უეფას ჩემპიონთა ლიგის მეოთხედფინალურ ეტაპზე მადრიდის “ატლეტიკომ” “ბარსელონას” ბარიერის დაძლევა მოახერხა. როგორც მოგეხსენებათ, წყვილის პირველი მატჩი კატალონიელთა გამარჯვებით, ანგარიშით 2:1 დასრულდა. მადრიდში გამართულ საპასუხო შეხვედრაში “ატლეტიკომ” ანტუან გრიზმანის დუბლის წყალობით 2:0 იმარჯვა.
მატჩის შემდეგ გრიზმანმა ჟურნალისტებისთვის კომენტარი გააკეთა.
“ატლეტიკომ” ძალისხმევა არ დაიშურა იმისთვის, რომ ევროპის საუკეთესო კლუბთა ოთხეულში აღმოჩენილიყო. ვიცოდით, რომ დღეს სულ სხვა თამაში იქნებოდა. ყურადღებით ვმოქმედებდით დაცვაში და საერთო ჯამში, ეს გამარჯვება დავიმსახურეთ”, – ციტირებს გრიზმანის სიტყვებს “ბიბისი”.
