულშემატკივრებმა უდიდესი როლი ითამაშეს. აქედან გამომდინარე, ვთვლი, რომ ხვალინდელ შეხვედრაში მათი მხარდაჭერა ძალიან მნიშვნელოვანი იქნება. დიდი იმედი მაქვს, რომ შვედეთის წინააღმდეგ გასამართი მატჩით ბათუმში ქულების მოგროვებას დავიწყებთ და ვთვლი, რომ ქომაგები ამაში დაგვეხმარებიან”, – ციტირებს კაშიას სიტყვებს Nakrebi.Ge.

შეგახსენებთ, რომ მსოფლიოს ჩემპიონატის საკვალიფიკაციო ეტაპზე საქართველო-შვედეთის დაპირისპირება ბათუმის აჭარაბეთ არენაზე 21:00 საათზე დაიწყება.

საქართველოს ნაკრებმა ბათუმის არენაზე 24 ფეხბურთელით ივარჯიშა და გუნდს მხოლოდ “აპოელის” თავდამსხმელი თორნიკე ოქრიაშვილი დააკლდა.

უცნობია მიზეზი თუ რატომ გამოტოვა ვარჯიში ოქრიმ, თუმცა ხვალ მისი თამაში ჯერჯერობით გამორიცხული არ არის.

თუ თორნიკე არ იქნება, მაშინ მას ვაკო ყაზაიშვილი შეცვლის.

11 ნოემბერს, საქართველოს ეროვნული ნაკრები მსოფლიო ჩემპიონატის საკვალიფიკაციო ეტაპზე შვედეთს დაუპირისპირდება.

სტუმართა განაცხადშია ზლატან იბრაჰიმოვიჩი, თუმცა ჯერ არ არის ცნობილი, ითამაშებს თუ არა ის საქართველოს წინააღმდეგ. შვედეთის ნაკრები 14 ნოემბერს ესპანეთსაც ესტუმრება.

შვედეთის ნაკრების მთავარ მწვრთნელს, იანე ანდერსონს საქართველოსთან მატჩამდე ერთი დღით ადრე ჰკითხეს, ითამაშებს თუ არა იბრაჰიმოვიჩი ბათუმში, თუმცა მან სასტარტო შემადგენლობის შესახებ არ ისაუბრა.

“რა თქმა უნდა, ზლატანს ჩვენს გუნდში თამაში სურს. ის, საკუთარი გამოცდილებითა და თვისებებით მნიშვნელოვანი ფიგურაა. მიხარია, რომ ის შემადგენლობაში გვყავს. სასტარტო თერთმეტეული უკვე შერჩეული მყავს, თუმცა ამაზე საუბარს არ ვაპირებ”, – განაცხადა იანე ანდერსონმა.