ჭდე: ქუთაისის ტორპედო

დღეს ქუთაისის „ტორპედოს“ საწვრთნელ ბაზაზე ამხანაგური თამაში გაიმართა, რომელშიც ერთმანეთს ჩვენი კლუბის ადმინისტრაციისა და სამწვრთნელო შტაბისგან დაკომპლექტებული გუნდი და ქომაგთა კლუბ „ჯუნგლების“ გუნდი შეხვდა. მატჩში მონაწილება მიიღეს „ტორპედოს“ აღმასრულებელმა დირექტორმა, ბატონმა ზურაბ ჩაკვეტაძემ და მთავარმა მწვრთნელმა გიორგი დარასელიამაც.
კლუბის წევრთა სრული შემადგენლობა კი ასეთი იყო:

გელა კიკალეიშვილი, მიხეილ მახვილაძე, დევიზ ჯურხაძე(შმაგი შოთაძე), ვლადიმერ ჭყონია, თამაზ ოდიკაძე, ბონდო გოცირიძე, გიორგი დარასელია, რევაზ კვერნაძე, ზურაბ ჩაკვეტაძე, მიხეილ აშვეთია, ზურაბ იონანიძე.

მიუხედავად მისი შინაარსისა, შეხვედრის ორივე ტაიმი საკმაოდ საინტერესო გამოდგა. თუ თამაშის პირველ ნახევარში „ჯუნგლები“ ტოლს არ უდებდნენ მეტოქეს, მეორე ნახევარში ტორპედოელთა ოსტატობამ იჩინა თავი და მატჩიც მათი გამარჯვებით, ანგარიშით 4:3 დასრულდა. ჰეთ-თრიქი შეასრულა საქართველოს ნაკრების ვეტერანმა ფეხბურთელმა მიხეილ აშვეთიამ, რომელიც ამიერიდან ჭაბუკთა ლიგაში მოასპარეზე „ტორპედოს“ 15-წლამდე გუნდის მთავარი მწვრთნელი იქნება. რაც შეეხება რევაზ კვერნაძეს, იგი 17-წლამდე გუნდის მთავარ მწვრთნელად იმუშავებს. განსაკუთრებით ლამაზი აშვეთიას მესამე გოლი გამოვიდა, როცა მან რამდენიმე მეურვეს აუარა გვერდი და ტექნიკურად დაარტყა. სხვათა შორის, ყოფილი თავდამსხმელისთვის „ტორპედოში“ გატანილი გოლები უცხო ნამდვილად არაა, რამეთუ მას ოფიციალურ მატჩებში ქუთაისელთა კლუბის მაისურით 78-ჯერ აუღია მეტოქეთა კარი. დღევანდელ მატჩში ერთი გოლი საქართველოს ჩემპიონატების საუკეთესო ბომბარდირმა, ზურაბ იონანიძემ გაიტანა, რომელიც აშვეთიასა და კვერნაძეს „ტორპედოს“ ასაკობრივი გუნდების გაწვრთნაში დაეხმარება.

მსგავსი ხასიათის ღონისძიებების ჩატარებას კლუბი მომავალშიც გეგმავს.

FCTorpedo.GE

როგორც უკვე ცნობილია, ქუთაისის „ტორპედოში“ მომხდარი მნიშვნელოვანი საკადრო ცვლილების შედეგად, აღმასრულებელი დირექტორის პოსტი ზურაბ ჩაკვეტაძემ დაიკავა, ვინც ბოლო პერიოდში კლუბის იურიდიულ სამსახურს ხელმძღვანელობდა. როგორია მისი გეგმები, ხედვები, პრინციპები, და პრიორიტეტები „ტორპედოსთან“ დაკავშირებით, ამას დაპირებული ინტერვიუდან შეიტყობთ.

 – ბატონო ზურაბ, პირველ რიგში, გილოცავთ ამ მეტად საპასუხისმგებლო თანამდებობაზე დანიშვნას. ინტერვიუს დასაწყისში გთხოვთ, თქვენ შესახებ გვიამბოთ და გვითხრათ, აქამდე რა შეხება გქონდათ ფეხბურთთან?

– მადლობა მოლოცვისთვის. რაც შეეხება ჩემს ბიოგრაფიას, დავიბადე ქუთაისში, დავამთავრე მე-6 საშუალო სკოლა, ხოლო 1998 წელს – სახელმწიფო უნივერსიტეტის იურიდიული ფაკულტეტი. ამავე წელს ქუთაისის „ტორპედოში“ იურისტად დავიწყე მუშაობა. მანამდე კი იყო ასეთი ისტორია: მე და ჩემმა მეგობრებმა დავაარსეთ „ტორპედოს“ ე. წ. გულშემატკივართა კავშირი, რომელიც 1999 წელს დავარეგისტრირეთ იურიდიულად. ეს იყო ერთ-ერთი პირველი იურიდიულად გაფორმებული საფეხბურთო ქომაგთა კლუბი საქართველოში. მაშინდელ წესდებასაც დღემდე ვინახავ. თანამოაზრეებთან ერთად ვიკრიბებოდით იმ რთულ პერიოდში და ვამხნევებდით ჩვენს გუნდს. მე, როგორც ამ კავშირის თავჯდომარე, დავუახლოვდი კლუბის ხელმძღვანელობას და მოხდა ისე, რომ შემომთავაზეს იურისტის სამსახური, სადაც, ზუსტად მახსოვს, 1998 წლის 1 აპრილს მიმიღეს. ამის პარალელურად გულშემატკივრებსაც არ ვწყდებოდი. შემდეგ, ძალიან კარგად განვითარდა მოვლენები, დღესაც ისეთივე სიხარული მაქვს გულში, როგორც მაშინ, როცა „ტორპედო“ 3-ჯერ გახდა ჩემპიონი. მას შემდეგ, რაც „ტორპედოში“ 4 წელი გავატარე, ამდენივე ხანი ვიყავი მოსკოვში, სადაც საკმაოდ დიდი ტურისტული სააგენტოს გენერალური მენეჯერი ვიყავი. 1 წელი მილანში და 5 წელი ბარსელონაში დავყავი. აღნიშნულ ქალაქებში სხვადასხვა საქმიანობას ვეწეოდი, შეხება მქონდა ასევე სამშენებლო საქმიანობასთან და დაცვის სამსახურთანაც, ბარსელონაში კი ვსწავლობდი სპორტული კოლექტივების მართვა-ორგანიზაციას. ათწლიანი განშორების შემდეგ, 2011 წელს დავბრუნდი საქართველოში და 2014 წლის 1 დეკემბრიდან „ტორპედოში“ იურისტად და ლიცენზირების მენეჯერად დავიწყე მუშაობა. ეს ის პერიოდია, როცა კლუბი მერიის ბალანსზე გადადიოდა. აქვე დიდ მადლობას გადავუხდი ქალაქის ხელძღვანელობას ჩემდამი გამოცხადებული ნდობისთვის და ძალიან მინდა, რომ ეს იმედები გავამართლო.

 – კლუბის განსავითარებლად როგორ აპირებთ მუშაობას?

– მაგალითად, ავიღოთ ცნობილი სპორტული ფირმა „ადიდასი“. მისი პროდუქტი, როგორი ხარისხიანიც უნდა იყოს, თუ ამ ფირმის ლოგო არ ადევს, რაც მისი იდენტურობის განსაზღვრელია, ცნობადი აღარ იქნება, ყველაფერს თავისი იმიჯი უნდა ჰქონდეს. რატომ ვამბობ ამას, ჩვენს ქალაქში „ტორპედო“ არის ბრენდი, ამიტომ არასწორად მიმაჩნია ლოგოს ფერებისა და ატრიბუტიკის სისტემატური შეცვლა. იგი მუდმივი უნდა იყოს და შეჯერებული. კომუნისტების ეპოქაში „ტორპედო“ თეთრ-წითელი ფერის მაისურებით თამაშობდა, ხოლო მოგვიანებით, მას შემდეგ, რაც დამოუკიდებლები გავხდით იყო ფერების მუდმივი ცვლა. ამდენად, ვინაიდან ცოტა გაურკვევლობაა ამ კუთხით, გადაწყვეტილი გვაქვს, რომ ჩამოვყალიბდეთ, გამოვაცხადოთ კუნკურსი, ლოგოზე, გულშემატკივართა დროშაზე და გუნდის 1 ძირითადი და 2 სათადარიგო სათამაშო ფერის მაისურის დიზაინზე. ოღონდ გასათვალისწინებელია ის, რომ ეს ყველაფერი იდენტურობაში უნდა იყოს მოყვანილი ქალაქის დროშის ფერებთან და სიმბოლიკასთან. ვფიქრობ, რადგან ქუთაისს წარმოვადგენთ, კლუბის ფერები ქალაქის დროშის ფერებს უნდა შეესაბამებოდეს. შემდეგ უკვე ოფიციალურ საიტსაც იგივე დიზაინს მივცემთ.ვფიქრობთ, კონკურსი ჩავატაროთ ორ ეტაპად. პირველ ეტაპზე მივიღებთ მონაწილეთა მიერ წარმოდგენილ მასალებს, შემდეგ მოწვეული კომისია შეარჩევს სამ საუკეთესოს, რომლებიც განთავსდება ჩვენს საიტზე, რათა გულშემატკივრებსაც ჰქონდეთ არჩევანის საშუალება. იქნება 3 ძირითადი ნომინაცია და თითოეულში გამარჯვებულისთვის გამოიყოფა სიმბოლური თანხა. შესაძლებელია, რომ სამივე ნომინაციაში ერთმა პიროვნებამ გაიმარჯვოს. ამით რიგით გულშემატკივრებს შანსი აქვთ, რომ “ტორპედოს” ისტორიის ნაწილი გახდნენ. აქვე დავამატებ, რომ ეს საიტი ჩვენ უნდა გამოვიყენოთ არა მარტო ინფორმაციის მიწოდებისთვის, არამედ გულშემატკივართა ჩართულობისთვისაც. ჩვენ მოვიფიქრებთ მათთან საკონტაქტო ფორმას, რითაც ისინი შეძლებენ თავიანთი იდეების მოწოდებასა და ჩვენთან ურთიერთობას.

ასევე ვაპირებთ, რომ „ტორპედოს“ სტადიონის ადმინისტრაციულ შენობაში გავაკეთოთ კლუბის მუზეუმი, სადაც გულშემატკივრებს ცალკე კუთხე ექნებათ. თბილისის „დინამოს“ შემდეგ „ტორპედო“ საქართველოში ყველაზე ტიტულოვანი კლუბია და კარგი იქნება, თუ კლუბის მიერ მოპოვებულ თასებსა და მედლებს მუზეუმში დავდებთ.

რაც შეეხება სპორტსკოლას, შეიძლება ამ ეტაპზე არ არის სათანადო საშუალება, თუმცა, საჭიროა, რომ რაც შეიძლება მალე დავაფუძნოთ იგი. ჩვენ გვყავს ახალბედა მწვრთნელები, რომლებთანაც გაფორმდება ხელშეკრულება და ისინიც ჩაერთვებიან ამ საქმეში. ბევრი პროცედურაა გასავლელი, თუმცა, ვფიქრობ, რომ ეს პროცესი არ შეფერხდება და სკოლა იფუნქციონირებს მთავარი სტადიონის ტერიტორიაზე. ბავშვთა ფეხბურთი იქნება ჩვენი ერთ-ერთი პრიორიტეტი.

ამ ყველაფერთან ერთად ვეცდებით, რომ კლუბმა რეკლამითაც მიიღოს გარკვეული შემოსავალი, ან თუნდაც ელემენტარული სარგებელი. გვეყოლება სარეკლამო აგენტი და ვიმუშავებთ კომპანიების მოზიდვაზე. რეკლამები კი განთავსდება საიტზე, სტადიონზე და ა. შ..

– რა პრინციპებზე იქნება აგებული კლუბის სტრუქტურა?

– მოგეხსენებათ, საქართველო არაა მატერიალურად მდიდარი ქვეყანა, აქედან გამომდინარე, საბიუჯეტო კლუბი ფინანსურად ისეთი ხელგაშლილი ვერ იქნება, როგორც კერძო ინვესტორის ქვეშ მყოფი, თუმცა ოქროს შუალედის გამონახვა შეიძლება. გულშემატკივარი, რასაკვირველია, ითხოვს შედეგს, რაც დამოკიდებულია შესაძლებლობებზე. იმ რესურსით, რაც ქალაქის ხელმძღვანელობის წყალობით გაგვაჩნია, საქართველოს პირველობაზე დადებითი შედეგი უნდა გვქონდეს. მომავალ სეზონში ჩვენი მიზანი ევროტურნირებზე მოხვედრა იქნება.

ვიცი, ზოგიერთებისთვის, ვისაც არ უყვარს ფეხბურთი, რთული თემაა, თუ რატომ უნდა დაფინანსდეს ქალაქის ბიუჯეტიდან კლუბი, როცა ის საშუალებები შეიძლება სოციალურ პრობლემებს მოხმარდეს, მაგრამ ფეხბურთიც არის სოციალური მოვლენა, რაზეც ბევრი რამაა მიჯაჭვული. არის კლუბი, ახალგაზრდული და ჭაბუკთა გუნდები, სადაც იზრდებიან ბავშვები და ყალიბდებიან პროფესიონალ ფეხბურთელებად. მთავარია, არსებული საშუალებები სწორად გამოვიყენოთ.

ჩემი და მთავარი მწვრთნელის სურვილით, ჩვენი პრინციპი შემდეგი იქნება – მაგალითად, ერთნაირი დონის ორი ფეხბურთელიდან უნდა დავიტოვოთ ის, ვინც კარგი პიროვნებაა, რადგან „ტორპედოში“ სწორედ ასეთი ადამიანები უნდა იყვნენ.

– რაც ყველაზე მთავარია,  რა მოცულობის იქნება „ტორპედოს“ ბიუჯეტი ახალ სეზონში?

– ბიუჯეტი ჯერჯერობით განსაზღვრული არ არის, ვინაიდან, როდესაც მერიას გადაეცა კლუბი, ქუთაისის წლიური ბიუჯეტი უკვე შედგენილი იყო. ამრიგად, ახალი ბიუჯეტი მიმდინარე წლის დეკემბერში გაიწერება, რომელშიც გათვალისწინებული „ტორპედოც“ იქნება. ამჟამად ჩვენ რა საჭიროებაც გვაქვს, ყველანაირად გვეხმარება ქალაქის ხელძღვანელობა. ქუთაისის მერი შოთა მურღულია და ვიცე-მერი ნოდარ მიქიაშვილი გვერდით გვიდგანან, რომ გუნდმა რაც შეიძლება კარგად იასპარეზოს.

– გატყობთ, რომ ძალიან მოტივირებული ხართ…

– როგორ გითხრათ, უდიდესი პასუხიმგებლობა და სიხარულია ჩემთვის, მომეცა იმის საშუალება, რომ ვუხელმძღვანელო ამ კლუბს და ქალაქის ხელმძღვანელებთან შეთანხმებით გარკვეული წვლილი შევიტანო „ტორპედოს“ განვითარებაში. რა თქმა უნდა, ამას მე მარტო ვერ გავაკეთებ, ტექნიკური პერსონალიდან დაწყებული მთავარი მწვრთნელით დამთავრებული ყველანი ერთ მუშტად უნდა შევიკრათ, საქმისადმი სიყვარულითა და თავდადებით განვეწყოთ და ყველაფერი გამოგვივა.

– ინფრასტრუქტურული კუთხით თუ იგეგმება რაიმე სიახლე?

– ჩვენ ან უნდა გვყავდეს სუსტი გუნდი, რომელიც მიუღებელია გულშემატკივრებისთვის, ან მივმართოთ თანხები ინფრასტუქტურაზე. არჩევანის წინაშე ვართ, ამიტომ ამ ეტაპზე უპირატესობას გუნდის მიერ მიღწეულ შედეგს ვანიჭებთ, რათა ევროტურნირებმა გარკვეული შემოსავალი მოგვიტანოს. შემდეგ კი უფრო მეტად ვიფიქროთ ინფრასტუქტურის სრულყოფაზე, თუმცა გარკვეული სამუშაოები ამ კუთხით ამჟამადაც მიმდინარეობს.

– საზოგადოდ, როგორ ხედავთ „ტორპედოს“ ღირსეულ მომავალს?

– ჩვენ არსებული ფინანსებიდან გამომდინარე უნდა გვქონდეს ამბიცია. რა თქმა უნდა, „ტორპედო“ მუდამ საქართველოს ჩემპიონობისთვის უნდა იბრძოდეს, მაგრამ სამეულში მოხვედრაც არ იქნება ურიგო, თუმცა დამდეგ სეზონშიც უმაღლესი ტიტულის მოპოვებისათვის იბრძოლებს გუნდი. ასევე ჩვენი მიზანია, რომ ყოველ მომდევნო წელს პროგრესი გვქონდეს ყველა მიმართულებით.

 – სპორტულ მხარეზეც უნდა გკითხოთ, რას იტყვით ამჟამინდელ კოლექტივზე?

– მართალია, ახალი სეზონისთვის ჯერ ბოლომდე დაკომპლექტებული არაა „ტორპედო“, თუმცა უკვე შემიძლია ვთქვა, რომ ძლიერი და ანგარიშგასაწევი გუნდი იქნება, სადაც პროფესიონალები არიან. მთავარი მწვრთნელის ხელმძღვანელობით ჩვენ გვჯერა ამ ფეხბურთელების, რომ დასახულ მიზანს მიაღწევენ. მათ შორის იმ ახალგაზრდების, რომლებიც, სავარაუდოდ, დუბლშემადგენლობიდან უნდა დაწინაურდნენ და “ტორპედოს” ღირსება წარმატებით დაიცვან.

– დამდეგი სეზონის წინ გაივლის თუ არა გუნდი უცხოურ შეკრებას და დგას თუ არა დღის წესრიგში ახალი ეკიპირების შეძენა?

– ამ ეტაპზე უცხოური შეკრება არ იგეგმება, თუმცა არც გამოვრიცხავთ. დღესდღეობით გუნდს არ აქვს ეკიპირების პრობლემა, ამდენად რაც გვაკლია მხოლოდ მის შევსებაზე ვიზრუნებთ და ეკიპირება იგივე დარჩება. მხოლოდ ერთ დავსძენ, თუ დროულად დამტკიცდა კლუბის ახალი ლოგო, ჩემპიონატის დაწყებამდე შეიძლება მაისურზეც გადავიტანოთ, სანამ ჩვენ არ ჩამოვყალიბებულვართ ფერებთან დაკავშირებით, რაზეც ზემოთ ვისაუბრეთ, ამ ეტაპზე ახალი ეკიპირების შეძენა საჩქარო არ არის.

 – დაბოლოს, „ტორპედოს“ გულშემატკივრებს როგორ მიმართავთ?

– ვინაიდან მეც გულშემატკივართა წიაღიდან ვარ და მათი კარგად მესმის, ასევე მჯერა, რომ მათაც კარგად აქვთ გააზრებული, თუ რამდენად ახლოა ყველა ჩვენგანისთვის “ტორპედო”, ნებისმიერ შემთხვევაში უნდა გვწამდეს, რომ ჩვენი ქალაქი, გუნდი და გულშემატკივარი ერთნი ვართ და ამ რწმენით, ნებისმიერ მეტოქეს გავუმკლავდებით.

 – დიდი მადლობა, წარმატებებს გისურვებთ.

FCTorpedo.GE

ქუთაისის რამაზ შენგელიას სახელობის სტადიონზე მოედნის საფარის გასაუმჯობესებლად სამუშაოები დაიწყო. ამისათვის, ჩვენმა კლუბმა შესაბამისი ტექნიკური მოწყობილობები შეიძინა. სიახლეა ისიც, რომ საფეხბურთო არენაზე არსებული ტაბლო შეკეთდა და კვლავინდებურად იფუნქციონირებს. აღნიშნულთან დაკავშირებით ჩვენ „ტორპედოს“ ტექნიკური მენეჯერი გვესაუბრა.

გიგა ჩუბინიძე: „საფეხბურთო სეზონის დასრულებისთანავე ჩვენ დავიწყეთ სამუშაოები მოედნის გასაუმჯობესებლად. სულ მალე მოხდება მინდვრის შეთესვა, მასზე სასუქისა და ქვიშის შეტანა, ამასთან ერთად, საჭიროა მისი სისტემატური მორწყვაც. ახლახან შევიძინეთ ბალახის საკრეჭი ტრაქტორიც. საბედნიეროდ, სრულად უზრუნველყოფილი ვართ იმისთვის, რომ მინდორს ზაფხულის მაღალმა ტემპერატურამაც პრობლემები ვერ შეუქმნას.

გარდა ამისა, მიმდინარეობს სტადიონის ტერიტორიაზე არსებული სხვა ბუნებრივსაფარიანი მოედნების მოვლაც. ასევე, შეკეთდა ტაბლო, რომლისთვისაც ახალი პროგრამული უზრუნველყოფა გახდა საჭირო, რაც არცთუ მარტივი საქმე იყო. სამუშაო ჯგუფთან ერთად მაქსიმალურად ვეცდებით, რომ ქუთაისის „ტორპედოს“ ყველანაირი პირობა შევუქმნათ სასურველი შედეგების მისაღწევად“.

FCTorpedo.GE