Qatar 2022 – Fanebi.Com – ფეხბურთი, კალათბურთი, რაგბი, სხვა

ყატარში ვერ გადაწყვიტეს, თუ რამდენმა სტადიონმა უნდა მიიღოს მსოფლიოს ჩემპიონატი

Posted on დეკემბერი 9, 2015 by ბექა დოგრაშვილი

ყატარში ჯერ კიდევ ვერ გადაწყვიტეს, თუ რამდენმა სტადიონმა უნდა მიიღოს 2022 წლის მსოფლიოს ჩემპიონატი. საკითხზე მსჯელობა გადაიდო.

ტურნირის საორგანიზაციო კომიტეტის ხელმძღვანელის თანაშემწის, ნასერ ალ ხატერის თქმით, საკითხი იმდენად მნიშვნელოვანია, რომ გადაწყვეტილების მიღების თარიღი ერთი თვით გადაიდო. თავდაპირველი გეგმის მიხედვით, გადაწყვეტილება იმის შესახებ, თუ რამდენი სტადიონი მიიღებს მსოფლიოს ჩემპიონატის მატჩებს, დეკემბერში უნდა მიეღოთ, თუმცა საკითხი იანვრამდე არ გადაწყდება.

პირვანდელ პროექტში გათვალისწინებული იყო 12 სტადიონი, მაგრამ მოგვიანებით ფიფამ რეკომენდაცია მხოლოდ რვა არენას გაუწია.

ფიფას პრეზიდენტობის კანდიდატი: “შესაძლოა, ყატარს მუნდიალის მასპინძლობის უფლება ჩამოვართვათ”

Posted on ნოემბერი 12, 2015 by ბექა დოგრაშვილი

ფიფას პრეზიდენტობის კანდიდატი ჟერომ შამპანი თვლის, რომ ჯერ არ არის გვიანი 2022 წლის მსოფლიოს ჩემპიონატის მასპინძელ ქვეყნად ყატარის ნაცვლად სხვა ადგილდებარეობის შერჩევა. იგი ამბობს, რომ თუ პრეზიდენტად აირჩევენ და ტურნირის მასპინძელ ქვეყნად ყატარის არჩევის პერიოდში კორუფციის ბრალდებები დამტკიცდდება, ფიფა მუნდიალის სამასპინძლოდ ახალ ქვეყანას შეარჩევს.

“თუ მსოფლიოს ჩემპიონატის მასპინძელ ქვეყნად ყატარის არჩევისას თაღლითობისა და კორუფციის ბრალდებები დამტკიცდდება, ჩვენ შეგვიძლია, რომ ტურნირის სამასპინძლოდ ახალი ქვეყანა შევარჩიოთ”, – განაცხადა შამპანმა iTele-სთვის მიცემულ ინტერვიუში.

შეგახსენებთ, რომ ფიფას საპრეზიდენტო არჩევნები 2016 წლის 26 თებერვალს გაიმართება.

ფიფამ ყატარის მსოფლიოს ჩემპიონატის ჩატარების ვადები დაამტკიცა

Posted on სექტემბერი 25, 2015 by ბექა დოგრაშვილი

ფიფას აღმასრულებელმა კომიტეტმა შვეიცარიის ქალაქ ციურიხში გამართულ შეკრებაზე 2022 წელს ყატარში ჩასატარებელი მსოფლიოს ჩემპიონატის ვადები დაადგინა.

უკვე ოფიციალურად შეგვიძლია ვთქვათ, რომ ყატარის მუნდიალი 21 ნოემბრიდან 18 დეკემბრამდე პერიოდში ჩატარდება.

ტურნირის ვადების შეცვლის მთავარ მიზეზად ყატარის მაღალი ტემპერატურა სახელდება. ცნობისთვის, ზაფხულში ყატარში საშუალო ტემპერატურა ცელსიუსის შკალით 40-50 გრადუსს აღწევს, რის გამოც ამ დროს იქ ფეხბურთის თამაში ფაქტობრივად წარმოუდგენელია. ტურნირი შემჭიდროებულ ვადებში ჩატარდება და ის 31-32 დღის ნაცვლად 28 დღეს გასტანს, რათა ევროპული ქვეყნების ეროვნულ ჩემპიონატებზე ნაკლები გავლენა იქონიოს.

ყატარის მუნდიალის ახალ კალენდარს ფეხბურთელთა პროფკავშირი აკრიტიკებს

Posted on სექტემბერი 10, 2015 by ბექა დოგრაშვილი

2022 წელს ყატარში გასამართი მსოფლიოს ჩემპიონატის კალენდარი ფეხბურთელთა საერთაშორისო პროფკავშირისთვის მიუღებელია. შეგახსენებთ, რომ კლიმატური პირობების გამო ტურნირი არა ივნის-ივლისში, არამედ ნოემბერ-დეკემბერში ჩატარდება. ჩემპიონატი 32-ის ნაცვლად 28 დღის განმავლობაში გაიმართება, ფინალური შეხვედრა კი 18 დეკემბერს არის დაგეგმილი.

“ასეთი ტურნირის ოთხ კვირაში ჩატარება შეუძლებელია. წარმოიდგინეთ: შაბათ-კვირას ფეხბურთელები თავიანთ ჩემპიონატებში ითამაშებენ, ორშაბათს კი ნაკრებს შეუერთდებიან და იმავე დღეს ყატარში გაემგზავრებიან. ორი დღე მგზავრობას უნდა. ტურნირზე კი ოთხი, ხუთი ან შვიდი მატჩი უნდა ჩაატარონ.

არავითარი დასვენება, არავითარი მოსამზადებელი პერიოდი, ეს რაღაც სიგიჟეა. ფეხბურთელთა ჯანმრთელობას საფრთხე შეექმნება”, – ციტირებს პროფკავშირის გენერალური მდივნის, თეო ვან სეგელენის სიტყვებს Reuters-ი.

2022 წლის მუნდიალის ფინალური მატჩი 18 დეკემბერს გაიმართება

Posted on მარტი 19, 2015მარტი 19, 2015 by ბექა დოგრაშვილი

დღეს შვეიცარიის ქალაქ ციურიხში გამართულ ფიფას აღმასრულებელი კომიტეტის შეხვედრაზე გადაწყდა, რომ მსოფლიოს 2022 წლის ჩემპიონატის ფინალური მატჩი 18 დეკემბერს ჩატარდება.

შეგახსენებთ, რომ ყატარში გასამართი მსოფლიოს 2022 წლის ჩემპიონატი მეტეოროლოგიური პირობების გამო არა ზაფხულში, არამედ ნოემბერ-დეკემბერში გაიმართება. ცნობისთვის, ივლისის თვეში ყატარში საშუალო ტემპერატურა ცელსიუსის შკალით 40-50 გრადუსს აღწევს, რის გამოც ამ დროს იქ ფეხბურთის თამაში ფაქტობრივად წარმოუდგენელია.

2022 წლის მუნდიალი ნოემბერ-დეკემბერში ჩატარდება

Posted on თებერვალი 19, 2015 by ბექა დოგრაშვილი

მსოფლიოს 2022 წლის ჩემპიონატი, რომელიც ყატარში ჩატარდება, ნოემბერ-დეკემბერში გაიმართება. ამ ინფორმაციას გამოცემა Sports Illustrated-ი ავრცელებს. წყაროს ცნობით, მომავალ კვირაში ფიფა ყატარს მუნდიალის შემოდგომა-ზამთრის კვეთაზე ჩატარების რეკომენდაციას მისცემს, უკვე მარტის თვეში კი ამ გადაწყვეტილებას დაამტკიცებს.

ამრიგად, მუნდიალის გამო ევროპულ ჩემპიონატებში პაუზა გამოცხადდება. შეგახსენებთ, რომ გასული წლის ბოლოს ფიფას პრეზიდენტმა იოზეფ ბლატერმა მსოფლიოს 2022 წლის ჩემპიონატის ჩატარების ოპტიმალურ პერიოდად სწორედ ნოემბერ-დეკემბერი დაასახელა.