კატალონიის “ბარსელონას” პრეზიდენტი, ჟოან ლაპორტა, მთავარი მწვრთნელის პოსტზე რონალდ კუმანის შემცვლელს ეძებს. კატალონიური გამოცემების ცნობით ლაპორტას ყველაზე მეტად ანდრეა პირლოს კანდიდატურა მოსწონს.

“იუვენტუსის” ყოფილი თავკაცი ერთადერთ კანდიდატურას არ წარმოადგენს. კლუბის ხელმძღვანელები აქტიურად აკვირდებიან ანტონიო კონტეს, ფილიპ კოკუსა და ხავის გარშემო არსებულ ვითარებებსაც.

კატალონიელებს კვლავაც სურთ ერიკ ტენ ჰაგის მოწვევა, თუმცა “აიაქსის” თავკაცმა დღეს განაცხადა, რომ ამ თანამდებობით დაინტერესებული არ არის და მხოლოდ ამსტერდამულ კლუბზეა კონცენტრირებული.

შეგახსენებთ, რომ რონალდ კუმანი “კამპ ნოუზე” 2020 წლიდან მუშაობს. მისი ხელმძღვანელობით “ბლაუგრანამ” მხოლოდ კოპა დელ რეის მოგება შეძლო.

კატალონიის “ბარსელონას” ლეგენდა, ანდრეს ინიესტა, “ბარსელონაში” ხავის დაბრუნების შანსებზე აკეთებს კომენტარს. შეგახსენებთ, რომ ესპანელი ფეხბურთელი ამჟამად “ვისელ კობეს” ღირსებას იცავს.

კითხვას, არის თუ არა ხავი მზად “ბარსელონას” თავკაცის პოსტის ჩასაბარებლად, ინიესტამ ასე უპასუხა – “დიახ, ვთვლი, რომ ის მზად არის. ხავი სწორედ იმისთვის მუშაობდა და სწავლობდა, რომ შემდეგში “ბარსელონა” გაეწვრთნა.

ვთვლი, რომ ხავის ყველაფერი აქვს იმისთვის, რომ ასეთი დონის გამოწვევა მიიღოს,” – ვციტირებთ ანდრეს ინიესტას სიტყვებს.

შეგახსენებთ, რომ “ბლაუგრანადან” მესის წასვლის შემდეგ გუნდში რთული სიტუაციაა და აქტიურად განიხილება რონალდ კუმანის დათხოვნის საკითხიც.