შაბათს ვისოლის სარაგბო სტადიონმა ქართულ-ფრანგულ რკენას უმასპინძლა. 16 საათზე ვეტერან ლოკომოტიველბსა და ფრანგულ კლუბ „პოკელენ XV“-ის შორის დიდი ბურთაობა გაჩაღდა.
საქართველოში ვეტერან მორაგბეთა სტუმრობა უცხო ხილი როდია. პოკელენი ბოლო ოთხი წლის განმავლობაში მესამე გუნდია, რომელიც სათამაშოდ თბილისს ესტუმრა. 2012 წელს ინგლისიდან ‘სევენოუქსი’ გვეწვივნენ, რომლებიც სამოყვარულო კლუბებს ‘დევებსა’ და ‘ბარბაროსებს’ ერაგბნენ. შემდეგ პოლონეთში მცხოვრები ფრანგი, ინგლისელი, ირლანდიელი და შოტლანდიელი მორაგბეებისგან დაკომპლექტებული გუნდი ‘ოლდ ქოჯერსი’ ჩამოვიდა, 2014-ში კი ქართველ და რუს ვეტერანთა რკენაც გაიმართა ‘ავჭალაში’.
პოკელენი საფრანგეთის ლანგედოკის რეგიონის ქალაქ პეზნასის გუნდია, რომელშიც ვეტერანი ბორჯღალოსანი გუჯა იოვაძე თამაშობდა. სწორედ მისი დამსახურებაა ფრანგული გუნდის სტუმრობა საქართველოში. ყველაზე ტიტულოვანი ქართული კლუბის ვეტერანთა გუნდის შემადგენლობაში ლოკომოტივის სხვა დასხვა თაობის მორაგბემ ითამაშა, მათ შორის ბორჯღალოსნებმა და 7-კაცელებმა: გუჯა იოვაძემ, კახა ალანიამ, აჩიკო ქავთარაშვილმა, გიორგი ბუგიანიშვილმა, ზაზა ლეჟავამ, პალიკო ჯიმშელაძემ, კაკო მაჭუტაძემ, ბობა კვინიხიძემ, გიორგი კობერიძემ, ვასილ აბაშიძემ დაგიორგი ასათიანმა.
„ძალიან გახარებული ვარ, ვინაიდან იმ ბიჭებთან ერთად მომიწია თამაშმა, ვისთანაც ერთად ლოკომოტივის თუ ნაკრების შემადგენლობაში მინდორზე არა ერთხელ გავსულვარ და წარმატებისთვის მიმიღწევია. დიდი მადლობა მინდა გადავუხადო ფრანგ ვეტერანებს ამ თამაშისათვის. ნამატჩევს, როგორც მორაგბეებს გვჩვევია, კარგათაც მოვილხინეთ და ერთად ვუქომაგეთ ჩვენს 20-წლამდელებს, რომლებმაც ალაფის გათამაშებაზე ფიჯის სძლიეს.“ განაცხადა კახა ალანიამ, ვეტერანმა ბორჯღალოსანმა და საქართველოს 7-კაცა რაგბის ნაკრების მთავარმა მწვრთნელმა.
როგორც ბებრებს შეჰფერით, ლაღი, მხიარული და თავშესაქცევი რაგბი გაიმართა. შეცვლა შეუზღუდავი იყო, კარში არავინ ურტყამდა და ლელობსაც აქა-იქღა ითვლიდნენ, რის გამოც ზუსტი ანგარიში არ შემოგვრჩა, მაგრამ ასეთ მატჩებში ანგარიშს დიდი მნიშვნელობა არ ენიჭება, თუმცა შეჯერებული ვერსიებით თამაში ლოკომოტიველების გამარჯვებით დასრულდა. ორივე გუნდმა ნანატრი ბურთაობით გული კარგად, რომ იჯერა, გეზი ტრადიციული მესამე ტაიმის ასპარეზისკენ აიღო და კარგად, რაგბულად მოილხინა.
„ეს იყო რაგბის ზეიმი. რამდენიმე თაობის “ლოკომოტიველს” ამ დღეს სიზმარი აუხდა. სიზმარი, რომელიც ყველა ვეტერან მორაგბეს მინიმუმ კვირაში ორჯერ მაინც ესზიმრება – ის რაგბის თამაშობს ! სათამაშო გადაძახილები გუნდელებთან, ბალახის და გამახურებელი მალამოს სუნი, ჯახი, ტკივილი და ოფლი. ამიტომაც ვამბობ რომ ყოფილი მორაგბე არ არსებობს, ვერც იარსებებს იმიტომ, რომ რაგბი ცხოვრება და ცხოვრების წესია. მადლობა ჩვენს ძმას, ვეტერან ბორჯღალოსან გუჯა იოვაძეს ამ ინიციატივისათვის, სწორედ მან ჩამოიყვანა ეს გუნდი საქართველოში.“ განაცხადა ვეტერანმა მორაგბემ, სტრატეგიული ბრენდინგის სააგენტო ‘ლაივის’ დამფუძნებელმა, ალექსი ჩიქოვანმა.
Rugby.GE
