ჭდე: Lazio

რომის „ლაციოს“ ახალწვეულ ჯოზეფ მინალას წარმომადგენელმა ფეხბურთელის ასაკთან დაკავშირებით გაჩენილ კითხვებს უპასუხა. პასპორტში კამერუნელ მოთამაშეს დაბადების თარიღად 1996 წლის 24 აგვისტო უწერია, თუმცა მისი ფიზიკური მდგომარეობიდან გამომდინარე, ბევრმა ეჭვი შეიტანა იმაში, რომ მინალა მართლაც 17 წლისაა.

„მისი მისამართით უსამართლო ბრალდებები გაისმა, თუმცა ჯოზეფი სიმშვიდეს ინარჩუნებს. მას რთული ბავშვობა ჰქონდა. თუ გაესაუბრებით, დარწმუნდებით, რომ მინალა მართლაც 17 წლის ბიჭი გახლავთ“, – განაცხადა ფეხბურთელის აგენტმა დიეგო ტავანომ.

ჯოზეფ მინალა „ლაციოში“ გასული წლის დეკემბრის თვეში გადავიდა.

ბექა დოგრაშვილი

ირლანდიის ნაკრების ყოფილმა მთავარმა მწვრთნელმა ჯოვანი ტრაპატონიმ რომის „ლაციოს“ ჩაბარებაზე უარი განაცხადა.

ვარაუდობენ, რომ „არწივების“ ამჟამინდელი თავკაცი ვლადიმირ პეტკოვიჩი დაკავებულ პოსტს საშობაო არდადეგების შემდეგ დატოვებს, ამიტომ რომაელები ახალი მწვრთნელის კანდიდატურას არჩევენ. გავრცელებული ინფორმაციით, „ლაციოს“ ხელმძღვანელობამ კლუბში 74 წლის ტრაპატონი მიიწვია, თუმცა ფეხბურთის იტალიელმა სპეციალისტმა აღნიშნულ წინადადებაზე უარი განაცხადა. როგორც ჩანს, ტრაპატონის საკლუბო ფეხბურთში დაბრუნება არ სურს და ისევ რომელიმე ნაკრების ჩაბარებით არიას დაინტერესებული.

შეგახსენებთ, რომ ტრაპატონის მწვრთნელის რანგში შვიდჯერ აქვს მოგებული სერია A: აქედან ექვსჯერ „იუვენტუსთან“, ერთხელ კი მილანის „ინტერთან“ ერთად.

იტალიური „კორიერე დელო სპორტის“ ცნობით კი, „ლაციოს“ ედოარდო რეია ჩაიბარებს, რომელიც რომაულ კლუბს 2010-2012 წლებში თავკაცობდა. იმავე წყაროს თანახმად, რეიას თანაშემწე „ლაციოს“ ყოფილი თავდამსხმელი სიმონე ინძაგი იქნება.

ბექა დოგრაშვილი