მიუნხენის “ბაიერნის” მცველმა დავიდ ალაბამ შესაძლოა, კლუბი გამოიცვალოს.
ავტორიტეტული გერმანული გამოცემა “ბილდი” იუწყება, რომ კონტრაქტის გახანგრძლივების თაობაზე მხარეებს შორის მოლაპარაკება ჩიხში შევიდა. ალაბას ძალების მოსინჯვა სხვა ჩემპიონატში სურს, თან ბავარიული კლუბისგან მაღალ ხელფასს ითხოვს. ავსტრიელი ფეხბურთელით ინტერესს ესპანური გრანდები იჩენენ – “ბარსელონა” და მადრიდის “რეალი”.
“ბაიერნსა” და დავიდ ალაბას შორის გაფორმებულ მოქმედ შრომით ხელშეკრულებას ვადა 2021 წლის ივნისის ჩათვლით აქვს.
მიუნხენის “ბაიერნის” მცველმა დავიდ ალაბამ გუნდის მთავარი მწვრთნელი ხოსეპ გვარდიოლა შეაქო. ფეხბურთელმა განაცხადა, რომ ესპანელი სპეციალისტის ხელი გუნდს აშკარად ეტყობა.
“გვარდიოლასთან მუშაობა ერთი სიამოვნებაა. მან თავიდან გახსნა ფეხბურთი. ზოგჯერ მგონია, რომ იგი 24 საათის განმავლობაში ფეხბურთზე ფიქრობს. იგი მუდმივად გვიხსნის, როგორ შევუტიოთ და როგორ დავიცვათ თავი. გვარდიოლას გარეშე ნამდვილად ვერ ვიქნებოდით ასეთი წარმატებულები”, – ალაბას კომენტარი Gola.com-მა გამოაქვეყნა.
შეგახსენებთ, რომ ხოსეპ გვარდიოლა სეზონის ბოლოს “ბაიერნს” დატოვებს და “მანჩესტერ სიტის” ჩაიბარებს.
შობის ღამეს ავსტრიის ნაკრების ფეხბურთელ დავიდ ალაბასგან მეგობარმა ავტომობილი ინათხოვრა, შემდეგ კი ავტოავარიაში მოყვა.
Audi, რომელიც ავსტრიელმა ფეხბურთელმა მიუნხენის “ბაიერნისგან” საჩუქრად 23 დეკემბერს მიიღო, მძიმედ დაზიანდა. აღსანიშნავია, რომ თავად ფეხბურთელი ავტომობილში არ იმყოფებოდა. მან დღესასწაული ოჯახთან და მეგობრებთან ერთად აღნიშნა.
ავსტრიის 2015 წლის საუკეთესო ფეხბურთელად მიუნხენის “ბაიერნის” მცველი დავიდ ალაბა დაასახელეს. 23 წლის ფეხბურთელი ამ ჯილდოს ზედიზედ მეხუთედ იგებს, რითაც უკან იტოვებს კიევის “დინამოს” მცველ ალექსანდრ დრაგოვიჩს, “სტოკ სიტის” თავდამსხმელ მარკო არნაუტოვიჩსა და ბრემენის “ვერდერის” ნახევარმცველ ზლატკო იუნუზოვიჩს.
აქვე შეგახსენებთ, რომ დავიდ ალაბამ გერმანიის ბუნდესლიგის მე-13 ტურში გელზენკირხენის “შალკეს” წინააღმდეგ გამართულ მატჩში ტრავმა მიიღო და ახლა მკურნალობს.
მიუნხენის “ბაიერნის” მთავარმა მწვრთნელმა ხოსეპ გვარდიოლამ გუნდის მცველ დავიდ ალაბას შესახებ მცირე კომენტარი გააკეთა და მის უნივერსალურობას გაუსვა ხაზი.
“ალაბა ჩვენი ღმერთია. მას თითქმის ყველა შესაძლო პოზიციაზე უთამაშია”, – ციტირებს გვარდიოლას კომენტარს L’ Equipe-ი.
შეგახსენებთ, რომ დავიდ ალაბა ავსტრიის ნაკრების ღირსებას იცავს, რომელიც 2018 წლის მსოფლიოს ჩემპიონატის შესარჩევ ეტაპზე საქართველოს ეროვნული გუნდის მეტოქე იქნება.
მიუნხენის “ბაიერნის” მცველმა დავიდ ალაბამ უეფას ჩემპიონთა ლიგის ნახევარფინალურ ეტაპზე “ბარსელონას” წინააღმდეგ გასამართ განმეორებით მატჩზე საკუთარი პროგნოზი დააფიქსირა. ავსტრიელი ფეხბურთელი ფიქრობს, რომ მისი გუნდი “ბლაუგრანას” ანგარიშით 4:0 დაამარცხებს და ფინალში გავა.
“4:0 გავიმარჯვებთ.
იმედი მაქვს, გამოვჯანმრთელდები და ბერლინში გასამართ ფინალურ მატჩში ვითამაშებ”, – ციტირებს ალაბას სიტყვებს ესპანური გამოცემა “ასი”.
შეგახსენებთ, რომ წყვილის პირველი მატჩი კატალონიური გუნდის დამაჯერებელი გამარჯვებით, ანგარიშით 3:0 დასრულდა.
“ბაიერნსა” და “ბარსელონას” შორის განმეორებითი შეხვედრა დღეს, თბილისის დროით 22:45 საათზე დაიწყება და მას მარკ კლატენბურგის თავკაცობით ინგლისელ მსაჯთა ბრიგადა მოემსახურება.
მიუნხენის “ბაიერნის” მეკარე მანუელ ნოიერმა თანაკლუბელი დავიდ ალაბა დაადანაშაულა იმაში, რომ გერმანიის ნაკრებს დაცვის მარცხენა ფლანგზე პრობლემები აქვს. გერმანელმა კიპერმა ეს, რა თქმა უნდა, ხუმრობით თქვა.
“როდესაც დავიდი ჯერ კიდევ ახალგაზრდა იყო, ვეუბნებოდი, რომ გერმანიის მოქალაქეობა მიეღო (ალაბა ავსტრიის ნაკრებში თამაშობს). ჩვენ არ გვყავს მარცხენაფლანგელი მცველი და ამაში დამნაშავე ალაბაა”, – ციტირებს ნოიერის სიტყვებს Goal.com-ი.
მიუნხენის “ბაიერნის” მცველი დავიდ ალაბა ავსტრიის წლის სპორტსმენად დასახელდა.
22 წლის ფეხბურთელმა გამოკვეთილ ფავორიტებს აჯობა: მოთხლამურე მარსელ ჰირშერს, რომელიც მსოფლიოს ჩემპიონი და სოჭის ზამთრის ოლიმპიური თამაშების ვერცხლის მედალოსანია და ანა ფენინგერს, რომელმაც იმავე ოლიმპიადაზე სუპერგიგანტურ სლალომში ოქროს მედალი მოიპოვა.
აღსანიშნავია, რომ ათი ფინალისტიდან ალაბა ერთადერთი იყო, რომელიც ზამთრის სპორტის სახეობას არ წარმოადგენდა.
როგორც მოგახსენეთ, ევროპის 2016 წლის ჩემპიონატის საკვალიფიკაციო ეტაპზე ავსტრიისა და შვედეთის ნაკრებებს შორის გამართულ მატჩში (1:1) ზლატან იბრაჰიმოვიჩმა დავიდ ალაბას სახეში იდაყვი ჩაარტყა, რის გამოც შვედი ფეხბურთელი უეფასგან დისკვალიფიკაციის საფრთხის წინაშე დადგა.
ევროპული ფეხბურთის მმართველ ორგანოში აღნიშნეს, რომ ეს ეპიზოდი მსაჯის მატჩისშემდგომ პროტოკოლში არ მოხვდა და, შესაბამისად, დისციპლინური სამართალწარმოება არ დაიწყება. ასე რომ, შვედეთის ნაკრების ლიდერი დისკვალიფიკაციას გადაურჩა.
სახეში იდაყვის ჩარტყმისთვის მთავარმა მსაჯმა ზლატანს მხოლოდ სიტყვიერი გაფრთხილება მისცა, რის გამოც ალაბა აცხადებდა, არბიტრს იბრაჰიმოვიჩის შეეშინდაო.
ევროპის 2016 წლის ჩემპიონატის საკვალიფიკაციო ეტაპზე ავსტრიისა და შვედეთის ნაკრებებს შორის გამართულ მატჩში (1:1) ზლატან იბრაჰიმოვიჩმა მეტოქე გუნდის ფეხბურთელს სახეში იდაყვი ჩაარტყა. შესაძლოა, უეფამ აღნიშნული ეპიზოდი გამოიძიოს და შვედი თავდამსხმელი დისკვალიფიკაციით დასაჯოს.
ინციდენტი პირველი ტაიმის მიმდინარეობის დროს მოხდა. იბრაჰიმოვიჩმა ავსტრიელ მცველ დავიდ ალაბას სახეში იდაყვი ჩაარტყა, თუმცა მთავარმა არბიტრმა ზლატანი მხოლოდ სიტყვიერად გააფრთხილა.
“დაე, დამსაჯონ 40-მატჩიანი დისკვალიფიკაციით”, – აღნიშნა მატჩის შემდეგ იბრამ.
