“ბარსელონას” თავდამსხმელ ლუის სუარესს ბოლო პერიოდში არამხოლოდ გოლების გატანით მოჰყავს საზოგადოება აღფრთოვანებაში. ესპანეთის პრიმერადივიზიონის IV ტურში “ლეგანესის” წინააღმდეგ გამართულ მატჩში (5:1) ურუგვაელმა ფეხბურთელმა ნეიმარს ეფექტური გადაცემა გაუკეთა.
ჭდე: Neymar
ნეიმარს ჰოლივუდის ფილმში იღებენ (ვიდეო)
ბრაზილიის ნაკრებისა და “ბარსელონას” ლიდერ ნეიმარს ჰოლივუდის ფილმში იღებენ. ბრაზილიელი ფეხბურთელი ვინ დიზელის ფილმში – “Return of Xander Cage” – ერთ-ერთ როლს შეასრულებს.
გთავაზობთ ფილმის ოფიციალურ თრეილერს, რომელშიც ნეიმარის კადრიც არის შეტანილი.
ნეიმარმა ჯასტინ ბიბერის საფეხბურთო შესაძლებლობები შეამოწმა (ვიდეო)
“ბარსელონასა” და ბრაზილიის ნაკრების თავდამსხმელი ნეიმარი შვებულებას ამერიკის შეერთებულ შტატებში ატარებს. ბრაზილიელი ფეხბურთელი ცნობილ მომღერალ ჯასტინ ბიბერს ეწვია და მისი საფეხბურთო შესაძლებლობებიც შეამოწმა.
“ბარსელონა” ნეიმარს კოპა ამერიკაზე არ უშვებს
“ბარსელონა” წელს ამერიკის შეერთებულ შტატებში გასამართ კოპა ამერიკის ტურნირზე კლუბის ერთ-ერთი ლიდერის, ნეიმარის გაშვებას არ აპირებს.
Dream Team-ის ცნობით, კატალონიურ გუნდში შიშობენ, რომ ბრაზილიელი ფეხბურთელი ფიზიკურად გადაიღლება. სამაგიეროდ, “ბარსელონა” ნეიმარს ნებას რთავს, რომ აგვისტოში გასამართ რიოს ოლიმპიურ თამაშებზე მონაწილეობა მიიღოს. როგორც მოგეხსენებათ, ოლიმპიადაზე მონაწილე საფეხბურთო გუნდებს განაცხადში 23 წელზე უფროსი ასაკის სამი მოთამაშის შეყვანის უფლება აქვთ.
“ბარსელონას” პრეზიდენტი ხოსეპ მარია ბარტომეუ ფიქრობს, რომ ზაფხულში გასამართ ორივე ტურნირზე ნეიმარის თამაში შეუძლებელია.
კოპა ამერიკა 3 ივნისიდან 26 ივნისამდე პერიოდში გაიმართება. ბრაზილია B ჯგუფში ეკვადორის, ჰაიტისა და პერუს ნაკრებების წინააღმდეგ ითამაშებს.
ჩემპიონთა ლიგის ამ კვირის საუკეთესო მოთამაშეები დაასახელეს
უეფას ჩემპიონთა ლიგის ამ კვირის საუკეთესო ფეხბურთელად “ბარსელონას” თავდამსხმელი ნეიმარი დასახელდა. შეგახსენებთ, რომ კატალონიურმა გუნდმა “ნოუ კამპზე” ლონდონის “არსენალი” ანგარიშით 3:1 დაამარცხა, აქედან ერთი გოლი კი სწორედ ბრაზილიელმა ფეხბურთელმა გაიტანა.
გულშემატკივართა გამოკითხვის შედეგად, ნეიმარმა ხმათა 59 პროცენტი მოაგროვა და ჩამოიტოვა პოლ პოგბა (22%, “იუვენტუსი”), ანტუან გრიზმანი (10%, “ატლეტიკო”) და იაია ტურე (9%, “მანჩესტერ სიტი”).
მესიმ, სუარესმა და ნეიმარმა მიმდინარე სეზონში ერთად 100 გოლი გაიტანეს
ესპანეთის პრიმერადივიზიონის 28-ე ტურში “ბარსელონამ” “ეიბარი” ანგარიშით 4:0 გაანადგურა.
კატალონიური გუნდის თავდამსხმელებმა ლიონელ მესიმ, ლუის სუარესმა და ნეიმარმა მიმდინარე სეზონში ერთობლივად გატანილ გოლთა როადენობა 100-მდე გაზარდეს.
აქედან 35 გოლი მესის ანგარიშზეა, ნეიმარმა 23 ბურთი გაიტანა, სუარესმა კი 42-ჯერ დაამწუხრა მეტოქე.
გასულ სეზონში მესიმ, ნეიმარმა და სუარესმა ყველა ტურნირზე ერთად 122 გოლი გაიტანეს.
ნეიმარი: “რონალდუ “ბარსელონას” გააძლიერებდა”
“ბარსელონას” ერთ-ერთმა ლიდერმა ნეიმარმა მადრიდის “რეალის” თავდამსხმელ კრისტიანუ რონალდუს შესახებ ისაუბრა და განაცხადა, რომ პორტუგალიელი ფეხბურთელი “ბარსელონას” გააძლიერებდა.
“კრიშტიანუს თამაშს თვალს ვადევნებ, იგი მსოფლიო ფეხბურთის ვარსკლავი და ერთ-ერთი საუკეთესო ფეხბურთელია. ეჭვგარეშეა, რომ რონალდუ “ბარსელონას” გააძლიერებდა.
პეპ გვარდიოლასა და ჟოზე მოურინიოს მუშაობით აღფრთოვანებული ვარ. მათ საქმიანობას მრავალი წელია ვაკვირდები. მიუხედავად ამისა, მე ლუის ენრიკეს თავკაცობით ვთამაშობ და “ბარსელონას” ღირსებას ვიცავ”, – ციტირებს ნეიმარის სიტყვებს A bola.
ნეიმარი: “მესი პასს მე მიკეთებდა, თუმცა სუარესიც იქვე იყო”
კატალონიის “ბარსელონას” თავდამსხმელი, ნეიმარი აცხადებს, რომ “სელტასთან” გამართულ შეხვედრაში, პენალტის მომენტში, მესი პასს მას უკეთებდა.
შეგახსენებთ, რომ 14 თებერვალს, პრიმერა დივიზიონის 24-ე ტურში “ბარსელონამ” საკუთარ მოედანზე “სელტა” მიიღო და მეტოქე ანგარიშით 6:1 დაამარცხა. 81-ე წუთზე, მესიმ პენალტი შეასრულა, საგოლე გადაცემა კი სუარესს გაუკეთა.
“მესის პენალტი? ჩვენ მის შესრულებაზე ვვარჯიშობდით. ის პასს მე მიკეთებდა, თუმცა სუარესიც იქვე იყო და გოლის გატანა მოახერხა”, – აღნიშნა ბრაზილიელმა.
ნეიმარს მომდევნო სეზონიდან ხელფასი თითქმის გაუორმაგდება
“ბარსელონას” თავდამსხმელ ნეიმარს მომდევნო სეზონიდან ანაზღაურება მნიშვნელოვნად გაეზრდება.
“ასის” ცნობით, 2016/17 წლების სეზონში ბრაზილიელი ფეხბურთელი ჯამაგირის სახით 9,1 მილიონის ნაცვლად 17,6 მილიონ ევროს მიიღებს. ცნობისათვის, ნეიმარსა და “ბარსელონას” შორის გაფორმებულ შრომით ხელშეკრულებას ვადა 2018 წლის 30 ივნისს გასდის.
გავრცელებული ინფორმაციის თანახმად, კატალონიური კლუბი ხელფასს მოუმატებს ლიონელ მესისაც.
სუარესი: “მსოფლიოში მესის შემდეგ ნეიმარია”
“ბარსელონას” თავდამსხმელმა ლუის სუარესმა თანაკლუბელების — ლიონელ მესისა და ნეიმარის შესახებ კიდევ ერთხელ ისაუბრა.
“მესი მსოფლიოს საუკეთესო მოთამაშეა. რასაც იგი მოედანზე აკეთებს, აღფრთოვანებას იწვევს, თუმც, ამავე დროს, იგი საოცრად მორცხვი და მოკრძალებულია.
მესის შემდეგ ნეიმარი მოდის. იგი ლეოსგან სწავლობს. ბრაზილიელი ყოველ მატჩში აკეთებს რაღაც საოცრებას. ოდესღაც ნეიმარი მსოფლიოს საუკეთესო ფეხბურთელი გახდება”, – ციტირებს სუარესის სიტყვებს Four four two.
“ბარსას” ვიცე-პრეზიდენტი შიშობს, რომ ნეიმარს კენედის მკვლელობასაც დააბრალებენ
“ბარსელონას” ვიცე-პრეზიდენტი კარლეს ვილარუბი სარკაზმით გამოეხმაურა ნეიმარის გარშემო მიმდინარე მოვლენებს. შეგახსენებთ, რომ გამოძიებამ ბრაზილიელი ფეხბურთელის “სანტოსიდან” კატალონიურ გუნდში ტრანსფერის პროცესში დარღვევები გამოავლინა, რის გამოც ნეიმარს თებერვალში სასამართლოს წინაშე მოუწევს წარდგომა.
“ნეიმარი სულ უფრო უმატებს. ქომაგები აღფრთოვანებულნი არიან მისი თამაშით. მის მიმართ წნეხი სულ უფრო გაძლიერდება.
ნეიმარის წინააღმდეგ კამპანიაა აგორებული და დარწმუნებული ვარ, ერთ დღესაც იტყვიან, რომ ნეიმარი დალასში იყო, როდესაც კენედი მოკლეს”, – ციტირებს ვილარუბის სიტყვებს RAC-1.
რობერტო კარლოსი: “ნეიმარი “რეალში”? უბრალოდ ვიხუმრე”
მადრიდის “რეალის” ყოფილმა მცველმა რობერტო კარლოსმა აღნიშნა, რომ უბრალოდ გაიხუმრა, როდესაც “ბარსელონადან” “სამეფო კლუბში” ნეიმარის შესაძლო გადასვლაზე გააკეთა კომენტარი.
“უბრალოდ ვიხუმრე, თუმცა ზოგიერთებმა ეს სერიოზულად აღიქვეს. “რეალი” ისედაც მხოლოდ საუკეთესო ფეხბურთელებს იმატებს.
ნეიმარი ძალზედ ახალგაზრდაა და დარწმუნებული ვარ, რომ მომავალ წელს იგი “ოქროს ბურთისთვის” რეალურად იბრძოლებს.
მოხარული ვარ, რომ “რეალი” სამსახურს მთავაზობს, თუმცა აქ ჯერ მხოლოდ იმისთვის ვარ, რომ გუნდის საწვრთნელ პროცესს დავაკვირდე. მინდა, რომ უმაღლესი დონის სამწვრთნელო კურსები გავიარო. რუსეთში, თურქეთსა და ინდოეთში მიმუშავია, თუმცა ჯერ კიდევ ბევრი მაქვს სასწავლი”, – ციტირებს რობერტო კარლოსის კომენტარს Goal.com-ი.