სამწუხაროდ, ვერ მოახერხა გაგამარუმ დღეს, ზედიზედ მესამედ დაემარცხებინა ეგვიპტელი ოსუნაარაში.
არადა, ჩვენმა გოლიათმა სტარტზე ძალიან აგრესიულად შეუტია 22 წლის აბდელრაჰმან შარანს და შეეძლო კიდეც დოჰიოდან განედევნა. თუმცა, მე-11 მაეგაშირად განთესილმა ეგვიპტელმა სეკიტორმა შეძლო თავის დაცვა და როდესაც გაგა ჯიქურ აწვებოდა მას, უვატენაგეთი დასცა დოჰიოზე ქართველი ფალავანი.
გაგამარუსთვის აღნიშნული მარცხი უკვე რიგით მესამეა ჰარუ ბაშოზე, აქტივში კი მხოლოდ 1 მოგება აქვს ჩვენებურს.
მისი მომდევნო მეტოქე იაპონელი მე-7 მაეგაშირა, ტოიოჰიბიკი იქნება, რომელსაც ასევე არასახარბიელოდ მისდის საქმეები ოსაკაში, თუმცა გაგასგან განსხვავებით, იაპონელს ჯერ-ჯერობით კინკილა გამარჯვებაც არა აქვს.
რაც შეეხება ურთიერთშეხვედრებს, აქ მცირე უპირატესობას ტოიოჰიბიკი ფლობს – განვლილი 7 შერკინებიდან მან 4 მოუგო გაგამარუს.
ჩვენმა მეორე სუმოისტმა, ტოჩინოშინმა დღეს დაისვენა და მომდევნო (რიგით მე-3) ორთაბრძოლას ხვალ ჩაატარებს ბაშოზე. ლევანს მეტოქეობას მაკუშიტას 57-ე ნომერი, 24 წლის იაპონელი, კეიტენკაი გაუწევს. ამ სუმოისტმა 2012 წლის სექტემბერში ჯურიოს დივიზიონსაც უწია, და სხვათა შორის, პირველი ორთაბრძოლა იმ ბაშოზე ჩვენ კოკკაის მოუგო. თუმცა, ტურნირის მე-2 დღეს ძალიან მძიმე ტრავმა მიიღო და მთელი 1 წელი მოუწია დასვენება. შედეგად, კეიტენკაი ყველაზე ქვედა, ჯონოკუჩის (რანგით მე-6) დივიზიონამდე დაქვეითდა და გასული წლის სექტემბერში ფაქტობრივად ნულიდან დაიწყო რიკიშის კარიერა. მისდა სასახელოდ უნდა ითქვას, რომ ტრავმის მერე ძალიან მოყოჩაღებული დაბრუნდა, ზედიზედ 2 ტურნირი მოიგო (ჯონოკუჩის და ჯონიდანის დივიზიონებში) და ახლა უკვე მაკუშიტაში იმყოფება.
კეიტენკაის მიმდინარე ბაშოზე, ტოჩის დარად, ორივე ორთაბრძოლა მოგებული აქვს. იმედი ვიქონიოთ, რომ ლევანი ხვალ პირველი მარცხის გემოს გააგებინებს იაპონელს.
სატურნირო ცხრილის სათავეში ნელ-ნელა მცირდება დაუმარცხებელ სუმოისტთა რიცხვი. 4 ტურის თავზე ჰარუ ბაშოს 5 წაუგებელი სუმოისტი შემორჩა: მონღოლი იოკოძუნები, ჰაკუჰო და ჰარუმაფუჯი, იაპონელი ოძეკი კისენოსატო, მისივე თანამემამულე სეკივაკე გოეიდო და ჩვენი გაგას დღევანდელი დამჯაბნავი, ეგვიპტელი ოსუნაარაში.
ჭდე: ჰარუმაფუჯი
ქართული გამარჯვებების დღე ოსაკაში
ოსაკაში მიმდინარე ჰარუ ბაშოს მე-3 დღე წარმატებული გამოდგა ორივე ქართველი სუმოისტისთვის. მე-9 მაეგაშირად განთესილმა გაგამარუმ პირველი გამარჯვება იზეიმა ტურნირზე, ხოლო მაკუშიტას 55-ე ნომერმა, ტოჩინოშინმა მე-2 მოგება ჩაიწერა აქტივში.
გაგა ჯუღელმა საკმაოდ მარტივად დაამარცხა მე-10 მაეგაშირად განთესილი მონღოლი გოლიათი, ტერუნოფუჯი. ჩვენმა დევკაცმა ერთი ამოსუნთქვით, ოშიდაშით განდევნა მონღოლი დოჰიოდან.
როგორც უკვე გითხარით, გაგასთვის ეს პირველი გამარჯვება იყო ბაშოზე, პასივში კი 2 მარცხი აქვს მას.
ჩვენებურის მომდევნო მეტოქე ეგვიპტელი ამომავალი ვარსკვლავი, მე-11 მაეგაშირას სტატუსით მებრძოლი, ოსუნაარაში იქნება, რომელსაც სამივე ბრძოლა მოგებული აქვს მიმდინარე ტურნირზე. თუმცა, ჩვენი გოლიათი 2-ჯერ შეხვედრია აქამდე ეგვიპტელს და ორივეჯერ დამარცხებული ყავს. იმედი ვიქონიოთ, რომ ამ სერიას არც ხვალ არ შეწყვეტს გაგამარუ.
რიგით მე-2 ორთაბრძოლა ჩაატარა დღეს ბაშოზე ტრავმის შემდეგ დაბრუნებულმა ლევან გორგაძემ და ამჯერადაც უპრობლემოდ იმარჯვა. ტოჩინოშინმა მაკუშიტა დივიზიონის 57-ე ნომერი, იაპონელი ჰაკუიოძანი კარგად დაიჭირა მავაშით და ძალისმიერი იორიკირით გაიყვანა დოჰიოდან.
ტოჩი ხვალ დაისვენებს და მომდევნო ორთაბრძოლს, სავარაუდოდ, ზეგ ჩაატარებს.
ამასობაში სხვა საინტერესო ამბებიც ხდება უკვე მარტის ბაშოზე. დღეს პირველი მარცხი იწვნია ცუნატორად (იოკოძუნობის კანდიდატი) შერაცხულმა მონღოლმა ოძეკი კაკურიუმ. მისი ძლევა იაპონელმა მე-2 მაეგაშირა, ოკინოუმიმ შეძლო (სხვათა შორის, უკვე ზედიზედ მესამედ). კაკურიუს მიზანი, იმისთვის რომ იოკოძუნას საპატიო ტიტული მიიღოს, ამ ბაშოს მოგებაა. თანაც ისე, რომ მინიმუმ 13 გამარჯვება უნდა ქონდეს აქტივში. ამიტომ, დღევანდელი მარცხი არანაირად არ იჯდა მის გეგმებში.
უდანაკარგოდ აგრძელებენ ტურნირზე ასპარეზობას კაკურიუს თანამემამულე იოკოძუნები, ჰარუმაფუჯი და ჰაკუჰო. ამ უკანასკნელს დღეს 29 წელი შეუსრულდა და საკუთარ თავს საჩუქარი იაპონელთა ახალი იმედის, ენდოს ძლევით გაუკეთა.
ჰარუ ბაშო ტრადიციულად 15 დღეს გასტანს და 23 მარტს დასრულდება.
ამირან ურუშაძე
მზადება ჰარუ ბაშოსთვის
მოახლოებული ჰარუ ბაშოსთვის ქართველ სუმოისტებთან ერთად აქტიურ მზადებას გადიან სხვა რიკიშებიც. აღნიშნული მზადების პროცესში სუმოისტები ყოველდღიურად ათობით სპარინგ-ორთაბრძოლას ატარებენ.
სამწუხაროდ, უცხოურ პრესაში ჩვენებურთა სპარინგებზე ინფორმაცია არ გავრცელებულა. სამაგიეროდ, ბევრი დაიწერა მათ შესახებ, ვინც ლიდერთა შორის მოიაზრება.
ტრავმის გამო გამოტოვებული იანვრის ბაშოს შემდეგ, აქტიურად ემზადება მონღოლი იოკოძუნა ჰარუმაფუჯი. “მზიურმა ცხენმა” გუშინ ჯურიოს ბინადარ სოტაირიუსთან 8 შერკინება ჩაატარა და 7-ჯერ სძლია. მანამდე ჰარუმაფუჯი თანამემამულე ოძეკი კაკურიუს შეებრძოლა 10-ჯერ და აქედან 8-ში დამარცხდა. როგორც ჩანს, კაკურიუსთვის ცუნატორის (იოკოძუნობის კანდიდატი) სტატუსის მინიჭებამ ძალიან კარგად იმოქმედა და ახალი ძალა შემატა. ამას მოწმობს მისი შემდგომი სპარინგები, იაპონელ ექს-სეკივაკე ამინიშიკისთან, მონღოლ ტერუნოფუჯისთან და იაპონელ ტაკარაფუჯისთან. ხსენებულ სამეულთან ჩატარებული 19 შეხვედრიდან კაკურიუმ 18 მოიგო.
შთამბეჭდავ ფორმაშია, როგორც ჩანს, მონღოლი იოკოძუნა ჰაკუჰოც. “თეთრმა ფენიქსმა” ჯერ იყო და იაპონელ კომუსუბი ტოიონოშიმას 10-დან 10 შერკინება მოუგო, მერე კი იაპონელთა ამომავალ ვარსკვლავს, პირველ მაეგაშირად განთესილ ენდოს ასევე მშრალად, 11-ივე ორთაბრძოლაში სძლია. სხვათა შორის, ენდომ ჰაკუჰომდე სპარინგ-პარტნიორობა ზემოთ მოხსენიებულ კაკურიუს გაუწია. მათ შორის გამართული 20-ივე (!!!) ორთაბრძოლა მონღოლი ცუნატორის სასარგებლოდ დასრულდა. როგორც ჩანს, ენდოს საკმაოდ გაუჭირდება ამ ბაშოზე პირველი მაეგაშირას სტატუსის დაცვა.
ჰარუ ბაშო, რომელსაც ქალაქი ოსაკა მასპინძლობს, სტარტს კვირას, 9 მარტს აიღებს და ტრადიციულად 15 დღეს გასტანს. ხვალ კი ტურნირის სასტარტო შერკინებათა განრიგი გამოქვეყნდება და თქვენი მონა-მორჩილიც აუცილებლად შეგატყობინებთ ქართველი სუმოისტების პირველ მეტოქეთა ვინაობას.
ამირან ურუშაძე
ხვალ დიდი სუმო იწყება
ხვალიდან 15 დღის მანძილზე სუმოს გულშემატკივრებს მოწყენის საშუალება ნამდვილად აღარ გვექნება, რადგან იანვრის (ჰაცუ) ბაშო იღებს სტარტს. წლის პირველ სუპერტურნირს ტრადიციულად ტოკიოს რიოგოკუ კოკუგიკანი უმასპინძლებს.
საბოლოოდ გადაწყდა, რომ ამ ბაშოზე მონაწილეობას არ მიიღებს ჩვენი ლევან გორგაძე, რათა კარგად დაისვენოს და ბოლომდე აღიდგინოს ტრავმირებული კუნთოვანი ქსოვილები. ეს რჩევა ტოჩინოშინს პირადმა ექიმმა და კლუბის პრეზიდენტმა, ოიაკატა კასუგანომ მისცეს, იმისთვის რომ ტრავმის განმეორების შანსი ბოლომდე გამორიცხონ.
რაც შეეხება ჩვენს მეორე სუმოისტს, გაგამარუს, იგი როგორც იცით, აღმოსავლეთის მე-12 მაეგაშირად გახლავთ განთესილი და თავის პირველ ორთაბრძოლას დასავლეთის მე-11 მაეგაშირა, იაპონელ იოშიკაძესთან გამართავს. გაგა ჯუღელი ტანმორჩილ იაპონელს აქამდე ზუსტად 10-ჯერ გადაეყარა დოჰიოზე და აქედან 4-ჯერ დაამარცხა.
ჰაცუ ბაშოს გამოტოვება მოუწევს მოქმედ ჩემპიონს, მონღოლ იოკოძუნა ჰარუმაფუჯის. “მზიურ ცხენს” ტკივილი აწუხებს ტერფის არეში, რის გამოც მას ბაშოსწინა ვარჯიშებისა და სპარინგების გამოტოვებაც მოუხდა. ჰარუმაფუჯის მარცხენა ფეხი დეკემბრის მეორე ნახევარში, ერთ-ერთ ვარჯიშზე გადაუბრუნდა, რამაც მისი ტერფის მყესების ნაწილობრივი დაზიანება გამოიწვია. შედეგად ამისა, მონღოლ იოკოძუნას ტელეეკრანიდან მოუწევს ბაშოსთვის თვალყურის მიდევნება.
პრეცედენტი იოკოძუნას მხრიდან ბაშოს გამოტოვებისა ბოლოს დაახლოებით 5 წლის წინ მოხდა – 2008 წლის ნოემბრის ბაშოზე იოკოძუნა ასაშორიუ დისკვალიფიკაციის გამო არ დაუშვეს.
იანვრის ტურნირზე ვერ მიიღებენ მონაწილეობას აგრეთვე იაპონელი მე-7 მაეგაშირა ჰომაშო და იაპონელი მე-17 მაეგაშირა კოტოიუკი. ჰომაშომ დაახლოებით 1 კვირის წინ აპენდიციტის ოპერაცია გაიკეთა, ხოლო კოტოიუკიმ ნოემბრის ბაშოზე ძალიან მძიმე ტრავმა მიიღო და ჯერ-ჯერობით კვლავ მკურნალობს.
კოტოიუკის თანაგუნდელი იაპონელი ოძეკი კოტოშოგიკუ ბაშოს კადობანში ჩაყენებული ხვდება, რაც იმას ნიშნავს, რომ ოძეკის ტიტულის შესანარჩუნებლად “ღიპმაისტერს” უცილობელი კაჩი-კოში (დადებითი ბალანსი) ჭირდება. კოტოშოგიკუმ წინა ბაშო მე-2 ტურში მიღებული ტრავმის გამო ნაადრევად შეწყვიტა და ამის გამო აღმოჩნდა იგი კადობანში. კადობანიდან კი თავის დაღწევა ვერ მოახერხა კიდევ ერთმა მათმა თანაგუნდელმა, ბულგარელმა კოტოოშუმ, რომელმაც ასევე ტრავმის გამო ნაადრევად შეწყვიტა უკანასკნელი ბაშო და 8-წლიანი ტარების შემდეგ ოძეკის ტიტულს დაემშვიდობა. კოტოოშუ სეკივაკეს წოდებით დაიწყებს ჰაცუ ბაშოს და დებულების თანახმად, თუკი მინიმუმ ათ ორთაბრძოლას მოიგებს ამ ტურნირზე, პრესტიჟულ ტიტულს კვლავ დაიბრუნებს.
მნიშვნელოვანი გამოწვევის წინაშე დგას იაპონელი ოძეკი კისენოსატოც. სტაბილურად მაღალ დონეზე ჩატარებული ბოლო რამდენიმე ბაშოს შემდეგ (განსაკუთრებით კარგად ნოემბერში გამოვიდა კისე), იაპონური სუმოს მამებმა მას ცუნატორის (იოკოძუნობის პრეტენდენტი) სტატუსი მისცეს. მის წინაშე წაყენებული პირობა ასეთია: იმ შემთხვევაში, თუ კისენოსატო გახდება ჰაცუ ბაშოს ჩემპიონი, ისე რომ მოიგოს მინიმუმ 13 ორთაბრძოლა, მაშინ მას იოკოძუნას ესოდენ ნანატრ ტიტულს მიანიჭებენ.
სუმოს მამები ჯერ-ჯერობით არაფერს ამბობენ, რა იქნება იმ შემთხვევაში, თუ კისენოსატო 14 შერკინებას მოიგებს, მაგრამ ჩემპიონი მაინც ვერ გახდება, ან თუ ჩემპიონი გახდება, მაგრამ 2-ზე მეტ მარცხს იწვნევს, ანუ 13 მოგებას ვერ მიითვლის.
მოკლედ, წინ ძალიან საინტერესო ბატალიები და დაძაბული ბაშო გველის!
ჩვენ კი წარმატება ვუსურვოთ ჩვენს გაგამარუს!
გაგას კაჩი-კოში და საუცხოო ფინალის მოლოდინი
ქართველმა სუმოისტმა, გაგა ჯუღელმა ნოემბრის ბაშოს დასრულებამდე 1 ტურით ადრე მე-8 გამარჯვება მოიპოვა და კაჩი-კოში, იგივე დადებითი ბალანსი გაიფორმა. მართალია, ჩვენ გოლიათს საკმაოდ გაუჭირდა კორეელი მე-4 მაეგაშირა, ტოჩინოვაკას ძლევა, თუმცა ბოლომდე შეუპოვრად იბრძოლა და მიზანსაც მიაღწია.
შერკინების სტარტზე კორეელმა ტაჩიაი-ჰენკა, ანუ სასტარტო ჯახისთვის თავის არიდება და განზე გადგომა იკადრა და ამით სცადა ჩვენებურთან ფონს გასვლა. თუმცა, გაგამარუ მეტოქის ამ ფანდს მომზადებული შეხვდა და წონასწორობა დიდად არ დაუკარგავს.
ამის შემდეგ ჩვენმა გოლიათმა ცუპარებით დაიწყო ბრძოლა, კორეელი კი ძირითადად თავს იცავდა და ისევ სხვადასხვა ფანდებით ცდილობდა თავის გადარჩენას. საბოლოოდ გაგამ ოშიდაშით დაატოვებინა კორეელს დოჰიო და რეიტინგში წინსვლა გაინაღდა.
ბაშოს ბოლო დღეს ჩვენებურს ძალიან სერიოზული მეტოქე ყავს, აიპონელი 1-ლი მაეგაშირა, მიოგირიუს სახით, რომელსაც 7-7 აქვს ბალანსი და ხვალ უცილობელი გამარჯვება ესაჭიროება კაჩი-კოშითვის. გაგას აქამდე 4-ჯერ მოუწია იაპონელთან შერკინება და აქედან 3-ჯერ მარცხი განიცადა.
საუცხოო ფინალი გველის ხვალ კიუშუ ბაშოზე – იმპერატორის თასს მონღოლ იოკოძუნათაგან ერთ-ერთი ჩაიბარებს. საინტერესოა, ჰაკუჰოს 28-ე თუ ჰარუმაფუჯის მე-6 ტრიუმფს ვიხილავთ ფუკუოკაში?
როგორც არ უნდა დასრულდეს ხვალიდნელი დღე, ერთ რამ ცხადია: ერთ-ერთი ყველაზე დაძაბული, საინტერესო და სანახაობრივი ბაშო გამოდგა, ბოლო რამოდენიმე წლის მანძილზე.
დღეს კი საოცარი ორთაბრძოლა შედგა იოკოძუნა ჰაკუჰოსა და ოძეკი კისენოსატოს შორის. იაპონელმა ოძეკიმ “მზიური ცხენის” ძლევის შემდეგ, არც მეორე იოკოძუნა დაინდო და “თეთრი ფენიქსიც” დაამარცხა.
ორთაბრძოლას წინ უძღვოდა საოცრად მკაცრი, დაგეშილი და განმგმირავი მზერა მეტოქეთა მხრიდან – მათ ლამის თვალებით შეჭამეს ერთმანეთი, ჯერ კიდევ ბრძოლის დაწყებამდე.
შერკინებისთანავე კისენოსატომ მარჯვენამხრიანი დგომა მოიპოვა, ჰაკუჰომ კი მარცხენა ხელით ჩაავლო იაპონელს იღლიის ქვემოდან, მავაშიში. ინიციატივა კისემ გამოიჩინა პირველმა და იოკოძუნას ტავარასკენ (დოჰიოს ხაზი) მიაწვა. ამ დროს ჰაკუჰომ მეტოქე შემოატრიალა და მარცხენა ხელით შიტატენაგეს შესრულება წამოიწყო. თუმცა, კისეს უფრო მაგრად ქონდა მონღოლის მავაში მარჯვენა ხელით დაჭერილი და საპასუხო გდება, უვატენაგე განახორციელა. პუბლიკა აღტაცებაში მოვიდა, ჰაკუჰომ კი პირველი მარცხი იწვნია ბაშოზე.
დღის დასკვნით ორთაბრძოლაში ჰარუმაფუჯიმ უპრობლემოდ სძლია თანამემამულე ოძეკი კაკურიუს და ბალანსით ჰაკუჰოს გაუთანაბრდა (13-1). კისენოსატოს კი 12 მოგება აქვს, 2 მარცხი წილ და ხვალინდელ ბრძოლაში კაკურიუ რომც დაამარცხოს, ჩემპიონობის შანსი მაინც დაკარგული აქვს, რადგან ხვალ სწორედ ერთნაირბალანსიანი მონღოლი იოკოძუნები ერკინებიან ერთმანეთს და მათგან რომელიმეს აუცილებლად 14 მოგება მოუგროვდება.
ასეთ დაძაბულ და სანახაობრივ ფინალს ალბათ არავინ ელოდა.
გაგამარუ კაჩი-კოშს მიუახლოვდა
ძალიან მნიშვნელოვანი, ძალიან საჭირო და ძალიან რთული ორთაბრძოლა მოიგო დღეს გაგამარუმ, ძალიან ძლიერ და მისთვის უხერხულ მეტოქესთან!
34 წლის მონღოლ მე-10 მაეგაშირა ტოკიტენკუს ჩვენი გოლიათი აქამდე 10-ჯერ შეხვედროდა დოჰიოზე და აქედან 8 შემთხვევაში მარცხი ქონდა განცდილი. ჩვენებურის მდგომარეობას მონღოლთან შერკინების წინ ისიც ართულებდა, რომ ტოკიტენკუს 7 წაგება უკვე ქონდა მიმდინარე ბაშოზე და გაგასთან დამარცხების შემთხვევაში, მაკე-კოში (უარყოფითი ბალანსი) გაუფრომდებოდა.
ჩვენდა სასაიხარულოდ უნდა ითქვას, რომ გაგამარუ ძალიან მობილიზებული გამოვიდა დოჰიოზე და ცბიერი ფანდებით ცნობილ მონღოლს არანაირი შანსი არ დაუტოვა. ქართველმა გოლიათმა ვეტერანი ტოკიტენკუ ერთი ამოსუნთქვით გაიყვანა დოჰიოდან (ოშიდაშით) და რიგით მე-7 გამარჯვება ჩაიწერა ნოემბრის ბაშოზე, პასივში კი ისევ 6 მარცხი დაიტოვა.
ამრიგად, მე-13 მაეგაშირად განთესილ გაგა ჯუღელს დადებითი ბალანსის მოსაპოვებლად დარჩენილი 2 ბრძოლიდან ერთის მოგებაც ყოფნის. თუმცა, ორივეს მოგების შემთხვევაში, რეიტინგში უფრო გვარიანად დაწინაურდება და სახიფათო ზონასაც თავს დააღწევს.
ჩვენი გოლიათი კაჩი-კოშის გაფორმებას ხვალ ლევან გორგაძის თანაგუნდელ, ტოჩინოვაკასთან შეეცდება, რომელიც წარმოშობით კორეელი გახლავთ. მე-4 მაეგაშირად განთესილ კორეელს კიუშუ ბაშოზე საკმაოდ ცუდად მისდის საქმეები – 13 ორთაბრძოლიდან 10 უკვე წაგებული აქვს და რეიტინგში საგრძნობ ვარდნასაც ვეღარ აცდება. ურთიერთშეხვედრებში მცირე უპირატესობას გაგამარუ ფლობს ტოჩინოვაკასთან – აქამდე ჩატარებული 5 შერკინებიდან 3 ჩვენებურის სასარგებლოდ დასრულდა.
ბაშოს დასრულებამდე 2 ტურით ადრე კი ლიდერთა შორის მდგომარეობა კიდევ უფრო დაიძაბა. პირველი მარცხი იწვნია დღეს მონღოლმა იოკოძუნა ჰარუმაფუჯიმ და თანამემაულე იოკოძუნა ჰაკუჰოს ერთპიროვნულად გალიდერების საშუალება მისცა. “მზიურ ცხენს” იაპონელმა ოძეკი კისენოსატომ სძლია (იორიკირით), რომელიც ასევე ინარჩუნებს ტურნირზე ჩემპიონობის შანსს. მას ამ დროისთვის 11 მოგება აქვს, 2 მარცხის წილ და მხოლოდ ზემოთ ნახსენებ იოკოძუნათა დუეტს ჩამორჩება. “თეთრმა ფენიქსმა” კი, თავის მხრივ, თანამემაულე ოძეკი კაკურიუ დაამარცხა (ასევე იორიკირით) და 13 მოგებით ჩემპიონობის ყველაზე რეალურ პრეტენდენტად რჩება.
ძალიან ბევრ კითხვას გასცემს პასუხს ხვალინდელი შერკინება ჰაკუჰოსა და კისენოსატოს შორის. ასევე ძალიან დიდ მნიშვნელობას ატარებს მონღოლური ჯახი, კაკურიუსა და ჰარუმაფუჯის მონაწილეობით (განსაკუთრებით ამ უკანასკნელისთვის).
ბაშოს დასკვნით დღეს (სენშურაკუ) ერთმანეთის პირისპირ მონღოლი იოკოძუნები დადგებიან და თუკი ხვალ ორივე მათგანმა გამარჯვება იზეიმა, ალბათ ერთ-ერთი ყველაზე დრამატული ფინალი შედგება მათ შორის.
P.S. გამოთქვით თქვენი აზრი: ვინ გახდება კიუშუ ბაშოს ჩემპიონი?
გაგამ ნავსის გატეხა ვერ შეძლო
სამწუხაროდ, კვლავ გადაულახავი ბარიერი აღმოჩნდა იაპონელი ტაკარაფუჯი ჩვენი გაგასთვის. ქართველმა გოლიათმა, მიუხედავად იმისა, რომ მცდელობა არ დააკლო, მაინც მარცხი იწვნია მე-8 მაეგაშირად განთესილ იაპონელთან.
ორთაბრძოლა, რომელიც 9 წამი გრძელდებოდა, გარდამავალი უპირატესობით წარიმართა – ინიციატივას ხან გაგამარუ ფლობდა, ხანაც ტაკარაფუჯი. საბოლოოდ, გაგამ იაპონელის წამოწყებულ შიტატენაგეს ვერაფერი დაუპირისპირა და დოჰიოს ხელებით შეეხო, რაც მას რიგით მე-6 წაგებად დაუჯდა მიმდინარე ბაშოზე. აქტივში კი ისევ 5 მოგება დარჩა.
ჩვენი გოლიათის მომდევნო მეტოქე იაპონელი მე-12 მაეგაშირა, ფუჯიაძუმა იქნება, რომელთანაც ურთიერთშეხვედრების შესაშური ბალანსი აქვს გაგას – 5:0. რაც შეეხება იაპონელის პირად მონაგარს კიუშუ ბაშოზე, იგი 7 მოგებასა და 4 მარცხს ითვლის.
სატურნირო ცხრილის სათავეში აბსოლუტურად უცვლელი მდგომარეობაა, რადგან ლიდერთა შორის მყოფმა ხუთივე სუმოისტმა გამარჯვება იზეიმა დღეს. ამრიგად, 11-11 მოგებით კვლავაც დაუმარცხებლად აგრძლებენ სვლას მონღოლი იოკოძუნები, ჰაკუჰო და ჰარუმაფუჯი. პელეტონის მეორე პოზიციაზე 9-9 მოგებით ისევ სამი სუმოისტი იმყოფება: იაპონელი ოძეკი კისენოსატო, მონღოლი ოძეკი კაკურიუ და იაპონელი მე-6 მაეგაშირა ჩიოტაირიუ.
როგოც ჩანს, ძალიან საინტერესო და დაძაბული ფინიში გველის ბაშოზე.
გაგამარუს გამარჯვება ხელიდან გამოსტაცეს
ორი შერკინება გახდა გუშინ საჭირო, ჩვენ გაგამარუსა და მონღოლ ტამავაშის შორის, გამარჯვებულის გამოსავლენად. პირველ შემთხვევაში, როდესაც გაგამ მონღოლი მე-11 მაეგაშირა გულდაღმა დასცა დოჰიოზე, მთავარმა მსაჯმა გამარჯვება ჩვენებურს მიაკუთვნა. თუმცა, როგორც ჩანს, ამ ილეთის შესრულების დროს, ქართველ გოლიათს დოჰიოს ხაზს მიღმა დაედგა ფეხი და გვერდითმა მსაჯებმა მონოი (კონსილიუმი) მოითხოვეს, რომლის შედეგადაც განმეორებითი შერკინების გამართვა გადაწყვიტეს.
რემატჩის დროს გაგამარუ უკვე დაღლილი ჩანდა, რითაც კარგად ისარგებლა ტამავაშიმ, კორპუსში ჭკვიანურად შევიდა ჩვენებურთან და იორკირით გაიყვანა დოჰიოდან.
ამ დამარცხებით გაგა ჯუღელის ბალანსი კიდევ ერთხელ განულდა კიუშუ ბაშოზე (5-5). მისი მომდევნო მეტოქე იაპონელი მე-8 მაეგაშირა, ტაკარაფუჯი იქნება, რომელსაც ასევე 5-5 მოგება-წაგება აქვს ფუკუოკაში. აქამდე ჩატარებულ 2 შერკინებაში კი ორივეჯერ გამარჯვება იაპონელს დარჩა. თუმცა, სრული პასუხისმგებლობით მინდა გითხრათ, რომ ტაკარაფუჯი ნამდვილად არ განეკუთვნება გაგასთვის დაუმარცხებელ და უხერხულ მეტოქეთა რიცხვს. ამიტომ იმედი ვიქონიოთ, რომ შეძლებს დღეს ჩვენი გოლიათი იაპონელის ძლევას.
ნოემბრის ბაშოს დასრულებამდე 5 ტურით ადრე კვლავ წაუგებლად, 10-10 მოგებით ლიდერობენ ტურნირს მონღოლი იოკოძუნები, ჰაკუჰო და ჰარუმაფუჯი. ასეთ შემთხვევას კი საერთოდ არ ქონია ადგილი მას შემდეგ, რაც ეს ორი სუმოისტი ერთდროულად ატარებს იოკოძუნას ტიტულს (ანუ 2012 წლის ნოემბრიდან).
ლიდერებს 8-8 მოგებით კვალში 3 სეკიტორი უდგას: იაპონელი ოძეკი კისენოსატო, მონღოლი ოძეკი კაკურიუ და იაპონელი მე-6 მაეგაშირა ჩიოტაირიუ.
ყველაფერი კი იქეთ მიდის, რომ იმპერატორის თასი ისევ მონღოლ იოკოძუნებს შორის გათამაშდება. საინტერესოა, შეძლებს კი ჰარუმაფუჯი ჰაკუჰოს ჰეგემონიის დამხობას?
გაგამ ბალანსი კვლავ გაათანაბრა
კიუშუ ბაშოს ნაკაბიზე ბალანსი კიდევ ერთხელ გაანულა ჩვენმა გაგამარუმ. ქართველმა გოლიათმა ლიდერთა შორის მყოფ მონღოლ მე-15 მაეგაშირა შოტენროს ჰატაკიკომით სძლია.
შერკინების სტარტზე გაგამ მძლავრი მჯიღი უთავაზა მონღოლ მეტოქეს და უკან დაახევინა, შემდეგ კეფაზე მარჯვენა ხელი მოავლო, თავისკენ დაქაჩა და გულდაღმა დოჰიოზე დაანარცხა.
გაგა ჯუღელისთვის ეს მე-4 გამარჯვება გახლდათ, 4 მარცხის საპირისპიროდ და როგორც უკვე გითხარით, კიდევ ერთხელ გავიდა იგი ნულოვან ბალანსზე.
ჩვენებურის მომდევნო მეტოქე კიდევ ერთი მონღოლი, ჯურიოს დივიზიონში პირველ ნომრად განთესილი კაგამიო იქნება, რომელსაც ამ დროისთვის 5 მოგება და 3 მარცხი აქვს ბაშოზე. გაგა და კაგამიო აქამდე ერთმანეთს დოჰიოზე მხოლოდ ერთხელ, შორეულ 2008 წელში შეხვედრიან, როდესაც ისინი მაკუშიტას (რანგით მე-3) დივიზიონში გამოდიოდნენ და მაშინ მონღოლმა ოშიდაშით იმარჯვა. მას შემდეგ ჩვენმა გოლიათმა მაკუუჩიც დააჭაშნიკა (07.2010) და სანიაკუსაც გაუსინჯა გემო, კომუსუბის წოდების რანგში (03.2012), მონღოლმა კი მხოლოდ ამა წლის დასაწყისში შეძლო ჯურიოში გადმოსვლა და უკვე მე-6 ტურნირს ატარებს ელიტარული სუმოს მე-2 დივიზიონში.
ნოემბრის ბაშოს კვლავ წაუგებლად ლიდერობენ მონღოლი იოკოძუნები, ჰაკუჰო და ჰარუმაფუჯი. მათი მდევრების რიცხვი კი დღეს ერთბაშად 4-დან 1-მდე შემცირდა და ის სუმოისტი, რომელიც 7 მოგებითა და 1 მარცხით მათ კვალში უდგას, გახლავთ ჩვენი ტოჩინოშინის თანაგუნდელი, ბულგარელი მე-5 მაეგაშირა აოიიამა.
6 მოგება და 2 მარცხი გააჩნია ერთბაშად შვიდ სუმოისტს, რომელთაგან განსაკუთრებულ ყურადღებას იაპონელი ოძეკი კისენოსატო, მონღოლი ოძეკი კაკურიუ და იაპონელი სეკივაკე გოეიდო იმსახურებენ. მე-8 ტურში განსაკუთრებით საინტერესო სწორედ კისენოსატოსა და გოეიდოს შერკინება აღმოჩნდა, სადაც იაპონელმა სეკივაკემ მასზე კლასითა და რანგით უფრო მაღლა მდგომი ოძეკი კუბინაგეს ულამაზესი ილეთით დაანარცხა დოჰიოზე.
კიუშუ ბაშო ტრადიციულად 15 დღეს გასტანს და 24 ნოემბერს დასრულდება.
გაგას მარცხისა და ოძეკთა შავი დღე ბაშოზე
ფუკუოკაში მიმდინარე ნოემბრის ბაშოზე 3 დღე მიილია. ქართველ სუმოისტ, გაგა ჯუღელს, გამარჯვებით აღებული სტარტის შემდეგ, ზედიზედ ორი მარცხი შეემთხვა. არადა, დღეს ჩვენმა გოლიათმა მაგრად იომა, ამ სიტყვის პირდაპირი გაგებით, იაპონელ მე-10 მაეგაშირა, კოტოიუკისთან, თუმცა ბოლოს მაინც მარცხი იწვნია.
ბრძოლა ძირითადად მძლავრი ცუპარებით წარიმართა ორივე სუმოისტის მხრიდან და საბოლოოდ იაპონელმა ოშიდაშით დაატოვებინა დოჰიო ჩვენებურს.
3 ტურის თავზე გაგამარუს 1 მოგება და 2 მარცხი მოუგროვდა ბაშოზე. მისი მომდევნო მეტოქე ორ ცენტნერიანი იაპონელი გოლიათი, მე-9 მაეგაშირად განთესილი, სადანოფუჯი იქნება, რომელსაც გაგას დარი ბალანსი (1-2) აქვს ტურნირზე. ურთიერთშეხვედრებში არცთუ კარგი ისტორია აქვს ჩვენ გოლიათს იაპონელთან – 7 შერკინებიდან მხოლოდ 2 დასრულდა გაგას სასარგებლოდ.
კიუშუ ბაშოს მე-3 ტური შავ დღედ შეიძლება ჩაიწეროს ოძეკებისათვის, რადგან ოთხივე მათგანმა მარცხი განიცადა ერთდროულად. უფრო სწორად თუ ვიტყვით, სამმა ოძეკიმ მარცხი იწვნია, ხოლო მეოთხე ტრავმის გამო ვერ გამოცხადდა დოჰიოზე და ბუნებრივია, მასაც მარცხი ჩაეთვალა.
მივყვეთ თანმიმდევრობით: ფუკუოკელ ოძეკი კოტოშოგიკუს მე-2 ტურში ასევე ფუკუოკელი კომუსუბი შოჰოძანის ძლევა ძალზე ძვირად დაუჯდა – მან მკერდის დიდი კუნთი გაიწყვიტა და არა მარტო ამ ბაშოს, შესაძლოა მომდევნო ბაშოს გამოტოვებაც მოუხდეს, რადგან ექიმების პროგნოზით აღნიშნული ტრავმის მორჩენას 3 თვემდე პერიოდი დაჭირდება. თუ მართლა ასე მოხდა, კოტოშოგიკუს ოძეკის წოდებასთან გამოთხოვება მოუწევს.
ოძეკის წოდებასთან გამომშვიდობების საფრთხის წინაშე დადგა დღეს კიდევ ერთი ოძეკი, ბულგარელი კოტოოშუ, რომელიც კოტოშოგიკუს თანაგუნდელი გახლავთ სადოგატაკეს სკოლიდან. ბულგარელმა ოძეკიმ მარცხენა მხარი დაიზიანა დღეს და სხვათა შორის, მის ტრავმაშიც კომუსუბი შოჰოძანმა დაიდო ცოდვა. მშობლიური კედლებით გაგულისებულმა კომუსუბიმ იორიტაოშით გადაუშვა დარბაზში კოტოოშუ და მძიმე ტრავმა მიაყენა მხარზე. ჯერ-ჯერობით უცნობია, შეძლებს თუ არა ასპარეზობის გაგრძელებას ბულგარელი. ხოლო თუკი ვერ შეძლო, მაშინ მას ნამდვილად მოუწევს საპატიო ტიტულთან გამოთხოვება, რადგან წინა ბაშო ასევე ტრავმის გამო ნაადრევად შეწყვიტა, მაშინ როცა მხოლოდ 4 გამარჯვება ქონდა აქტივში და საბოლოოდ მაკე-კოში (უარყოფითი ბალანსი) დაუფიქსირდა. შედეგად კოტოოშუ კადობანში ჩაყენებული აღმოჩნდა, რაც იმას ნიშნავს, რომ ტიტულის დასაცავად მას უცილობელი კაჩი-კოში ესაჭიროება ამ ბაშოზე. სავარაუდოდ ხვალ უკვე გვეცოდინება მისი ტრავმის სიმძიმე და გავიგებთ, მოახერხებს თუ არა ბრძოლის გაგრძელებას.
პირველი მარცხი განიცადა ბაშოზე იაპონელთა იმედად მიჩნეულმა, ოძეკი კისენოსატომ, რომელსაც პირველ მაეგაშირად განთესილმა, 35 წლის ვეტერანმა თანამემამულე ამინიშიკიმ სძლია, კომატასუკუის ილეთით.
მეორე მარცხი შეემთხვა მონღოლ ოძეკი კაკურიუს. კომუსუბი ოკინოუმის შემდეგ, მისი ძლევა სეკივაკე გოეიდომაც შეძლო. ეს უკანასკნელი კი მონღოლ იოკოძუნებთან (ჰაკუჰო, ჰარუმაფუჯი) და კიდევ 4 რიგით მაეგაშირასთან ერთად უდანაკარგოდ მიმავალ ლიდერთა ჯგუფშია.
ასე რომ, წინ კიდევ ძალიან ბევრი საინტერესო და უკომპრომისო პაექრობა გველის ბაშოზე.
გაგას ჩაგდებული ბაშო და ჰაკუჰოს მორიგი ტრიუმფი
მონღოლი იოკოძუნა ჰაკუჰოს 27-ე ტრიუმფით დასრულდა ტოკიოს რიოგოკუ კოკუგიკანში აკი ბაშოდ წოდებული წლის რიგით მე-5 სუპერტურნირი სუმოში. “თეთრმა ფენიქსმა” ჯერ კიდევ ბოლოსწინა (მე-14) ტურში გაიფორმა ოფიციალურად ჩემპიონობა, თუმცა ბაშოს ბოლო დღეს მაინც მოტივირებული გამოვიდა დოჰიოზე, თანამემამულე იოკოძუნა ჰარუმაფუჯის წინააღმდეგ და 14 მოგებით დაასრულა სექტემბრის ტურნირი.
ჰაკუჰო “მზიურ ცხენს” თავიდანვე მთელი ძალით ეკვეთა, კარგად დაიჭირა კორპუსით და კოტენაგეს მოხდენილი გდებით დოჰიოზე დასცა. შედეგად, ჰარუმაფუჯიმ მე-5 მარცხი მიითვალა ბაშოზე, ბოლო 4 ტურნირზე კი საერთო ჯამში 20 წაგება მოუგროვდა, რაც იოკოძუნას ტიტულის მფლობელისათვის ზედმეტად ბევრია. არაა გამორიცხული, რომ 29 წლის მონღოლმა ძალიან მალე მიიღოს სუმოს მამებისაგან დიდი სუმოდან წასვლის “რეკომენდაცია”, რომელიც ფაქტიურად სავალდებულო მოთხოვნის ტოლფასია და სუმოისტი ვალდებულია უსიტყვოდ დაემორჩილოს მას.
რაც შეეხება “თეთრ ფენიქსს”, მან წლეულს მიჯრით მე-4 ბაშო მოიგო, საერთო ჩემპიონობათა რიცხვი 27-მდე გაზარდა და ნელ-ნელა უახლოვდება ლეგენდარული იოკოძუნა ტაიჰოს აბსოლუტურ რეკორდს, რომელიც 32 საჩემპიონო ტიტულს ითვლის.
დაჯილოდვების ცერემონიალზე ჰაკუჰომ პირველ რიგში იაპონელებს 2020 წლის ოლიმპიადაზე განაცხადებში ტოკიოს გამარჯვება მიულოცა და გამოტყდა, რომ ოცნებობს თავისი კარიერის სწორედ ამ დრომდე გაგრძელებაზე. მან ისიც აღნიშნა, რომ 45 წლის წინ მეხიკოს ოლიმპიურ თამაშებზე მისმა მამამ ვერცხლის მედალი აიღო.
სამწუხაროდ, მარცხით დაასრულა აკი ბაშოზე გამოსვლა ქართველმა გოლიათმა, გაგა ჯუღელმა. გაგამარუმ თავისი ბოლო შერკინება მისთვის ერთ-ერთ ყველაზე უხერხულ მეტოქე, იაპონელ ჰომაშოსთან (დ-მ13) დათმო იორიკირით და საბოლოოდ 9 წაგება მიითვალა ბაშოზე (6 მოგების საპირისპიროდ), რაც მე-9 მაეგაშირას სტატუსის სეკიტორისთვის საკმაოდ ცუდი შედეგია.
აღნიშნული რეზულტატი დაახლოებით 2-დან 4 საფეხურამდე დააქვეითებს გაგას მომდევნო ბაშოსთვის რეიტინგში, რომელიც ოფიციალურად 28 ოქტომბერს გამოქვეყნდება.
რაც შეეხება ჩვენს მეორე სეკიტორს, ლევან გორგაძეს, იგივე ტოჩინოშინს, მან როგორც იცით, ივლისის ბაშოზე მიღებული ტრავმის გამო სექტემბრის ტურნირი, რომელზეც ჯურიოს დივიზიონის პირველ ნომრად იყო განთესილი, სრულად გამოტოვა. მოგეხსენებათ, გამოტოვებული ორთაბრძოლები სუმოში წაგების ტოლფასად ითვლება და შესაბამისად, ლევანს მკვეთრად დააქვეითებენ მომდევნო ბაშოსთვისაც. თუმცა, შესაძლებელია, რომ დივიზიონი მაინც არ დაატოვებინონ და ჯურიოს მე-14 ნომრის სტატუსი მიანიჭონ.
როგორც ჩვენთვის ცნობილია, ტოჩინოშინმა უკვე გაიკეთა ოპერაცია ტრავმირებულ მუხლზე და აღდგენითი პროცესი საკმაოდ ნორმალურად მიდის. სხვათა შორის, ლევანმა იძულებითი პაუზით ისარგებლა და მუხლთან ერთად ოპერაცია ნატკენ იდაყვზეც გაიკეთა, რომელიც ქრონიკულად აწუხებდა ბოლო წლებში. მისი სრულად გამოჯანმრთელების ზუსტი ვადა ჯერ-ჯერობით უცნობია, თუმცა თუ ყველაფერი კარგად იქნა, სავარაუდოდ იანვრის ბაშოსთვის უნდა შეძლოს დოჰიოზე დაბრუნება.
სექტემბრის ბაშოს ვიცე-ჩემპიონები 11-11 მოგებით იაპონელი ოძეკი კისენოსატო და იაპონელი სეკივაკე გოიდო გახდნენ. ამ უკანასკნელმა ერთ-ერთი საუკეთესო ტურნირი ჩაატარა კარიერაში და ვიცე-ჩემპიონობასთან ერთად, ბრწყინვალე ასპარეზობისთვის დაწესებული სპეციალური პრიზი, შუკუნ-შოც დაიმსახურა.
აქვე გეტყვით, რომ მებრძოლი სულის გამოვლენისათვის დაწესებული პრიზი, კანტო-შო იაპონელმა პირველმა მაეგაშირა, შოჰოძანმა მიიღო, რომელმაც ტურნირზე 1 იოკოძუნა, 2 ოძეკი და თითო სეკივაკე-კომუსუბი დაამარცხა.
შოჰოძანი მომდევნო ბაშოზე კომუსუბის ტიტულით მოგვევლინება.
რაც შეეხება მესამე სპეციალურ პრიზს, გინო-შოს, რომელიც ტექნიკური ორთაბრძოლების ჩვენებისათვის გადაეცემათ სუმოისტებს, იგი ამჯერად გაუცემელი დარჩა.
წლის დასკვნითი სუპერტურნირი, რომელიც კიუშუ ბაშოს სახელითაა ცნობილი, ქალაქ ფუკუოკას საერთაშორისო ცენტრში 10-დან 24 ნოემბრის ჩათვლით გაიმართება.
გაგამ მაკე-კოში გაიფორმა, ჰაკუჰომ – ჩემპიონობა
ქართველმა გოლიათმა გაგა ჯუღელმა, სამწუხაროდ, ვერ შეძლო ჩვენი იმედების გამართლება, დადებით ბალანსზე გასვლასთან დაკავშირებით და ბაშოს დასრულებამდე 1 ტურით ადრე მაკე-კოში (უარყოფითი ბალანსი) გაიფორმა, რაც მე-9 მაეგაშირად განთესილ ჩვენებურს რეიტინგში კიდევ უფრო დააქვეითებს მომდევნო ტურნირისთვის.
აკი ბაშოს მე-14 ტურში გაგამარუ იაპონელ ტამაასუკასთან იორიკირით დამარცხდა. ჩვენმა გოლიათმა იაპონელი მე-15 მაეგაშირას მიძალებას ვერაფერი დაუპირისპირა და შერკინებიდან 6 წამში ტავარას (დოჰიოს ხაზი) მიღმა აღმოჩნდა. არადა, ტამაასუკა ნამდვილად არ განეკუთვნებოდა გაგასთვის უძლეველი ან უხერხული მეტოქეების რიცხვს, რაც კიდევ უფრო გულდასაწყვეტია.
თუ დღეს გაგა ბოლო შერკინებას მოგებას მაინც მოახერხებს, რეიტინგში უკუსვლა შედარებით მცირე ექნება. თუმცა, დღეს მას ერთ-ერთ ყველაზე უხერხულ მეტოქე, იაპონელ ჰომაშოსთან მოუწევს დაპირისპირება. დღემდე იაპონელთან გამართული 8 ორთაბრძოლიდან რვავე (!!!) წაგებული აქვს ჩვენებურს.
ამასობაში, იოკოძუნა ჰაკუჰომ ბაშოს დასრულებამდე 1 დღით ადრე ნაადრევად გაიფორმა ჩემპიონობა და დღეს უკვე ოფიციალურად, 27-ედ ჩაიბარებს იმპერატორის თასს! ამ მიღწევით იგი ნელ-ნელა უახლოვდება ლეგენდარული იოკოძუნების, ტაიჰოსა და ჩიონოფუჯის აბსოლუტურ რეკორდებს, რომელთაც შესაბამისად 32 და 31 ბაშო აქვთ კარიერაში მოგებული. მონღოლ იოკოძუნას კი, როგორც ჩანს, მათი რეკორდების დამხობა დაუსახავს მიზნად, რაც მისი ასაკიდან და სპორტული ფორმიდან გამომდინარე სავსებით რეალურად მოჩანს.
დღის ცენტარლურ პაექრობაში “თეთრმა ფენიქსმა” მისი უახლოესი მდევარი და საჩემპიონო რბოლაში უშუალო კონკურენტი, იაპონელი ოძეკი კისენოსატო ჰატაკიკომით დასცა დოჰიოზე და ყველა კითხვას საბოლოოდ გასცა პასუხი.
ჰაკუჰო: 13 მოგება, 1 მარცხი.
კისენოსატო, ჰარუმაფუჯი, გოეიდო: 10 მოგება, 4 მარცხი.
სექტემბრის ბაშო ოფიციალურად დღეს დასრულდება.
