როგორც მოგეხსენებათ, გუშინ გორის “დილამ” ისტორიაში პირველად საქართველოს ჩემპიონის ტიტული მოიპოვა. გუნდმა მიმდინარე გათამაშების დასრულებამდე ორი ტურით ადრე გაინაღდა პირველი ადგილი.
ფაქტს გამოეხმაურა საქართველოს ლეიბორისტული პარტიის ლიდერი შალვა ნათელაშვილი, რომელმაც სოციალური ქსელის მეშვეობით გორელებს ჩემპიონობა მიულოცა:
“გორის “დილა” ფეხბურთში საქართველოს ჩემპიონია. ბიჭებო, სულით და გულით გილოცავთ ამ დიდ გამარჯვებას. დაე, ქართული ფეხბურთს მალე დაეპყროს ქვეყნები და კონტინენტები”.
როგორც იცით, 13 მაისს, უმაღლესი ლიგის 28-ე ტურში გორის “დილამ” “სამტრედია” სტუმრად მინიმალური სხვაობით დაამარცხადა და ჩემპიონატის გამარჯვებული გახდა.
გორში ჩასულ “დილას” ფეხბურთელებს გულშემატკივრები დახვდნენ, მათ კი ჩემპიონობა ერთად იზეიმეს.
დღეს გაიმართა საქართველოს ჩემპიონატის 27-ე ტურის მატჩები. უმაღლესი ლიგის ლიდერმა, გორის “დილამ” საკუთარ კედლებში ფოთის “კოლხეთს” უმასპინძლა და მინიმალური ანგარიშით, 1-0 დაამარცხა.
Fanebi.Com დაუკავშირდა გორელთა მეკარეს და გიორგი სომხიშვილმა დღევანდელ მატჩთან დაკავშირებით კომენტარი გააკეთა.
“დღეს ძალიან დაძაბული მატჩი გამოდგა და მინდა, გუნდის თითოეულ წევრს მადლობა გადავუხადო. ასევე ქომაგებს, მხარდაჭერისთვის. ამჟამად ყველაზე დიდი კონცენტრაციაა საჭირო, რადგან “დილას” ჩემპიონობამდე ერთი ნაბიჯი აშორებს. მობილიზებაა საჭირო იმისთვის, რათა დაწყებული საქმე ბოლომდე მივიყვანოთ”.
საქართველოს ერონული ჩემპიონატის XXV ტურის შეხვედრაში გორის „დილა“ ქობულეთის „შუქურას“ მასპინძლობს. აღნიშნული შეხვედრა სატურნირო მდგომარეობიდან გამომდინარე მნიშვნელოვანია, რადგან ჩემპიონატის დასრულებამდე ექვსი ტურით ადრე, გორის „დილა“ ჩემპიონატის ცხრილის სათავეში იმყოფება, უახლოეს მდევართან სხვაობა კი მხოლოდ ერთ ქულას შეადგენს.
პრინციპული შეხვედრის წინ ჩვენი გუნდის ფეხბურთელები გორელ ქომაგებს სტადიონზე მოსვლის და „დილას“ გულშემატკივრობისკენ მოუწოდებენ. „შუქურასთან“ შეხვედრისთვის საყვარელი გუნდის მხარდასაჭერად ემზადება „დილას“ ფანკლუბიც. „ლომკაცების“ თქმით „დილას“ მხარდასაჭერად ისინი ენერგიას არ დაზოგავენ და საყვარელი გუნდის წარმატებისთვის ბოლომდე დაიხარჯებიან.
FCDila.GE
„დინამოსა“ და „დილას“ საპასუხო სათასო მატჩის შემდეგ „დინამო არენას“ საპრესკონფერენციო დარბაზში გორელთა თავკაცმა უჩა სოსიაშვილმა მატჩი შეაფასა.
„პირველ რიგში, ვიტყვი, რომ შეხვედრა საინტერესო გამოდგა. რაც შეეხება პირველ ტაიმს, ორივე გუნდი საკუთარ ნახევარზე თამაშს ცდილობდა. გოლი უწყინარ სიტუაციაში გავუშვით. სამწუხაროა, რომ დავმარცხდით – მეტოქეზე მეტი მომენტი შევქმენით. „დინამოს“ გაუმართლა. ამ გუნდს ვულოცავ და წარმატებას ვუსურვებ.
ზამთარში გამოცდილი თავდამსხმელის დამატება გვსურდა, მაგრამ ფინანსების გამო ეს ვერ მოხერხდა. რაც შეეხება ირაკლი ძარიას, იგი სულ მალე ვარჯიშს დაიწყებს და ორ კვირაში შემოგვიერთდება“, – განაცხადა სოსიაშვილმა.
დღეს ბორის პაიჭაძის სახელობის „დინამო არენაზე“ თბილისის „დინამოსა“ და გორის „დილას“ შორის საქართველოს თასის განმეორებით 1/4-ფინალური მატჩი გაიმართა.
შეხვედრა ინტერესს არაერთი მიზეზის გამო იწვევდა. მათ შორის მთავარი, რა თქმა უნდა, ისაა, რომ ჩემპიონატში „დინამო“ პირველ ადგილზე იმყოფება და გორელებს მხოლოდ ერთი ქულით უსწრებს. გარდა ამისა, პირველი შეხვედრა გატანილი გოლების გარეშე დასრულდა. ორივე გუნდი თამაშს დანაკლისით ხვდებოდა – „მტკვრისპირელთა“ რიგებიდან, პირველ რიგში, კაპიტან ნიკა ჭანტურიას გამოყოფა შეიძლება. „ზესტაფონთან“ ჩემპიონატის შეხვედრაში ჭანტურიამ მენისკის ტრავმა მიიღო. გამორიცხული არ არის, მცველმა შემდეგი სეზონის დასაწყისშიც ვერ ითამაშოს. ასევე „ლურჯ-თეთრებს“ ტრავმების გამო შერგელაშვილი და პაპუნაშვილი დააკლდნენ, დისკვალიფიკაციის გამო კი პარუნაშვილმა ვერ ითამაშა. „დილას“ კვლავ ძარია აკლდა, რომელსაც ახალ გუნდში ჯერ არ უთამაშია. ასევე ტრავმის გამო შეხვედრას მოდებაძე ტოვებდა.
მატჩის დასაწყისშივე „დილასთვის“ კარგი ეპიზოდი შეექმნა – მე-11 წუთზე ნიკა კვეკვესკირმა სახიფათოდ დაარტყა, თუმცა ძლიერ დარტყმულს ლიბორ ჰრდლიჩკა გაუმკლავდა. 11 წუთში კი სახიფათო ეპიზოდი უკვე გორელთა კართან შეიქმნა – მარცხენა ფლანგიდან მანუელმა ჭანტურიშვილს პასი გაუკეთა, ამ უკანასკნელის გვერდით კი ოთარ კაკაბაძე აღმოჩნდა, რომელიც ჭანტურიშვილმა საგოლე გადაცემით მოამარაგა. პირველი ნახევარი ამ ანგარიშით დასრულდა.
მეორე ტაიმის უფრო დაძაბული გამოდგა, თუმცა ანგარიში არ შეცვლილა.70-ე წუთზე გიორგი გველესიანის ძლიერი დარტყმის აღნივნა შეიძლება, მაგრამ მიგინეიშვილის კარი ძელმა გადაარჩინა. შეხვედრის ბოლოს მომენტები სტუმრებსაც ჰქონიათ, მაგრამ მასპინძლებმა თავისთვის სასარგებლო ანგარიშით შენარჩნება მაინც შეძლეს. 1:0 და თბილისელები ნახევარფინალში არიან!
დინამო – დილა 1:0
გოლი: 1:0 კაკაბაძე 22’
„დინამო“: ჰრდლიჩკა, გველესიანი, რენე, თოთაძე, კაკაბაძე, ბუკორაცი (ჯანელიძე 52′), ჭანტურიშვილი, ცინცაძე, კიტეიშვილი, ლობჟანიძე (ჯიღაური 83), მანუელი (ჩირგაძე 62)
„დილა“: მიგინეიშვილი, ბაგაევი, მარიჩი (წიქარიძე 87), კვახაძე, ფალავანდიშვილი, ხურცილავა, გვალია, თექთურმანიძე (ერისთავი 55′), სეთურიძე, კვეკვესკირი (ახალკაცი 82′), გორელიშვილი
გაფრთხილებები: თოთაძე, მანუელი, ხურცილავა – ბაგაევი
გაძევება: ფალავანდიშვილი
21 თებერვალს, სასტუმრო ,,ბომონდ გარდენში“ გორის „დილას“ ფეხბურთელებს საქართველოს ფეხბურთის ფედერაციის წარმომადგენელმა სათამაშო წესების შესახებ სემინარი ჩაუტარა, რომელსაც სფფ-ს სამსაჯო და სადამკვირვებლო განყოფილების წარმომადგენელი, მსაჯთა მენეჯერი ავთანდილ შალამბერიძე უძღვებოდა.
არსებული წესების განხილვა და მასზე მსჯელობა ეკრანზე ნაჩვენები საფეხბურთო ეპიზოდის მაგალითზე მიმდინარეობდა. სემინარის პროცესში ფეხბურთელების განსაკუთრებული ინტერესი გამოიწვია საკითხებმა, რომელიც ხელით თამაშს და თამაშგარე მდგომარეობის შესახებ წესებს ეხება. შეხვედრის დასასრულ „დილას“ ფეხბურთელებმა სფფ-ს წარმომადგენელთან ერთად ჩვენი გუნდის მიერ ბოლო დროს გამართული შეხვედრების დეტალები და სადავო საკითხები განიხილეს.
„დილას“ პრესსამსახური
როგორც იცით, მიმდინარე კვირას საქართველოს უმაღლესი ლიგა განახლდა.
გუშინ ჩატარდა ჩემპიონატის ორი მატჩი. ზუგდიდის “ზუგდიდმა” ქობულეთის “შუქურა” მინიმალური ანგარიშით დაამარცხა, ხოლო ზესტაფონელები გურულებთან 1-0, თორნიკე მოსიაშვილის გოლით დამარცხდნენ.
დღეს კი გაიმართა შიდა ჩემპიონატის კიდევ ხუთი მატჩი.
“ჩიხურა”(საჩხერე) 2-0 “სიონი”(ბოლნისი)
გოლი: მანჯგალაძე ’31; კორიფაძე ’88
“დინამო”(ბათუმი) 2-0 “მეტალურგი”(რუსთავი)
გოლი: ბერიაშვილი ’40; ტატანაშვილი ’47
“სამტრედია”(სამტრედია) 0-1 “დინამო”(თბილისი)
გოლი: მანუელ ონვუ ’20
“ცხინვალი”(ცხინვალი) 0-1 “დილა”(გორი)
გოლი: გორელიშვილი ’61
“ვიტ-ჯორჯია” 2-2 “მერანი”(“მარტვილი”)
გოლი: კურდღელაშვილი ’64; ’67 – წურწუმია ’34; წყაროზია ’84
გუგა ფალავანდიშვილი: „კარიერა გაგრის საფეხბურთო კლუბში დავიწყე, სადაც ბავშვობის პერიოდში პაატა გოცირიძემ ძალიან დიდი როლი ითამაშა ჩემს სწორად განვითარებაში. შემდეგ გადავედი თბილისის „დინამო 2“-ში, რომელსაც ჩვენი ამჟამინდელი თავკაცი უჩა სოსიაშვილი წვრთნიდა. უჩამ თავიდანვე გამომიცხადა ნდობა და სწორედ მისი დამსახურებაა ჩემი გორის „დილაში“ მოწვევაც. რაშიც მისი ძალიან დიდი მადლიერი ვარ.
გორის „დილა“ ჩემი პირველი უმაღლესი ლიგის გუნდი გახლდათ. კიდევ ერთხელ მინდა მადლობა გადავუხადო უჩა სოსიაშვილს ნდობისთვის და ვფიქრობ, რომ ვამართლებ ჩემდამი გამოცხადებულ ნდობას. მოვხვდი ძალიან კარგ გუნდში როგორც მწვრთნელების, ასევე ხელმძღვანელების თვალსაზრისით.
რაც შეეხება ჩვენს მიერ ჩატარებულ პირველ წრეს, ვთვლი რომ შედეგი დამაკმაყოფილებელია. რომ არა რამოდენიმე შეხვედრაში დასანანად დაკარგული ქულები, პირველ წრეს პირველ ადგილზე დავასრულებდით. ამჟამად გუნდი თურქეთში ნაყოფიერ შეკრებას გადის. ჩავატარეთ სამი ამხანაგური შეხვედრა და ჩემი აზრით, ამ მატჩებში ურიგოდ არ გვიასპარეზია. ამ ეტაპზე აქცენტი გადატანილია თამაშის ხარისხის გაუმჯობესებაზე. ვფიქრობ, რომ ეს შეკრება ნაყოფიერად ჩაივლის და გუნდი კვლავ ითამაშებს ლამაზ და გააზრებულ ფეხბურთს.
აქვე მინდა ჩვენს გულშემატკივრებს თანადგომისათვის ძალიან დიდი მადლობა გადავუხადო, რომელსაც ისინი ჩვენს მიმართ იჩენენ და ამას ყველგან ვგრძნობთ. გორში თითოეული შეხვედრა ზეიმის ტოლფასია და ჩვენც ფეხბურთელებს გვინდა მადლობა გულშემატკივრებს კარგი და შედეგიანი თამაშით გადავუხადოთ.“
„დილას“ პრესსამსახური
პოლონურ “იაგელონიასთან” შედარებით გერმანულ „აურბახთან“ სასტარტო შემადგენლობა ოდნავ განსხვავდებოდა, რადგან ჩვენი გუნდის მთავარმა მწვრთნელმა უჩა სოსიაშვილმა რამოდენიმე ცვლილებას მიმართა.
შეკრებაზე გუნდს შეუერთდნენ 23 წლის რუსი ცენტრალური მცველი ალან ბაგაევი, რომელსაც ვლადიკავკასის „ალანიაში“ და ეკატერინბურგის „ურალში“ აქვს ნათამაშები, ასევე 30 წლის გამოცდილი სერბი მარცხენა მცველი სლავკო მარიჩი, რომელიც „რადნიჩკში“ და „ლამიაში“ თამაშობდა. გუნდს შეკრებაზე ირაკლი ძარიაც შეუერთდა, რომელიც ბოლოს თბილისის „დინამოს“ ღირსებას იცავდა.
შეხვედრა საკმაოდ საინტერესოდ და დაძაბულად წარიმართა. თითქმის მთელი მატჩი ჩვენი გუნდის კარნახით მიმდინარეობდა. გოლის გატანის შესაძლებლობები ჰქონდათ გიორგი ერისთავს (რომელიც დღეს იუბილარი გახლავთ და 21 წელი შეუსრულდა), გორელიშვილსა და გიორგი მელქაძეს, რომელმაც 20 მეტრიდან სულ მცირე მანძილით ააცდინა მიზანს.
მატჩის მე-60’ წუთზე გორელებმა გახსნეს ანგარიში. „დილას“ გამოცდილმა ნახევარმცველმა ლუკა რაზმაძემ მეტოქის საჯარიმოს სიახლოვეს მიიღო ბურთი კარგად დაამუშავა და მეკარისაგან შორეულ ცხრიანში გადაგზავნა. უნდა აღინიშნოს, რომ გოლი საკმაოდ ლამაზი გამოუვიდა. გერმანელებმა კი 75’-ე წუთზე წონასწორობა აღადგინეს. საბოლოოდ პოლონელებთან გამართული მატჩის მსგავსად, ეს დაპირისპირებაც ფრედ 1:1 დასრულდა.
მომდევნო შეხვედრას გორის „დილა“ 6 თებერვალს შვეიცარიული „იანგ ბოიზის“ წინააღმდეგ გამართავს.
„დილამ“ ასეთი შემადგენლობით ითამაშა: სომხიშვილი, ხურცილავა, ჯაფარიძე, კვახაძე, ქარქუზაშვილი, რაზმაძე, ფალავანდიშვილი, კვეკვესკირი, სეთურიძე, ერისთავი თექთურმანიძე.
შეცვლაზე შევიდნენ: გვალია, გორელიშვილი, ხიდეშელი, ბაგაევი, მარიჩი, ჭეჭელაშვილი, კურმაშვილი, ახალკაცი, მელქაძე.
„დილას“ პრესსამსახური
გორის „დილა“ 29 იანვარს გამთენიისას თურქულ შეკრებაზე ანტალიაში გაემგზავრა. გუნდი სიდეში სასტუმრო „Side Star“-ში დაბინავდა, სადაც 10 თებერვლამდე დაჰყობს და ოთხ ამხანაგურ შეხვედრას გამართავს.
უჩა სოსიაშვილმა თურქულ შეკრებაზე შემდეგი ფეხბურთელები იახლა: ომარ მიგინეიშვილი, გიორგი სომხიშვილი, დავით მარიამიძე, ალექსანდრე კვახაძე, გიორგი ხიდეშელი, გივი ქარქუზაშვილი, ლაშა ჯაფარიძე, დავით ხურცილავა, გიგა სამხარაძე, ლუკა რაზმაძე, გუგა ფალავანდიშვილი, ლაშა გვალია, გიორგი კურმაშვილი, გიორგი მელქაძე, გიორგი ერისთავი, ჭიაბერ ჭეჭელაშვილი, ნიკა კვეკვესკირი, გიორგი თექთურმანიძე, გიორგი სეთურიძე, ირაკლი მოდებაძე, მიხაილ გორელიშვილი, რომან ახალკაცი.
შეკრებაზე გუნდს ირაკლი ძარია შეუერთდება, რომელიც ბოლოს თბილისის „დინამოში“ ასპარეზობდა. მას საქართველოს ეროვნულ ნაკრებშიც აქვს ნათამაშები, სადაც 9 მატჩში 1 გოლის გატანა შეძლო.
„დილას“ პრესსამსახური
გორის ,,დილა’’ მეორე წრისთვის მზადებას განგრძობს და 27 იანვარს მორიგ ამხანაგურ შეხვედრას ბოლნისის ,,სიონის“ წინააღმდეგ გამართავს. 29 იანვარს კი გუნდი შეკრებაზე ანტალიაში გაემგზავრება.
,,დილას’’ ყოფილმა წევრებმა, მიხაილ გორელიშვილმა და ლაშა გვალიამ დღეს გორში ინდივიდუალურად ივარჯიშეს. გორელიშვილმა 2012-13 წლების სეზონი და XXV ეროვნული ჩემპიონატის პირველი წრე ,,დილაში’’ გაატარა, ამის შემდეგ კი კარიერა რუსეთის პირველი ლიგის კლუბ ,,ტოსნოში’’ განაგრძო. ლაშა გვალიამ კი 2012-13 წლების სეზონის შემდეგ, რუსეთის პრემიერ ლიგის ბინადარ ეკატერინბურგის „ურალში“ განაგრძო კარიერა, ბოლოს კი ს. კ. „ზესტაფონში“ თამაშობდა, სადაც მან მიმდინარე ჩემპიონატის პირველი წრე ჩაატარა. როგორც მოგეხსენებათ, ფეხბურთელები ჩვენს გუნდში წარმატებით თამაშოდნენ და დიდ ძალას წარმოადგენდნენ.
გთავაზობთ მიხაილ გორელიშვილისა და ლაშა გვალიას კომენტარებს, რომელიც მათ კლუბის ოფიციალური ვებ-გვერდისთვის გააკეთეს.
მიხაილ გორელიშვილი: „გორის ,,დილასთან’’ ძალიან თბილი მოგონებები მაკავშირებს. გუნდი ბოლო პერიოდში კარგ შედეგებს აჩვენებს შიდა ჩემპიონატსა და ევროტურნირებზე. გულშემატკივართან მქონდა და მაქვს ძალიან კარგი ურთიერთობა და შევეცდები მათი მოლოდინებიც გავამართლო. ,,დილაში’’ ხელმძღვანელობა შეიცვალა და მახარებს ის ფაქტი, რომ ახალგაზრდა ამბიციური მწვრთნელი ახალგაზრდა ფეხბურთელებს ნდობას უცხადებს“.
ლაშა გვალია: „მოხარული ვარ ,,დილაში’’ დაბრუნებით. კლუბს დიდი ისტორია გააჩნია. შეიძლება ითქვას, რომ ,,დილაში’’ ასპარეზობის დროს გამიცნო საფეხბურთო სამყარომ. გუნდს ყოველთვის ჰქონდა დიდი ამბიცია და დღესაც ასეა. შევეცდები, რომ მიზნების მიღწევაში მაქსიმალურად დავეხმარო. „დილას“ გულშემატკივარი ძალიან კარგად მახსოვს, მათ მხარდაჭერას ყოველთვის ვგრძნობდით. გუნდში ძალიან გამოცდილი ფეხბურთელები თამაშობენ. მათთან მეგობრული ურთიერთობა მაქვს და შევეცდები გულშემატკივრის იმედები გავამართლო“.
„დილას“ პრესსამსახური
