“მანჩესტერ იუნაიტედში” დაბრუნებული კრიშტიანო რონალდუ 11 სექტემბერს “ნიუკასლის” წინააღმდეგ გასამართი მატჩისათვის ემზადება.
36 წლის პორტუგალიელი დღეს ვარჯიშზე 160 000 ფუნტ სტერლინგად შეფასებული ლამბორგინი Urus-ით მივიდა.
Cristiano Ronaldo arrives for his first day of full training ahead of his potential second Manchester United debut this weekend 🔴 pic.twitter.com/81bgrR9vTC
— Sky Sports News (@SkySportsNews) September 8, 2021
ბულგარეთის ნაკრების მთავარმა მწვრთნელმა, იასენ პეტროვმა საქართველოსთან გამარჯვების (4:1) შემდეგ კომენტარი გააკეთა.
53 წლის ბულგარელი სპეციალისტი ამბობს, რომ საქართველოს ნაკრებმაც კარგად ითამაშა.
“კმაყოფილი ვარ. ძირითად შემადგენლობაში 9 ახალი ფეხბურთელი გვყავდა, რომლებმაც შესანიშნავად ითამაშეს. მინდა, ისინი შევაქო. არც კი მახსოვს, ბოლოს როდის გავიტანეთ ოთხი გოლი ერთ მატჩში. ერთი გავუშვით, მაგრამ მსაჯზე კომენტარს არ გავაკეთებ.
როგორც ყოველთვის, ბულგარელები ახლაც იტყვიან, რომ სუსტ გუნდს ვეთამაშეთ, მაგრამ სუსტი გუნდები არ არსებობენ, საქართველომაც კარგად ითამაშა. არ მომეწონა, რომ გოლი გავუშვით, მაგრამ ჩვენს ბიჭებს მადლობა უნდა გადავუხადოთ”, – განაცხადა პეტროვმა.
დღეს, საქართველოს ეროვნული ნაკრები ამხანაგურ შეხვედრაში ბულგარეთს დაუპირისპირდება. უკვე ცნობილია, როგორი შემადგენლობებით გავლენ გუნდები მოედანზე.
ბულგარეთი: მიხაილოვი, ა. ხრისტოვი, პ. ხრისტოვი, ბოჟიკოვი, ველკოვსკი, ჩოჩევი, ნედელევი, ცონევი, ილიევი, დელევი, დ. ილიევი.
საქართველო: მამარდაშვილი – კაკაბაძე, ხოჭოლავა, ლოჩოშვილი, ხვადაგიანი – ალთუნაშვილი, დაუშვილი, გიორბელიძე, წიტაიშვილი, ჩაკვეტაძე – მიქაუტაძე
გუნდის კაპიტანი ოთარ კაკაბაძე იქნება.
შეგახსენებთ, რომ მატჩი 20:30 საათზე დაიწყება, პირდაპირ რეპორტაჟს კი საზოგადოებრივი მაუწყებლის პირველი არხი შემოგვთავაზებს.
კოვიდ 19-თან ორთვიანი ბრძოლის შემდეგ, ლევან მაისაშვილი სამხრეთ აფრიკიდან სამშობლოში დაბრუნდა.
საქართველოს მორაგბეთა ნაკრების მთავარ მწვრთნელს კორონავირუსი სამხრეთ აფრიკასთან სტუმრად გამართული მატჩის შემდეგ დაუდასტურდა. ეს შეხვედრა 2 ივლისს გაიმართა. ამის შემდეგ, მაისაშვილი მდგომაროება დამძიმდა და ის საავადმყოფოში გადაიყვანეს.
ლევან მაისაშვილს ფილტვები ჰქონდა დაზიანებული და მისი მდგომარეობა იმდენად მძიმე იყო, რომ სიცოცხლისათვის იბრძოდა. 15 აგვისტოს ცნობილი გახდა, რომ მან პირადად შეძლო კომუნიკაცია რაგბის კავშირის წარმომადგენლებთან.
დღეს ის საქართველოში დაბრუნდა, აეროპორტში კი მას მორაგბეები, მეგობრები, ოჯახის წევრები და გულშემატკივრები დახვდნენ.
“ბარსელონას” მთავარმა მწვრთნელმა რონალდ კუმანმა აღნიშნა, რომ კლუბთან შრომითი ხელშეკრულების გახანგრძლივებით მოხარული იქნება. ცნობისთვის, მხარეებს შორის გაფორმებულ მოქმედ კონტრაქტს ვადა 2022 წლის ივნისის ჩათვლით აქვს. თავის მხრივ, “ბარსელონას” პრეზიდენტმა ჟოან ლაპორტამ განაცხადა, რომ ნიდერლანდელი სპეციალისტის მუშაობით კმაყოფილია და მას ნდობა გამოუცხადა. პრესაში გავრცელებული ინფორმაციის თანახმად, “ბარსელონა” კუმანთან შრომით ხელშეკრულებას გააგრძელებს.
“ახალი კონტრაქტის შემოთავაზებისთვის ღია ვარ. ძალიან მინდა, რომ “ბარსას” თავკაცის პოსტზე მაქსიმალურად დიდხანს ვიმუშაო. კლუბში არსებული მძიმე პერიოდის მიუხედავად, მწვრთნელებისა და ტექნიკური პერსონალის მუშაობის შედეგად “ბარსელონას” დიდი მომავლის მქონე ახალგაზრდა ფეხბურთელები ჰყავს. ვიმედოვნებ, რომ სამი, ოთხი ან ხუთი წლის შემდეგ ისევ მათი მწვრთნელი ვიქნები.
საკუთარ თავს საკლუბო ადამიანად მივიჩნევ. თავს ვალდებულად ვთვლი, კლუბს დავეხმარო და ჩვენი ერთიანი კეთილდღეობისთვის ვიპოვო შესაძლებლობები, რომლებიც გუნდს გააუმჯობესებს, თუმცა კლუბში ბოლო დროს მართლაც განსაკუთრებული მოვლენები ხდება. ბევრი რამ განვიცადე”, – ციტირებს კუმანის სიტყვებს Sport.es.
მადრიდის “ატლეტიკოში” დაბრუნებულმა ანტუან გრიზმანმა მსოფლიო ჩემპიონატის საკვალიფიკაციო ეტაპზე ფინეთის ნაკრებთან მატჩში თავი ორი გატანილი გოლით გამოიჩინა.
30 წლის თავდამსხმელმა 25-ე წუთზე ფინეთის ნაკრების კარი კარიმ ბენზემას საგოლე პასის დახმარებით აიღო, 53-ე წუთზე კი ლეო დუბუას დახმარებით გაიფორმა დუბლი.
ეს გოლები გრიზმანისთვის საფრანგეთის ნაკრების რიგებში მე-40 და 41-ე გახლდათ. შედეგად გრიზმანი საფრანგეთის ნაკრების გოლეადორთა რეიტინგში მესამეადგილოსან მიშელ პლატინის გაუთანაბრდა.
ზემოხსენებულ რეიტინგში პირველ პოზიციას ტიერი ანრი იკავებს 51 გატანილი გოლით, მეორე ადგილზე კი ოლივიე ჟირუ გახლავთ 46 გოლით.
ტოკიოს ოლიმპიური თამაშების გამარჯვებულმა გაბლ სტივსონმა სოციალურ ქსელში ტაჰა აკგულთან ერთად გადაღებული ფოტო გამოაქვეყნა და თურქი მოჭიდავე შეაქო.
როგორც იცით, სტივსონმა აკგული ოლიმპიადის მეოთხედფინალში 8:0 დაამარცხა. ამერიკელი ფინალში გენო პეტრიაშვილს დაუპირისპირდა, სადაც ბოლო წამებში გაიმარჯვა.
“2016 წელს, 16 წლის ვიყავი, როცა ვუყურებდი, როგორ მოიგო ტაჰა აკგულმა ოქროს მედალი რიოს ოლიმპიურ თამაშებზე. მომდევნო კვირაში, Twitter-ში ის შევაქე და დავწერე, როგორი მაგარი იქნებოდა მასთან ჭიდაობა. მაშინ არც კი ვიცოდი, რომ ხუთი წლის შემდეგ ჩვენ ერთი და იმავე წონით კატეგორიაშიაში ოლიმპიური ოქროსათვის ვიბრძოლებდით. დიდი ისტორია ამ ფოტოში მოკლედაა აღწერილი. მის “ფინკას” ჩარჩოში ჩავსვამ და ჩემი სახლის კედელზე სამუდამოდ ჩამოვკიდებ. ნამდვილი ლეგენდა, ვისთან ერთადაც ხალიჩაზე გავედი!” – წერს სტივსონი Instagram-ში.
შეგახსენებთ, რომ აკგულმა ტოკიოს ოლიმპიურ თამაშებზე ბრინჯაოს მედალი მოიპოვა.
საქართველოს ეროვნული ნაკრების მთავარმა მწვრთნელმა ვილი სანიოლმა ბულგარეთთან მატჩამდე ერთი დღით ადრე პრესკონფერენცია გამართა.
“ეროვნულ ნაკრებში გამართული ყველა მატჩი თანაბრად მნიშვნელოვანია, იქნება ეს საკვალიფიკაციო ეტაპი თუ ამხანაგური. მას შემდეგ რაც საქართველოს ნაკრებში დავიწყე მუშაობა, მაქსიმალურად ვცდილობ როტაციის პრინციპი გამოვიყენო, რადგან ვთვლი, რომ ჯერ კიდევ დარჩნენ მოთამაშეები ვისი ნახვაც მსურს. ბევრი ახალგაზრდა ფეხბურთელი გვყავს, რომელიც შანსს იმსახურებს, რადგან სწორედ ისინი არიან ეროვნული ნაკრების მომავალი.
კოსოვოს წინააღმდეგ გამართულმა მატჩმა ცუდი მოგონებები დაგვიტოვა, რადგან ამ შეხვედრის მიმართ სხვა მოლოდინი გვქონდა. ესპანეთთან ვიცოდით, რომ რთული თამაში გველოდა, პირველ ტაიმში ისე ვითამაშეთ, როგორც კოსოვოსთან. მეორე ნახევარში კი, გაცილებით უკეთ გამოვიყურებოდით.
ბოლო დღეებში ფეხბურთელებთან ბევრი საუბარი მქონდა, თუ რა მოლოდინი მაქვს მე და რას მოითხოვს უმაღლეს დონეზე თამაში. იმიტომ, რომ ვფიქრობ აუცილებლად უნდა გავიზარდოთ და გავიაზროთ, რომ თუ გვსურს ეროვნული ნაკრები განვითარდეს ყოველდღიურად უფრო მეტი უნდა ვიმუშაოთ. ჩემი აზრით, საუბრები, რომელიც გვქონდა საკმაოდ ნაყოფიერი გამოვიდა. ხანდახან იმედგაცრუება საჭიროა იმისთვის, რომ მომავალში უკეთ იმუშაო. დარწმუნებული ვარ, რომ ხვალ და მითუმეტეს ოქტომბერ-ნოემბერში, მოედანზე განსხვავებულ გუნდს ვიხილავთ, რომლითაც მთელი ქვეყანა იამაყებს”, – ციტირებს სანიოლის სიტყვებს Nakrebi.Ge.
შეგახსენებთ, რომ ბულგარეთისა და საქართველოს ნაკრებებს შორის ამხანაგური შეხვედრა 8 სექტემბერს, სოფიას ვასილ ლევსკის სახელობის სტადიონზე, 20:30 საათზე დაიწყება.
ფოტო: სფფ
კატალონიის “ბარსელონას” პრეზიდენტმა, ჟოან ლაპორტამ, პრესასთან საუბრისას ანტუან გრიზმანის ტრანსფერი განიხილა. შეგახსენებთ, რომ ფრანგი შემტევი სატრანსფერო ფანჯრის ბოლო დღეს “ატლეტიკოში” დაბრუნდა.
“გრიზმანი არ იყო ის ფეხბურთელი, რომელიც ჩვენ გვჭირდებოდა. ჩემი აზრით, გრიზმანს მეტის მიცემაც შეეძლო “ბარსელონასთვის”. მაგრამ გარემოებებმა ყველაფერი გაართულა.
შედეგად ის მივიღეთ, რომ ანტუანი “ბარსელონას” სისტემას ვერ მოერგო. თუმცა ეს იმას არ ნიშნავს, რომ მისი დამოკიდებულება საქმისადმი შეუფერებელი იყო. ის ძალიან აქტიური იყო და გასულ წელს ბევრი გოლიც გაიტანა,” – აცხადებს ლაპორტა.
ესპანეთის საფეხბურთო ნაკრების თავკაცი, ლუის ენრიკე, კოსოვოსთან მატჩამდე გამართულ პრესკონფერენციაზე პეპ გვარდიოლასთან დაკავშირებით საინტერესო განცხადებას აკეთებს.
ჟურნალისტების კითხვას, თუ რას ფიქრობდა ესპანეთის ნაკრებში პეპ გვარდიოლას მოსვლის შესაძლებლობაზე, ლუის ენრიკემ ასეთი პასუხი გასცა: “ძალიან მომწონს ეს აზრი. ვისურვებდი, რომ გვარდიოლა ნაკრებში მოვიდეს.
ესპანეთის ნაკრებს გვარდიოლაზე უკეთესი მწვრთნელი ვერ ეყოლება. ეს ბრწყინვალე რამ იქნება. რაც მთავარია, გვარდიოლა ესპანეთის ნაკრებს თავის ხელს დაატყობს.”
ბრაზილიის ნაკრების ყოფილმა თავდამსხმელმა რონალდომ ჩემპიონთა ლიგის წლევანდელ გათამაშებაზე “პარი სენ-ჟერმენის” შანსების შესახებ ისაუბრა და კომენტარი პარიზელთა ფორვარდ კილიან მბაპეს თაობაზეც გააკეთა.
“სათამაშო მოედანზე ბევრი ფაქტორი მოქმედებს. მადრიდის “რეალში” ხუთი სეზონი გავატარე, ეს იყო გუნდი, რომელსაც “გალაქტიკოს” უწოდებდნენ, თუმცა ჩემპიონთა ლიგა მაინც ვერ მოვიგე. გამარჯვება მათემატიკური ფორმულით არ გამოითვლება, თუნდაც საუკეთესო შემადგენლობა გყავდეს. საუკეთესო შემადგენლობა ჰყავს “პარი სენ-ჟერმენს”: ლიონელ მესი, ნეიმარი, კილიან მბაპე, სერხიო რამოსი, თუმცა გადაჭრით ნამდვილად ვერ ვიტყვით იმას, რომ ჩემპიონთა ლიგას სწორედ პარიზელები მოიგებენ.
მბაპეს ჩემი მსგავსი თვისებები აქვს. ის გასაოცარ უნარებს ფლობს, საოცრად ტექნიკურია და ამ თვისებას მაღალ სიჩქარეზეც ავლენს. ის ჯერ კიდევ ახალგაზრდაა. მიუხედავად ამისა, უკვე გრძელი გზა განვლო. მე მომწონს კილიანი და ვქომაგობ მას”, – თქვა რონალდომ DAZN-ისთვის მიცემულ ინტერვიუში.
