ჭდე: საქართველოს ფეხბურთის ფედერაცია

27 დეკემბერს, ნოდარ ახალკაცის სახელობის თბილისის მე-9 საჯარო სკოლაში საქართველოს ფეხბურთის ფედერაციის ფინანსური მხარდაჭერითა და ვეტერან ფეხბურთელთა კავშირის ორგანიზებით, ნოდარ ახალკაცის ბიუსტი გაიხსნა. ბიუსტის გახსნის ღონისძიებას მისი ოჯახის წევრები, საქართველოს ფეხბურთის ფედერაციის ხელმძღვანელები და ვეტერანი ფეხბურთელები დაესწრნენ.

საქართველოს ფეხბურთის ფედერაციის პირველ პრეზიდენტს, ლეგენდარულ მწვრთნელსა და დიდ საფეხბურთო მოღვაწეს 2018 წლის 2 იანვარს 80 წელი შეუსრულდებოდა.

კახა ჭუმბურიძე: „ძალიან კარგი საქმე გაკეთდა ფეხბურთის ფედერაციის, თბილისის საკრებულოსა და მე-9 საჯარო სკოლის ხელმძღვანელობის ერთობლივი მუშაობით. ვფიქრობ, რომ ეს ხელს შეუწყობს დიდი ქართველი მწვრთნელისა და პიროვნების სახელის უკვდავყოფას.“

ალექსანდრე ჩივაძე: „ნოდარი თბილისის „დინამოს“ ისტორიაში მეოცე საუკუნის საუკეთესო მწვრთნელადაა აღიარებული. მისი წვლილი ქართულ ფეხბურთში ძალიან დიდია. იმას რასაც თბილისის „დინამომ“ 1981 წელს მიაღწია დიდწილად სწორედ ნოდარ ახალკაცის დამსახურებაა. რა თქმა უნდა, მისასალმებელია, რომ მე-9 სკოლას ნოდარ ახალკაცის სახელი მიენიჭა, თუმცა ჩვენ ვეტერანები თბილისის მერიას ვთხოვთ, რომ ნოდარ ახალკაცის ქუჩა გახსნას.“

ნოდარ ახალკაცი უმცროსი: „ჩვენ, რა თქმა უნდა, მოხარული ვართ. ოჯახის სახელით მსურს მადლობა გადავუხადო ყველა იმ ადამიანს და ორგანიზაციას ვინც მონაწილეობდა ამ საქმეში. საქართველოს ფეხბურთს ფედერაციას, ვეტერანთა კავშირს და თვითონ მოქანდაკეს, გოგი შხვაცაბაიას. გვეამაყება, რომ დღევანდელ დღეს მოხდა ნოდარ ახალკაცის დაფასება. 2 იანვარს 80 წელი შეუსრულდებოდა მას და მომავალ წელს კიდევ არის დაგეგმილი რამდენიმე ერთობლივი ღონისძიება. კიდევ ერთხელ დიდი მადლობა ყველას დაფასებისთვის, აქ მობრძანებისთვის და იმისთვის, რომ ამ ადამიანის სახელი ახსოვს ყველას ვისაც კი, ფეხბურთი უყვარს.“

Gff.Ge

საქარველოს ფეხბურთის ფედერაციის ეგიდით, 2018 წლის იანვარში რიგით მეორე ზამთრის თასი გაიმართება. ტურნირი ემსახურება ქართული საკლუბო ფეხბურთის პოპულარიზაციას და ზამთრის შესვენების გამრავალფეროვნებას. მასში მონაწილეობას მიიღებს ეროვნული ლიგისა და ეროვნული ლიგა 2-ის წარმომადგენელი 16 გუნდი.

ზამთრის თასის 2018 წლის გათამაშების მონაწილე 16 გუნდისგან ოთხი ჯგუფი დაკომპლექტდა:

ჯგუფი “ა”: “გაგრა”, “ტორპედო”, “რუსთავი”, “თელავი”.

ჯგუფი “ბ”: “დინამო თბ”, “კოლხეთი 1913”, “ვიტ ჯორჯია”, “ნორჩი დინამო”.

ჯგუფი “გ”: “სამტრედია”, “დილა”, “სიონი”, “შევარდენი 1906”

ჯგუფი “დ”: “საბურთალო”, “ლოკომოტივი”, “მერანი”, “ცხინვალი”.

ზამთრის თასის 2018 წლის გათამაშება გაიმართება უნივერსიტეტის ქუჩაზე მდებარე ოლიმპიური სასახლის დიდ დარბაზში.

საქართველოს ფეხბურთის ფედერაციისა და დავით პეტრიაშვილის სახელობის ფონდის ეროთობლივი პროექტი – „ფეხბურთის ექიმთა საგანმანათლებლო პროგრამა“ 15 დეკემბერს, პეტრიაშვილის სახელობის სტადიონზე დაიწყო. კურსი, რომელიც ქართულ ფეხბურთში დასაქმებული ექიმებისათვის ტარდება, საქართველოს ფეხბურთის ფედერაციის საგანმანათლებლო მიმართულების უახლესი პროექტია. მსმენელები სამი დღის განმავლობაში დაესწრებიან აღნიშულ კურსს, რომელსაც საქართველოს ეროვნული ნაკრების სამედიცინო ჯგუფის ხელმძღვანელი მერაბ ვარძუკაშვილი წარუძღვება და როგორც თეორიულ, ისე პრაქტიკულ კომპონენტს მოიცავს.

საქართველოს ფეხბურთის ფედერაციის პრესსამსახური

გასულ კვირას ვარშავამ UEFA GROW-პროგრამის პრინციპულ სემინარს უმასპინძლა. სემინარს უეფას ყველა წევრი ასოციაციის წარმომადგენლები ესწრებოდნენ, მათ შორის საქართველოდან ვიცე-პრეზიდენტი და უეფას მასობრივი ფეხბურთის განვითარების კომიტეტის წევრი ნიკა ჯღარკავა. პოლონეთის დედაქალაქში ევროპული ფეხბურთის მმართველმა ორგანიზაციამ GROW-ის ახალი სამომავლო ხედვა წარადგინა, რომელიც ამასთან ასოციაციების განვითარების სამოქმედო გეგმასაც მოიცავს.

ამჟამად UEFA GROW ეროვნულ ასოციაციებს ისეთი მნიშვნელოვანი სფეროების განვითარებაში ეხმარება, როგორიცაა ფეხბურთში ჩართულობის ზრდა, ამასთან პროგრამა ასევე ეხმარება ასოციაციებს ზოგადი სტრატეგიული გეგმის შემუშავებაში, რომელიც გამყარებულია ეფექტური კომუნიკაციებით, ძლიერი ბრენდებითა და სახელმწიფო მხარდაჭერით.

შეგახსენებთ, რომ საქართველომ 2017 წლის მარტში, GROW სამიტს უმასპინძლა, რომელიც ამ ფორმატით უეფას ისტორიაში პირველად ჩატარდა და მასში აღმოსავლეთ ევროპის 13 ქვეყანა მონაწილეობდა. ვარშავას სემინარზე სამიტის შედეგები განიხილეს, სადაც საქართველო, მსაობრივი ფეხბურთის განვითარების მიმართული გადადგმული სტრატეგიული ნაბიჯების შედეგად მოწინავე ქვეყნად წარადგინეს.

პროგრამის შემდეგი ეტაპი მოიცავს ეროვნული ასოციაციებისთვის ხუთწლიანი სამოქმედო გეგმის შემოთავაზებას მდგრადი განვითარებისა და წარმატების მისაღწევად. აღნიშნული ხედვა, სახელწოდებით „მომავლის ფეხბურთის ფედერაციები“, მიზნად ისახავს ფეხბურთის პოტენციალის სხვადასხვა მიმართულებით ოპტიმიზაციის გეგმების შემუშავებას თითოეული ასოციაციისთვის. აღნიშნულ პროცესში სპორტისა და სხვადასხვა დარგების ექსპერტები ჩაერთვებიან.

„ჩვენ გვსურს ავიყვანოთ ფეხბურთი ახალ დონემდე. აღნიშნულ პროცესში ჩვენ გავითვალისწინებთ კულტურულ და დემოგრაფიულ ცვლილებებს, რათა კიდევ უფრო წარმატებული მომავალი შევუქმნათ სპორტის ამ სახეობას ევროპაში,“ განაცხადა უეფას ეროვნული ასოციაციების ბიზნეს-განვითარების ხელმძღვანელმა, ნოელ მუნიმ.

„ჩვენ მნიშვნელოვნად შევცვალეთ ჩვენი მიდგომა ევროპაში ფეხბურთის განვითარებასთან დაკავშირებით, ასევე პირველად ვაყალიბებთ სტრატეგიული და სისტემატიური ზრდის გეგმას თითოეული წევრი ასოციაციისთვის. აღნიშნულ პროცესში ჩვენ მჭიდროდ ვითანამშრომლეთ ჩვენს წევრ ასოციაციებთან, რათა ჩამოგვეყალიბებინა საუკეთესო მიდგომა,“ აღნიშნა მუნიმ.

„მომავლის ფეხბურთის ფედერაციების“ პროგრამის მიზანია, წარმოაჩინოს უეფას საფეხბურთო ოჯახის მუშაობის საუკეთესო მხარეები. ეროვნული ასოციაციების რეგიონალური ჯგუფები ერთმანეთთან მჭიდროდ ითანამშრომლებენ საუკეთესო პრაქტიკის გაზიარებისა და ერთობლივი განვითარების მიმართულებებით.

Gff.Ge

მოგეხსენებათ, 6 დეკემბერს გავრცელდა ინფორმაცია ქართველი მსაჯის – ილია ტუღუშის ტრაგიკული გარდაცვალების შესახებ. ილია ტუღუში 10 წელზე მეტი ხნის განმავლობაში მსაჯობდა საქართველოს ჩემპიონატის ასაკობრივ პირველობებსა და სხვადასხვა ლიგებს.

საქართველოს ფეხბურთის ფედერაცია კიდევ ერთხელ, ღრმა მწუხარებას გამოთქვამს აღნიშნულის გამო და უსამძიმრებს დაღუპულის ოჯახის წევრებს, მეგობრებს, ახლობლებსა და სრულიად საფეხბურთო სამყაროს.

გვსურს, მკაფიოდ დავაფიქსიროთ, რომ საქართველოს ფეხბურთის ფედერაცია გამოთქვამს სრულ მზადყოფნას, საჭიროების შემთხვევაში, აღნიშნულ ფაქტზე ითანამშრომლოს სამართალდამცავ უწყებებთან და ამასთან, ვიმედოვნებთ, რომ ეს შემთხვევა უმოკლეს ვადაში იქნება გამოძიებული.

Gff.Ge