ბოლო დროს ევროპული მედია რაჰიმ სტერლინგის „ლივერპულიდან“ შესაძლო წასვლის შესახებ ალაპარაკდა. სავარაუდო სატრნასფერო ფასად საკმაოდ მაღალი თანხები სახელდება. წარმოგიდგენთ მერსესაიდული კლუბის მიერ აქამდე მაღალ თანხად გაშვებული ფეხბურთელების ათეულს.
მაიკლ ოუენი (მადრიდის „რეალში“ 12 მილიონ ევროდ, 2004 წელი)
მაიკლ ოუენი „ენფილდს“ „ოქროს ბიჭუნას“ სტატუსით ტოვებდა. სტერლინგთან შედარებით, ის უფრო ასაკოვანი და გამოცდილი იყო. ასევე მას „ოქროს ბურთი“ ჰქონდა მოგებული. სამწუხაროდ, „ბერნაბეუზე“ ინგლისელმა იმედები ვერ გაამართლა და მადრიდელებმა ის ოპერატიულად „ნიუკასლში“ გაუშვეს. თანაც, „რეალმა“ ამ ტრანსფერით მოგება ნახა, რამეთუ ინგლისელი 25 მილიონი ევროს სანაცვლოდ გაუშვა. იმის შემდეგ მაიკლის სატრანსფერო ფასი არ აწეულა. საინტერესოა, რა იქნებოდა, თუ მას „ენფილდი“ არ დაეტოვებინა? სავარაუდოდ, ეს თანამედროვე ინგლისური ფეხბურთის ერთ-ერთი მთავარი კითხვაა…
რაულ მეირელეში („ჩელსიში“ 13,5 მილიონ ევროდ, 2011 წელი)
მეირელეში „ლივერპულში“ „პორტუდან“ 13 მილიონ ევროდ გადავიდა, ერთ წელიწადში კი მერსესაიდელებმა ის ნახევარი მილიონით უფრო მაღალ ფასად გაყიდეს. კიდევ ერთ წელიწადში მან ნისლიანი ალბიონი დატოვა და თურქეთისკენ გაეშურა. არც ისე დიდი მიღწევების მიუხედავად, მეირელეში ერთ-ერთი ის ფეხბურთელია, რომელიც „წითლებმა“ მაღალ ფასად გაყიდეს.
პიტერ კრაუჩი („პორტსმუტში“ 13,7 მილიონ ევროდ, 2008 წელი)
„პორტსმუტმა“ პრემიერლიგა სწორედ ასეთი ტრანსფერების გამო დატოვა. „ლივერპულმა“ კი ამ გარიგებით მოგება ნახა, რამეთუ პიტერი „საუთჰემპტონიდან“ 10,5 მილიონ ევროდ მოიყვანა.
რობი კინი („ტოტენჰემში“ 16,7 მილიონ ევროდ, 2009 წელი)
კინის ტრანსფერი მერსესაიდული კლუბის ისტორიაში ერთ-ერთი ყველაზე უცნაურია. 2008 წლის ზაფხულში ირლანდიელი „წითლებში“ 24 მილიონი ევროს სანაცვლოდ გადავიდა, თუმცა ერთ წელიწადში არც ისე წარმატებული თამაშის გამო ლონდონში დაბრუნება მოუწია. თანაც, გაცილებით ნაკლებ ფასად…
რობი ფაულერი („ლიდსში“ 16,8 მილიონ ევროდ, 2001 წელი)
რობი ფაულერის სანაცვლოდ „ლივერპულმა“ 2001 წელს მოგება ნახა. თუმცა, „ლიდსში“ ფეხბურთელმა, რომელსაც „ღმერთსაც“ კი უწოდებდნენ, იმედები ვერ გაამართლა და „მანჩესტერ სიტიდან“ ტრანზიტით კვლავ მერსესაიდელებს დაუბრუნდა.
ენდი კეროლი („ვესტ ჰემში“ 17,5 მილიონ ევროდ, 2013 წელი)
კიდევ ერთი უიღბლო ტრანსფერი. ამ ადამიანის სანაცვლოდ ლივერპულელებმა 2010 წელს „ნიუკასლს“ 41 მილიონი ევრო გადაუხადეს, მაგრამ ასეთი თანხის დახარჯვის მიუხედავად, კლუბმა მაშინდელი პრობლემები ვერ მოაგვარა. ენდი იმდენად ცუდ ფეხბურთს აჩვენებდა, რომ მის სანაცვლოდ „ვესტ ჰემის“ მიერ გადახდილი თანხაც კი საკმაოდ მაღალია. ამ მოთამაშესთან პრობლემა ახლა ლონდონურ კლუბსაც აქვს…
ხავიერ მასკერანო („ბარსელონაში“ 20 მილიონ ევროდ, 2010 წელი) და ჩაბი ალონსო (მადრიდის „რეალში“ 35,4 მილიონ ევროდ, 2009 წელი)
მიუხედავად იმისა, რომ ორი ეს ტრანსფერი სხვადასხვა დროს განხორციელდა, ისინი მაინც ერთად უნდა მოვიხსენიოთ. ორივე ფეხბურთელი „ლივერპულის“ ცენტრში შეუცვლელი იყო, რაც მათი წასვლის შემდეგაც დადასტურდა – გუნდმა მათი სათანადო შემცვლელები საბოლოოდ ვერ იპოვა. დიახ, კლუბმა მშვენიერი კომპენსაცია მიიღო, მაგრამ, როგორც ოუენის შემთხვევაში, გულშემატკივრებს კითხვა დაებადათ – რა მოხდებოდა, თუ ისინი „ენფილდზე“ დარჩებოდნენ?
ფერნანდო ტორესი („ჩელსიში“ 58,5 მილიონი ევროს სანაცვლოდ, 2011 წელი)
ტრანსფერი, რომლის მიმართაც „ლივერპულის“ გულშემატკივრებს სხვადასხვა დამოკიდებულება აქვთ. ერთი მხვრივ, კლუბის ბიუჯეტი მნიშვნელოვნად შეივსო, სხვა მხვრივ, ეს თანხა კლუბმა ნახსენებ ენდი კეროლს დაახარჯა. მესამე მხვრივ კი, „წითლებში“ ლუის სუარესიც გადავიდა, რომლის წყალობითაც ფერნანდო „ენფილზე“ სულ მალე დაავიწყდათ.
ლუის სუარესი („ბარსელონაში“ 81 მილიონ ევროდ, 2014 წელი)
ეს ტრანსფერი, ურუგვაელის გარშემო შექმნილი სკანდალის მიუხედავად, „ლივერპულის“ გულშემატკივრებისთვის დიდი დანაკარგია, რომელიც მათ ჯერ არ დაუვიწყებიათ. არადა, ამ ადამიანმა გუნდს თითქმის პრემიერლიგა მოაგებინა და ჩემპიონთა ლიგაზე დააბრუნდა. სამწუხაროა, რომ მიღებული თანხა კლუბის ხელმძღვანელობამ კვლავ არასწორად დახარჯა და სამხრეთ ამერიკელის სათანადო შემცვლელი ჯერ არ მოუყვანია. ეს მაგალითები კიდევ ერთხელ ადასტურებენ, რომ ფეხბურთში ფინანსები წარმატების გარანტიას არ იძლევიან.
