ჭდე: საქართველოს თასი

ბათუმში, საქართველოს თასის პირველ ნახევარფინალურ შეხვედრაში ადგილობრივ კლუბსა და “რუსთავს” შორის, გამარჯვება სტუმართა გუნდს დარჩა.

დისკალიფიცირებული ლიდერის, ბიჯეი იანგის გარეშე მოთამაშე ბათმელებმა რუსთაველ კალათბურთელებს საკადრისი წინააღმდეგობა ვერ გაუწიეს და საბოლოოდ 10-ქულიანი სხვაობით, 85:75 დამარცხდნენ.

მასპნიძელთა რიგებში 20 ქულით საუკეთესო ირაკლი მიქელაძე იყო, ხოლო შეხვედრის ყველაზე შედეგიანი კალათბურთელი რუსთაველი აკაკი დვალიშილი გახდა, რომელმაც 25 ქულასთან ერთად 12 მოხსნასც მიითვალა და ორმაგი დუბლი გაიფორმა.

განმეორებითი შეხვედრა “რუსთავსა” და “ბათუმს” შორსი, 13 მარტს რუსთავში შედგება.

მატჩისშემდგომი კომენტარები

დავით უსტიაშვილი (‘ბათუმის“ მთავარი მწვრთნელი):  ძალიან ცუდად ვითამაშეთ, განსაკუთრებით კი პირველ ტაიმში, სადაც საკმაოდ დიდი სხვაობით ჩამოვრჩით მეტოქეს.  მოგეხსენებათ, ჩვენს გუნდს ბიჯეი იანგი აკლია, ამასთან მცირე ტრავმებმაც შეგვიშალა ხელი. „რუსთავმა“ დამსახურებულად გაიმარჯვა. ვეცდებით მეორე მატჩი ჩვენს სასარგებლოდ დავასრულოთ და სერია გავათანაბროთ.

მიხეილ ბერუაშვილი(„რუსთავის“ მთავარი მწვრთნელი): სასიხარულოა, რომ გავიმარჯვეთ და  ფინალისკენ ერთი ნაბიჯი  გადავდგით. საინტერესო თამაში იყო, რომელიც  ჩვენი უპირატესობით  წარიმართა. მიუხედავად ამისა,  ჯერ არაფერი დასრულებულა.   წინ მეორე მატჩი გველოდება და ვედებით ისიც მოგებით დავასრულოთ.

 

უაღრესად დაძაბულ და დრამატულ მატჩში „რუსთავმა“ „მგზავრები-არმია“ დაამარცხა და თასის გათამაშების ნახევარფინალში გავიდა.  ამ გუნდების მატჩი 5 დეკემბერს, რუსთავში უნდა გამართულიყო, თუმცა დარბაზში არასაკმარისი ტემპერატურის გამო შეხვედრა გადაიდო და დღეს, 13 დეკემბერს, თბილიში, საკალათბურთო აკადემიის დარბაზში ჩატარდა.

რუსთაველებმა თასის გათამაშების მეოთხედფინალური სერიის პირველი მატჩი თბილისში იოლად მოიგო და ნახევარფინალში გასასვლელად მეორე გამარჯვების მოპოვება ესაჭიროებოდა. ქვემოქართლელებმა საწადელს მატჩის ბოლო წამზე მიაღწიეს. გოგა ცეკვავამ გამარჯვების ბურთი რომ ესროლა, საფინალო სირენა მერე გაისმა და რუსთაველი უკანახაზელის შედეგიანი შეტევის შემდეგ საბოლოო შედეგიც დაფიქსირდა – 70:69 რუსთაველების სასარგებლოდ.

საფინალო სირენამდე 2 წუთით ადრე ქვემოქართლური გუნდი 66:60 იგებდა, მაგრამ დაშვებული შეცდომების გამო 3 სწრაფი შეტევა მიიღო და ძირითადი დროის დასრულებამდე 17 წამით ადრე ანგარიში გათანაბრდა – 66:66. რუსთაველთა მწვრთნელმა მიხეილ ბერუაშვილმა წუთშესვენება აიღო, შეტევა დაგეგმა, რაც ზუსტად დააგვირგვინა მიხეილ ჭოჭუამ და „რუსთავი“ დასრულებამდე 7 წამით ადრე 68:66 დააწინაურა.

წუთშესვენებაზე დაგეგმეს შეტევა „მგზავრები-არმიას“ მთავარმა მწვრთნელმა ბუბა ბერიშვილმა და მოთამაშეებმა. გუნდის ერთ-ერთმა ლიდერმა მერაბ ბოქოლიშვილმა სწრაფი შეტევა წარმატებით დაგვირგვინა, თან რუსთაველთა ამერიკელი ლეგიონერი აიძულა, დაჯარიმებულიყო. ბოქოლიშვილმა 1 საჯარიმოც ჩააგდო და საფინალო სირენამდე 3.3 წამით ადრე „მგზავრები-არმია“ 69:68 დააწინაურა.

რუსთაველთა მორიგი წუთშესვენება და მიხეილ ჭოჭუას არაზუსტი სამქულიანი, თუმც აცილებული ბურთი რუსთაველმა გოგა ცეკვავამ მოიხელთა და იატაკზე დაუშვებლად ესროლა. ქვემოქართლელთა უკანახაზელმა ბურთის სროლა მოასწრო – საფინალო სირენა მაშინ გაისმა, როცა ბურთი მის ხელებს მოსწყდა. ლამაზი ტრაექტორიით გამარჯვების ბურთი „მგზავრები-არმიას“ კალათში ჩაეშვა და რუსთაველებს გამარჯვებასთან ერთად თასის გათამაშების ნახევარფინალის საგზური მოუტანა.

„რუსთავი“ ნახევარფინალში „ბათუმს“ შეუწყვილდა.

მატჩისშემდგომი კომენტარები

რუსთავი -მგზავრები არმია 70:69

ბუბა ბერიშვილი („მგზავრები-არმიის“ მთავარი მწვრთნელი): ამ თამაშს აუცილებლად განვიხილავთ ფედერაციასთან ერთად და ვიდეო ანალიზს გავაკეთებთ. თუ ყველაფერი რიგზე იყო,  გამოვა რომ ფორტუნამ ზურგი შეგვაქცია.

 

მიხეილ ბერუაშვილი („რუსთავის“ მთავარი მწვრთნელი): მართალია გავედით შემდეგ ეტაპზე, მაგრამ ძალიან უკმაყოფილო ვარ. ეს თამაში წესით არ უნდა მოგვეგო, უბრალოდ    გაგვიმართლა.

superleague.ge 

საქართველოს თასის გათამაშების 3 ნახევარფინალისტი ცნობილია. დღეს, საკალათბურთო აკადემიის დარბაზში 3 მეოთხედფინალური მატჩი გაიმართა სამივე წყვილში იმ გუნდებმა იმარჯვეს, რომლებმაც სერიის პირველი შეხვედრა მოიგეს.

დებულების თანახმად, მეოთხედფინალური სერია 2 მოგებამდე გრძელდება. წინა კვირაში გამართული მატჩების შედეგად ფავორიტად მიჩნეული გუნდები სერიაში დაწინაურდნენ, დღეს კი საპასუხო შეხვედრები გაიმართა და გაირკვა:

ნახევარფინალში ზედმეტი გართულების გარეშე გავიდა „ბათუმი“, რომელსაც სერიის პირველი მატჩი „სოხუმთან“ აჭარაში 80:65 ჰქონდა მოგებული. დღეს გამართულ საპასუხო მატჩში პირველი ტაიმი თანაბარი იყო. პირველი და მეორე მეოთხედები ფრედ დასრულდა და დიდი შესვენებისთვის 34:34 დაფიქსირდა.

ბათუმელებმა „სოხუმი“ მესამე პერიოდში გატეხეს. ფერადკანიანმა მოთამაშეებმა – ბიჯეი იანგმა და ნიკ კელოგმა შესაშური მიზანი გამოავლინეს და აჭარულ კლუბს ათწუთეული 30:15 მოაგებინეს. ბოლო პერიოდში სოხუმელებმა მოინდომეს, მაგრამ მაქსიმუმი, რაც შეძლეს, ღირსეული ანგარიშით დამარცხებაა. გიორგი ჯგერენაიას და ირაკლი ჩლაიძის შედეგიანობით სოხუმელებმა ჩამორჩენა 7 ქულამდე შეამცირეს და საბოლოოდ 72:79 დამარცხდნენ.

ბათუმელთაგან იანგმა იყოჩაღა, რომელმაც 28 ქულა და 9 მოხსნა მიითვალა. 15 ქულა დააგროვა კელოგმა, ხოლო ნოდარ თენიეშვილს ორმაგ დუბლამდე მცირედი დააკლდა – 11 ქულა და 9 მოხსნა მიითვალა. სოხუმელთაგან 19 ქულითა და 13 მოხსნით გიორგი ჯგერენაია გამოირჩა.

ძალიან დაძაბული და საინტერესო გამოდგა შინაგან საქმეთა აკადემიის გუნდისა და „ქუთაისის“ შეხვედრა. სერიის პირველ მატჩში ქუთაისელებმა იოლად იმარჯვეს, საპასუხო შეხვედრაში კი ფავორიტად კოტე ტუღუშის „შსს-აკადემია“ მიიჩნეოდა.

აკადემიელები გამარჯვებასთან ახლოსაც იყვნენ, თუმცა ბოლო წუთებზე დაშვებული უპატიებელი შეცდომების გამო დამარცხდნენ. ძირითადი დროის დასრულებამდე წუთნახევრით ადრე თბილისური გუნდი 9 ქულით იგებდა და გამარჯვებასთანაც ძალიან ახლოს იყო.

სწორედ კრიტიკულ მომენტში იყოჩაღეს ქუთაისელებმა. გიორგი ბარბაქაძემ სამქულიანი ჩააგდო, რასაც ორიანი მოაყოლა და სტუმართა ჩამორჩენა 4 ქულამდე შემცირდა. აკადემიელებმა ზედიზედ მესამე შეტევაში ვერ იხეირეს, ქუთაისელებმა კი მეტოქეს შეცდომა არ აპატიეს და ვახტანგ ქადარიამ ორქულიანით „ქუთაისი“ მასპინძლებს 75:77 მიაახლოვა. ქადარიამ დაცვაშიც იყოჩაღა და აკადემიელ ბექა ჩიკვილაძეს დააფარა, რასაც დავით ბარბაქაძის შედეგიანი გარღვევა და ანგარიშის გათანაბრება მოჰყვა 77:77.

ბოლო შეტევა მასპინძლებს დარჩათ, თუმცა გუნდის საუკეთესო მოთამაშე გიორგი ცინცაძემ გადამწყვეტი სროლა გააცუდა და თამაში დამატებით დროში გადავიდა. ექსტრახუთწუთეულის პირველსავე წუთზე ცინცაძის ზუსტი გარღვევით აკადემიელები დაწინაურდნენ, თუმცა ქუთაისელებმა დარჩენილ დროში დამაჯერებლად ითამაშეს როგორც შეტევაში, ისე დაცვაში და გამარჯვება გაინაღდეს.

გამარჯვებულებს 27 ქულით დავით ბარბაქაძემ ულიდერა. 16 ქულა, 9 პასი და 7 მოხსნა მიითვალა ზაურ ფაშაევმა, ხოლო ვახტანგ ქადარიამ და გიორგი ბარბაქაძემ 14-14 ქულა მიითვალეს.

სერიის პირველი მატჩის მსგავსად გია კაზანჯიანის გაწვრთნილმა „ოლიმპმა“ ამჯერადაც ბოლომდე იბრძოლა, შეხვედრა ორჯერ დამატებით დროში გადაიყვანა, მაგრამ გასული წლის ჩემპიონსა და მიმდინარე სუპერლიგის ლიდერ „დინამოსთან“ მაინც დამარცხდა.

„ოლიმპი“ ქების ღირსია, რადგან უპირობო ფავორიტად მიჩნეულ „დინამოს“ არაფერი დაუთმო. პირველი მეოთხედის 7 ქულით მოგების შემდეგ ოლიმპელებმა პოზიციები დათმეს და დიდი შესვენებისთვის 6 ქულით ჩამორჩნენ. ბოლო ათწუთეულის წინ „დინამო“ 7 ქულით იგებდა, თუმცა ბოლო წუთებზე ნუგზარ აბულაძის, ნოდარ გოგოძის და მათი თანაგუნდელების შეუპოვრობით კაზანჯიანის გუნდმა ძირითადი დროის დასრულებამდე 8 წამით ადრე ანგარიში გაათანაბდა – 77:77.

ცნობისთვის, ამ ანგარიშით დასრულდა დღეს გამართული შეხვედრის ძირითადი დრო „შსს-აკადემიასა“ და “ქუთაისს“ შორის. დამატებით 5-წუთეულში დაძაბული ბრძოლა წარიმართა და კვლავ ფრე დაფიქსირდა – 4:4, რის შემდეგაც მეორე ოვერტაიმი დაინიშნა.

ბოლო წამებამდე გაურკვეველი იყო, თუ ვინ მოიგებდა. ორივე გუნდი ინარჩუნებდა შანსს, თუმცა გადამწყვეტ წუთებზე გამოცდილებამ თავისი გაიტანა – ლაშა გამყრელიძის, ილია ლონდარიძის და რიჩარდ მათიაშვილის სტაბილური თამაშის წყალობით „დინამომ“ გამარჯვების მოპოვება (91:87) მოახერხა და ნახევარფინალში გავიდა.

მატჩისშემდგომი კომენტარები

სოხუმი- ბათუმი  72:79

მიხეილ კობაშავიძე („ბათუმის“ მთავარი მწვრთნელი): მივულოცავ ჩემს ბიჭებს ამ  წარმატებას. გავმეორდები და ვიტყვი რომ შეთამაშება ჯერ კიდევ გვაკლია. დღევანდელი მატჩში გარდამავალი უპირატესობით მიმდინარეობდა თამაში და სასიხარულოა, რომ მოვიგეთ.

ვაჟა კვარაცხელია („სოხუმის“ მთავარი მწვრთნელი): „ბათუმი“ ფავორიტია და ეს შედეგი ლოგიკური იყო. მეტოქე გუნდი სამი ამერიკელი ლეგიონერითაა დაკომპლექტებული, ამასთან დღეს  ფორტუნაც მის მხარეს აღმოჩნდა. მიუხედევად ამისა, ჩვენი მიზნისთვის ბოლომდე ვიბრძოლებთ და  ბათუმში რევანშისთვისაც მოვემზადებით.

 შსს აკადემია – ქუთაისი  88:96
კოტე ტუღუში(,,შსს აკადემიის’’ მთავარი მწვრთნელი): ძალიან დასანანი მარცხი განვიცადეთ. ალბათ ზოგიერთმა, მათ შორის ჩემმა მოთამაშეებმაც, იფიქრეს, რომ თამაში მოგებული იყო, 2 წუთი იყო დარჩენილი და სოლიდური უპირატესობა გვქონდა. ჩემს მოთამაშეებს ყოფნით გამოცდილება, რომ ასეთი უპირატესობა შეინარჩუნონ, თუმცა დღეს. სამწუხაროდ. ეს ვერ მოვახერხეთ და წავაგეთ. ალბათ, თავი იჩინა იმანაც, რომ როტაციის საშუალება თითქმის არ გვაქვს, 5-6 კაცი თამაშობდა. სამწუხაროა, რომ წავაგეთ, თუმცა სეზონი გრძელდება, ბრძოლაც გრძელდება და ვეცდებით, გამოვასწოროთ თამაში.

მედეა მხეიძე(,,ქუთაისის’’ მთავარი მწვრთნელი): პირველ რიგში, მივულოცავ ჩვენს გუნდს და გულშემატკივრებს ამ წარმატებას. ძალიან პრინციპული გამარჯვება იყო ჩვენთვის, მაქსიმალურად ვცდილობთ, შარშან მოგებული თასი წელსაც შევინარჩუნოთ. ძალიან კარგი თამაში შედგა, ნელ-ნელა ვუახლოვდებით იმ ფორმას, რომელშიც უნდა ვიყოთ და იმედია, მაყურებელს არაერთ სანახობრივ და კარგ თამაშს ვუჩვენებთ.

ოლიმპი – დინამო   87:91

ირაკლი ხოშტარია(,,დინამოს’’ მთავარი მწვრთნელი): ველოდით ასეთ დაძაბულ შეხვედრას. ფსიქოლოგიურად არ ვიყავით ბოლომდე მომზადებულები. ძალიან ბევრი ხარვეზი გვქონდა, თუმცა, გვაქვს 2 კვირა იმისთვის, რომ ვიმუშაოთ და გავაგრძელოთ წარმატებული თამაში. თასის მომდევნო ეტაპი ჯერ შორს არის, ამიტომ, პირველ რიგში, რეგულარული ჩემპიონატის მატჩებისთვის მოვემზადებით.

გია კაზანჯიანი „(ოლიმპის“ მთავარი მწვრთნელი): ძალიან საინტერესო თამაში იყო და გულშემატკივარმა დიდი სიამოვნება მიიღო ამ მატჩით. მეორე ოვერტაიმში დავმარცხდით. წაგება ზოგადად არასასიამოვნო მომენტია, მაგრამ ამ თამაშში უფრო მეტი დადებითი იყო ვიდრე უარყოფითი. დავმარცხდით ძალიან ძლიერ და  გამოცდილ გუნდთან.  მივულოცავ „დინამოს“ ამ გამარჯვებას, ჩემს  ბიჭებს კი დიდი მადლობა ასეთი ბრძოლისა და თავდადებისთვის.

superleague.ge

დღეს, რეგიონებში სტარტი აიღო 2015 წლის საქართველოს თასის გათამაშებამ, რომელშიც მონაწილეობას ეროვნული ჩემპიონატის რვავე გუნდი იღებს. გუნდები წინა სეზონში დაკავებული ადგილების მიხედვით ორ კალათაში გადანაწილდნენ და კენჭისყრის შედეგად 4 ქვეჯგუფში განთავსდნენ. ჯგუფში თასის გათამაშების მატჩები 2 მოგებამდე ჩატარდება, მოედნის უპირატესობა კი 1-ლ კალათაში მოხვედრილ, გასული სეზონის 4 საუკეთესო გუნდს აქვს.

საქართველოს თასის პირველი 2 მატჩი დღეს ქუთაისსა და ბათუმში ჩატარდა, სადაც, სათამაშოდ, შესაბამისად, ,,შსს აკადემიისა’’ და ,,სოხუმის’’ გუნდები ჩავიდნენ. მაყურებელმა ორივე ქალაქში სანახაობრივი და საინტერესო შეხვედრები იხილა.

ბათუმში გამართულ მატჩი ბოლო წუთებში მოპოვებული უპირატესობის წყალობით მასპინძელთა გუნდმა იმარჯვა – 85:60. მანამდე კი, თითქმის მთელი თამაში დაძაბული ბრძოლა მიმდინარეობდა. პირველი მეოთხედი მასპინძელთა უმნიშვნელო ლიდერობით – 22:20 დასრულდა, მეორე პერიოდში ბააკაშვილის და შვანგირაძის ზუსტი წყალობით ჯერ სოხუმელები გალიდერედნენ, თუმცა ბათუმელთა ახალწვეულმა, ბი ჯეი იანგმა თავისი შედეგიანობით გუნდს ლიდერობა დაუბრუნდა და დიდი შესვენებისთვის კვლავ მასპინძლები იგებდნენ – 41:40.

თანაბარი ბრძოლა გაგრძელდა მესამე პერიოდის დასაწყისშიც, თუმცა ბათუმელებმა მალე უპირატესობა მოიპოვეს და გადამწყვეტი ათწუთეულის წინ 8 ქულით დაწინაურდნენ – 61:54.

ბოლო პერიოდი მასპინძლებმა საკმაოდ კარგად ჩაატარეს, ტემპი შეინარჩუნეს და უპირატესობა ხელიდან არ გაუშვიათ. სოხუმელები, ჩლაიძის ლიდერობით, ბევრს ეცადნენ, თუმცა ჩამორჩენის აღმოფხვრა ვეღარ შეძლეს.  მათი მაქსიმუმი სხვაობის 11 ქულამდე დაყვანა იყო. საბოლოოდ, 80:65 ბათუმელთა სასარგებლოდ.

ორივე გუნდის რიგებში საუკეთესო იყო ახალგაზრდა ლეგიონერი ბობ ჯინ იანგი, რომელმაც თავი 27 ქულას მოუყარა, ორმაგი დუბლი მიითვალეს  ლეგიონერებმა – ქრისტოფერ ფელჩერმა (17ქულა, 17მოხსნა) და ნიკ კელოგმა (14 ქულა, 12მოხსნა).

,,სოხუმს’’ 19 ქულით ირაკლი ჩლაიძემ ულიდერა, 15 ქულა და 8 მოხსნა ჰქონდა ვატო ბააკაშვილს, 13 ქულა დააგროვა გრიგოლ შვანგირაძემ, გიორგი ჯგერენაიამ კი ორმაგი დუბლი გაიფორმა – 10ქულა, 11მოხსნა.

ამ გუნდების საპასუხო შეხვედრა თბილისში, 6 დეკემბერს, საკალათბურთო აკადემიის დარბაზში გაიმართება.

მასპინძლებმა მოიპოვეს გამარჯვება ქუთაისშიც – 74:64. ქუთაისლებმა პირველი პერიოდი 16:14 მოიგეს, მეორე მეოთხედში კი კვიმსაძის და გრძელიძის კარგი თამაშის წყალობით საგრძნობი უპირატესობა მოიპოვეს, ,,შსს აკადემია’’ ვერც ფარქვეშ ლიდერობდა და არც პერიმეტრიდან უმართლებდა, შედეგად, მასპინძლებმა პირველ ნახევარში 11 ქულით – 37:26 იმარჯვეს.

შესვენების შემდეგ ,,ქუთაისი’’ კიდევ უფრო უკეთ ათამაშდა. კვიმსაძეს და გრძელიძეს ბარბაქაძე და ფაშაევიც მიეშველნენ და მასპინძელთა უპირატესობამ მესამე პერიოდის ბოლოს 15 ქულას გადააჭარბა – 61:40.

ფაქტი იყო, ,,შსს აკადემიას’’ ამ სხვაობის გაბათილება და თამაშის შემობრუნება გაუჭირდებოდა, თუმცა აკადემიელებმა სიმტკიცე და ბრძოლისუნარიანობა გამოავლინეს, ცინცაძის და წივწივაძის ეფექტური და შედეგიანი თამაშით ვითარება ბოლო წუთებში დაიძაბა, როცა  აკადემიელებმა სხვაობა 6 ქულამდე შეამცირეს – 68:62 მატჩის დასრულებამდე 2,30 წუთით ადრე.  დარჩენილ დროში სტუმრებმა რამდენიმე შეცდომა დაუშვეს, კვიმსაძემ და ბარბაქაძემ კი შანსი გამოიყენეს და თავიანთი გუნდი კვლავ 10-ქულით გაიყვანეს წინ. 1 წუთში აკადემიელებს სხვაობის აღმოფხვრის ძალა არ ეყოთ  და შეხვედრა  64:74 დათმეს.

გამარჯვებულებს 17 ქულით, 5 მოხსნით და 6 შედეგიანი გადაცემით ბუბა კვიმსაძემ ულიდერა, 14 ქულა და 8 მოხსნა დააგროვა გიორგი ბარბაქაძემ, ლევან გრძელიძემ კი 13 ქულა მიითვალა.

,,შსს აკადემიაში’’ 12 ქულით, 6 მოხსნით და 5 პასით გიორგი ცინცაძე გამოირჩა, 11-11 ქულა კი ბექა წივწივაძის და ბექა ჩიკვილაძის ანგარიშზე დაგროვდა.

,,ქუთაისი’’ – ,,შსს აკადემიის’’ მეორე მატჩიც  6 დეკემბერს, აკადემიის დარბაზში გაიმართება.

მატჩისშემდგომი კომენტარები

ბათუმი – სოხუმი  80:65

მიხეილ კობეშავიძე („ბათუმის“ მთავარი მწვრთნელი):   მადლობას გადავუხდი ჩემს ბიჭებს. გუნდი არ არის კარგად შეთამაშებული, შედეგის მიღწევისთვის გარკვეული დროა საჭირო. გაცილებით მეტს ველოდები ჩემი გუნდისგან.

ვაჟა კვარაცხელია („სოხუმის“ მთავარი მწვრთნელი): მივულოცავ „ბათუმს“, კარგად იასპარეზა და ბრწყინვალე ლეგიონერები ჰყავს. თამაში საინტერესოდ  დაიწყო, თუმცა შემდეგ ვერ გავუძელით. დაღლილობამ იჩინა თავი. სამომავლოდ, როცა ბათუმში მოგვიწევს თამაში, აუცილებლად წინა დღეს ჩავალთ რეგიონში.

ქუთაისი – შსს აკადემია  74:64

მედეა მხეიძე („ქუთაისის“ მწვრთნელი): მივულოცავ „ქუთაისს“გამარჯვებას, ჩვენს გულშემატკივრებს და ყველა იმ ადამიანს, ვისაც დღევანდელი მოგება გაუხარდა. ეს თამაში ჩვენთვის ძალიან პრინციპული და მნიშვნელოვანი იყო. „დინამოსთან“ განცდილი მარცხის შემდეგ ეს გამარჯვება ნამდვილად გვჭირდებოდა. სუპერლიგის წინა ტურის მარცხმა გარკვეული უკმაყოფილება გამოიწვია და  გულშემტივარიც გაგვინაწყენდა.  ვიმედოვნებ, ამ მოგების შემდეგ სიტუაცია გამოსწორდება, ბევრად უკეთეს თამაშს ვაჩვენებთ და ქუთაისის სპორტის სასახლეშიც ბევრად მეტი ქომაგი მოვა.

კოტე ტუღუში (შსს აკადემიის მთავარი მწვრთნელი): როგორც მოსალოდნელი იყო დაძაბული და რთული თამაში გამოდგა. მეტოქემ თავიდანვე მოიპოვა უპირატესობა და ჩვენი შეცდომების წყალობით  წინ გასვლის საშუალება მივეცით.  ბოლომდე ვიბრძოდით, მაგრამ ქუთაისში მოგება ნამდვილი სასწაულია. ყველაფერს გავაკეთებთ იმისთვის, რომ დღევანდელი შეცდომები მაქსიმალურად გამოვასწოროთ და მესამე თამაშის საჭიროება გავხადოთ.

superleague.ge