როგორც ბრიტანული პრესა წერს, ლონდონის “არსენალი” სერიოზულად იყო დაინტერესებული ლონელ მესის დამატებით, როცა არგენტინელი მხოლოდ 16 წლის გახლდათ.
“მეთოფეთა” მთავარი მწვრთნელის, არსენ ვენგერის ყურადღების არეალში “ბარსელონას” ახალგაზრდა ფეხბურთელები მოხვდნენ, მათ შორის იყვნენ ლეო მესი, ჟერარ პიკე და სესკ ფაბრეგასი. “არსენალს” სულ ცოტაღა აკლდა, რომ მესი დაემატებინა, თუმცა არგენტინელს ინგლისში სამუშაო ვიზა არ მისცეს და გარიგებაც ჩაიშალა.
როგორც მოგეხსენებათ, “არსენალმა” მოგვიანებით ფაბრეგასის ტრანსფერის გაჩარხვა მოახერხა. პიკემ “მანჩესტერ იუნაიტედს” მიაშურა. რაც შეეხება მესის, მას “ბარსელონას” პირველ გუნდში დებიუტი 17 წლისა და 114 დღის ასაკში ჰქონდა, როცა კატალონიურ გუნდს ფრანკ რაიკაარდი თავკაცობდა.
