ჭდე: Didier Deschamps

საფრანგეთის ფეხბურთის ფედერაციამ დეშამთან დაკავშირებით გადაწყვეტილება მიიღო

Posted on by ბექა დოგრაშვილი

საფრანგეთის ფეხბურთის ფედერაციის პრეზიდენტმა ნოელ ლე გრემ განაცხადა, რომ დიდიე დეშამი ეროვნული ნაკრების მთავარი მწვრთნელის პოსტზე მუშაობას გააგრძელებს.

“ყატარში გასამართ მსოფლიოს ჩემპიონატზე გუნდს დეშამი უხელმძღვანელებს. გადაწყვეტილება სამ წუთში მივიღეთ. თანამშრომლობის გაგრძელების სურვილი საკმაოდ ძლიერია. არავითარი კამათი არ ყოფილა. არ უნდა დავივიწყოთ ის, რაც გაკეთდა. ბევრი ახალგაზრდა ფეხბურთელი გვყავს, რომელთაც შესანიშნავი უნარები აქვთ. ჩვენს მწვრთნელსაც მშვენიერი უნარები გააჩნია”, – ლე გრეს კომენტარს “ლეკიპი” ციტირებს.

შეგახსენებთ, რომ დიდიე დეშამი “ლე ბლუს” 2012 წლიდან თავკაცობს. მისი თავკაცობით გუნდმა 2016 წლის ევროპის ჩემპიონატზე ვერცხლის, ხოლო 2018 წლის მსოფლოის ჩემპიონატზე ოქროს მედლები მოიპოვა.

საფრანგეთის ნაკრები ევრო-2020-ს მერვედფინალურ ეტაპზე შვეიცარიის ეროვნულმა გუნდმა გამოთიშა.

დეშამმა ნაკრებში ბენზემას გამოძახების ფაქტი განმარტა

Posted on by ბექა დოგრაშვილი

საფრანგეთის ეროვნული ნაკრების მთავარმა მწვრთნელმა დიდიე დეშამმა ევროპის ჩემპიონატისთვის გუნდის განაცხადში მადრიდის “რეალის” თავდამსხმელი კარიმ ბენზემა შეიყვანა.

33 წლის ფეხბურთელს “მამლების” რიგებში 2015 წლის შემდეგ არ უთამაშია. ბენზემასთვის ეროვნული ნაკრების კარი მას შემდეგ დაიხურა, რაც მატიე ვალბუენამ ის შანტაჟში დაადანაშაულა. კერძოდ, ვალბუენა ამტკიცებდა, რომ ბენზემას მისი მონაწილეობით ინტიმური შინაარსის ამსახველი ვიდეომასალა ჰქონდა და კრიმინალებთან თანამშრომლობდა, რომლებიც მატიეს დიდი თანხის გადახდას აიძულებდნენ. სასამართლომ ბენზემა უდანაშაულოდ ცნო, თუმცა 33 წლის ფეხბურთელს ნაკრებში მაინც არ იწვევდნენ.

ექვსწლიანი პაუზის შემდეგ დეშამმა ბენზემას უხმო და ეს გადაწყვეტილება დღეს განმარტა კიდეც.

“შეუძლებელია წარსულში დაბრუნება და რაიმეს შეცვლა. ყველაზე მნიშვნელოვანი დღევანდელი და ხვალინდელი დღეა. მნიშვნელოვანი ნაბიჯები გადავდგით, კარიმს შევხვდი, ბევრი ვისაუბრეთ. შეხვედრის შემდეგ დიდხანს ვფიქრობდი ამ გადაწყვეტილების შესახებ. ვერ გეტყვით, რაზე ვისაუბრეთ, ეს მხოლოდ ჩვენ გვეხება. ეს ორივე ჩვენგანს გვჭირდებოდა. რთული სიტუაციები გამომივლია და პირად ინტერესებს ყოველთვის უგულებელვყოფდი. საფრანგეთის ნაკრები ჩემი საკუთრება არ არის.

ოლივიე ჟირუს საფრთხე შეექმნა? აუცილებელი არ არის, ასე ვიფიქროთ. კონკურენცია ყოველთვის არის. ისინი სამი წლის განმავლობაში ერთ გუნდში იყვნენ. მათი ერთად ყოფნა კარგი იდეაა თუ ცუდი, ამას ევროპის ჩემპიონატის შემდეგ გავიგებთ”, – ციტირებს დეშამის სიტყვებს L’Equipe-ი.

ფრანგები ევროპის ჩემპიონატის ჯგუფურ ეტაპზე გერმანელების, უნგრელებისა და პორტუგალიელების წინააღმდეგ ითამაშებენ.

დეშამი ევრო-2020-ისთვის ნაკრებში ბენზემას გამოძახებას აპირებს

Posted on by ბექა დოგრაშვილი

ფრანგული პრესის ცნობით, საფრანგეთის ეროვნული ნაკრების მთავარი მწვრთნელი დიდიე დეშამი ევროპის ჩემპიონატისთვის გუნდში მადრიდის “რეალის” თავდამსხმელ კარიმ ბენზემას გამოძახებას აპირებს.

შეგახსენებთ, რომ ფრანგი ფორვარდისთვის “მამლების” კარი 2016 წელს დაიხურა, მას შემდეგ, რაც მატიე ვალბუენამ ის შანტაჟში დაადანაშაულა. კერძოდ, ვალბუენა ამტკიცებდა, რომ ბენზემას მისი მონაწილეობით ინტიმური შინაარსის ამსახველი ვიდეომასალა ჰქონდა და კრიმინალებთან თანამშრომლობდა, რომლებიც მატიეს დიდი თანხის გადახდას აიძულებდნენ. სასამართლომ ბენზემა უდანაშაულოდ ცნო, თუმცა 33 წლის ფეხბურთელი ეროვნულ გუნდში დღემდე არ მიუწვევიათ.

ფრანგები ევროპის ჩემპიონატის ჯგუფურ ეტაპზე გერმანელების, უნგრელებისა და პორტუგალიელების წინააღმდეგ ითამაშებენ.

დეშამი: “სანტა კლაუსი არ ვარ, განაცხადში სიურპრიზებს არ ელოდოთ”

Posted on by ბექა დოგრაშვილი

საფრანგეთის ეროვნული ნაკრების მთავარი მწვრთნელი დიდიე დეშამი გულშემატკივრებს აფრთხილებს, რომ ევროპის ჩემპიონატისთვის “მამლების” განაცხადში მოულოდნელობები არ იქნება.

“სანტა კლაუსი არ ვარ. აქ იმისთვის არ გახლავართ, რომ სიურპრიზები დაგიანონსოთ. სიას ნელ-ნელა ვადგენ. კორანტენ ტოლისოს მსგავსად მყავს სხვა ფეხბურთელებიც, რომლებიც გამოჯანმრთელების პროცესს გადიან, მაგრამ მათი ჯანმრთელობის შესახებ სრულ ინფორმაციას არ ვფლობ.

განაცხადს 18 მაისს გამოვაცხადებ, თუმცა ამის შემდეგ მატჩები გვექნება. არიან ფეხბურთელები, რომლებიც ევროთასების ფინალურ შეხვედრებში ითამაშებენ. სამწუხაროდ, ფეხბურთში უსიამოვნო მოულოდნელობები ხდება ხოლმე. იმედია, ყველაფერი კარგად იქნება”, – ციტირებს დეშამის სიტყვებს “კიკერი”.

დიდიე დეშამი: “ფინალში ვართ და ტიტულის ბედი ჩვენს ხელშია”

Posted on by ბექა დოგრაშვილი

2016 წლის ევროპის ჩემპიონატის ნახევარფინალურ ეტაპზე საფრანგეთის ნაკრებმა გერმანია ანგარიშით 2:0 დაამარცხა და ფინალურ შეხვედრაში თამაშის უფლება მოიპოვა. ამ წარმატების შესახებ ფრანგთა მთავარმა მწვრთნელმა დიდიე დეშამმა ისაუბრა.

“ეს სიხარული, ბედნიერება და სიამაყეა. ძლიერი მეტოქის წინააღმდეგ რთული მატჩი ჩავატარეთ. სირთულეები გვქონდა, თუმცა უკან არ დაგვიხევია. მეორე ტაიმში სიტუაციას უკეთ ვაკონტროლებდით.

სამ დღეში ფინალია. დრო ძალიან სწრაფად გარბის, ამიტომ ამ გამარჯვებით დატკბობა უნდა მოვასწროთ. ეს წინ გადადგმული დიდი ნაბიჯია, თუმცა ყველაზე მნიშვნელოვანი შეხვედრა კვირას გველის. ყოველთვის მჯეროდა ჩემი ფეხბურთელების. ეს მათი გამარჯვებაა, ეს მათი ისტორიაა. ვეცდებით, რომ ფინალურ მატჩს ოპტიმალური კონდიციებით შევხვდეთ.

ჩვენ უკვე შევედით ისტორიაში. საფრანგეთის ნაკრებს გერმანია დიდი ხანია დამარცხებული არ ჰყავდა, მაგრამ ამას დღეს მნიშვნელობა არ ჰქონდა. ჩვენ ფინალში ვართ და ტიტულის ბედი ჩვენს ხელშია. ჩვენს გუნდს ყველაფერი აქვს იმისთვის, რომ ის უყვარდეთ”, – ციტირებს დეშამის სიტყვებს უეფას ოფიციალური ვებგვერდი.

დეშამი: “მძიმე მატჩი გამოვიდა”

Posted on by ბექა დოგრაშვილი

2016 წლის ევროპის ჩემპიონატის გახსნით შეხვედრაში საფრანგეთის ეროვნულმა გუნდმა რუმინეთის ნაკრები ანგარიშით 2:1 დაამარცხა. მატჩის შესახებ კომენტარი გააკეთა ფრანგთა თავკაცმა დიდიე დეშამმა.

“მოხარული ვარ, რომ გავიმარჯვეთ. რუმინეთის ნაკრების წინააღმდეგ თამაში ადვილი არ არის. ჩვენ ეს ვიცოდით. მეტოქემ ბევრი შეცდომა დაუშვა, თუმცა თავს კარგად იცავდა. უპირატესობის გაზრდის შანსი გვქონდა, მაგრამ საპასუხო გოლი მალევე მივიღეთ.

მატჩის ბოლოს შეტევაში ოთხი ფეხბურთელი გავამწესე, რითაც მივანიშნე, რომ გამარჯვებაზე ვთამაშობდით. ტურნირის გახსნითი შეხვედრა იყო, მძიმე მატჩი გამოვიდა”, – განაცხადა დეშამმა.

დეშამი: “ბენზემა საფრანგეთის საუკეთესო თავდამსხმელია”

Posted on by ბექა დოგრაშვილი

დღეს საფრანგეთის ეროვნული გუნდი ნიცაში ამხანაგურად სომხეთის ნაკრებს გაეჯიბრება. მატჩის წინ “მამლების” მთავარმა მწვრთნელმა დიდიე დეშამმა კარიმ ბენზემას შესახებ ისაუბრა და აღნიშნა, რომ იგი საფრანგეთის ნაკრებისთვის ძალზედ მნიშვნელოვანი ფეხბურთელია.

“ბენზემას თამაში იმაზეა დამოკიდებული, თუ ვინ არის მის გვერდით ან მის უკან. კი ბატონო, მას უკეთ თამაშიც შეუძლია, თუმცა კარიმი იყო და დარჩება ჩვენს საუკეთესო თავდამსხმელად”, – დეშამის კომენტარი უეფას ოფიციალურ ვებგვერდზე გამოქვეყნდა.

 

ვის მისცა ხმა დეშამმა “ოქროს ბურთისა” და წლის მწვრთნელის გამოკითხვაში

Posted on by ბექა დოგრაშვილი

საფრანგეთის ნაკრების თავკაცმა დიდიე დეშამმა იმის შესახებ ისაუბრა, თუ ვის მისცა ხმა წლის მწვრთნელისა და “ოქროს ბურთის” გამოკითხვაში.

“ვის მივეცი ხმა “ოქროს ბურთის” გამოკითხვაში? ამას იანვარში გაიგებთ, თუმცა ახლავე გეტყვით, რომ ჩემ მიერ დასახელებული ორი ფეხბურთელი საუკეთესო სამეულში მოხვდა.

რაც შეეხება მწვრთნელს, ხმა იოახიმ ლიოვს მივეცი. მას შემდეგ კარლო ანჩელოტი და დიეგო სიმეონე დავაყენე”, – დეშამის სიტყვებს “ლე პარიზიენი” აქვეყნებს.

შეგახსენებთ, რომ “ოქროს ბურთის” დაჯილდოების საზეიმო ცერემონია 2015 წლის 12 იანვარს, შვეიცარიის ქალაქ ციურიხში ჩატარდება.

 

დეშამი ანრისთვის გამოსათხოვარი მატჩის ჩატარების წინააღმდეგი არ არის

Posted on by ბექა დოგრაშვილი

საფრანგეთის ნაკრების მთავარი მწვრთნელი დიდიე დეშამი ზინედინ ზიდანის ინიციატივას გამოეხმაურა, რომლის მიხედვითაც, ეროვნულმა გუნდმა ტიერი ანრის გამოსათხოვარი მატჩი უნდა მოუწყოს.

ზიზუს აზრით, ანრის გამოსამშვიდობებლად იდეალური ვარიანტი იქნებოდა ბრაზილიის ნაკრების წინააღმდეგ მომავალ წელს გასამართი ამხანაგური შეხვედრა.

Zinedine Zidane - Thierry Henry

“ანრი მართლაც იმსახურებს ნაკრების მხრიდან განსაკუთრებულ დამოკიდებულებას, თუმცა ახლა მეტის თქმა არ შემიძლია, რადგან აღნიშნული საკითხი ფედერაციასთან ერთად უნდა გადაწყდეს.

კი ბატონო, ბრაზილიის ნაკრების წინააღმდეგ გასამართი მატჩი ამხანაგური იქნება, თუმცა ეს შეხვედრა ევროპის 2016 წლის ჩემპიონატის მოსამზადებელი ეტაპის ფარგლებში ჩატარდება და ძალიან კარგი იქნება ისეთი ფეხბურთელის გასაცილებლად, როგორიც ანრია”, – განაცხადა დეშამმა RTL-ისთვის მიცემულ ინტერვიუში.

 

“მონპელიეს” მეკარის მეუღლემ დეშამს სიკვდილი უსურვა

Posted on by ბექა დოგრაშვილი

ფრანგული “მონპელიეს” მეკარე ჟოფრე ჟურდრანის მეუღლე ნოემიმ საფრანგეთის ნაკრების მთავარ მწვრთნელ დიდიე დეშამს სიკვდილი უსურვა.

“დეშამ, იმედია, ხვალ მოკვდები”, – დაპოსტა ნოემიმ სოციალურ ქსელში, თან დეშამის გვარი არასწორად დაწერა.

ნოემის გაღიზიანების მიზეზი მარტივი გასაგებია. დეშამმა ტრავმირებული სტეფან რუფიეს ნაცვლად ნაკრებში არა ჟურდრანს, არამედ “რენის” კიპერ ბენუა კოსტილიას უხმო.

დეშამი: „ყველანი ვღელავთ, მაგრამ არა გერმანიის სიძლიერის გამო“

Posted on by ბექა დოგრაშვილი

დღეს ბრაზილიაში მიმდინარე მსოფლიოს ჩემპიონატის მეოთხედფინალური ეტაპი გაიხსნება. თბილისის დროით 20:00 საათზე საფრანგეთისა და გერმანიის ნაკრებებს შორის გასამართი მატჩი აიღებს სტარტს.

„მამლების“ მთავარი მწვრთნელი დიდიე დეშამი აცხადებს, რომ მისი გუნდი დამდეგი შეხვედრისთვის ჩვეულ რეჟიმში ემზადება. ფეხბურთის ფრანგი სპეციალისტის თქმით, მის ბანაკში ყველა ღელავს, თუმცა არა მეტოქის სიძლიერის გამო.

— არანაიდ ზეწოლას არ ვგრძნობთ. თქმა არ უნდა იმას, რომ ყველანი ვღელავთ, მაგრამ არა მეტოქის სიძლიერის გამო, არამედ იმიტომ, რომ ეს მსოფლიოს ჩემპიონატის მეოთხედფინალური ეტაპია. აქ გერმანიის ნაკრები არაფერ შუაშია.

— ესე იგი, მატჩს ლაღი განწყობილებით ხვდებით?
— რაც უფრო შორეულ ეტაპზე გადიხარ, მით უფრო მეტ პასუხისმგებლობას გრძნობ. ჩვეულ რეჟიმში ვემზადებით, თუმც გვესმის, რაოდენ დიდი მნიშვნელობა ექნება მატჩის შედეგს.

— შეგიძლიათ, რომ ახლავე გააკეთოთ მსოფლიოს ჩემპიონატზე თქვენი გუნდის გამოსვლის წინასწარი შეფასება?
— ჩვენმა ფეხბურთელებმა დაამტკიცეს, რომ მაღალი სტატუსის მიუხედავად, მათ შეუძლიათ ერთ გუნდად შეკვრა. გუნდში არსებული ატმოსფეროთი კმაყოფილი ვარ. ყველამ ისწავლა პასუხისმგებლობის აღება არამხოლოდ საკუთარ შეცდომაზე, არამედ თანაგუნდების არასწორ მოქმედებაზეც.

 

დიდიე დეშამი და სოციალური ქსელები

Posted on by ბექა დოგრაშვილი

საფრანგეთის ნაკრების მთავარმა მწვრთნელმა დიდიე დეშამმა განაცხადა, რომ ფეხბურთელთა მხრიდან სოციალური ქსელის მოხმარებას ლიბერალურად უყურებს, თუმცა ფეხბურთის ფრანგი სპეციალისტი იქვე დასძენს, მსოფლიოს ჩემპიონატის მიმდინარეობისას გუნდის წევრების მიერ ქსელის ხშირ გამოყენებას არ დავუშვებო.

„ჯერ არ იციან, რა წესებით ვიმოქმედებთ ბრაზილიაში. ყველაფერს მე განვსაზღვრავ. სოციალური ქსელები თითოეული ადამიანის პირადი თავისუფლების ნაწილია, მაგრამ იმედი მაქვს, რომ საღი აზრი გაიმარჯვებს. ქსელში შეიძლება ვინმეს მიესალმო, გამოემშვიდობო, ეს კარგია და არ მაღელვებს, თუმცა არ დავუშვებ არაფრისმომცემ მიმოწერას, რაც გუნდის ინტერესებს ეწინააღმდეგება. ეს იქნება უპირველესი წესი“, – დეშამის სიტყვებს L’Equipe-ი აქვეყნებს.

შეგახსენებთ, რომ საფრანგეთს მსოფლიოს ჩემპიონატის ჯგუფურ ეტაპზე მეტოქეებად შვეიცარიის, ეკვადორისა და ჰონდურასის ნაკრებები ჰყავს. მუნდიალის დაწყებამდე 23 დღე დარჩა.

ბექა დოგრაშვილი