26 მარტს, რუსეთის თასზე მეოთხედფინალური ეტაპის მატჩები გაიმართა. ჯანო ანანიძის “როსტვომა” საკუთარ მოედანზე რანგით მეორე ლიგელ “როტორს” უმასპინძლა და მეტოქე დამაჯერებლად, ანგარიშით 3:0 დაამარცხა.
აღსანიშნავია, რომ როსტოველთა გამარჯვებაში თავისი წვლილი ქართველმა ნახევარმცველმაც შეიტანა – ჯანომ მე-60 წუთზე სხვაობა ორამდე გაზარდა.
21 მარტს, რუსეთის ჩემპიონატში, “როსტოვმა” საკუთარ მოედანზე “ამკარი” მიიღო და ფრედ, 3:3 ითამაშა.
აღნიშნულ შეხვედრაში, როსტოველთა ძირითად შემადგენლობაში იყო ახალგაზრდა ქართველი ნახევარმცველი ჯანო ანანიძე. საქართველოს ნაკრების მოთამაშემ, მე-18 წუთზე, თანაგუნდელ კალაჩევს გენიალური გადაცემა გაუკეთა, რასაც გოლი მოყვა.
იხილეთ ჯანოს საგოლე გადაცემა 00:36-დან:
“როსტოვის” ვიცე-პრეზიდენტმა, ალექსანდე შიკუნოვმა დაადასტურა, რომ გუნდში “სპარტაკიტან” იჯარის წესით მყოფი ანანიძე და ძიუბა კარიერას როსტოვულ კლუბში გააგრძელებენ.
“ძიუბა და ჯანო ნამდვილად რჩებიან ჩვენს გუნდში ივნისამდე, მერე კი ვნახოთ. ჯანოს საკითხის გადაწყვეტა ახალი სპონსორის მოსვლას უკავშირდება. ის ჩინებული ფეხბურთელია. ცოტას ფიზიკაში თუ მოუმატებს, ნამდვილად დიდი მომავალი ექნება. მაგრამ, გულახდილად რომ ვთქვათ, რუსეთის ჩემპიონატი მისთვის არ არის. მაგალითად ჰოლანდიაში ის უკვე ტოპ ფეხბურთელი იქნებოდა” – განაცხადა შიკუნოვმა.
დღეს საფეხბურთო კლუბ „როსტოვის“ ვიცე-პრეზიდენტი ალექსანდრ შიკუნოვასი მოსკოვის „სპარტაკის“ ხელმძღვანელებს შეხვდა.
შეხვედრის შემდეგ ჟურნალისტებისთვის ცნობილი გახდა, რომ მხარეებმა ქართველი ლეგიონერის ჯანო ანანიძის საკითხი განიხილეს. შედეგად, გადაწყდა, რომ ანანიძე „როსტოვში“ სეზონის ბოლომდე დარჩება. მასთან ერთად „სპარტაკში“ მიმდინარე სეზონის დასრულებამდე არც თავდამსხმელი არტიომ დიუბა დაბრუნდება.
შეგახსენებთ, რომ „როსტოვში“ საქართველოს ნაკრების მოთამაშე მიმდინარე წლის ზაფხულის სატრანსფერო ფანჯრის დროს იჯარის წესით გადავიდა.
ალექსანდრე მატევოსოვი
დღეს, რუსეთის პრემიერლიგის მე-18 ტურში „როსტოვმა“ მოსკოვის „ცსკა“-ს უმასპინძლა. „ყვითელ-ლურჯთა“ რიგებში ჯანო ანანიძემ წლის ბოლო მატჩი ჩაატარა. ქართველმა ფეხბურთელმა მატჩი ძირითად შემადგენლობაში დაიწყო და ჩვეულებისამებრ, ერთ-ერთი გამორჩეულიც იყო. ჯანოს შეხვედრის მეორე ტაიმის დასაწყისში გოლის გატანაც მართებდა, თუმცა ახლო მანძილიდან ბურთს ფეხი ხეირიანად ვერ მოარტყა, არადა, მეკარე კარის კუთხეს ვეღარ იცავდა. სიმართლე რომ ვთქვათ, „როსტოვს“ გოლის გატანის ბევრი შანსი მიეცა, თუმცა ყველაზე რეალური სწორედ ჯანოს მომენტი იყო. მასპინძლები გაცილებით აქტიურად გამოიყურებოდნენ, ბურთს აკონტროლებდნენ და უტევდნენ, „ცსკა“-ს ფეხბურთელები კი ძირითადად თავდაცვით იყვნენ დაკავებულნი. ანანიძე 82-ე წუთზე შეცვალეს. ქართველ ფეხბურთელს მოედნის დატოვებისას აშკარად ეტყობოდა გაფუჭებული მომენტის გამო სინანული. საბოლოო ჯამში, შეხვედრა უგოლოდ დასრულდა. მატჩის საუკეთესო ფეხბურთელთა გამოსავლენად მოწყობილ გამოკითხვაში გულშემატკივრებმა ჯანოს მესამე ადგილი არგუნეს.
მიუხედავად იმისა, რომ წლის ბოლომდე კიდევ ერთი მატჩია დარჩენილი, თამამად შეგვიძლია ვთქვათ, რომ ჯანო ანანიძემ „როსტოვის“ შემადგენლობაში წელს ბოლო მატჩი ჩაატარა. მომდევნო ტურში „როსტოვი“ მოსკოვის „სპარტაკს“ მასპინძლობს. „სახალხო გუნდის“ მფლობელმა ლეონიდ ფედუნმა განაცხადა, თუ გინდათ, რომ თქვენთან იჯარით მყოფებმა – ჯანო ანანიძემ და არტიომ ძიუბამ ითამაშონ, მაშინ მილიონი (ვალუტა არ დაუკონკრეტებია) გადაგვიხადეთო. „როსტოვი“ თანხის გადახდას არ აპირებს, შესაბამისად ანანიძე და ძიუბა მათ საკუთრებასი მყოფი კლუბის წინააღმდეგ ვერ ითამაშებენ. აღსანიშნავია ისიც, რომ ჯანომ რამდენჯერმე გამოთქვა „როსტოვში“ სეზონის ბოლომდე დარჩენის სურვილი. ანანიძეს საიჯარო ხელშეკრულება 1 წლის ვადით აქვს გაფორმებული, თუმცა არ არის გამორიცხული, „სპარტაკმა“ ის ზამთრის შესვენებისას დაიბრუნოს.
ცნობისთვის, ჯანომ „როსტოვის“ რიგებში 15 მატჩი ჩაატარა და ერთი გოლი გაიტანა.
ბექა დოგრაშვილი
„როსტოვში“ იჯარის წესით მოთამაშე ჯანო ანანიძემ კლუბის პრესსამსახურისთვის მიცემულ ინტერვიუში აღნიშნა, რომ მთავარი მწვრთნელისგან ნდობას გრძნობს. გავრცელებული ინფორმაციით, მოსკოვის „სპარტაკს“ ზამთრის სატრანსფერო პერიოდში ქართველი ფეხბურთელის დაბრუნება სურს, თუმცა თავად ანანიძეს უნდა, რომ სეზონის ბოლომდე „როსტოვში“ იასპარეზოს.
„პირველ ორ ტურში სასტარტო განაცხადში არ ვყოფილვარ, შეცვლებზე შემოვდიოდი, თუმცა შემდეგ რეგულარულად თამაში დავიწყე. ვხედავ, რომ მიოდრაგ ბოჟოვიჩი („როსტოვის“ თავკაცი) მენდობა და ეს ძალას მმატებს. ახლა ყველაზე მთავარი სათამაშო პრაქტიკაა. გუნდში კარგი ატმოსფეროა, საქმეები კარგად მიმდის, ამიტომ ზამთარში „სპარტაკში“ დაბრუნებას არ ვისურვებდი.
„სპარტაკის“ ხელმძღვანელობამ გადაწყვიტა, რომ იანვარში მათ შეკრებაზე უნდა გავყვე, თუმცა ვთხოვ, რომ არ დამაბრუნონ. მინდა, რომ „როსტოვში“ სრული სეზონი გავატარო, სასურველ ფორმაში ჩავდგე, საჭირო გამოცდილება შევიძინო და ზაფხულში მოსკოვს ჩემს ძალებში დარწმუნებული დავუბრუნდე. ამის შემდეგ გადაწყდება ჩემი მომავალი, მოქმედი კონტრაქტი 2015 წელს მეწურება“, – განაცხადა ჯანო ანანიძემ.
ბექა დოგრაშვილი
6 ოქტომბერს, რუსეთის პრემიერ ლიგაში, “ყუბანსა” და “როსტოვს” შორის გამართულ შეხვედრაში (2:2), ქართველმა ფეხბურთელმა, ჯანო ანანიძემ შესანიშნავი ფინტი გააკეთა.
