ჭდე: გია გეგუჩაძე

30 მაისს საქართველოს ახალგაზრდული ნაკრები შვედეთში გაემგზავრება, სადაც 3 ივნისს ევროპის ჩემპიონატის შესარჩევ მატჩში მასპინძელთა 21-წლამდე ნაკრებს დაუპირისპირდება.

გია გეგუჩაძის გუნდი უკვე რამდენიმე დღეა, სფფ-ის ტექნიკურ ცენტრ „ბასაზე“ ვარჯიშობს, შვედეთში გამგზავრებამდე კი ჩვენი ნაკრების მთავარმა მწვრთნელმა პრესკონფერენცია ჩაატარა და ჟურნალისტების შეკითხვებს უპასუხა.

გია გეგუჩაძე: „მზადება თბილისში დავიწყეთ. შვედეთში დაგვემატება გიორგი გოროზია. ასევე დიდი იმედი მაქვს, რომ დაგვეხმარება ჯიმი ტაბიძე, რომლის თაობაზე პასუხი დღეს გვეცოდინება. ექიმების დიაგნოზს ველოდებით გიორგი პაპუნაშვილზე – მას ფეხზე სურათი უკვე გადაუღეს და მალე გვეტყვიან, შეძლებს თუ არა თამაშს. სამწუხაროდ, ასეთ პრობლემებს ვერ ავცდით, თუმცა ეს იმას არ ნიშნავს, რომ რამეს დავთმობთ. გუნდში კარგი განწყობაა, მეგობრული ატმოსფეროა, ბიჭები მოგვყვებიან, იოლად ითვისებენ სიახლეებს და მჯერა, ისე ვითამაშებთ, როგორც შეგვიძლია და რაც შედეგს მოგვიტანს…

…ლუკა ზარანდიას დისკვალიფიკაცია აქვს და ეს იქნება ბოლო თამაში, რომელსაც გამოტოვებს. ამიტომაც ვერ ითამაშებს ის შვედეთში. რაც შეეხება სიის მიღმა დარჩენილ სხვა ფეხბურთელებს: მინდა, განვაცხადო, რომ ყველას ვაკვირდებით, გვაქვს გაფართოებული სია, გვაქვს კომუნიკაცია ფეხბურთელებთან, რამდენჯერმე ნაკრების ვარჯიშებზეც გამოვიძახეთ. ასე რომ, მათ იციან, რომ შეიძლება, ნებისმიერ დროს მოუწიოთ ნაკრებში თამაში და ამისთვის მზად უნდა იყონ“.

დაჩი ცნობილაძე: „ნაკრებში ყოფნა დამატებით მოტივაციას არ საჭიროებს. გუნდში კარგი განწყობაა და გვინდა, წარმატებით ვითამაშოთ. ყველანი მონდომებულები ვართ და ვცდილობთ, ის დავალებები, რასაც მწვრთნელები გვაძლევენ, მოედანზე გადავიტანოთ“.

სფფ-ის პრესსამსახური

საქართველოს ახალგაზრდული ნაკრების მთავარი მწვრთნელი გია გეგუჩაძე უკვე ტრადიციულად ქცეულ მორიგ ერთჯერად ვარჯიშს 26 აპრილს ჩაატარებს. 21-წლამდე ნაკრების კანდიდატები სფფ-ს ტექნიკურ ცენტრ „ბასაზე“ შეიკრიბებიან და 16:30 საათზე დაიწყებენ წვრთნას.

ეს უკვე მესამე ერთდღიანი ვარჯიშია, რაც გია გეგუჩაძის ახალგაზრდულ ნაკრებში დანიშვნის შემდეგ ჩატარდება.
ნაკრების მთავარმა მწვრთნელმა ამჯერად შემდეგი 25 ფეხბურთელი მიიწვია შეკრებაზე:

მეკარეები: დავით მარიამიძე (დილა), გოგი კულუა (დინამო თბ);

მცველები: თორნიკე კირკიტაძე (ჩიხურა), ირაკლი კომახიძე (შუქურა), ზურაბ მალანია (შუქურა), ლუკა ნოზაძე (გურია), ანრი ჭიჭინაძე (ტორპედო), გურამ გიორბელიძე (სიონი), დავით უბილავა (ლოკომოტივი), ალექსანდრე გურეშიძე (სიონი), ალექსანდრე ჩაკვეტაძე (კოლხეთი), გიორგი გაბაძე (ლოკომოტივი), გიორგი გაფრინდაშვილი (სიონი);

ნახევარმცველები: ბექა ჭკუასელი (დინამო ბთ), თენგიზ წიქარიძე (დილა), ოლეგ მამასახლისი (ტორპედო), გიორგი კაშია (დინამო ბთ), ზაურ გოგუაძე (მერანი), ნიკა ლაშხია (ზუგდიდი), ოთარ კობახიძე (სიონი), ლევან ნონიკაშვილი (დილა);

თავდამსხმელები: ილია კერძევაძე (შუქურა), ნიკა ტუღუში (კოლხეთი), დავით ვოლკოვი (ჩიხურა), დავით ჯიქია (სამტრედია).

სფფ-ის პრესსამსახური

საქართველოსა და უკრაინის ახალგაზრდულ ნაკრებებს შორის ზესტაფონის დავით აბაშიძის სახელობის სტადიონზე გამართული ამხანაგური მატჩი უხვგოლიანი გამოდგა. შეხვედრა ფრედ, ანგარიშით 3:3 დასრულდა.

საქართველოს 21 წლამდე ნაკრების მთავარმა მწვრთნელმა გია გეგუჩაძემ მატჩის შემდეგ აღნიშნა, რომ გუნდს ბევრი შეცდომა ჰქონდა, თუმცა, საბოლოო ჯამში, თამაში დადებითად შეაფასა.

“ბევრი შეცდომა გვქონდა, მაგრამ ბევრი დადებითიც იყო ჩვენს თამაშში. მინდოდა, ყველა ფეხბურთელი მენახა საქმეში, რადგან მომავალ შესარჩევ ციკლში ასაკით პატარა ბიჭებს უწევთ თამაში და დღეს გამოჩნდა, ვის დავეყრდნობით მომავალში. ყველაფრის მიუხედავად, თამაშს დადებითად შევაფასებ. შეცდომები იყო, მაგრამ ამას ველოდით და ვიცით, რაზე გვაქვს სამუშაო”, – განაცხადა მატჩის შემდეგ გამართულ პრესკონფერენციაზე გია გეგუჩაძემ.

სან მარინოს 21-წლამდე ნაკრებთან ევროშესარჩევი მატჩის მოგების (4:0) შემდეგ საქართველოს ახალგაზრდული ნაკრები მზადებას აგრძელებს. გია გეგუჩაძის გუნდი 28 მარტს ზესტაფონის დავით აბაშიძის სახელობის სტადიონზე ამხანაგურ მატჩს გამართავს უკრაინელ თანატოლებთან. შეხვედრა 18 საათზე დაიწყება და დასწრება თავისუფალი იქნება.

საქართველოს ნაკრები უკრაინელებთან სათამაშოდ სამი წამყვანი ფეხბურთელის გარეშე ემზადება – გიორგი აბურჯანია, ლაშა დვალი და ნიკა კაჭარავა ეროვნულ გუნდში მიიწვიეს. რაც შეეხება კიდევ ერთ დანაკლისს – ავთო ენდელაძე ავადმყოფობის გამო ვერ ეხმარება ნაკრებს.

21-წლამდელებში მატებაცაა: გია გეგუჩაძემ გამოიძახა „სამტრედიას“ თავდამსხმელი ბუდუ ზივზივაძე, რომელიც უკვე შეუერთდა ნაკრებს და ბელარუსული „მინსკის“ ნახევარმცველი ვალერიან გვილია, რომელიც ხვალ გამოცხადდება შეკრებაზე.

ხვალ-ზეგ საქართველოს ნაკრები ტექნიკურ ცენტრ „ბასაზე“ ივარჯიშებს, 27 მარტს კი მატჩისწინა წვრთნას ზესტაფონში ჩაატარებს. ამავე დღეს აქვს „დავით აბაშიძეზე“ ვარჯიში დაგეგმილი უკრაინასაც, რომელმაც გუშინ ამხანაგურ მატჩში ავსტრია 1:0 დაამარცხა.

სფფ-ის პრესსამსახური