ეროვნული ლიგის მეცხრამეტე ტურში თბილისის “დინამო” რუსთავის “რუსთავს” დაუპირისპირდა.
შეხვედრაში ანგარიში მე-18 წუთზე გაიხსნა. აკაკი შულაიამ დავით კობოურის გადაცემის შემდეგ გაიტანა. ზუსტად 16 წუთში ნიკა ნინუამ ორამდე გაზარდა სხვაობა. მეორე ნახევარში, ელგუჯა ლობჯანიძემ მინიმუამდე შეამცირა ჩამორჩენა. თუმცა, მეტი გოლი აღარ გასულა. საბოლოოდ – 2-1 დედაქალაქელთა სასარგებლოდ.
ამ გამარჯვების შემდეგ “დინამო” 41 ქულით მეორეა. ხოლო, “რუსთავს” 21 ქულა აქვს და მეექვსე ადგილს იკავებს.
ეროვნული ლიგის მეთვრამეტე ტურის შეხვედრაში “მიხეილ მესხი 2”-ზე ერთმანეთს “ლოკომოტივი” და “რუსთავი” დაუპირისპირდნენ.
ანგარიში ეროვნული ლიგა 2-ის შარშანდელმა ბომბარდირმა, დათა სიჭინავამ გახსნა. მან ამის გაკეთება 45-ე წუთზე მოახერხა, თუმცა 68-ეზე მამია გავაშელიშვილმა შეძლო გათანაბრება. საბოლოოდ, მატჩი, ანგარიშით, 1-1 დასრულდა.
ამ თამაშის შემდეგ “ლოკო” 19 ქულით მეშვიდეა. ხოლო, “რუსთავს” 21 ქულა აქვს და მეექვსე პოზიციას იკავებს.
ფოტო: “ლოკომოტივის” ოფიციალური გვერდი
დღეს ეროვნული ლიგის მეჩვიდმეტე ტურის შეხვედრაში “რუსთავი” “სამტრედიას” დაუპირისპირდა.
“მიხეილ მესხზე” მიმდინარე მატჩში ანგარიში 33-ე წუთზე ოთარ მარცვალაძემ გახსნა. ამ შემთხვევაში საგოლე პასი ლევან გეგეჭკორმა მიითვალა. თუმცა, 37-ეზე სამტრედიელთა მხრიდან, ანტე გიმ გაათანაბრა თერთმემეტრიანის ნიშნულიდან. მეორე ნახევარში, 75-ეზე გიორგი პაპავას გადაცემის შემდეგ, ოთარ მარცვალაძემ დუბლი შეასრულა და “რუსათაველებს” გამარჯვება მოუტანა.
ამ მოგების შემდეგ ვარლამ კილასონიას შეგირდებს 20 ქულა დაუგროვდათ და მეექვსე ადგილს იკავებენ. ხოლო, “სამტრედია” ცხრა ქულით ბოლოზეა.
დღეს ეროვნული ლიგის მე-16 ტურში “რუსთავი” “დილას” დაუპირისპირდა.
“მიხეილ მესხზე” მიმდინარე შეხვედრაში ანგარიში ლევან ნონიკაშვილმა მეოთხე წუთზე გახსნა. ისედაც უკან მყოფ “რუსთავს” ტაიმის მიწურულს კიდევ ერთი პრობლემა შეექმნა: მესამე დამატებულ წუთზე ნუკრი რევიშვილმა წითელი ბარათი მიიღო. სავარაუდოდ, მეკარემ მსაჯს სიტყვიერი შეურაცხყოფა მიაყენა. თუმცა, მეექვსე დამატებულ წუთზე მათე ცინცაძემ მოახერხა თავით გოლის გატანა და წონასწორობა აღადგინა.
მეორე ტაიმში, 58-ე წუთზე ცინცაძემ მეორე გოლიც შეაგდო. თუმცა, “დილას” ქულა ნდარ ქავთარაძის მიერ 83-ე წუთზე გატანილმა გოლმა გადაურჩინა. საბოლოოდ, 2-2.
ამ ფრის შემდეგ “რუსთავს” 17 ქულა დაუგროვდა და ცხრილში მეშვიდე ადგილს იკავებს. რაც შეეხება “დილას”, ის 31 ქულით მეორეა.
დღეს ეროვნული ლიგის მე-14 ტურში “რუსთავმა” “სიონი” “მიხეილ მესხზე” მიიღო.
საკმაოდ დაძაბულ შეხვედრაში ანგარიში მეცხრე წუთზე ზაზა ციცქიშვილმა გახსნა. ამ შემთხვევაში “რუსთაველთა” მოთამაშეს საგოლე გადაცემა თამაზ მაქაცარიამ გაუკეთა. თუმცა, 43-ეზე ლაშა ლეჟავას პასით ალექსანდრე გურეშიძემ გაათანაბრა.
მეორე ნახევარში, 48-ე წუთზე ციცქიშვილმა კიდევ ერთხელ გაიყვანა მასპინძლები წინ. მაგრამ 76-ეზე ლაშა მანაგაძის გადაცემის შემდეგ, ჯაბა უგულავამ საბოლოო ანგარიში, 2:2 დააფიქსირა.
“რუსთავი” 15 ქულით მეექვსეა. ხოლო, “სიონს” ათი ქულა აქვს და მეცხრე ადგილს იკავებს.
დედაქალაქურმა „საბურთალომ“, რომელმაც მიმდინარე სეზონში მეათე გამარჯვება მოიპოვა, „რუსთავს“ უმასპინძლა და 2:1 დაამარცხა. გიორგი ჭიაბრიშვილის ბიჭებმა ბრძოლისუნარიანობა კიდევ ერთხელ გამოავლინეს და მორიგი შეხვედრა შემოატრიალეს, ამჯერად კაცნაკლულებმა.
წინა მატჩისგან განსხვავებით, „საბურთალოს“ ძირითად შემადგენლობაში რამდენიმე ცვლილება განხორციელდა, ერთ-ერთი კი გურამ გოშთელიანის თერთმეტეულში გამოჩენა იყო. ახალგაზრდა ფორვარდს ტრავმის გამო თითქმის ორი წელი გაუცდა და ახლა იბრუნებს ნელ-ნელა სპორტულ ფორმას.
რაც შეეხება მატჩს, მე-8 წუთზე სტუმრები დაწინაურდნენ – კუთხურიდან ჩაწოდებულ ბურთს ვეტერანი დავით კვირკველია გამოეხმაურა და თავით გახსნა ანგარიში. ტაიმის შუაში თბილისელებს ანგარიშის გათანაბრება მართებდათ – გეგა დიასამიძე მეკარესთან პირისპირ გავიდა, გოლიც თითქოს გარდუვალი იყო, მაგრამ 4-5 მეტრიდან შედეგიანი დარტყმა ვერ განახორციელა.
მეორე ტაიმის დებიუტიც, ისევე როგორც პირველი ნახევრის საწყისი წუთები, „საბურთალოსთვის ცუდად დაიწყო – 47-ე წუთზე საჯარიმოს გარეთ უხეშობისთვის მეკარე და გუნდის კაპიტანი, ლაზარე კუპატაძე გააძევეს. მის მაგივრად კარში ბექა ქურდაძე ჩადგა, სათადარიგოებისკენ კი გეგა დიასამიძემ გადაინაცვლა. მიუხედავად კაცნაკლულობისა, მასპინძლებმა დამსახურებულად გაიმარჯვეს. თუმცა, დაწინაურებამდე თბილისელებს რამდენჯერმე მართებდათ მეტოქის კარის აღება. ჯერ კოხრეიძეს მიეცა შანსი, მაგრამ მეკარემ არ გაატანინა. შემდეგ ტერას ახლო მანძილიდან დარტყმული, კვლავ რევიშვილმა გააშეშა ბურთი ადგილზე. რამდენიმე წუთში ბექა გვარაძემ კვირკველია ჩამოიშორა ტექნიკურად, კარშიც დარტყა, მაგრამ ბურთი ძელს მოხვდა. შეხვედრაში გადამწყვეტი აღმოჩნდა დავით ვოლკოვის მინდორზე შემოსვლა, რომელსაც ტრავმის გამო დიდი დრო გაუცდა – ვოლკოვმა, საკუთარი ნახევრიდან ორ მცველს ერთდროულად გაასწრო სისწრაფეში, შემდეგ კვირკველიც დაჯაბნა, მაგრამ ამ უკანასკნელმა წესების დარღვევით საჯარიმოში შეაჩერა. თერთმეტმეტრიანის დარტყმა გიორგი კოხრეიძემ ითავა, რომელმაც ზუსტი დარტყმა განახორციელა. საბოლოოდ, „საბურთალომ“ მატჩი გამარჯვებამდე მიიყვანა და 13 ტურის შემდეგ 30 ქულას მოუყარა თავი და ლიდერია. რაც შეეხება “რუსთავს”, ის 14 ქულით მეექვსე ადგილზეა.
“საბურთალოს” ოფიციალური გვერდი
დღეს ეროვნული ლიგის მეთერთმეტე ტურის შეხვედრები შედგა.
ქუთაისში, “რამაზ შენგელიაზე” ადგილობრივი “ტორპედო” “რუსთავს” დაუპირისპირდა. მეთერთმეტე წუთზე ბათრაზ ხადარცევმა სტუმრები დააწინაურა. თუმცა, ცოტა ხანში რუსთაველთათვის ცუდი რამ მოხდა: 27-ე წუთზე ტარას ცარიკაევმა მეორე გაფრთხილება მიიღო და მოედნის დატოვება მოუწია. ამის შემდეგ “ტორპედო” უფრო გააქტიურდა. მეორე ნახევარში, 72-ე წუთზე გიორგი კუხიანიძემ თერთმეტმეტრიანის გატანა მოახერხა და წონასწორობა აღადგინა. ხოლო, ქუთაისელთა მხრიდან გამარჯვების გოლი 87-ე წუთზე ლევან კუტალიამ შეაგდო. საბოლოოდ, მატჩი, ანგარიშით, 2-1 დასრულდა.
ამ მოგების შემდეგ იმერული კლუბი 17 ქულით მეხუთე ადგილზეა. ხოლო, “რუსთავს” 14 ქულა აქვს და მეექვსე პოზიციაზე დაქვეითდა.
დღეს ეროვნული ლიგის მეცხრე ტურის შეხვედრები იმართება. ერთ-ერთ მათგანში “რუსთავი” “ლოკომოტივს” დაუპირისპირდა.
მატჩის ბედი ერთადერთმა გოლმა გადაწყვიტა. მისი ავტორი ბექა მიქელთაძე გახდა. “დინამოს” ყოფილმა მოთამაშემ, თამაზ მაქაცარიას პასის შემდეგ შეაგდო.
ამ გამარჯვების შემდეგ “რუსთავი” 14 ქულით მეხუთე პოზიციაზეა. ხოლო, “ლოკომოტივს” ოთხი ქულა აქვს და მეათე ადგილზეა. ამ გუნდმა უკვე მეოთხე შეხვედრა წააგო მიჯრით.
გუშინ ეროვნული ლიგის მერვე ტურის მატჩები გაიმართა.
“სამტრედიამ” “ევგრაფი შევარდნაძეზე” “რუსთავი” მიიღო. მიუხედავად გუნდების აქტიური მცდელობისა, აღნიშნული შეხვედრა უგოლო ფრით, 0-0 დასრულდა. ამ მატჩის შემდეგ იმერულ გუნდს ექვსი ქულა აქვს და მეცხრე ადგილზეა. ხოლო, “რუსთავი” თერთმეტი ქულით მეხუთე პოზიციას იკავებს. შემდეგ ტურში სამტრედიელები ლიდერს, თბილისის “საბურთალოს” დაუპირისპირდებიან. მატჩი თბილისში, პირველ მაისს შედგება. რაც შეეხება “რუსთავს”, ის მეცხრე ტურში ორ მაისს “ლოკომოტივს” ესტუმრება.
დღეს ეროვნული ლიგის მეშვიდე ტურის შეხვედრები გაიმართა.
გორში, “თენგიზ ბურჯანაძეზე” “დილამ” “რუსთავი” მიიღო. მეათე წუთზე ანგარიში ალვინ ფორტისმა გახსნა. ხოლო, მე-80 წუთზე ნოდარ ქავთარაძემ მასპინძლები ორბურთიანი უპირატესობით გაიყვანა წინ. თუმცა, სტუმრებმა მაინც მოახერხეს ამ მატჩის გადარჩენა: ჯერ 90-ეზე თამაზ მაქაცარიამ გამოვარდნილ ბურთზე შეძლო დამატება და მინიმუმამადე შეამცირა სხვაობა. ხოლო, მატჩის გმირის ვინაობა მეხუთე დამატებით წუთზე გახდა ცნობილი, როცა გეორგი გაბულოვმა კუთხური მოაწოდა; იქ მარტო დარჩენილმა მეკარემ, ნუკრი რევიშვილმა თავით შეძლო გატანა და ანგარიშის გათანაბრება – 2-2.
ამ ფრის შემდეგ “დილა” 12 ქულით მესამე ადგილზეა. ხოლო, “რუსთავს” 10 ქულა აქვს და მეხუთე საფეხურზე იმყოფება.
დღეს ეროვნული ლიგის მეხუთე ტურის მატჩები იმართება.
“მიხეილ მესხი” ორზე ბოლნისის “სიონმა” რუსთავის “რუსთავი” მიიღო. მატჩის ორივე ტაიმში თითო-თითო გოლი გავიდა – 39-ე წუთზე გოლი მამუკა კობახიძემ შეაგდო. მას ზაზა ციცქიშვილმა გაუკეთა საგოლე გადაცემა. მეორე ტაიმში, 89-ე წუთზე ბქა მიქელთაძემ ოთარ მარცვალაძის პასის შემდეგ შეაგდო და, საბოლოოდ, “რუსთავმა” ანგარიშით, 2-0 მოიგო.
ამ გამარჯვების შემდეგ “რუსთავს” ექვსი ქულა აქვს და მეექვსე პოზიციაზეა. “სიონი” ოთხი ქულით მეშვიდეა.
დღეს ეროვნული ლიგის მეხუთე ტური აიღებს სტარტს. Fanebi.Com-ი გთავაზობთ აღნიშნული ტურის პრევიუს.
ბოლნისის “სიონი” – რუსთავის “რუსთავი”
დაწყების დრო: 4 აპრილი, 16:00 საათი
ბოლნისის “სიონი” “მიხეილ მესხი 2”-ზე რუსთავის “რუსთავს” მიიღებს. წინა ტურში მასპინძლები გორის “დილასთან” დამარცხდნენ. თუმცა, ამ სეზონში მათ უკვე მოახერხეს ერთი მოგებისა და ფრის მიღწევა. შესაბამისად, ოთხი ქულა აქვთ და მეექვსე ადგილს იკავებენ. რაც შეეხება “რუსთავს”, ამ გუნდმა პირველ ტურში “დინამოსთან” სტუმრად მოგების შემდეგ, გოლიც კი ვერ გაიტანა და სამ მატჩში ოთხი გოლი გაუშვა. ერთი მოგებითა და სამი წაგებით, რუსთაველები მერვე საფეხურზე იმყოფებიან.
თბილისის “საბურთალო” – თბილისის “ლოკომოტივი”
დაწყების დრო: 4 აპრილი, 21:00 საათი
კიდევ ერთი მატჩი, რომელიც დღეს შედგება თბილისური დერბია. მზიანი დღის დასასრულს, “მიხეილ მესხზე” დედაქალაქელებს მშვენიერი მატჩი ელით – “საბურთალო” “ლოკომოტივის” წინააღმდეგ. პირველი მათგანი შეუჩერებელია, რადგან ოთხივე შეხვედრა მოიგო. რაც შეეხებათ “რკინიგზელებს”, ეროვნულ ლიგაში მათზე მეტად მოგება ახლა არავის სჭირდება – “ლოკო” ერთადერთი გუნდია, რომელმაც ამ სეზონში ვერცერთხელ ვერ მოახერხა სამი ქულის მოპოვება. ლოგიკურია, რომ ის ერთი ქულით ათში ბოლოა.
საჩხერის “ჩიხურა” – თბილისის “დინამო”
დაწყების დრო: 5 აპრილი, 16:00 საათი
უკვე ხვალ საჩხერის “ჩიხურა” თბილისის “დინამოს” “დავით პეტრიაშვილი არენაზე” მიიღებს. იმერულ კლუბს “საბურთალოსთან” ერთად ამ სეზონში არცერთი მატჩი არ წაუგია: ორი ფრე, ორი მოგება, რვა ქულა და მესამე ადგილი. მასზე ერთი ქულითა და ადგილით წინ სწორედ “დინამოა”, რომელმაც ბოლო სამი დაპირისპირება ისე მოიგო, რომ ცხრა გოლი გაიტანა და მხოლოდ ორი გაუშვა. შესაბამისად, აქაც საინტერესო და დაძაბულ ჯახს უნდა ველოდოთ.
ფოთის “კოლხეთი” – გორის “დილა”
დაწყების დრო: 5 აპრილი, 18:00 საათი
“კოლხეთის” ამჟამინდელი მეტოქე “დილაა”. მეგრელებმა წინა ტურში პატარა სენსაცია გამოაცხვეს და “სამტრედიას” სტუმრად ანგარიშით, 2-0 მოუგეს. ეს გუნდი ერთ-ერთი ყვლაზე სუსტია ჩემპიონატში და, ვინ იცის, სად გამოადგება აღნიშნული სამი ქულა. ამჟამად, “კოლხეთი” ოთხი ქულით მეშვიდე ადგილზეა. გორელებს რაც შეეხებათ, ბოლოს ისინი “სიონს” დაუპირისპირდნენ და პირველი ტაიმი 3:0 მოუგეს. მიუხედავად, ბოლნისლების მიერ გაქვითული ორი გოლისა, მათ მეტი ვეღარაფერი შეძლეს და “დილამაც” სამი ქულა ჩაიწერა აქტივში. ის შვიდი ქულით მეოთხე პოზიციაზეა.
ქუთაისის “ტორპედო” – სამტრედიის “სამტრედია”
დაწყების დრო: 5 აპრილი, 21:00 საათი
ეროვნული ლიგის გულშემატკივარი იმერული დერბის მოლოდინშია: “ტორპედო” “სამტრედიის” წინააღმდეგ. სხვათა შორის, ვერც ერთი გუნდი ვერ ბრწყინავს: “ტორპედომ” პირველ ტურში წაგების შემდეგ, ორჯერ კი მოიგო, თუმცა “დინამოსთან” უშანსოდ დამარცხდა. “სამტრედიამ” კი ბოლო სამი დაპირისპირება დათმო და სამი ქულით მეცხრე ადგილზეა. ორივე გუნდს სჭირდება გამარჯვება წინ სვლისა და თავდაჯერებისთვის – ვნახოთ, რა იქნება.
