„რეალმა“ ბეილის სერიოზული ტრავმა უარყო

ესპანურ „მარკაში“ გამოქვეყნებულ ინფორმაციას, რომლის მიხედვითაც, მადრიდის „რეალის“ ნახევარმცველ გარეტ ბეილს სერიოზული ტრავმა დაუდგინდა, „სამეფო კლუბი“ ოფიციალური განცხადებით გამოეხმაურა.

„ინფორმაცია, რომლის მიხედვითაც, ბეილს  მალთაშუა თიაქრის დიაგნოზი დაუსვეს, სიმართლეს არ შეესაბამება. გასაკვირია, მაგრამ ფაქტია, რომ  ჩვენი კლუბის სამედიცინო შტაბის წევრებმა ჟურნალისტებს ფეხბურთელის რეალური ტრავმის შესახებ ინფორმაცია ჯერ კიდევ ხუთშაბათს, 10 ოქტომბერს მიაწოდეს. ბეილს დისკოს მცირე დეფორმაცია დაუდგინდა, რაც ძალზედ გავრცელებულია ფეხბურთელებში და ეს მათ თავიანთი პროფესიული საქმიანობის ნორმალურად შესრულებაში ხელს არ უშლის“, – ნათქვამია „რეალის“ განცხადებაში.

ბექა დოგრაშვილი