უეფას ევროპის ლიგის მესამე საკვალიფიკაციო ეტაპზე “გაბალასა” და კვიპროსის “აპოლონს” შორის აზერბაიჯანში გამართული განმეორებითი მატჩის (1:0) დროს ვნებათაღელვა არამხოლოდ მოედანზე, არამედ ტრიბუნაზეც შეიმჩნეოდა.
შეხვედრის მიმდინარეობისას კლუბის ფანები სამართალდამცველებს დაუპირისპირდნენ. ფიზიკური შეხლა-შემოხლის დროს ზოგიერთი ქომაგი დაშავდა და საავადმყოფოში გადაიყვანეს, ზოგიერთს კი კლუბის სამედიცინო პერსონალმა ადგილზევე აღმოუჩინა პირველადი დახმარება.
გთავაზობთ ამ დაპირისპირების ვიდეომასალას.
უეფას ევროპის ლიგის მეთექვსმეტედფინალურ ეტაპზე როტერდამის “ფეინოორდის” წინააღმდეგ გასამართ მატჩში “რომას” საქომაგოდ იტალიელი ტიფოზები გაჰყვნენ. გავრცელებული ინფორმაციით, ჰოლანდიაში ჩასულ ქომაგებს ადგილობრივი სამართალდამცველი ორგანოს წარმომადგენლებთან უთანხმოება მოუვიდათ. აღშფოთებულმა ტიფოზებმა ჰოლანდიაში იტალიის საელჩოსა და ჟურნალისტებს პრეტენზიით მიმართეს.
“ჰოლანდიის პოლიცია ცხოველებივით მოგვექცა. თვითმფრინავის ტრაპიდან ორი ავტობუსით ღია მინდორზე გადაგვიყვანეს. წვიმაში გაგვაჩერეს, ფოტოებს გვიღებდნენ, პირად მონაცემებს იწერდნენ. ბარგი ჩვენს დაუსწრებლად გაჩხრიკეს.
2-საათნახევრის განმავლობაში ცხოველებივით გვექცეოდნენ. ბუნებრივი მოთხოვნილებების დაკმაყოფილების მიზნით ხის ქვეშ გადაადგილება ვთხოვეთ, თუმცა არც ამ პროცესმა ჩაიარა პოლიციის ზედამხედველობის გარეშე”, – ერთ-ერთი ტიფოზის კომენტარი Football Italia-მ გამოაქვეყნა.
შეგახსენებთ, რომ ერთი კვირის წინათ “ფეინოორდის” ფანებმა რომში არეულობა მოაწყვეს, რისთვისაც 16-თვიანი პატიმრობა მიესაჯათ. იტალიის დედაქალაქში მომხდარმა არეულობამ 2,8 მილიარდი ევროს ზარალი გამოიწვია.
უეფას ევროპის ლიგის მეთექვსმეტედფინალური ეტაპი გაიხსნა. “რომასა” და როტერდამის “ფეინოორდს” შორის გამართული მატჩის დაწყებამდე რომის პოლიციამ ჰოლანდიური გუნდის 22 ქომაგი დააკავა.
“გარდიანის” ცნობით, “ფეინოორდის” ფანებმა ქალაქის ცენტრში არეულობა მოაწყვეს, შემდეგ კი სამართალდამცველებთანაც იჩხუბეს, რის გამოც პოლიცია იძულებული გახდა, ხელკეტები და ცრემლსადენი გაზი გამოეყენებინა. დაკავებულიდან მინიმუმ რვა პირს ექვსთვიანი პატიმრობა და ჯარიმის სახით 45 ათასი ევროს გადახდა ემუქრება.
მატჩი “რომასა” და “ფეინოორდს” შორის ფრედ, ანგარიშით 1:1 დასრულდა.
ესპანეთის ეროვნული გუნდისა და “ბარსელონას” მცველ ჟერარ პიკეს კვირას ღამით, ლუქსემბურგის ნაკრების წინააღმდეგ გამართული მატჩის შემდეგ მომხდარი შემთხვევის გამო პასუხისგება მოუწევს.
Vanguardia-ს ცნობით, ესპანელმა ფეხბურთელმა პოლიციელებთან იჩხუბა. წყაროს თანახმად, “ბარსელონას” მცველის ძმამ მარკ პიკემ პარკირების წესი დაარღვია, რის გამოც პოლიციამ იგი დააჯარმა. მას ფეხბურთელიც თან ახლდა, რომელიც ავტომობილიდან გადმოვიდა და პოლიციელებს უპატივცემულოდ მოექცა. წყაროს თანახმად, პიკე იმაზე ამახვილებდა ყურადღებას, რომ ცნობილი პიროვნებაა და ჯარიმის გადახდას ვერავინ აიძულებდა, პოლიციის თანამშრომლებს გათავისუფლებით დაემუქრა და მათ სიტყვიერი შეურაცხყოფაც მიაყენა. პიკეს ძმა ჯარიმის გადახდა აპირებდა, თუმცა ფეხბურთელმა მას ფული ხელიდან გამოგლიჯა, კუპიურები გადახია და პოლიცელებს ფეხებთან დაუყარა.
მოგვიანებით ჟერარ პიკემ მომხდართან დაკავშირებით კომენტარი გააკეთა:
“ამ საქმეში ბევრი რამ გაზვიადებულია, თუმცა ნებისმიერ შემთხვევაში, არასწორად მოვიქეცი. მაპატიეთ. ასეთი რამ აღარ განმეორდება”.
საქართველოს ფეხბურთის ფედერაცია დიდი ხანია აქტიურად თანამშრომლობს შინაგან საქმეთა სამინისტროსთან. წლის განმავლობაში, სფფ-მ ოფიციალური წერილით რამდენჯერმე მიმართა შსს-ს და სთხოვა უეფადან მიღებული ინფორმაციის გადამოწმება საქართველოს ეროვნულ ჩემპიონატში საეჭვო მატჩებთან დაკავშირებით.
რამდენიმე კვირის წინ, შედგა შეხვედრა საქართველოს ფეხბურთის ფედერაციის ხელმძღვანელებსა და შსს-ს ანტიკორუფციული სამსახურის ხელმძღვანელებს შორის, სადაც კიდევ ერთხელ დაისვა საკითხი ჩაწყობილი მატჩების გამოძიებასთან დაკავშირებით.
შინაგან საქმეთა სამინისტროს შესაბამისმა სამსახურებმა საქმეში გასარკვევად ორ კვირიანი ვადა ითხოვეს.
საქართველოს ფეხბურთის ფედერაცია მადლობას უხდის შინაგან საქმეთა სამინისტროს გაწეული სამუშაოსთვის და თანამშრომლობისთვის. გამოძიება გრძელდება და იმედი გვაქვს, ამ კორუფციულ გარიგებებში მონაწილე ყველა პირი და მხარე სათანადოდ აგებს პასუხს.
სფფ-ის პრესსამსახური
უეფას ევროპის ლიგის მესამე საკვალიფიკაციო ეტაპზე ბაქოს “ნეფთჩისა” და საჩხერის “ჩიხურას” შორის გამართულ მატჩში მომხდარ ინციდენტთან დაკავშირებით შინაგან საქმეთა სამინისტრომ სპეციალური განცხადება გამოაქვეყნა, რასაც აქვე გთავაზობთ:
“მიმდინარე წლის 31 ივლისს, აზერბაიჯანის დედაქალაქ ბაქოში გამართული – ბაქოს “ნეფჩთი”-სა და საჩხერის “ჩიხურა”-ს საფეხბურთო მატჩის დროს მომხდარი ინციდენტის შემდეგ, რომელშიც მონაწილეობდნენ “ქართული სპორტის ქომაგების” წარმომადგენლები, ვითარებაში გარკვევის მიზნით შინაგან საქმეთა სამინისტროს წარმომადგენლების მხრიდან მოხდა შეხვედრა და გასაუბრება აღნიშნულ ინციდენტში მონაწილე პირებთან, რომლებმაც განაცხადეს, რომ მათი საქციელი არ იყო პოლიტიკურად მოტივირებული და არ ისახავდა მიზნად არცერთი მეზობელი სახელმწიფოს სუვერენული უფლებების შელახვას ან შეურაცხყოფას.
“ქართული სპორტის ქომაგებმა” გააცნობიერეს თავიანთი ქმედებების პოლიტიკური შედეგები და აღნიშნეს, რომ მომავალში მათი მხრიდან მაქსიმალურად იქნება გააზრებული ყოველი ნაბიჯი, რათა სპორტულ ღონისძიებებზე მათი აქტიურობა არ იქცეს ორ მეგობარ-მეზობელ სახელმწიფოს შორის დაპირისპირების მიზეზად.
მოგეხსენებათ, რომ საფეხბურთო გუნდებს შორის განმეორებითი შეხვედრა მიმდინარე წლის 7 აგვისტოს, 21:00 საათზე, მ. მესხის სახელობის “ლოკომოტივის” სტადიონზე გაიმართება. შინაგან საქმეთა სამინისტრო მოუწოდებს ყველა გულშემატკივარს კორექტულობისაკენ და სტუმარი გუნდის გულშემატკივრების პატივისცემისაკენ. აქვე ხაზგასმით აღვნიშნავთ, რომ ყველა სამართალდამრღვევი პირი კანონის შესაბამისად მკაცრად დაისჯება”.
