თბილისის „ახალ სპორტის სასახლეში“ 20-წლამდე ვაჟთა ხელბურთის ევროპის ჩემპიონატის საკვალიფიკაციო ეტაპის ელიტრაუნდი დაიწყო. ქართველებმა პირველი შეხვედრა საბერძნეთთან გამართეს და ოთხბურთიანი სხვაობით, 22:26 დამარცხდნენ.
მანამდე, ჯგუფის პირველი შეხვედრა სერბეთსა და ისრაელს შორის შედგა – 11-ბურთანი გამარჯვება სერბებმა იზეიმეს (35:24).
საქართველოს 20-წლამდელთა ნაკრები ჯგუფური ეტაპის მეორე ტურში ისრაელს თანატოლებს ხვალ დაუპირისპირდება. შეხვედრა 19:00 საათზე დაიწყება.
საქართველოს ხელბურთის ნაკრებმა მაყურბლით თითქმის გავსებულ ქუთაისის სპორტის სასახლეში, უმძიმეს თამაშში 17-16 დაამარცხა ლუქსემბურგი და დაწინაურდა ევროპის 2018 წლის ჩემპიონატის შესარჩევ ჯგუფში. 3 მაისს ლუქსემბურგს სტუმრად ვეთამაშებით, ჯგუფის გამარჯვებულის ვინაობა კი გაირკვევა ივნისში, როდესაც ორჯერ ითამაშებენ ესტონეთი და ლუქსემბურგი.
პირველი ეტაპის სამი ჯგუფის სამი გამარჯვებული გავა პლეიოფში და გაისად, გაზაფხულზე ეთამაშება 2016 წლის ევროშესარჩევის სამ უარეს გუნდს, ამ სამი წყვილის მოგებული კი მიიღებს ძირითადი შესარჩევი ეტაპის საგზურებს. ასეთი რთული გზაა ევროპის ჩემპიონატამდე.
ჩვენს გუნდს სერიოზული პრობლემები გვქონდა – გვაკლდა სამი ძირითადი უკანახაზელი – მსხვილიძე, რუსია და დათუკაშვილი. მაგრამ, როდესაც ლიდერები არ არიან, თავის გამოჩენის შანსი ეძლევათ ხოლმე შემცვლელებს. კარგად ითამაშა ზურაბ სიმონიამ, რომელმაც მისთვის უხერხული, მარჯვენა შუამარბის პოზიციიდან სულ ერთი გოლი გაიტანა, მაგრამ მოიპოვა შვიდმეტრიანი და რამდენიმე შედეგიანი პასიც შეასრულა. ნაკრებში პირველი, მაგრამ მნიშვნელოვანი და გამარჯვების მომტანი გოლი შეაგდო ლექსო წითელიშვილმა.
პირველი ტაიმი თითქოს უპრობლემოდ მოვიგეთ. მეტოქეს ძალიან ბევრი წუნი ჰქონდა და მარტო პივოტის მისამართით გაგზავნილი შვიდი პასი დაკარგა შესვენებამდე. ამას დაემატა მეკარე შოთა თევზაძის კლასი და ლუქსემბურგმა პირველ ტაიმში სულ 7 გოლი გაიტანა – 7-11.
მაგრამ მეორე ნახევარში უკვე ჩვენ შევაგდეთ მხოლოდ 6 გოლი. მეტოქემ, ცხადია, იოლად შენიშნა, ან თავიდანვე იცოდა, რომ უკანა ხაზში მთვარი საფრთხე ირაკლი ჩიქოვანისგან ელოდა და ლიდერს განსაკუთრებით აქტიურად ეთამაშებოდა. მწვრთნელი ადრიან სტორტი იყენებდა 5-1 და 3-2-1 განლაგებას, რის შედეგადაც უკანა ხაზიდან შეტევა თითქმის აღარ გვქონდა. ამას დაუმატეთ, რომ ბურთის მიღებისას მეურვე დაუყონებლივ გადადიოდა პირველ ტაიმში ჩვენს საუკეთესო მოთამაშეზე, გარემარბ რევაზ ჭანტურიაზე.
ამის წინააღმდე ერთადერთი გამოსავალი იყო ინდვიდუალური გარღვევები და ირაკლი კეკელიძემ მეტი დრო დაუთმო უჩა გამზარდიას. ფოთელმა სამჯერ მოატყუა თავისი მცველი, მაგრამ 6 მეტრიდან ორჯერ მეკარეს გაარტყა და ერთი შვიდმეტრიანი მოიპოვა, რომელიც ასევე ვერ გამოვიყენეთ. ამავე პოზიციიდან, ძალისმიერი გარღვევების შემდეგ მეკარემ აუღო სიმონიასა და ჩიქოვანს და მხოლოდ აკაკი ტალახაძემ გაიტანა. საბოლოო ჯამში, 17 გოლიდან 4 გავიტანეთ 9 მეტრიდან, 1 – სწრაფ გარღვევაში, 2 – შვიდმეტრიანიდან, 4 – 6 მეტრიდან და 6 – კუთხიდან.
55-ე წუთამდე სხვაობა მუდმივად მერყეობდა 2-4 გოლამდე, კვანძი კი ძალიან დრამატულად გაიხსნა. 56-ე წუთზე მიულერმა პირველად დაიყვანა სხვაობა 1 გოლამდე (15-14), ჩიქოვანმა ისევ დაგვაწინაურა ორით, მაგრამ მას შემდეგ, რაც 58-ე წუთზე უჩა მაისურაძე გააძევეს 2 წუთით, დასრულებამდე ორწუთნახევრით ადრე კოლმა გაათანაბრა – 16-16.
სირენამდე წუთნახევრით ადრე, რიცხობრივი ნაკლებობისას, ჩვენებს ცხრამეტრიანი ერგოთ. მეტოქე ელოდა, რომ ჩიქოვანი დაარტყამდა, მაგრამ ბურთი წითელიშვილმა მიიღო – სამტრედიელმა 11 მეტრიდან გაიტანა გოლი, რომელიც თამაშში ბოლო აღმოჩნდა.
მაისურაძე დაბრუნდა და როდესაც დასრულებამდე ზუსტად წუთი რჩებოდა, მიულერმა მშვენივრად გადაატარა თავზე ხელი მცველს და 6 მეტრიდან შეაგდო, მაგრამ… იქამდე ერთი წამით ადრე მწვრთნელმა ადრიან სტორტმა წუთშესვენების ასაღები დაფა დააგდო სამსაჯო მაგიდაზე. ცხადია, გოლი არ ჩაითვალა! ტაიმაუტის შემდეგ მიულერმა უკვე ააცილა, დარჩენილ 29 წამში კი ბურთი შევინარჩუნეთ და ასე მოვიგეთ ძალიან რთული მატჩი, რომელიც თითქმის ორი საათი გაგრძელდა.
ხელბურთი. ევრო 2018. პირველი შესარჩევი ეტაპი. B ჯგუფი
30 აპრილი, ქუთაისის სპორტის სასახლე, 18:00
საქართველო-ლუქსემბურგი 17-16
საქ: თევზაძე – ჭანტურია 12/7, ჩიქოვანი 11/4, გოგალაძე 2/2, ტალახაძე 2/1, მაისურაძე 2/1, სიმონია 3/1, წითელიშვილი 3/1, გამზარდია 3/0, გვაზავა, ბეჟანიშვილი (ტორონჯაძე, აბრამიშვილი, გრიშიკაშვილი, დათუკაშვილი) – მწვ: კეკელიძე – ორწუთიანი 4, შვიდმეტრიანი 3/2, დარტყმების ეფექტურობა 45%, შეტევების ეფექტურობა 26%
ლუქ: ოჟე, ჰერმანი – მაისი 6/4, ბოკი 5/3, კოლი 5/3, მიულერი 4/2, შრიოდერი 1/1, პული 1/1, სხოლტენი 2/1, ბარდინა 5/1 ბაუმი, ზეკანი 1/0, ლეი, შაიდი, მარზადორი – მწვ: სტორტი – ორწუთიანი 2, შვიდმეტრიანი 2/1. დარტყმების ეფექტურობა 52%, შეტევების ეფექტურობა 27%
მსაჯები: ძმიტრი ნაბოკაუ, სიარჰეი კულიკი (ბლრ), დელეგატი: დელიან გენჩევი (ბულ)
1200 მაყურებელი
—
29.10.2014 ესტონეთი – საქართველო 28-26
02.11.2014. საქართველო-ესტონეთი 29-27
30.04.2015. საქართველო-ლუქსემბურგი 17-16
—
საქართველო 4 ქულა (3 თამაშიდან), ესტონეთი 2 (2), ლუქსემბურგი 0 (1)
პლეიოფში გადის ჯგუფის გამარჯვებული
03.05.2015. ლუქსემბურგი – საქართველო
10.06.2015. ლუქსემბურგი-ესტონეთი
13.06. 2015. ესტონეთი-ლუქსემბურგი
—
A ჯგუფი. კვიპროსი ბელგია 17-26 – საბერძნეთი 4 (2), ბელგია 2 (1), კვიპროსი 0 (3)
B ჯგუფი. კოსოვო-იტალია 22-29 – რუმინეთი 4 (2), იტალია 2 (1), კოსოვო 0 (3)
საქართველოს ხელბურთელთა ნაკრებმა ევრო 2018-ის პირველი შესარჩევი ეტაპის მატჩში 29:27 დაამარცხა ესტონეთი. პირველი თამაში ესტონელებმა ასევე ორი ბურთით, 28:26 მოიგეს.
სტუმრად გატანილი მეტი გოლის წესი ევროპის ჩემპიონატზე არ მოქმედებს, ამიტომაც, ორივე გუნდი ურთიერთშეხვედრებით აბსოლუტურად თანაბარ მდგომარეობაშია. ორივეს დარჩენილი აქვს 2-2 მატჩი ჯგუფის მესამე წევრთან, ლუქსემბურგთან და თუ საქართველომაც და ესტონეთმაც ორ-ორჯერ მოიგეს, მაშინ ჯგუფის გამარჯვებულსა და, შესაბამისად, პლეიოფში გამსვლელ გუნდს, ბურთების უკეთესი სხვაობა გამოავლენს მთელი ტურნირის განმავლობაში.
ამ მხრივს ესტონეთს ის უპირატესობა აქვს, რომ ლუქსემბურგს ბოლო ორ ტურში, ივნისში ეთამაშება, ჩვენ კი – გაზაფხულზე. თუმცა, ლუქსემბურგი არაა ისეთი ხელწამოსაკრავი გუნდი, რომ გარანტირებულად ორჯერ მოუგო – უთუოდ ისინიც იბრძოლებენ პირველობისთვის. ყველაფერი წინაა.
ევრო 2018. კვალიფიკაციის პირველი ეტაპი. 2 ჯგუფი
საქართველო-ესტონეთი 29:27
2 ნოემბერი. თბილისი, სპორტის სასახლე
საქართველო: თევზაძე, ტორონჯაძე – რუსია 15 დარტყმა/8 გოლი (2 წთ), მსხვილიძე 10/6 (2 წთ), ჩიქოვანი 12/6 (2 წთ), ჭანტურია 4/4, გოგალაძე 5/3, დათუკაშვილი 2/1 (2წთ), გრიშიკაშვილი 4/1 (2წთ), სიმონია 1/0 (გამზარდია, მაისურაძე, გვაზავა, ორჯონიკიძე, ბეჟანიშვილი). მწვრთნელი ირაკლი კეკელიძე
შეტევების ეფექტურობა 36%, დარტყმების ეფექტურობა 55%, გაძევება – 10 წთ, შვიდმეტრიანები 3/3
ესტონეთი: ალექსეევი, ლოოკენე – მ. პინონენი 15/7, როოსნა 5/4, ვოიკა 6/4, იოჰანსონი 4/3, სლასტინოვსკი 8/3, პიარტი 3/2, მუუგა 3/2, ლეესი 4/2, ლეპი 1/0, ცელმინსი 1/0, ს. პინონენი 3/0 (სილასტე, ჰიიენდი, იარვე). მწვრთნელი რეინ სუვი
შეტევების ეფექტურობა 32%, დარტყმების ეფექტურობა 49%, გაძევება – 4 წთ, შვიდმეტრიანები 4/2
მსაჯები: ანგელოს არგირიდისი, ხრისტოს მუტასი (კვი)
თამაში ყოჩაღად დავიწყეთ და პირველივე სამი დარტყმიდან სამი გოლი გავიდა – 3:0 (რუსია, ჩიქოვანი, მსხვილიძე), მაგრამ ესტონეთს ჰყავდა მიკ პინონენი, ნამდვილი ლიდერი, რომელსაც თავადაც გაჰქონდა და გუნდის თამაშსაც ალაგებდა. მეათე წუთზე ანგარიში გათანაბრდა – 5:5, ერთი ხანობა თანაბრად მიდიოდა და მე-20 წუთისთვის ისევ წინ გავედით სასურველი 3 ბურთით – 11:8. ტაიმის ბოლო წუთზე ანგარიში 15:12 იყო, მაგრამ დათუკაშვილის ორწუთიანი გაძევების შემდეგ ესტონელებმა 2 გოლი გაგვიტანეს – 15:14.
მეორე ტაიმის დასაწყისში სტუმრები წინაც გავიდნენ (17:16), მაგრამ მეკარე თევზაძის კარგი სერიის შემდეგ 42-ე წუთზე რუსიამ ისევ დაგვაწინაურა საჭირო 3 გოლით – 20:17. ასეთივე სხვაობა დაფიქსირდა კიდევ სამჯერ, 54-ე წუთზე ანგარიში 27:23 იყო, დასრულებამდე 4 წუთით ადრე, ჭანტურიას შვიდმეტრიანის შემდეგ – 28:24. სამბურთიან სხვაობაზე თავი თითქმის ქუდში გვქონდა და ჯგუფის გამარჯვებული შეიძლებოდა უკვე მაისში გამოვლენილიყო – იმ შემთხვევასი, თუ ორჯერ დავამარცხებდით ლუქსემბურგს, მაგრამ ესტონელებმა ბოლომდე იბრძოლეს.
დასრულებამდე 50 წამით ადრა სლასტინოვსკიმ ორი მატჩის ჯამური ანგარიში გაათანაბრა, ბოლო შეტევაში რუსიამ რთული სიტუაციიდან ვერ გაიტანა და ესტონეთს ერთი შეტევა დარჩა, რომლის წარმატებულად დასრულების შემთხვევაში უკვე ისინი დაწინაურებოდნენ ორივე შეხვედრის ჯამში, მაგრამ საბოლოოდ ქართველების გამარჯვება დაფიქსირდა – 29:27, ხოლო საერთო ანგარიში ფრეა – 55:55. ახლა. ჯგუფისგამარჯვებული ივნისამდე ვერ გამოვლინდება – სანამ ლუქსემბურგი და ესტონეთი არ ითამასებენ.
საქართველოს ნაკრების მთავარი პრობლემა, ისევე როგორც ტალინში, სათადარიგოთა მოკლე სკამი იყო. გუნდმა ფაქტიურად 8 ხელბურთელით ითამაშა (სიმონია რამდენიმე წუთით შეუშვეს მოედანზე, ხოლო ტორონჯაძე მხოლოდ შვიდმეტრიანის მოსაგერიებლად გამოვიდა. პირველ მატჩთან შედარებით განსხვავება მხოლოდ ის იყო, რომ ხაზზე გია გვაზავას ნაცვლად შოთა გრიშიკაშვილი იდგა). ვლადიმერ რუსიას ამჯერად კარგად აუბეს მხარი ირაკლი ჩიქოვანმა და რატი მსხვილიძემ, კარგი იყო მარცხენა გარემარბი ილია გოგალაძე (წინა თამაშის გმირს რევაზ ჭანტურიას ესტონელებმა მეტი ყურადღება დაუთმეს, რის გამოც ჭანტურიამ თამაშიდან მხოლოდ ერთი გოლი გაიტანა).
ესტონელებს კი ჰყავდათ უფრო მეტი მოთამაშე, ნამდვილი წინამძღოლი და გამთამაშებელი პინონენი, ყოჩაღი გარემარბი, 17 წლის კარლ როოსნა, ორი კარგი პივოტი (იოჰანსონი, პიარტი), უფრო დაბალანსებული შემადგენლობა. ისინი უფრო მრავალფეროვნად თამაშობდნენ შეტევაში და უკეთ იდგნენ დაცვაში.
სამწუხაროდ, თამაშის ბოლოს მძიმე ტრავმა მიიღო რატი მსხვილიძემ – წინასწარი შეფასებით, მას აქილევსის მყესი აქვს გაწყვეტილი, თუმცა, ზუსტი დიაგნოზი ხვალ დადგინდება.
შედეგები და განრიგი
29 ოქტომბერი, 2014. ესტონეთი-საქართველო 28:26
2 ნოემბერი, 2014. საქართველო – ესტონეთი 29:27
29 ან 30 აპრილი, 2015. საქართველო – ლუქსემბურგი
3 მაისი, 2015. ლუქსემბურგი – საქართველო
10 ივნისი, 2015. ლუქსემბურგი – ესტონეთი
13 ან 14 ივნისი, 2015. ესტონეთი – ლუქსემბურგი
http://www.geohandball.ge/
ინტერნეტ-სივრცეში გავრცელდა ვიდეო, რომელშიც აღბეჭდილია, თუ როგორ თამაშობენ ვარჯიშზე ხელბურთს “ბარსელონას” ფეხბურთელები.
საქართველოს ნაკრების მწვრთნელი, ჯორჯე რაშიჩი ხელბურთის ფედერაციასთან კონტრაქტს ახანგრძლივებს. ახალი ხელშეკრულების თანახმად სერბი სპეციალისტი ნაკრებს წლინახევრით დაუკავშირებს თავის მომავალს. რაშიჩი, ეროვნულის გარდა, ყველა ნაკრების გუნდის მზადებაში ჩაერთვება და კოორდინაციას გაუწევს.
ჯორჯე რაშიჩი: – როცა პირველად ჩამოვედი საქართველოში, ფედერაციის პრეზიდენტმა მიზნად დამისახა სამი საშინაო თამაშის მოგება. ეს შევასრულეთ, მეორე ადგილი დავიკავეთ და კმაყოფილი ვარ. მეტისთვის დრო არ გვქონდა. ჩვენ ფაქტიურად ნულიდან დავიწყეთ, ახლა კი დრო საკმარისად გვექნება, რათა გუნდი უფრო მაღალ დონეზე გავიდეს.
ხელბურთელთა ეროვნული ნაკრები ფინეთთან გამართულ გასვლით შეხვედრაში 36-24 დამარცხდა. რაც იმას ნიშნავს, რომ ჩვენი ეროვნული ნაკრები ევროპის ჩემპიონატის ფინალურ ეტაპზე ვერ იასპარეზებს.
სამწუხაროდ, საქართველოს ნაკრებს მხოლოდ გამარჯვების შემთხვევაში ჰქონდა ფინალურ ეტაპზე მოხვედრის შანსი.
საქართველოს ხელბურთელთა ეროვნულმა ნკარებმა ლიტვის ნაკრები გუნდი 26:23 დაამარცხა.
მატჩი თბილისის სპორტის სასახლეში, მსოფიო ჩემპიონატის შესარჩევი ეტაპის ფარგლებში ჩატარა. აღსანიშნავია, რომ ლიტველიბი ჩვენს ჯგუფში ლიდერობენ.
შემდეგი ტური 11 იანვარს გაიმართება და საქართველოს ეროვნული ნაკრები ფინეთს ესტუმრება.
