გერმანული გუნდი მეტოქეს სოციალური დისტანციის წესის დაცვით ეთამაშა და 0:37 დამარცხდა
უჩვეულო ფაქტი დაფიქსირდა გერმანიის ჩემპიონატის რანგით მე-11 დივიზიონის ეგიდით “რიდპორფ ფილდედსა” და “ჰოლდენშტედტ II”-ს შორის გამართულ შეხვედრაში. “რიდპორფმა” კორონავირუსით დაინფიცირების შიშის გამო მატჩი ანგარიშით 0:37 დათმო.
საქმე იმაში გახლავთ, რომ “ჰოლდენშტედტის” წინა მეტოქის ერთ-ერთ ფეხბურთელს კორონავირუსი დაუდასტურდა. თავად “ჰოლდენშტედტის” მოთამაშეთა ტესტებმა უარყოფითი პასუხი აჩვენა, თუმცა იქიდან გამომდინარე, რომ წინა მატჩიდან 14 დღე არ იყო გასული, “რიდპორფის” წარმომადგენლებმა კორონავირუსით დაინფიცირების საფრთხე დაინახეს და ტურნირის ორგანიზატორებს შეხვედრის გადადების თხოვნით მიმართეს, თუმცა უარი მიიღეს.
“რიდპორფს” ორი არჩევანი ჰქონდა: მატჩზე არგამოცხადება, რაც ტექნიკურ წაგებასა და ორასი ევროს ოდენობით დაჯარიმებას ნიშნავდა ან თამაში და Covid-19-ით დაინფიცირების საფრთხე.
“რიდპორფის” მესვეურებს ჯარიმის გადახდა ძალზედ არ სურდათ და მატჩზე გამოცხადება ამჯობინეს, თუმცა ასეთი გამოსავალი მოძებნეს: გუნდმა მოედანზე დასაშვები ფეხბურთელების მინიმალური რაოდენობა გაიყვანა (შვიდი), რომლებიც მეტოქეს სოციალური დისტანციის წესის დაცვით ეთამაშებოდნენ და შედეგად, ანგარიშით 0:37 დამარცხდნენ.
“რიდპორფის” წარმომადგენელმა დიდი სხვაობით მარცხი მატჩის შემდეგ ასე განმარტა:
“ჰოლდენშტედტის” ფეხბურთელები ვერ მიხვდნენ. ჩვენ ჯანმრთელობის საფრთხის ქვეშ დაყენება არ გვსურდა. ჩვენი ფეხბურთელები პირდაპირ კონტაქტში არ შედიოდნენ, ისინი სოციალური დისტანციის წესს იცავდნენ და მეტოქეს ორი მეტრის დაშორებით ეთამაშებოდნენ”.
