რომის „ლაციოს“ თავდამსხმელი ბალდე კეიტა გასული ღამით ავარიაში მოჰყვა.
ფეხბურთელმა საჭე ვერ დაიმორჩილა და კედელს შეეჯახა. შემთხვევა ადგილობრივი დროით, დაახლოებით, დილის ოთხ საათზე მოხდა. როგორც სურათზე ჩანს, ფეხბურთელის ავტომობილი მნიშვნელოვნად დაზიანდა.
თავად მოთამაშის აგენტის თქმით, შემთხვევის მიზეზი მხოლოდ ის არის, რომ მის კლიენტს ტარების არც თუ ისე დიდი გამოცდილება აქვს.
ევროპულმა პრესამ საკმაოდ საინტერესო ინფორმაცია გაავრცელა. რამდენიმე გამოცემის ცნობით, მიმდინარე სეზონის დასრულების შემდეგ რომის „ლაციოს“ ახალი თავკაცი ეყოლება. გუნდის ამჟამინდელი მთავარი მწვრთვნელი ვლადიმირ პეტკოვიჩი, დიდი ალბათობით, შვეიცარიის ნაკრებს უხელმძღვანელებს, ხოლო „არწივებს“ ლონდონის „ჩელსის“ ყოფილი თავკაცი რობერტო დი მატეო ჩაიბარებს.
2011/2012 წლების უეფას ჩემპიონთა ლიგის გამარჯვებულთან კონტრაქტის გაფორმება რომაელთათვის ერთ-ერთ მისაღებ ვარიანტად ითვლება.
აღსანიშნავია, რომ 1993 წლიდან 1996 წლამდე დი მატეო სწორედ „ლაციოს“ ფეხბურთელი იყო.
