ჭდე: რუსთავი

მეოთხედფინალის მიღმა დარჩენილმა გუნდებმა V-VII ადგილები გაინაწილეს. მე-5 ადგილისთვის მატჩში ერთმანეთს “შსს-აკადემია” და “რუსთავი” შეხვდნენ და გამარჯვება შინაგან საქმეთა სამინისტროს აკადემიის გუნდს დარჩა.

არჩილ ჟღენტის გუნდის გამარჯვება მოულოდნელი არ ყოფილა. შსს მეოთხედფინალიდან “ბათუმმა” გამოაგდო, რის შემდეგაც აკადემიელებმა საპრიზო ადგილებზე გასვლის შანსი დაკარგეს. ამის შემდეგ “შსს-აკადემიამ” პლეი აუტის ორივე თამაში იოლად მოიგო და მე-5 ადგილი დაიკავა.

მე-5 ადგილისთვის მატჩი დაძაბული ვერ გამოდგა. არჩილ ჟღენტის გუნდმა 113:89 დაამარცხა “რუსთავი”. აკადემიელებმა გუნდურად ითამაშეს – 6 კალათბურთელი ათქულიან ზღვარს ასცდა, ხოლო რუსთაველთაგან რევაზ ჩაჩანიე გამოირჩა 34 ქულით.

მე-7 ადგილისთვის მატჩში “ოლიმპმა” კიდევ უფრო დასუსტებულ “სოხუმს” 76:64 სძლია. ვაჟა კვარაცხელიას გუნდს ლატვიელი ვეტერანები ქომაგობდნენ, რომლებიც თბილისში სოხუმელთა მოწვევით ჩამოვიდნენ და ქართველ ვეტერანებთან ამხანაგურ მატჩს გამართავენ.

სოხუმელებს აკლდათ ტრავმირებული ირაკლი ჩლაიძე და რატი ბააკაშვილი. ამან გადამწყვეტი როლი ითამაშა და გუნდი, რომელმაც მიმდინარე სეზონში დუდუ დადიანისა და ქორქია-საკანდელიძის მემორიალების, ასევე საქართველოს თასის ფინალებში ითამაშა, “ოლიმპთან” დამაცხდა და საბოლოოდ მე-8 ადგილი დაიკავა.

მატჩისშემდგომი პრესკონფერენცია

შსს აკადემია-რუსთავი  113:89

არჩილ ჟღენტი(,,შსს აკადემიის’’ მთავარი მწვრთნელი): სეზონი დავამთავრეთ. მოგეხსენებათ, პირველი წრე ცუდად ჩავატარეთ. ამის შემდეგ ხელმძღვანელობის მხრიდან დავალება ხუთეულში შესვლა იყო და ეს პროგრამა მინუმუმი შევასრულეთ, თუმცა ვერ ვიტყვი, რომ სეზონი კარგად დავასრულეთ. როგორც მე, ასევე ბიჭებს უფრო მაღალი მიზნები გვქონდა. თუმცა შუა სეზონში გუნდის დალაგება საკმაოდ რთული იყო, ამას ტრავმებიც დაემატა და ვერ მოვასწარით ბოლომდე დაგველაგებინა გუნდი. მინდა დიდი მადლობა გადავუხადო ბიჭებს და წარმატებები ვუსურვო. შეგვეძლო, უფრო მაღალი ადგილებისთვის გვეთამაშა, მაგრამ სპორტია და ყველაფერი ხდება. 2 წლის წინ, როცა კეცელიდისმა ჩაიბარა გუნდი, მე-5 ადგილი დავიკავეთ, 1 წლის შემდეგ კი, როცა გუნდი თავად მან გააკეთა, ჩემპიონები გავხდით. ასე იყო წელსაც, პირველ წრეში გუნდი მენეჯერებმა შექმნეს, მწვრთნელის აზრი არ იყო გათვალიწინებული და ამიტომ არ გვქონდა შედეგი. კიდევ ერთხელ მადლობას ვეტყვი ჩემს გუნდს.

ოთარ ხმელიძე(,,რუსთავის’’ მთავარი მწვრთნელი): მე-6 ადგილის დაკავება ჩვენი მაქსიმუმი იყო. არც ერთი შეკრება არ გაგვლილია, მედიკამენტებიც კი არ გვქონია, ამას ტრავმიანობა დაემატა, ვერ დავიმატეთ ის მოთამაშეები, რომლებიც გვინდოდა, რამდენიმე ლიდერმა დატოვა გუნდი და კიდევ ბევრი რამ მოხდა. ამ ყველაფრის გათვალისწინებით, მე-6 ადგილი ურიგო არ არის. რაც შეეხება დღევანდელ თამაშს, მოტივაცია არ გვქონდა, რადგან ვიცოდით, რომ ,,შსს აკადემიის’’ დამარცხება არ შეგვეძლო.

 

აკაკი ლომოური(,,შსს აკადემია’’): დავეთანხმები მწვრთნელს. მე-2 წრის შემდეგ სხვა მიზნები გვქონდა, თუმცა ვერ შევძელით ამის შესრულება. მადლობა ,,შსს აკადემიის’’ მთლიან კოლექტივს, მწვრთნელებს, ბიჭებს. ასევე მადლობას ვეტყვი სუპერლიგის ხელმძღვანელობას ასეთი ორგანიზებული ჩემპიონატისთვის. დღევანდელი თამაში შედეგიანი იყო და მოგება არ გაგვჭირვებია.

სოხუმი-ოლიმპი  64:76

ვაჟა კვარაცხელია(,,სოხუმის’’ მთავარი მწვრთნელი): ვულოცავ ,,ოლიმპს’’ გამარჯვებას, ნამდვილად კარგი გუნდია, თუმცა სეზონის დასაწყისში პრობლემები შეექმნათ, მათიაშვილმა, საქართველოში საუკეთესო ცენტრმა, 10 თამაში გამოტოვა, თუმცა მისი დაბრუნების შემდეგ გუნდმა სიურპრიზები შემოგვთავაზა. რაც შეგვეხება ჩვენ, მთელი ძალები ქუთაისის წინააღმდეგ თამაშმა წაგვართა, მათ ახლა ფინალში გასვლის კარგი შანსი აქვთ. ფიზიკურად და ფსიქოლოგიურად გადავიღალეთ და დღეს ვეღარ მოვიკრიბეთ ძალები. მადლობას ვეტყვი ჩემს ბიჭებს, რომლებმაც ასეთი რთული სეზონი გაიარეს და 3 ტურნირის ფინალში ითამაშეს. თუ ,,ქუთაისმა’’ ჩემპიონატი მოიგო, საქართველოს თასის ფინალსაც ვითამაშებთ. კიდევ ერთხელ მადლობა მთლიანად ,,სოხუმს’’.

დავით თორთლაძე(,,ოლიმპის’’ მთავარი მწვრთნელი): ტრაფარეტული იქნება თუ ვიტყვი, რომ სეზონი მოგებით დავასრულეთ. რიგმა მიზეზებმა განაპირობა ჩვენი გამარჯვება, ,,სოხუმს’’ წამყვანი მოთამაშეები აკლდა. თუმცა არც ჩემს ბიჭებს დავუკარგავ შრომას, ნამდვილად კარგად ითამაშეს და პრესტიჟის ამბავი იყო, რომ ,,მაკაბის’’ გარდა კიდევ რომელიმე გუნდისთვის მოგვეგო. მინდა მადლობა გადავუხადო ,,სოხუმს’’, მთელი სეზონი კალათბურთს ემსახურებოდნენ და ამას მხოლოდ ენთუზიაზმის და თავიანთი საქმის სიყვარულის ხარჯზე აკეთებდნენ. ყველას მისცემს მაგალითი, თუ როგორ უნდა გიყვარდეს კალათბურთი.

რიჩარდ მათიაშვილი(,,ოლიმპი’’): მეც მადლობას ვეტყვი ,,სოხუმის’’ ბიჭებს ასეთი სეზონისთვის, ძალიან რთული პერიოდი გაიარეს და მომავალი წლიდან სიტუაცია აუცილებლად უნდა გამოსწორდეს. ჩვენც თავიდან სხვა გეგმები გვქონდა, თუმცა სამწუხაროდ, არ გამოგვივიდა. ალბათ, იღბალიც დაგვაკლდა. დღეს მოსაგებად გამოვედით და მადლობა ჩემს გუნდს და ბიჭებს კარგი თამაშისთვის.

 

დავით დეკანოიძე(,,სოხუმი’’): პირველ რიგში, მივულოცავ ,,ოლიმპს’’ გამარჯვებას და მადლობა მათ სოლიდარობისთვის. ამ თამაშს ჩვენთვის გადამწყვეტი მნიშვნელობა არ ჰქონდა, ფაქტობრივად ბიჭებმა ჩვენი სიამოვნებისთვის ვითამაშეთ. მთელი ენერგია მეოთხედფინალურ სერიას შევალიეთ და დღეისთვის მომზადება საკმაოდ რთული იყო.

superleague.ge

მეოთხედფინალურ სერიებში დამარცხებული გუნდები სუპერლიგის V-VII ადგილებისთვის ბრძოლაში გადაერთვნენ. პლეი აუტის მატჩები ერთ მოგებამდეა და პირველ წყვილში ერთმანეთს “შსს-აკადემია” და “ოლიმპი” შეხვდნენ.

შინაგან საქმეთა სამინისტროს აკადემიის გუნდი ნახევარფინალურ სერიაში “ბათუმთან” 1:3 დამარცხდა, არადა ამ არჩილ ჟღენტის გუნდს გაცილებით შორსმიმავალი გეგმები ჰქონდა და მე-5 ადგილის მოგება სავარაუდოდ ძვირად არ უღირს.

ამის მიუხედავად, “შსს-აკადემიამ” მაინც იოლად იმარჯვა და მე-5 ადგილისთვი მატჩში ასპარეზობის უფლება მოიპოვა, სადაც ძალოვნებ “სოხუმსა” და “რუსთავს” შორის გამარჯვებული ,,რუსთავი’’ შეხვდება.

რაც შეეხება “ოლიმპთან” მატჩს, შეხვედრა, რომ იტყვიან, ცალფარა გამოდგა. დავით თორთლაძის გუნდს ლიდერი, რიჩარდ მათიაშვილი აკლდა და ისედაც აუტსაიდერად მიჩნეულმა, 39-ქულიანი მარცხი განიცადა. აკადემიელთა შვიდმა წევრმა 10-ქულიან ზღვარს გადააბიჯა, რომელთა შორისაც ყველაზე მეტი – 21 ქულა, კოკა ტომარაძემ მიითვალა. 19 ქულა ჰქონდა რეზო როგავას. “ოლიმპში” ყველაზე მეტი – 15 ქულა რევაზ ათანელიშვილს დაუგროვდა.

მატჩისშემდგომი პრესკონფერენცია

შსს აკადემია – ოლიმპი 115:76

გიორგი ნიკოლაძე(,,შსს აკადემიის’’ მწვრთნელი): სამწუხაროდ, ჩვენი მიზანი და ამოცანა, რაც საუკეთესო ოთხეულში მოხვედრას გულისხმობდა, ვერ შევასრულეთ, თუმცა ბრძოლას ვაგრძელებთ და მე-5 ადგილის დაკავება უკვე პრესტიჟის ამბავია. ,,ოლიმპი’’ დღეს შესუსტებული შემადგენლობით იყო და გამარჯვების მოპოვება არ გაგვჭირვებია. მოვემზადებით ხვალინდელი მატჩისთვის და შევეცდებით მე-5 ადგილი დავიკავოთ.

დავით თორთლაძე(,,ოლიმპის’’ მთავარი მწვრთნელი): ჩვენთვის პრინციპული ხვალინდელი მატჩი იქნება. მართალია, რამდენიმე მოთამაშე გვაკლდა, თუმცა სრული შემდაგნელობითაც ,,შსს აკადემიის’’ წინააღმდეგ მიზერული შანსები გვქონდა. გულდასაწყვეტია, რომ ძალიან ცოტა თამაში ჩავატარეთ. პლეიაუტის მატჩებს ის მიზანი აქვს, რომ გუნდმა მეტი თამაში ჩაატაროს, უმჯობესი იქნებოდა ეს თამაშებიც 2 ან 3 მოგებამდე ყოფილიყო. წელს ბევრი მიზეზის გამო სუსტად ვიასპარეზეთ, თუმცა საპრიზო ადგილების მოპოვების ამბიცია არც გვქონია.  წარმატებებს ვუსურვებ ,,შსს აკადემიას’’, ჩვენ კი ხვალინდელი თამაშისთვის მოვემზადებით.

ლექსო ლაფანაშვილი(,,შსს აკადემია’’): მართალია, ჩვენი ამოცანა ვერ შევასრულეთ, თუმცა გვინდა, რომ სეზონი ღირსეულად ჩავამთავროთ, ხვალაც ასეთი შემართებით ვიასპარეზებთ და ვეცდებით, გამარჯვება მოვოპოვოთ.

 

მე-5 ადგილისთვის მატჩში “შსს-აკადემიას” “რუსთავი” დაუპირისპირდება. ქვემოქართლელებმა დღეს “სოხუმი” დაამარცხეს. მეოთხედფინალში “ქუთაისთან” გმირულად ნაბრძოლი და მე-5, გადამწყვეტ მატჩში დამარცხებული სოხუმელები ძირითადი გამთამაშებლის გარეშე თამაშობდნენ, ხოლო დღევანდელი მატჩის მეორე ნახევარში გუნდის ლიდერმა ირაკლი ჩლაიძემ ტრავმა მიიღო და თამაში ვეღარ გააგრძელა.

რუსთაველებმა საბოლოოდ 102:97 მოუგეს “სოხუმს” და მე-5 ადგილისთვის მატჩში შსს-ს დაუპირისპირდებიან. მე-7 ადგილისთვის შეხვედრაში “ოლიმპი” “სოხუმს” შეხვდება. ორივე მატჩი ხვალ, 10 მაისს, სპორტის სასახლეში გაიმართება.

 მატჩისშემდგომი პრესკონფერენცია

სოხუმი – რუსთავი 97:102 

ვაჟა კვარაცხელია(,,სოხუმის’’ მთავარი მწვრთნელი): ფსიქოლოგიურად ბიჭები ძალიან დაძაბულები და გადაღლილები იყვნენ, ,,ქუთაისთან’’ თამაშმა ყველანაირი ძალები გამოგვაცალა,

ოთარ ხმელიძე(,,რუსთავის’’ მთავარი მწვრთნელი): პირველ რიგში, გაგვიმართლა, ,,სოხუმი’’ ფიზიკურად და ემოციურად დაცლილი იყო, არადა მათ ჰქონდათ შანსი მაღალი მიზნებისთვის ებრძოლათ. ,,ქუთაისთან’’ წაგების შემდეგ, დღეს არ იყვნენ ისეთი განწყობით, როგორც ჩვევიათ. ამით ვისარგებლეთ და გავიმარჯვეთ.  ხვალ რა იქნება, არ ვიცი. ზედიზედ 2 თამაშის ჩატარებას არ ვართ მიჩვეული, ამიტომ გაგვიჭირდება. კარგი იქნებოდა, 1 დღე მაინც გვქონოდა დასვენება.

ირაკლი ჩლაიძე(,,სოხუმი’’): მინდა მივულოცო ,,რუსთავის’’ გუნდს გამარჯვება, ყოველთვის კარგი გუნდი ჰყავთ, წელს პერსპექტიული ახალგაზრდა კალათბურთელებით იყვნენ დაკომპლექტებული. რაც შეგვეხება ჩვენ, დღეს არც ერთი მოთამაშე არ იყო ბრძოლისთვის მოტივირებული. ჩვენი პირდაპირი მიზანი ,,ქუთაისის’’ გამოგდება იყო პლეიოფიდან, დიდი ომი და ბრძოლები გადავიტანეთ და დამარცხებულები ჩვენ გამოვედით. ამიტომ, მე-5 და მე-7 ადგილებისთვის ბრძოლა ჩვენთვის მთავარი აღარაა. დღეს ყველაფერი სამართლიანად და ლოგიკურად მოხდა, ჩვენს ახალგაზრდებს სათამაშო დრო მიეცათ და ამ გამოცდილებას მომავალში გამოიყენებენ. რუსთავმაც დამსახურებულად მოიგო, წაგებას ჩემი ფეხის გადაბრუნებას ან ბააკაშვილის არყოფნას ვერ დავაბრალებ. ჩვენმა გუნდმა წელს ბევრ რამეს გაუძლო, მხოლოდ ენთუზიაზმის და სპორტული ჟინის ხარჯზე ვთამაშობდით და ვფიქრობ, ვერავინ მოგვთხოვს პასუხს საპრიზო ადგილების დაუკავებლობის გამო. მინდა მადლობა გადავუხადო ჩემი გუნდის თითოეულ წელს გაწეული შრომის და თავდადებისთვის.

superleague.ge