“ლივერპულის” ყოფილი თავდამსხმელი იან რაში ინგლისის პრემიერლიგის მიმდინარე გათამაშების საუკეთესო ფეხბურთელად მერსისაიდული გუნდის ნახევარმცველ ფილიპე კოუტინიოს მიიჩნევს.
“კოუტინიოს თამაშს ხშირად ვუყურებ და მიკერძოებული ვარ, მაგრამ პრემიერლიგის საუკეთესო ფეხბურთელად გულწრფელად მას მივიჩნევ. “ჩელსიში” ედენ აზარი კარგად თამაშობს, თუმცა ამ სეზონში კოუტინიო უკეთ გამოიყურება. ფილიპე უფრო მეტს იტანს, მეტ საგოლე გადაცემას აკეთებს და მოედანზე ფანტასტიურად მოქმედებს. კოუტინიო გასულ სეზონშიც კარგი იყო, მაგრამ წელს უკეთესია”, – რაშის სიტყვებს Goal.com-ი ციტირებს.
ფილიპე კოუტინიომ პრემიერლიგის მიმდინარე გათამაშებაში 12 მატჩი ჩაატარა, ხუთი გოლი გაიტანა და ამდენივე საგოლე პასი გააკეთა.
