ესპანური „სარაგოსადან“ ბერძნულ „პანათინაიკოსში“ გადასული გიორგი შერმადინის დებიუტი გადაიდო. 4 დღეა, ქართველი ცენტრი ბერძნულ გუნდშია და ვარჯიშობს, გუშინ კი საბერძნეთის ჩემპიონატის მორიგი ტური გაიმართა, თუმცა შერმადინს არ უთამაშია.
„ოლიმპიაკოსი“ სტუმრად „აპოლონ პატრასს“ შეხვდა და დაძაბულ ბრძოლაში – 76:67დაამარცხა. შერმადინი განაცხადში არ ყოფილა, მისი დებიუტი სავარაუდოდ ევროლიგის მატჩში, 6 მარტს, იტალიურ „ემპორიო არმანისთან“ შედგება.
GBF.GE
ესპანურ “სარაგოსაში” თანამემამულის გარეშე დარჩენილი ვიქტორ სანიკიძე წარმატებით ასპარეზობს. გიორგი შერმადინის ბერძნულ “ოლიმპიაკოსში” გაშვების შემდეგ სარაგოსელებმა პირველი მატჩი გამართეს და მათთან დარჩენილი მეორე ქართველის დიდი თანამონაწილეობით გასვლითი გამარჯვება მოიპოვეს.
“სარაგოსა” ესპანეთის დედაქალაქში “ფუენლაბრადას” დაუპირისპირდა და 9 ქულის სხვაობით – 81:72 დაამარცხა. სარაგოსელთაგან საუკეთესო შედეგი სანიკიძემ დააფისირა. მან ყველაზე მაღალი მარგი ქმედების კოეფიციენტი (20) გაიფორმა.
ქართველმა ფორვარდმა სასტარტო ხუთეულში ითამაშა და სარაგოსელთა შორის მოედანზე ყველაზე მეტ ხანს დაჰყო. 31,31 წუთში სანიკიძემ 4-დან 3ორქულიანი, 5-დან 2 სამიანი და 2-დან 1 საჯარიმო ჩააგდო. 13 ქულიასთან ერთად ვიქტორმა 7 მოხსნა და 3 პასიც მოიაგროვა დადამსახურებულად გახდა საუკეთესო.
“სარაგოსაში” სანიკიძის მსგავსად, 13 ქულა კიდევ 2-მა კალათბურთელმა – მაიკლ როლმა და იონ სტეფანსომა მოაგროვეს, ხოლო 14 ქულით ბომბრდირი შერმადინის შემცვლელი ჰენკ ნორელი გახდა. მადრიდელთაგან 17 ქულით საუკეთესო ჯეიმს ფელდეინი იყო, ხოლო ენდი პანკომ 13 ქულა მიითვალა.
13 მოგებითა და 8 მარცხით “სარაგოსა” მე-6 ადგილზეა და 1 ქულით ჩამორჩება მის წინ მყოფ “უნიკახას” და “გრან კანარიას”. მომდევნო მატჩს სანიკიძის გუნდი სწორედ გრანკანარიეოებთან გამართავს.
GBF.GE
საქართველოს ეროვნული ნაკრების წევრმა, გიორგი შერმადინმა კლუბი გამოიცვალა. მიმდინარე სეზონში ესპანურ “სარაგოსაშ” მოთამაშე შერმადინი კარიერას ევროპის ერთ-ერთ გრანდში, ევროლიგის მოქმედ ჩემპიონ “ოლიმპიაკოსში” გააგრძელებს, სადაც 2012-13 წლების სეზონში გამოდიოდა.
თუკი გასულ სეზონში ქართველ ცენტრს ბერძნულ გრანდში ნაკლები სათამაშოდრო ჰქონდა, ახლა ის გუნდს ერთ-ერთ ლიდერად უბრუნდება. პირეოსელები ევროპიგის მეორე ჯგუფურ ეტაპზე არიან და ცენტრის პოზიციის გასაძლიერებლად სწორედ ქართველი ცენტრი შეიგულეს, რომელმაც საკუთარი შესაძლებლობები ესპანეთის მძლავრ ლიგაში კარგად წარმოაჩინა.
შერმადინის “ოლიმპიაკოსში” გადასვლის ამბავი ევროპაში სატრანსფერო ფანჯრის დახურვამდე რამდენიმე საათით ადრე გადაწყდა. “სარაგოსას” ხელმძღვანელებიქართველი ლეგიონერის გასხვისებას გვარიანი საკომპენსაციო თანხის სანაცვლოდ დათანხმდნენ, რის შემდეგაც საბოლოო სიტყვა თავად კალათბურთელმა თქვა. საბოლოოდ ფინანსური დეტალები არ გახმაურებულა, თუმცა ელექტრონულ მედიაში გამოქვეყნდა, რომ ბერძნები შერმადინს კონტრაქტს მიმდინარე სეზონისბოლომდე სთავაზობდნენ, გიორგის კი 1,5-წლიანი ხელშეკრულება სურდა.
მხარეები შეთანხმდნენ, რომ შერმადინს “ოლიმპიაკოსში” კონტრაქტი სეზონის ბოლომდე ექნება. ქართველი კალათბურთელი პირეოსში ხვალ ჩავა და გუნდში პირვე ვარჯიშს ჩაატარებს. ბერძნულ გრანდს ევროლიგის მე-2 ეტაპზე შექმნილ E ჯგუფში 4 მოგება და 3 მარცხი გააჩნია და იტალიურ “მილანთან” და მარადიულ მეტოქე ათენის “პანათაინაიკოსთან” ერთად მეორე-მეოთხე ადგილებს იყოფს. ცნობისთვის, მეოთხედფინალში E და F ჯგუფების ოთხ-ოთხი საუკეთესო გადის.
საბერძნეთის ჩემპიონატში “ოლიმპიაკოსს” 19 ტურის შემდეგ 17 გამარჯვება აქვს და “პანათინაიკოსს” 1 მოგებით ჩამორჩება. პირეოსელებს მომდევნო მატჩი 1 მარტს ელით, როდესაც პატრასში მეშვიდეადგილოსან “აპოლონს” ესტუმრებიან. შეერმადინის დებიუტი კი სავარაუდოდ 28 თებერვალს, ევროლიგაში შედგება, როცა “ოლიმპიაკოსი” სტამბოლში “ფენერბაჰჩეს” ესტუმრება.
GBF.GE
ზაზა ფაჩულიას გუნდმა ნაციონალური საკალათბურთო ასოციაციის ლიდერ “ინდიანას” უმასპინძლა და ბრძოლაში –100:110 დამარცხდა. “მილუოკის” ქართველმა ცენტრმა სასტარტო ხუთეულში ითააშა და ორმაგ დუბლამდე 1 მოხსნა დააკლდა.
ფაჩულიამ მოედანზე ზუსტად 27 წუთი გაატარა, მას ძირითადად ინდიანელთა ცენტრ როი ჰიბერტისთან უძევდა პაექრობა. ჰიბერტმა შეხვედრა 4 ქულით და 6 მოხსნით დაასრულა, თუმც აღსანიშნავია, რომ ინდიანელთა თავდამსხმელმა დევიდ ვესტმა გაილაღა, რომელმაც მილუოკელებს 30 ქულა ჩაუგდო.
ფაჩულიამ ქულების უმეტესობა საჯარიმოს ხაზიდან დააგროვა. ზაზამ 5-დან 1 ორქულიანი ჩააგდო, 10 საჯარიმოდან კი კალათში 8 მოათავსა და მთლიანობაში 10 ქულა მოიპოვა. ამასთან ერთად, ქართველმა ცენტრმა 9 მოხსნა, 2 პასი და 2 ჩაჭრა მიითვალა, ბურთი კი 2-ჯერ დაკარგა.
“მილუოკის” 10 მოგების წილ 44 წაგება აქვს და ამ გუნდის საპლეიოფო ამბიციები დასრულებულია. მომდევნო მატჩი მილუოკელებს 24 თებერვალს, ფილადელფიაში, ადგილობრივ “სიქსერსთან” ელის.
GBF.GE
დუდა სანაძის “სან დიეგომ” კონფერენციის ლიდერი “გონზაგა” დაამარცხა. გუნდს, რომელსაც კონფერენციაში 2 მარცხი ჰქონდა განცდილი და სრულიად სტუდენტური ლიგის გამოკითხვებში 25-ეულში შედის, სანდიეგოელებმა საკუთაარ მოედანზე 69:66 დაამარცხეს.
მატჩი პირდაპირ ეთერში ESPN 2ით გადაიცემოდა და ის საკმაოდ დაძაბული გამოდგა. შეხვედრა თავიდან ბოლომდე თანაბრად მიმდინარეობდა, სოლიდური ლიდერობის მოპოვებას ვერც ერთი გუნდი ვერ ახერხებდა, თუმცა აღსანიშნავია, რომ უფრო მეტი ხნით წინ სანდიეგოელები იყვნენ.
პირველი ტაიმი “სან დიეგომ” 36:34 მოიგო და წარმატებით თამაში მეორეშიც განაგრძო. სანაძე წინა მატჩის მსგავსად სათადარიგო იყო, თუმცა ის კვლავ გამოირჩეოდა და გამარჯვებაშიც ლომის წილი დაიდო. სანდიეგოელების მიერ მოხვეჭილი მატჩის ბოლო 7 ქულიდან 5 ქართველი კალათბურთელის ანგარიშზე იყო. სანაძემ ბოლოს სულ საჯარიმოებით მოიპოვა ქულები – ჩამორჩენილი გონზაგელები ტაქტიკური პერსონალურებით ცდილობდნენ წაგებისაგან თავის დაძვრენას, რისი საშუალებაც მათ სანაძემ არ მისცა. დუდამ მატჩის დასრულებამდე 2 წამით ადრე 2 საჯარიმო ზუსტად შეასრულა და საბოლოო შედეგი დააფიქსირა – 69:66.
სანაძემ 28 წუთი ითამაშა და საერთო შედეგიანობით თავისიანთაგან საუკეთესო იყო. დუდამ 2-დან 2 ორქულიანი, 8-დან 2 სამიანი და 6-დან 5 საჯარიმო ჩააგდო. მთლიანობაში ქართველი უკანახაზელის ანგარიშზე 15 ქულა, 5 მოხსნა და 1 ჩაჭრა დაგროვდა. მისმა თანაგუნდელმა, გუნდის პირველმა მექულა ჯონი დიმ 16 ქულა, 3 მოხსნა და 1 ჩაჭრა მიითვალა. 9-9 ქულით დაასრულეს შეხვედრა ჯიტო კოკმა და დენის კრამერმა.
“სან დიეგოს” 7 მოგება და 10 მარცხი აქვს. რეგულარული ჩემპიონატის ბოლო მატჩში სანაძის გუნდი 1 მარტს “ბრიგჰემ იანგს” უმასპინძლებს, რომელმაც სხვათა შორის, “გონზაგა” “სან დიეგოსთან” მატჩამდე დაამარცხა. რეგულარულის დასრულების შემდეგ “ვესტ ქოუსთის” კონფერენციის გუნდები თავს ლას ვეგასში მოიყრიან, სადათ ერთ წრეს ითამაშებენ და შემდეგ პლეი ოფში დაწყვილდებიან.
| გუნდი |
კონფერენცია |
მთლიანად |
| გონზაგა |
13-3 |
23-6 |
| ბრიგჰემ იანგი |
12-5 |
20-10 |
| სან ფრანცისკო |
11-5 |
18-10 |
| სეინტ მერი |
10-6 |
20-9 |
| პეპერდაინი |
8-8 |
15-13 |
| პორტლენდი |
7-9 |
15-13 |
| სან დიეგო |
7-10 |
16-14 |
| პასიფიკი |
5-11 |
14-13 |
| სანტა კლარა |
5-11 |
12-17 |
| ლოიოლა |
3-13 |
11-17 |
GBF.GE
არაგონულმა “სარაგოსამ” ესპანეთის პრიმერადივიზიონში გასვლითი გამარჯვება მოიპოვა. სარაგოსელებმა დიდი ბრძოლა გადაიტანეს კუნძულ ტენერიფეში, სადაც ადგილობრივი”იბეროსტარი” 78:75 დაამარცხეს.
ეს იყო მატჩი, რომელშიც ქართველების წილი მინიმალურია. გიორგი შერმდინმა ვერ ითამაშა, ვიქტორ სანიკიძემ კი შეხვედრა უქულოდ დაასრულა. შერმადინს ტენერიფეში გამგზავრებამდე მცირე ტრავმის გამო არ უვარჯიშია და სარაგოსაში დარჩა.
სანიკიძე სასტარტო ხუთეულში იყო, მაგრამ მოედანზე მხოლოდ 12,21 წუთი გაატარა. ქართველმა ფორვარდმა 3 ორქლიანი და 1 სამიანი ააცილა. მის ანგარიშზე 3 მოხსნა, ამდენივე პასი და 1 ჩაჭრა იყო. შერმადინის შემცვლელმა ჰენკ ნორელმა 16 წუთში 8 ქულა და 4 მოხსნა დააგროვა. რაც შეეხება ბომბარდირს, 16 ქულით თავი გამთამაშებელმა პედრო ლომპარტმა გამოიჩინა.
11 მოგებითა და 8 წაგებით “სარაგოსა” მე-6 ადგილზეა და მომდევნო ტურში, 23 თებერვალს, “ვალენსიას” მასპინძლობს. გასულ ტურში მარცხი განიცადა ბექა ბურჯანაძის “კახასოლმა”, რომელიც მალაგაში “უნიკახასთან” უშანსოდ იყო – 76:89. ქართველმა ფორვარდმა 1,17 წუთი ითამაშა და ვერაფრის გაკეთება ვერ მოასწრო.
GBF.GE
ევრობასკეტ 2015-ის შესარჩევ ტურნირში საქართელოს ეროვნული ნაკრების მეტოქეები ცნობილნი არიან. ბარსელონას გამართული კენჭისყრის შედეგად ჩვენი ნაკრების მეტოქეები გამოვლინდნენ – საქართველო ჩეხეთთან, პორტუგალიასთან და უნგრეთთან გაარკვევს ურთიერთობას.
ჩვენი გუნდი ევროშესარჩევ ტურნირს 10 აგვისტოს შინ, ჩეხეთთან მატჩით იწყებენ, რის შემდეგაც 3 გასვლითი თამაში აქვთ – 13 აგვისტოს უნგრეთში, 17 აგვისტოს – პორტუგალიაში და 20 აგვისტოს – ჩეხეთში. საქართველო შესარჩევ ტურნირს 2 საშინაო მატჩით დაასრულებს – 24 აგვისტოს უნგრეთს უმასპინძლებს, ხოლო 27-ში – პორტუგალიას.
საქართველო 4-გუნდიან ჯგუფში მოხვდა, რაც იმას ნიშნავს, რომ თუკი მე-2 ადგილზე გავიდა, ბოლო – მე-4 ადგილზე გასულ გუნდთან ნაჩვენები შედეგები ჩამოეჭრება და დანარჩენი ჯგუფების მეორეადგილოსნებთან ცალკეულ კლასიფიკაციაში მოხვდება. ეს საიმისოდაა საჭირო, რომ გამოვლინდეს ევრობასკეტის საგზურის მფლობელები. ჯგუფებში გამარჯვებულ 7 გუნდს, 6 საუკეთესო მეორეადგილოსანი დაემატება. ყველაზე უარესი შედეგის მქონე მეორეადგილოსანი კი ევროპის ჩემპიონატის მიღმა დარჩება.
E ჯგუფის კალენდარი
10 აგვისტო
საქართველო – ჩეხეთი
პორტუგალია – უნგრეთი
13 აგვისტო
ჩეხეთი – პორტუგალია
უნგრეთი – საქართველო
17 აგვისტო
პორტუგალია – საქართველო
ჩეხეთი – უნგრეთი
20 აგვისტო
უნგრეთი – პორტუგალია
ჩეხეთი – საქართველო
24 აგვისტო
პორტუგალია – ჩეხეთი
საქართველო – უნგრეთი
27 აგვისტო
საქართველო – პორტუგალია
უნგრეთი – ჩეხეთი
დღეს, თბილისის დროით 21:00 საათზე, ესპანეთის ქალაქ ბარსელონაში, ევროპის 2015 წლის ჩემპიონატის შესარჩევი ტურნირის კენჭისყრა გაიმართება. მას შემდეგ, რაც ფიბა-მ 3 ნაკრებს – ფინეთს, თურქეთს და საბერძნეთს მსოფლიოს ჩემპიონატის “ველური ბარათები” უბოძა, ევრობასკეტ 2015-ის შესარჩევში მონაწილე გუნდების რიცხვი 26-ამდე შემცირდა.
ფიბა-ევროპამ შესარჩევი ეტაპის გათამაშების სისტემა წარმოადგინა, რომელიც ცოტა არ იყოს, ჩახლართულია. სულ შეიქმნება 7 ჯგუფი, საიდანაც 5 იქნება 4-გუნდიანი, ხოლო 2 – სამგუნდიანი. შესარჩევ ტურნირში მონაწილე 26 გუნდი 13 საგზურისთვის იბრძოლებს, რომლებსაც ჯგუფების საუკეთესოები და 7-დან 6 საუკეთესო მეორეადგილოსანი მიიღებს.
მე-2 ადგილოსანების კლასიფიკაცია სამართლიანად რომ განხორციელდეს, 4-გუნდიან ჯგუფებში მე-2-ზე გასულ გუნდებს მე-4 ადგილზე გასულ გუნდებთან ნაჩვენები შედეგები არ ჩაეთვლება. შესაბამისად, 7-ივე ჯგუფის მეორეადგილოსანს თამაშების თანაბარი რაოდენობა ექნება და ნაჩვენები შედეგების მიხედვით საუკეთესო 6 გუნდი ევრობასკეტ 2015-ის საგზურს მიიღებს.
კენჭისყრამდე რამდენიმე საათით ადრე გუნდებს კალათებში გაანაწილებენ. საქართველო, სავარაუდოდ, მე-2 კალათაში მოხვდება.
gbf.ge
საქართველოს ასაკობრივი ნაკრებების სამწვრთნელო შტაბებში სიახლეები და გადაადგილებებია. ნაკრებებში 2 ახალი სახე გამოჩნდა – ირაკლი ხოშტარია და თემურ კანკია, რომლებიც ასაკობრივ ნაკრებებში ასისტენტის პოზიციას დაიკავებენ.
სუპერლიგის ლიდერ “დინამოს” მთავარი მწვრთნელი ირაკლი ხოშტარია 20-წლამდელთა ნაკრების სამწვრთნელო შტაბში იმუშავებს. ხოშტარია მთავარი მწვრთნელის, დავით უსტიაშვილის ასისტენტი იქნება. 20-წლამდელებში აინაცვლა 18-წლამდელთა ნაკრების მთავარმა მწვრთნელმა მიხეილ ბერუაშვილმა, რომელიც ხოშტარიასთან ერთად უსტიაშვილის ასისტენტი იქნება.
18-წლამდელთა ნაკრების მთავრი მწვრთნელის პოსტს არჩილ ჟღენტი დაიკავებს, რომელიც აქამდე 20-წლამდელებში დავით უსტიაშვილის ასისტენტად მუშაობდა. 18-წლამდელებში ჟღენტის ასიტენტები იქნებიან დიმიტრი ჟაკობოვი და გიორგი ნიკოლაძე, რომელიც აქამდე ანალოგიურ პოზიციაზე, ოღონდ 16-წლამდელებში მუშობდა.
16-წლამდელთა ნაკრების მთავარ მწვრთნელად კვლავ გია კაზანჯიანი იმუშავებს, რომლის ასისტენტები ირაკლი ტომარაძე და “სოხუმის” 20-წლამდელთა გუნდის თავკაცი თემურ კანკია იქნებიან. ტომარაძე 16-წლამდელებში აქამდეც კაზანჯიანის ასისტენტად მუშაობდა, კანკიას კი ასაკობრივ დონეზე მწვრთნელობა პირველად მოუწევს.
ზემოთაღნიშნული სიახლეებისა და გადაადგილებების შედეგად სამივე ასაკობრივი ნაკრების სამწვრთნელო შტაბში თავი 3-3-მა სპეციალისტმა მოიყარა, რომელთა შემადგენლობასაც ცალ-ცალკე გთავაზობთ:
20-წლამდელთა ნაკრები
დავით უსტიაშვილი – მთავარი მწვრთნელი
მიხეილ ბერუაშვილი – ასისტენტი
ირაკლი ხოშტარია – ასისტენტი
18-წლამდელთა ნაკრები
არჩილ ჟღენტი – მთავარი მწვრთნელი
გიორგი ნიკოლაძე – ასისტენტი
დიმიტრი ჟაკობოვი – ასისტენტი
16-წლამდელთ ნაკრები
გია კაზანჯიანი – მთავარი მწვრთნელი
ირაკლი ტომარაძე – ასისტენტი
თემურ კანკია – ასისტენტი
gbf.ge
თბილისის “დინამო” ახალ, 2014 წელს ამაღლებული განწყობით ხვდება. ყველაზე ტიტულოვანი ქართული კლუბი, რომელიც 2003 წლის შემდეგ ქვეყნის ჩემპიონი აღარ გამხდარა, მიმდინარე სეზონში ტიტულის მოგების უმთავრესი კანდიდატია. დინამოელებმა სუპერლიგის პირველ წრეში მხოლოდ 1 მარცხი განიცადეს, 3 დღის წინ კი ზურაბ საკანდელიძისა და მიხეილ ქორქიას მემორიალი არსებობის ისტორიაში პირველად მოიგეს. გუნდის ბირთვს გამოცდილი მოთამაშეები შეადგენენ, თუმცა “დინამოში” არაერთი პერსპექტიული ახალგაზრდაა, რომლებიც ნელ-ნელა ეჩვევიან სუპერლიგაში თამაშს და ხელმძღვანელობასაც მათი მომავლის ეიმედება. ჩვენი რუბრიკა “ოვერტაიმის” 2013 ბოლო სტუმრები სწორედ დინამოელები არიან. ეროვნული ნაკრების ყოფილ და მოქმედ წევრებთან – ლაშა გაყრელიძესა და ბესო ლეჟავასთან ერთად ჩვენ “დინამოს” ახალგაზრდა წევრ, გიორგი ორმოცაძესაც გავესაუბრეთ…
ზურაბ საკანდელიძე-მიხეილ ქორქიას მემორიალი
გიორგი გამყრელიძე: ორი ლეგენდარული კალათბურთელის სახელობის მემორიალია და ჩვენთვის ამ ტურნირში მონაწილეობა ყოველთვის საპატიო და სასიამოვნოა. რაც შეეხება უშუალოდ თამაშებს, ჯგუფური ეტაპი ადვილად გავიარეთ, რადგან შსს აკადემია 20-წლამდელთა გუნდით ასპარეზობდა. „რუსთავიც“ ახალგაზრდა გუნდია, ასე რომ წინასწარ ვიცოდით, რომ ფინალში უნდა გვეთამაშა, სადაც ძლიერი მეტოქე გვეყოლებოდა. ასეც აღმოჩნდა. მომზადებულნი ვიყავით, თუმცა რაღაც ჩავარდნებიც გვქონდა როგორც დაცვაში ისე თავდასხმაში. საბოლოოდ, ყველაფერი წარმატებულად ჩამთავრდა. მემორიალი მოვიგეთ, სუპერლიგის პირველი წრეც პირველ ადგილზე დავასრულეთ და საკმაოდ კარგი განწყობით ვხვდებით ახალ წელს.
ბესიკ ლეჟავა: პირველ რიგში, მინდა აღვნიშნო, რომ ჩვენთვის ძალიან მნიშვნელოვანი იყო ამ თასის მოგება. დიდი ხნის შემდეგ “დინამო“ კვლავ დაუბრუნდა ლიდერობას და ამ მემორიალის მოგება ჩვენთვის დიდი სტიმული იყო, რათა შემდგომში უფრო მეტი წარმატებისთვის ვიბრძოლოთ და მეტი ტიტული შევმატოთ დინამოს.
გიორგი ორმოცაძე: 3 წელია “დინამოში“ ვარ და ამ მემორიალამდე არცერთი ტიტული გვქონდა მოპოვებული, პლეიოფებშიც ვერ გავდიოდით, წელს კი ყველაფერი რადიკალურად შეიცვალა და უფრო სერიოზული მიზნები გვაქვს. იმედია, რომ ეს მემორიალი კიდევ უფრო დიდი წარმატების დასაწყისია.
ს უ პ ე რ ლ ი გ ა
გიორგი გამყრელიძე: წელს არ არის ისეთი ხასისხი, როგორიც 1-2 წლის წინ იყო. პირველ რიგში იმიტომ, რომ გასულ წელს ბევრად მეტი ლეგიონერი თამაშობდა და ისინი ძალიან მაღალი კლასის მოთამაშეები იყვნენ, თან უფრო მეტი გუნდი იყო თანაბარი ძალის. ახლა უფრო გამოკვეთილ ფავორიტად „დინამო“ მიიჩნევა. უკეთესი იქნებოდა, მეტ გუნდს ეასპარეზა და ჩემპიონატიც უფრო დაძაბული გამოსულიყო. ყველაფერი მაინც ფინანსებზეა დამოკიდებული და იმედია სუპერლიგის მომავალ სეზონში უფრო ძლიერი გუნდები ითამაშებენ. გუნდებმა კარგი მოთამაშეები უნდა შეინარჩუნონ, ლევანა ფაცაცია, ლაშა ფარღალავა და სხვები უცხოეთში წავიდნენ. ასეთი დონის მოთამაშეების შენარჩუნება მართალია რთულია, მაგრამ აუცილებელი. ამ შემთხვევაში სუპერლიგის ხარისხიც ზემოთ აიწევს და თამაშებიც უკეთესი საყურებელი იქნება.
ვფიქრობ, ლეგიონერები საჭიროა. ახალ ველოსიპედს დღეს აღარავინ იგონებს. ევროპაში ყველგან ასეა – გერმანიაში, იტალიაში… საქართველოში არც იმდენად ბევრი მოთამაშეა, რომ გუნდი მაღალი დონის კალათბურთელებით შეავსო. აქედან გამომდინარე, გუნდში მინიმუმ 2 უცხოელი მოთამაშეა საჭირო. „ბათუმის“ მაგალითი ავიღოთ, 3 ლეგიონერი დაიმატეს და გუნდს უკვე სერიოზული ამბიციები აქვს, ჩემპიონობისთვის იბრძვის და ეს ძალიან მისასალმებელია. მაყურებელიც აქტიურად დადის თამაშებზე, დარბაზი ივსება. ეს განსაკუთრებით საჭიროა რეგიონებისთვის. რუსთავის გუნდს ძალიან დიდი ისტორია აქვს, არაერთხელ გამხდარან ჩემპიონები და ახლა ასეთ კრიზისში არ უნდა იყვნენ. მიმაჩნია, რომ ლეგიონერების მეშვეობით გაცილებით უკეთესი ჩემპიონატი გვექნება.
ბესიკ ლეჟავა: დავამატებდი იმას, რომ სეზონის დასაწყისში ,,შსს აკადემიას’’ და „არმიას“ არ შეეძლოთ ლეგიონერების ჩამოყვანა. ეს ძალიან ცუდია, რადგან მეტნაკლებად ყველა გუნდს სჭირდება ლეგიონერებით შევსება, რათა ჩემპიონატის დონემაც აიწიოს და გუნდში მოთამაშეებს შორის ჯანსაღი კონკურენცია იყოს, ეს ჩემპიონატზეც გადავა და ხარისხიც მოიმატებს. ძალიან კარგი იქნება, თუ ყველა გუნდი გაძლიერდება ლეგიონერებით და სასურველია, ძლიერმა ქართველმა კალათბურთელებმა აქ ითამაშონ და დაეხმარონ სუპერლიგას.
ზოგადად ვფიქრობ,რომ მეტი ყურადღება და დაფინანსებაა საჭირო სპორტის მიმართ.
გიორგი ორმოცაძე: პირველ რიგში, თამაშების რაოდენობაა ცოტა. ასევე შემცირდა გუნდების რაოდენობაც შარშანდელთან შედარებით. ამ ყველაფრის მოწესრიგებას, რა თქმა უნდა, ფინანსები სჭირდება და ვინმემ უფრო მეტი ყურადღება უნდა გამოიჩინოს. აუცილებელია, კიდევ უფრო განვითარდეს ასაკობრივი ჩემპიონატები და ეს მომავალში სუპერლიგის დონის აწევაზეც აისახება. 2008 წლიდან, რაც სუპერლიგისა და ასაკობრივი ვებ-გვერდები შეიქმნა, 16-წლამდელების ჩემპიონატიდან მოყოლებული, სიტუაცია ბევრად დალაგებული და გამოსწორებულია. თვითონ მოთამაშეების დამოკიდებულება და მოტივაციაც შეიცვალა. ადრე სტატისტიკაც არ არსებობდა, ბავშვებს არ ჰქონდათ ელემენტარული პირობები, დარბაზში გათბობა არ იყო და ა.შ. წინსვლა არის, თუმცა უფრო მეტია საჭირო. ის ბიჭები, რომლებიც ახლა თამაშობენ, მეტი პასუხისმგებლობით ეკიდებიან თავიანთ საქმეს, ვიდრე იგივე ჩემი თაობა იყო, რადგან ჩემპიონატები ბევრად უკეთაა ორგანიზებულია.
დ ი ნ ა მ ო
გიორგი გამყრელიძე: ,,დინამოში” ახალი მოსული ვარ. გუნდში ძალიან კარგი ბიჭები დამხვდნენ. მილოჩევიში საქართველოში თამაშობდა და უკვე შეგუებულია სიტუაციას და იცის, რა ხდება. კარტერიც ფაქტობრივად, ქართველია J პესიჩიც მშვენივრად შეეწყო გუნდს. ყოველთვის ვამბობ, რომ თუ გუნდში კარგი სიტუაციაა, ის წარმატებას აუცილებლად მიაღწევს. ჩვენთან სწორედ ასეა. ყველა ყველას მეგობარია, ერთმანეთს პატივს ვცემთ, გვერდში ვუდგავართ და ეს თამაშებზეც ჩანს. თუ რაიმეს მოგების პრეტენზია გაქვს, პირობებიც უნდა გქონდეს ამის მისაღწევად. ის რაც საზღვარგარეთ ელემენტარულია, ჩვენთვის ბევრს ნიშნავს და ჩვენი მენეჯმენტი და ხელმძღვანელობა მართლაც ყველაფერს აკეთებს გუნდისთვის. ჩვენთან დისციპლინაც მაღალ დონეზეა.
ბესიკ ლეჟავა: გუნდში მართლა ძალიან კარგი, მეგობრული სიტუაციაა. ყველას გვესმის ერთმანეთის. პესიჩისთვის პირველი წელია საქართველოში და საკმაოდ კარგად შეეწყო ყველაფერს. ხელმძღვანელობა ისეთ ატმოსფეროს გვიქმნის გუნდში, რომ მოედანზე ასეთი განწყობით გავდიოდეთ და წარმატებისთვის ვიბრძოლოთ. ეს მისასალმებელი და ძალიან სასიამოვნოა. ხშირად გუნდებს აკლიათ ხელმძღვანელობისგან ყურადღება, ჩვენ კი ყველანაირი პირობა გვაქვს. ეს ალბათ შედეგებიდანაც ჩანს. აქ ყველა თავის საქმეს აკეთებს და თანაც მაღალ დონეზე. ყველას პროფესიონალური მიდგომა აქვს საქმის მიმართ.
გიორგი ორმოცაძე: მოთამაშეებს შორის ძალიან კარგი ურთიერთობა და დამოკიდებულებაა. გიორგი, ბესო და მიშა ისეთი მოთამაშეები არიან, რომლებიც მეგობრულად შემოვიდნენ ახალგაზრდებთან ურთიერთობაში. ნამდვილად ერთი ოჯახი ვართ.
ევრობასკეტი
ბესიკ ლეჟავა: ნაკრებში თამაში ჩემთვის ძალიან დიდი პასუხისმგებლობაა და ყოველთვის ამაყი ვარ, როცა ჩემი ქვეყნის სახელით ვთამაშობ. ძალიან მნიშვნელოვანი იყო ჩემთვის ამ ევროპის ჩემპიონატზე ასპარეზობა. ძალიან დიდი გამოცდილება მივიღე. ისეთი გუნდების და ისეთი კალათბურთელების წინააღმდეგ ვითამაშე, რომლებსაც ადრე მხოლოდ ტელევიზორში ვუყურებდი. ეს ჩემთვის დიდი სტიმული იყო.
ნაკრების გამოსვლას დადებითად შევაფასებდი, რადგან ფაჩულიას და შენგელიას სახით დიდი დანაკლისი გვქონდა. ბიჭებმა ბოლომდე ვიბრძოლეთ. მაქსიმუმი გავაკეთეთ. მაყურებელს ალბათ ახსოვს, რომ ყველა თამაშზე ბოლომდე დავიხარჯეთ. ერთადერთი თამაში იყო ჩეხეთთან, როცა დიდი ანგარიშით წავაგეთ. დანარჩენ ყველა თამაშში თანაბარი ბრძოლა იყო, ესპანეთი კი რა თქმა უნდა სხვა დონეა. ჩეხეთთან გუნდი უკვე გადაღლილი იყო, რადგან ძირითადი დატვირთვა 6-7 მოთამაშეზე მოდიოდა, რომლებსაც დიდი ხანი უწევდათ მოედანზე ყოფნა. გრაფიკიც ძალიან დატვირთული გვქონდა, 6 დღეში 5 თამაში გვიწევდა, ძალიან რთულია სპორტსმენისთვის ზედიზედ ძლიერ გუნდებთან თამაში და ამის გაძლება, დაღლილობამაც თავისი როლი ითამაშა. ვერ აღიდგინეს ბიჭებმა ძალები. ყველას უნდოდა გავსულიყავთ, მაგრამ სპორტი ასეთია – ხან წააგებ, ხან მოიგებ.
გიორგი გამყრელიძე: გულით ვგულშემტკივრობდი ბიჭებს, მსურდა გაგვემეორებინა მაინც ევრობასკეტის წინა შედეგი, როცა 12 საუკეთესო გუნდში გავედით. ორი წამყვანი მოთამაშე აკლდა გუნდს და ამან დიდი გავლენა იქონია. მიუხედავად ამისა, ბიჭებმა ყველაფერი გააკეთეს და თავი არ დაზოგეს ძალიან პატარა სკამით. ვფიქრობ, მეტიც უნდა ეთამაშათ ბიჭებს. თუ მიგყავს ახალგაზრდები, მეტი სათამაშო დროც უნდა მისცე. ხუთ მატჩს ვერანაირად გაუძლებდა მხოლოდ 5-6 კაცი, რაც არ უნდა მომზადებული იყოს გუნდი. როგორც ვნახეთ, ევრობასკეტზე ყველა გრძელი სკამით ასპარეზობდა.
ბესიკ ლეჟავა: ხორვატიასთან რომ მოგვეგო, უკვე 1 ნაბიჯით გასულები ვიყავით. გორტატის და ლამპეს პოლონეთს მაგრად მოვუგეთ, სლოვენიაში სლოვენიასთან თანაბრად ვითამაშეთ. გიორგის დავეთანხმები, რაც არ უნდა ძლიერი მოთამაშეები გყავდს, 6-7 კაცით ძნელია შედეგის მიღწევა.
გიორგი ორმოცაძე: ყველა ადევნებდა თვალს ვერობასკეტს და ყველამ დაინახა, რომ მაქსიმუმს აკეთებდნენ ჩვენი ბიჭები. უბრალოდ, მათ ენერგია არ ჰყოფნიდათ შედეგის მისაღწევათ.
კ ა ლ ა თ ბ უ რ თ ი
გიორგი ორმოცაძე: მამაჩემის (ამბროსი ორმოცაძე) და ჩემი ოჯახიდან გამომდინარე კალათბურთის თამაში 7 წლის ასაკში აკადემიაში, გელა წულაძესთან დავიწყე. შემდეგ ლიკა ქაჯაიასთან, ბოლო კი „დინამოში“ მოვედი.
მომენტებში რთულია კალათბურთელის და მწვრთნელის შვილობა. ჩემ მიმართ ყოველთვის იყო მკაცრი დამოკიდებულება და ბევრს მთხოვდნენ, მაგრამ მამა უფრო ნაკლებად ერევა ხოლმე ამ საქმეში.
გიორგი გამყრელიძე: მეც 7 წლის ვიყავი კალათბურთის თამაში რომ დავიწყე. გურამ მეგრელაძე იყო ჩემი პირველი მწვრთნელი. „ტიტებში“ ვთამაშობდი. ჩვენი მომგები არავინ ყოფილა, ძალიან ძლიერი გუნდი ვიყავით და ყოველ წელს ჩემპიონები ვხვდებოდით. ხუთგზის ჩემპიონები გახლდით და ბავშვთა ლიგებში ჩვენი სახელი დავტოვეთ. რაც შეეხება უმაღლეს ლიგას, მაშინ სუპერლიგა არ იყო, არსებობდა მხოლოდ დიდების ჩემპიონატი, სადაც ახალგაზრდები არ აყავდათ. არც მოყვარულთა ლიგა იყო, არც დუბლები… ამის გამო ჩემ თაობაში ბევრი ნიჭიერი ახალგაზრდა დაიკარგა, მათ შეეძლოთ კალათბურთის თამაში და წარმატების მიღწევა.
თავიდან მეც არავინ ამიყვანა ჩემპიონატში. თუმცა, საბედნიეროდ, გამიმართლა და უნივერსიტეტის გუნდში მოვხდი. თსუ-ში იურიდიულზე ვსწავლობდი და ნუგზარ მარკოიშვილმა ამიყვანა. არადა, უკვე კალათბურთისთვის თავის დანებებას ვაპირებდი. მერე იყო „შევარდენი“, სადაც მიხეილ კობეშავიძემ მიმიწვია. ასევე ვთამაშობდი აკადემიაშიც. ბოლოს დრაჟენ ბრაიკოვიჩის „დინამოში“ მოვხვდი. „დინამოს“ უცხოელი მწვრთნელი ჰყავდა, სადაც უამრავი ვარსკვლავი თამაშობდა – ჟღენტი, ხოშტარია… მე მეორე გამთამაშებელი ვიყავი და სათამაშო დროც მქონდა. მაშინ ქართველი მწვრთნელი ამას არ გააკეთებდა. გამიმართლა, რომ უცხოელი მწვრთნელი იყო ჩამოსული და მან მიმიწვია, თორემ ალბათ მეც უგუნდოდ დავრჩებოდი.
ბესიკ ლეჟავა: მამაჩემმა თავიდან ფეხბურთზე შემიყვანა, სადაც სულ 1 დღე ვიარე და უკან გამომიყვანა. ძალიან მაღალი ვიყავი სხვებთან შედარებით და მიხვდა, რომ ჩემგან ფეხბურთელი არ გამოვიდოდა. კალათბურთზე 8 წლიდან შევედი. თავიდან „ჩხიკვებში“ ვთამაშობდი. შემდეგ მეც გურამ მეგრელაძესთან გადავედი და მასთან ჩამოვყალიბდი კალათბურთელად. მე და გიორგი ერთად ვთამაშობდით, მაგრამ მე „ვარსკვლავების“ სახელით გამოვდიოდი. ვარჯიშით კი ისევ მეგრელაძესთან ვვარჯიშობდი, „ტიტების“ გუნდში არ მითამაშია. შემდეგ აკადემიაში გადავედი. ერთი პერიოდი საფრანგეთში, „დიჟოში“ ვთამაშობდი და იქ დიდი გამოცდილება მივიღე. იმ დროს ვიქტორ სანიკიძეც საფრანგეთში თამაშობდა, ოღონდ ის უმაღლეს ლიგაში, მე დუბლებში. საფრანგეთმა დიდი როლი ითამაშა ჩემს საკალათბურთო კარიერაში და იქ ყოფნის დროს ძალიან მოვუმატე.
გიორგი გამყრელიძე: სხვათაშორის, აკადემიის დამსახურება იყო, რომ ახალგაზრდები არ დაიკარგნენ, რადგან მათ გუნდი ჩასვეს უმაღლეს ლიგაში.
ბესიკ ლეჟავა: როდესაც „დინამომ“ ბრაკოვიჩი ჩამოიყვანა მწვრთნელად, ჩვენ აკადემიაში ვთამაშობდით, რომელიც ახალგაზრდებით დაკომპლექტებული გუნდი იყო. ,,დინამო’’ ცხრილში პირველ ადგილზე იმყოფებოდა, ჩვენ – ბოლოზე. მახსოვს, „დინამოს“ პირველი თამაში იყო ბრაკოვიჩის თავკაცობით და ჩვენ გვეთამაშებოდნენ. ეს მატჩი მოვიგეთ. გადამწყვეტი ჯარიმა მე ჩავაგდე. ჩემთან და გიორგისთან ერთად სანიკიძე და საყვარელიძე თამაშობდნენ. პირველ წრეში ცინცაძეც ჩვენთან ერთად იყო, მერე კი ბათუმში გადავიდა. ბრაიკოვიჩი შოკში იყო. იკითხა, ეს გუნდი ნამდვილად ბოლო ადგილზეაო? J იმ დროს „დინამო“ სასწაული გუნდი იყო და წარმოუდგენელი იყო, რომ ბავშვებმა დავამარცხეთ. ეს თამაში ჩემთვის ყველაზე განსაკუთრებული იყო. შემდეგ გიორგი „დინამოში“ გადავიდა, მე თსუ-ში.
გიორგი ორმოცაძე: ჩემთვის დასანანიც და დასამახსოვრებელი მატჩებიც შარშანდელ სეზონს უკავშირდება, პლეიოფის სერიაში „არმიასთან“ გამარჯვება ბოლო წუთებზე ყველაზე ემოციური იყო. დუბლებიდან კი პლეიოფში ,,შსს აკადემიის’’ დამარცხებას გამოვყოფდი. შსს ძალიან ძლიერი გუნდი იყო, უკრაინელი ცენტრიც ჰყავდათ ჩამოყვანილი. მიუხედავად ამისა, ნახევარფინალში 1 ქულით მოვუგეთ და ფინალში გავედით.
სამომავლო გეგმები
გიორგი ორმოცაძე: განსაკუთრებული გეგმები ჯერ არ მაქვს. წინასწარ არ იცი, რა იქნება შემდეგ სეზონში კალათბურთში და ამიტომ ვერაფერს ვიტყვი. ვსწავლობ თბილისის სახელმწიფო უნივერსიტეტში სოციალურ-პოლიტიკურ მეცნიერებათა ფაკულტეტზე, სოციოლოგიის მიმართულებით. მესამე კურსზე ვარ. შემდგომში მაგისტრატურის გავლასაც ვაპირებ.
ბესიკ ლეჟავა: პირველ რიგში, კონცენტრირებული ვარ სუპერლიგის მიმდინარე სეზონზე. აუცილებლად უნდა გავხდეთ ჩემპიონები. დიდი სურვილი მაქვს „დინამო“ საერთაშორისო აპარეზზეც გავიდესს, თუმცა ეს, რა თქმა უნდა, ხელმძღვანელობაზეც დიდადაა დამოკიდებული. მთავარია, ჯერ ჩემპიონის ტიტული მოვიპოვოთ.
რაც შეეხება შორეულ გეგმებს, ჯერ არ ვარ ჩამოყალიბებული კარიერის დასრულების შემდეგ რას ვიზავ. იმედია, ჯანმრთელობა ხელს შემიწყობს, ტრავმიანობას გადავურჩები და კიდევ დიდხანს ვითამაშებ კალათბურთს. ისე მწვრთნელობაზეც მიფიქრია, მაგრამ კონკრეტულ გადაწყვეტილებამდე ჯერ არ მივსულვარ. ერთი კი ზუსტად ვიცი – სახლის ყიდვა მინდაJ
გიორგი გამყრელიძე: სეზონი უნდა ჩავატაროთ წარმატებით და ჩემპიონები გავხდეთ. საერთაშორისო ასპარეზიც შესანიშნავი იქნება. მომავალში რა იქნება ვერ გეტყვით, მთელი ცხოვრება ამ სპორტს მივსდევ, კალათბურთით ვცხოვრობ… კარიერას რომ დაამთავრებ, ბუნებრივია გინდა, რომ კვლავ ამ სფეროში დარჩე. ვნახოთ, როგორ იქნება.
ახალგაზრდა თაობა
ბესიკ ლეჟავა: ჩვენს გუნდში ძალიან კარგი ბავშვები არიან, მაგალითად გიორგი თვალაბეიშვილი, რომელსაც დიდი ტალანტი და მომავალი აქვს. ვფიქრობ, მთავარი კალათბურთისადმი სწორი მიდგომა და შრომაა საჭირო. ბევრი მოთამაშე ვიცი, რომელმაც ბევრი იშრომა, მაგრამ არასწორად და შედეგს ვერ მიაღწია. ამიტომ ახალგაზრდებს ვურჩევდი სწორი მიმართულებით იმუშაონ. დანარჩენი უკვე აზროვნება და გამართლებაა. წარმატების მისაღწევად ნიჭთან ერთად შრომისმოყვარეობა, აზროვნება, სწორი მიმართულება და იღბალია საჭირო.
გიორგი გამყრელიძე: ახალგაზრდებს ეტყობათ, რომ ნიჭიერები და მონდომებულნი არიან, მათ შორის გიორგი თავალაბეიშვილიც, რომელიც ასაკით ყველაზე პატარაა გუნდში. მას ყველა მონაცემი აქვს და ისღა დარჩენია, რომ თავს მიხედოს, იშრომოს და ივარჯიშოს. შრომა აუცილებლად ფასდება. მნიშვნელოვანია ფსიქოლოგია,რომელიც სპორტში ყველაფერია. რაც უფრო ძლიერი ხარ ფსიქოლოგიურად, მით უფრო ძლიერი ხარ მოედანზე და ჩაგრავ მეტოქეს. თუ გინდა, რომ სერიოზული კალათბურთი ითამაშო, შენი თავის უნდა გწამდეს და დიდი ნებისყოფა უნდა გქონდეს. რთულია, როცა ახალგაზრდა ხარ 8 საათი ივარჯიშო, მაგრამ სხვანაირად არ გამოვა. როცა ამ ბიჭებისხელა ,,დინამოში’’ ვიყავი, სულ ვვარჯიშობდი და დარბაზიდან არ გამოვდიოდი. დავეთანხები ბესოს, რომ სწორად უნდა ივარჯიშო და ამ სწორ მიმარულებაში მწვრთნელმა უნდა ითამაშოს თავისი როლი. ჩვენს დროს არაფერი არ იყო, ახლა კი ინტერნეტის მეშვეობით ყველაფერი ხელმისაწვდომი და გაცილებით მარტივია.
ბესიკ ლეჟავა: ვუზიარებთ ჩვენს გამოცდილებას ბიჭებს და ისინიც ყველაფერს ითვალისწინებენ. ეს კი დიდი სტიმულია მათთვის.
ახალი წელი
გიორგი გამყრელიძე: ყოველთვის ოჯახთან ერთად, სახლში ვხდები ახალ წელს. შემდეგ მეგობრების წრეში ვერთობით. კარგია, რომ კარგ ხასიათზე ვამთვრებთ ამ წელს. მოგებით დავასრულეთ სეზონი. მემორიალის თასი მოვიპოვეთ. სპორტსმენები ვართ და სასიხარულოა, რომ ჯანმრთელად ვხვდებით ახალ წელს და ტრავმა არ გვაწუხებს. იმედია, 2014 წელი იქნება წარმატებული, მშვიდობიანი და ბარაქიანი როგორც „დინამოსთვის“, ისე ყველასთვის.
ბესიკ ლეჟავა: მე და ჩემი მეუღლე ბაკურიანში მივდივართ და იქ შევხდებით ახალ წელს. შემდეგ მეგობრებიც შემოგვიერთდებიან.საერთოდ, სულ თბილისში ვატარებთ ხოლმე ახალ წელს, მაგრამ წელს ბაკურიანში გადავწყვიტეთ წასვლა. სხვათაშორის, საზღვარგარეთ 2-ჯერ შევხდი ახალ წელს – საფრანგეთში და კვიპროსში. საფრანგეთში საერთოდ ვერაფერი ვიგრძენი, რომ არ მცოდნოდა, რომ 31 დეკემბერი იყო, ალბათ ვერც გავიგებდი ახალი წლის დადგომასJ არადა თბილისში თავისუფლებაზე გავიზარდე და რაც ხდებოდა თბილისში, კარგი თუ ცუდი, ყველაფრის საქმის კურსში ვიყავი სულJ. ასე რომ, საფრანგეთი რაღაც არ მომეწონა. არც ფეიერვერკი იყო, არც ხმაური, საქართველოში კი ამ ყველაფერს მიჩვეული ვარ. კვისპროსში კი საახალწლო განწყობა და გარემო კლიმატიდან გამომდინარე არ იყო. მოკლედ, ყველაზე მეტად ახალი წელი საქართველოში მიხარია.
გიორგი ორმოცაძე: სახლში ვხვდები ახალ წელს, პირველ იანვარს კი საერთოდ არ გავდივარ სახლიდან. ჩემთვის წყნარად ვატარებ ხოლმე ამ დღესJ ვისურვებ, რომ ეს ახალი წელი იყოს ყველასთვის სუპერ წელი და ყველასთვის ძალიან წარმატებული!
საკალათბურთო სუპერლიგამ მიმდინარე სეზონის მეორე ნახევრის ღონისძიებების კალენდარი გამოაქვეყნა.
შენიშვნა: სუპერლიგის მეორე წრეში რეგიონში თამაშები ტრადიციულად ტურის წინა დღეს გაიმართება
გუნდი, მოთამაშე, რომელიც არმიიღებს სავალდებულო ღონისძიებებში მონაწილეობას მოიხსნება სუპერლიგის ჩემპიონატიდან და დაეკისრება ფინანსური ჯარიმა
სიახლე ქართული კალათბურთის მოყვარულთათვის. მათთვის, ვინც სისტემატიურად დადის სუპერლიგის თამაშებზე, ან ამის სურვილი გააჩნია, შესაძლებლობა ეძლევა, მთელ სეზონზე გათვლილი აბონემენტით ისარგებლოს.
აბონემენტის მფლობელებს შეეძლებათ საკალათბურთო სუპერლიგის ყველა მატჩს, ასევე სუპერლიგის ორგანიზებით გამართულ ყველა ღონისძიებას დაესწრონ. აბონემენტის ღირებულება 40 ლარია და მისი შეძენა სპორტის სასახლის სალაროებსა და კალათბურთის ფედერაციასთან ერთად ინტერნეტშიც იქნება შესაძლებელი.
სპეციალური აქციის ფარგლებში აბონემენტის შეძენა ფასდაკლებით შეგიძლიათ. შებრძანდით სუპერლიგის პარტნიორ ვებ-გვერდ hotsale.ge-ზე და შეიძინეთ 2013-14 წლების სეზონის აბონემენტი 50-პროცენტიანი ფასდაკლებით.
