ჭდე: უმაღლესი ლიგა

დღეს ქართული ფეხბურთისთვის ისტორიული დღეა.

1990 წელს ქვეყნის ფეხბურთის ფედერაციამ, ნოდარ ახალკაცის მეთაურობით, გადაწყვიტა, რომ საქართველოს დამოუკიდებელი ჩემპიონატი უნდა ჰქონოდა. საბოლოოდ, დადგინდა, რომ ჩემპიონატს “საქართველოს უმაღლესი ჯგუფი” დარქმეოდა და მასში თვრამეტ გუნდს მიეღო მონაწილეობა.

იმავე წლის 30 მარტს ჩემპიონატის პირველი მატჩი შედგა. დაპირისპირება დღევანდელ ბორის პაიჭაძის ეროვნულ სტადიონზე თბილისის “იბერიასა” (“დინამო”) და ფოთის “კოლხეთს” შორის გაიმართა და იგი მეგრელთა გამარჯვებით, 1:0 დასრულდა. რაც არ უნდა კურიოზული იყოს, პირველი სეზონის სადებიუტო თამაშის ერთადერთი გოლი ავტოგოლი იყო: “თავის გამოჩენა” გელა კეტაშვილმა მოახერხა.

შეხვედრას ესწრებოდნენ ეროვნული მოძრაობის ლიდერი, ზვიად გამსახურდია და კათალიკოს პატრიარქი, ილია II. პირველმა მათგანმა საზოგადოებას სიტყვით მიმართა: “საქართველოს ძენო და სულნო, საყვარელო დანო და ძმანო, გილოცავთ ნანატრი დღის დადგომას, გილოცავთ ეროვნული ჩემპიონატის პირველ დღეს. ძვირფასო მეგობრებო ამ დღეს ქართული ფეხბურთი შემოუერთდა საქართველოს ეროვნულ განმათავისუფლებელ მოძრაობას და იგი ჩვენთან ერთად იბრძვის საქართველოს თავისუფლებისთვისა და დამოუკიდებლობისთვის. იმპერიული ძალების წინააღმდეგობის მიუხედავათ, ჩვენ გავიმარჯვეთ და მივაღწიეთ საქართველოს ფეხბურთის დამოუკიდებელი ფედერაციის გამოყოფას იმპერიული ფედერაციისგან. გაუმარჯოს დამოუკიდებელ ქართულ ფეხბურთს, გაუმარჯოს დამოუკიდებელ საქართველოს!”

“იბერიას” შემადგენლობა: ხაპოვი, კეტაშვილი, ჭედია, რევიშვილი, კაჭარავა, გურული, ცხადაძე, არზიანი, ქეცბაია, ცაავა, გოგიჩაიშვილი.

იხილეთ ვიდეო

30 ნოემბერს, საქართველოს ეროვნული ჩემპიონატის უმაღლესი ლიგის ბრინჯაოს პლეი-ოფის, 1 დეკემბერს კი, პლეი-აუტის პირველი მატჩები გაიმართება.

ბრინჯაოს პლეი-ოფი

თბილისურ დერბიში ერთმანეთს „საბურთალო“ და „დინამო“ დაუპირისპირდებიან. შეხვედრას მიხეილ მესხის სახელობის სტადიონი უმასპინძლებს. რეგულარული სეზონი დინამოელებმა მეორე ადგილზე დაასრულეს, საბურთალოელებმა კი – მესამეზე.

პლეი-ოფის მეორე შეხვედრა ქუთაისში გაიმართება. ადგილობრივი „ტორპედო“ ბათუმის „დინამოს“ მიიღებს. მასპინძლებმა საქართველოს თასი მოიგეს და ამით ევროპის ლიგის საკვალიფიკაციო ეტაპზე ასპარეზობის უფლება მოიპოვეს, თუმცა მიუხედავად ამისა ქუთაისური კლუბი ბრინჯაოსთვიის ბრძოლას განაგრძობს. ბათუმელებმაც კარგი სეზონი ჩაატარეს და წითელ ჯგუფში მეორე ადგილი დაიკავეს.

პლეი-აუტი

ბოლნისის „სიონი“ საკუთარ, თამაზ სტეფანიას სახელობის სტადიონზე ქობულეთის „შუქურას“ უმასპინძლებს. ქობულეთელებმა უმაღლეს ლიგაში პირდაპირ დარჩენის შანსი ბოლო ტურში დაკარგეს და ახლა პლეი-აუტში მოუწევთ უძლიერესთა შორის ადგილის შენარჩუნებისათვის ბრძოლა. რაც შეეხებათ ბოლნისელებს, მათ 12 გამართულ შეხვედრაში მხოლოდ 11 ქულის მოგროვება შეძლეს და წითელ ჯგუფში მეექვსე ადგილი დაიკავეს. „სიონსა“ და „შუქურას“ ერთმანეთის წინააღმდეგ 4 შეხვედრა აქვთ ჩატარებული, აქედან ერთი ბოლნისელებმა მოიგეს, ერთი – ქობულეთელებმა, 2 კი ფრედ დასრულდა.

მეორე შეხვედრაში ლანჩხუთის „გურია“ გორის „დილას“ უმასპინძლებს. გორელებს ევრო-ზონამდე სულ ორი ქულა დააკლდათ და ახლა უმაღლეს ლიგაში ადგილის შენარჩუნებისათვის მოუწევთ ბრძოლა. ლანჩხუთელებმა კი, რეგულარული სეზონი 11 ქულით დაასრულეს და თეთრ ჯგუფში ბოლოსწინა, მეექვსე ადგილზე გავიდნენ. კლუბებს ერთმანეთის წინააღმდეგ 27 შეხვედრა აქვთ ჩატარებული, აქედან 10 „გურიამ“ მოიგო, 11- „დილამ“, 6 მატჩი კი ფრედ დასრულდა.

უმაღლესი ლიგის ბრინჯაოს პლეი-ოფისა საპასუხო მატჩები 4 დეკემბერს გაიმართება და პლეი-აუტის კი, 6 დეკემბერს.