ჭდე: ლივერპული

“მანჩესტერ სიტის” ესპანელმა მწვრთნელმა, პეპ გვარდიოლამ “ლივერპულთან” გასამართ მატჩამდე მერსესაიდელთა გერმანელ თავკაცზე, იურგენ კლოპზე ისაუბრა.

“ის ძალიან ქარიზმატული მწვრთნელია, მის შესაძლებლობებს დიდ პატივს ვცემ და ვაღიარებ. ის უმაღლესი დონის მწვრთნელია.

როდესაც გერმანიაში უცხოელი მწვრთნელის რანგში წავედი და მას შევხვდი, ის ძალიან თბილად მომექცა. პირველად, როდესაც სუპერთასის მატჩში წავაგე და მერეც ის ყოველთვის სასიამოვნოდ იქცეოდა ჩემთან მიმართებაში.

რა თქმა უნდა, ჩვენ რადიკალურად განვსხვავდებით ერთმანეთისაგან, მე კატალონიელი ვარ, ის კი გერმანელი.

ვაღიარებ, რომ გატანილ გოლს ის უფრო კარგად აღნიშნავს ვიდრე მე. ასეთი დონის მწვრთნელების წინააღმდეგ თამაში ყოველთვის დიდი სიამოვნებაა ჩემთვის, ” – აცხადებს ესპანელი სპეციალისტი.

მერსესაიდული “ლივერპულის” მთავარმა მწვრთნელმა, იურგენ კლოპმა პეპ გვარდიოლას “მანჩესტერ სიტიზე” ისაუბრა, რომელიც მესამეზეა და ერთი ქულით უსწრებს გერმანელი სპეციალისტის გუნდს.

“პრემიერ ლიგის თითოეული თამაში უმნიშვნელოვანესია.

ყველამ ძალიან კარგად ვიცით, თუ რა შეუძლია “მანჩესტერ სიტის”. “მონაკოსთან” მათ საკმაოდ კარგად ითამაშეს და მომდევნო ეტაპზეც შეეძლოთ გასვლა. უბრალოდ, ისინიც ადამიანები არიან, ამიტომაც გამოვარდნენ.

მათი შეტევებისაგან თავის დაცვა ძალიან რთულია. მოსაგებად აუცილებელია ორთაბრძოლებში გამარჯვება. ისინი ნამდვილ ფეხბურთს თამაშობენ.

ჩემი გადმოსახედიდან, “მანჩესტერ სიტის” წინააღმდეგ თამაში ყველაზე რთულია. ეს სეზონის უმნიშვნელოვანესი მომენტია და ვთვლი, რომ ამ მატჩში ფავორიტები ჩვენ არ ვართ,” – აცხადებს იურგენ კლოპი.