“რეალში” ზიდანის შემცვლელად რაულს ხედავენ

შესაძლოა, მადრიდის “რეალის” მთავარი მწვრთნელის პოსტზე რაულ გონსალეს ბლანკო ვიხილოთ.

გუშინ გაჩნდა ინფორმაცია, რომლის თანახმადაც, მიმდინარე სეზონის დასრულების შემდეგ ზინედინ ზიდანი “სამეფო კლუბის” თავკაცის თანამდებობას დატოვებს. თავად ფრანგი სპეციალისტი არ გამორიცხავს, რომ ეს მართლაც მოხდეს.

“რეალის” ხელმძღვანელობა ზიდანის შემცვლელად რაულის კანდიდატურას მოიაზრებს. ისინი სხვა სპეციალისტების ვარიანტებსაც განიხილავენ, თუმცა რაული სიაში პირველია. შეგახსენებთ, რომ 43 წლის მწვრთნელი დღესდღეობით “რეალის” სარეზერვო გუნდ “კატილიას” თავკაცობს.

რაული მოთამაშის რანგში “რეალის” ღირსებას 1994-დან 2010 წლამდე იცავდა. მან “სამეფო კლუბის” შემადგენლობაში 741 მატჩი ჩაატარა, 324 ბურთი გაიტანა და 112 საგოლე გადაცემა მიითვალა.