Goal-ის მიერ მოპოვებული ინფორმაციის თანახმად, “შალკეს” 24 წლის მცველი, ჟოელ მატიპი “ლივერპულის” ხელმძღვანელობას სიტყვიერად შეუთანხმდა.
წყაროს ცნობით, კამერუნელი ფეხბურთელი, რომელმაც ბუნდესლიგაში მოთამაშე კლუბთან კონტრაქტის გახანგრძლივებაზე უარი განაცხადა, “წითლებთან” ოთხწლიან კონტრაქტს გააფორმებს.
მატიპმა, რომელსაც ნახევარდაცვაშიც შეუძლია თამაში, წლევანდელ სეზონში 4 გოლის გატანა მოახერხა. გერმანიაში აღიარებული მცველი “ლივერპულს” ზაფხულში, თავისუფალი აგენტის სტატუსით შეუერთდება.
როგორც იცით, მიმდინარე სეზონში გელზენკირხენის “შალკე” არც თუ ისე კარგად გამოიყურება, რისი მიზეზიც მეტწილად გერმანელთა სატრანსფერო პოლიტიკა გახლავთ.
არადა სავსებით შესაძლებელი იყო, რომ “ლურჯებს” მაღალი მიზნებისთვის ებრძოლათ. თუმცა “შალკეს” ხელმძღვანელობამ ცდუნებას ვერ გაუძლო და კლუბის ლიდერები გაყიდა.
სწორედ ასეთი იქნებოდა “შალკეს” შემადგენლობა, კლუბს ლიდერები რომ არ გაეყიდა:
მანუელ ნოიერი
პოზიცია: მეკარე
ასაკი: 29
ამჟამინდელი კლუბი: “ბაიერნი”
“შალკეს” რიგებში ჩატარებული მატჩი: 203
მანუელ ნოიერი “შალკეში” 5 წლის ასაკიდან თამაშობდა. ის გერმანული გუნდის ერთ-ერთი საუკეთესო პროდუქტია, რომელმაც გელზენკირხენელთა რიგებში 2011 წლამდე იასპარარეზა.
2010-11 წლების სეზონში გერმანიის თასის მოგების შემდგომ, გერმანელმა მეკარემ “ბაიერნში” მოისურვა კარიერის გაგრძელება, მიუხედავად ინგლისური გუნდების მხრიდან არსებული ინტერესებიდან და დღესაც ღირსეულად იცავს ბავარიული გრანდის კარს.
რაფინია
პოზიცია: მარჯვენა მცველი
ასაკი: 30
ამჟამინდელი კლუბი: “ბაიერნი”
“შალკეს” რიგებში ჩატარებული მატჩი: 198
ბრაზილიაში მოთამაშე რაფინიას თავდაპირველად ყურადღება სწორედ გერმანულმა “შალკემ” მიაქცია 2005 წელს. შემტევი შესაძლებლობების მქონე მცველმა თავისი შესაძლებლობები გერმანიაში მშვენივრად წარმოაჩინა, რის შემდეგაც ყველასთვის გასაკვირად, ის “ჯენოას” შეუერთდა 2010-ში.
სერია ა-ში გამართული რამდენიმე ბრწყინვალე მატჩის შემდგომ, მისი გადაბირების სურვილი “ბაიერნს” გაუჩნდა. ასე აღმოჩნდა ბრაზილიელი მცველი მიუნხენში, ნოიერის გვერდით.
კირიაკოს პაპადოპულოსი
პოზიცია: ცენტრალური მცველი
ასაკი: 23
ამჟამინდელი კლუბი: “ბაიერ ლევერკუზენი”
“შალკეს” რიგებში ჩატარებული მატჩი: 93
კირიაკოსი გერმანულ გუნდში 2010 წელს გამოჩნდა. მან “შალკეს” მესვეურთა ყურადღება საბერძნეთში, “ოლიმპიაკოსის” რიგებში მაღალ დონეზე თამაშით მიიქცია.
კირიაკოსმა 93 მატჩის ჩატარება მოახერხა “ლურჯი” მაისურით, რის შემდგომაც მის მიმართ ინტერესი “ლევერკუზენის ბაიერმა” გამოიჩინა, “შალკემ” კი მისი შენარჩუნება ვერ მოახერხა.
ჰაიკო ვესტერმანი
პოზიცია: ცენტრალური მცველი
ასაკი: 32
ამჟამინდელი კლუბი: “ბეტისი”
“შალკეს” რიგებში ჩატარებული მატჩი:123
ჰაიკო ვესტერმანს მცველისთვის დამახასიათებელი ყველა ნიშან-თვისება გააჩნდა. მისი პირველი დიდი კლუბი სწორედ “ფელტინს-არენას” ბინადარი “შალკე” გახლდათ, რომელმაც ის “არმინიადან” გადაიბირა.
ვესტერმანმა მთავარი როლი ითამაშა გერმანული გრანდის წარმატებულ ასპარეზობაზე (ჩემპიონტა ლიგაში), ის გუნდის შეუცვლელი ფიგურა იყო, მანამ სანამ გერმანელებს “ბარსელონა” არ გამოაგდებდა ნახევარფინალიდან. რის შემდგომაც ის “ჰამბურგის” კაპიტანი გახდა (2010-ში).
ბენედიქტ ჰიოვედესი
პოზიცია: მარცხენა მცველი
ასაკი: 27
ამჟამინდელი კლუბი: “შალკე”
“შალკეს” რიგებში ჩატარებული მატჩი: 286
ბენედიქტი ერთ-ერთია იმ ფეხბურთელთა წარმატებულ შორის, რომელთა შენარჩუნებაც გელზენკირხენულმა გუნდმა მოახერხა.
მსოფლიო ჩემპიონმა, რომელსაც ცენტრალური მცველის პოზიციაზეც შეუძლია თამაში, “შალკეს” მასიურით 286 მატჩში მიიღო მონაწილეობა და ამასთანავე 32-ჯერ შესძლო ნაკრების რიგებში თამაშიც.
იოჰანსენ გაისი
პოზიცია: ცენტრალური ნახევარმცველი
ასაკი: 22
ამჟამინდელი კლუბი: “შალკე”
“შალკეს” რიგებში ჩატარებული მატჩი: 23
მიუხედავად იმისა, რომ “შალკეს” რიგებში იოჰანსენმა მხოლოდ 23 მატჩის ჩატარება მოახერხა, მან მაინც დიდი მოწონება დაიმსახურა კლუბის ხელმძღვანელობის მხრიდან.
დიდწილად სწორედ 22 წლის გაისის დამსახურებაა, ის რომ “შალკე” ამჟამად გერმანიის ბუნდესლიგის სატურნირო ცხრილში მეოთხე პოზიციას იკავებს. მან კლუბის მიერ გატანილ 12 გოლში მიიღო მონაწილეობა.
ივან რაკიტიჩი
პოზიცია: ცენტრალური ნახევარმცველი
ასაკი: 27
ამჟამინდელი კლუბი: “ბარსელონა”
“შალკეს” რიგებში ჩატარებული მატჩი: 135
ივან რაკიტიჩმა, რომელიც ამჟამად “ბარსელონას” ერთ-ერთი ყველაზე მნიშვნელოვან ფეხბურთელად ითვლება, თავისი შესაძლებლობების წარმოჩენისათვის მადლობა პირველ რიგში “შალკეს” უნდა გადაუხადოს, რამეთუ სწორედ გერმანული გუნდის სკაუტმა შეამჩნია ის პირველად.
გერმანულმა კლუბმა “ბაზელში” მოთამაშე ხორვატი ნახევარმცველი 2007 წელს გაიფორმა. გერმანელთა ავანსები გამართლდა – ცენტრალურმა ნახევარმცველმა 135 მატჩში 16 გოლის გატანა და 29 ასისტის გაკეთება მოახერხა.
იულიან დრაქსლერი
პოზიცია: შემტევი ნახევარმცველი
ასაკი: 22
ამჟამინდელი კლუბი: “ვოლფსბურგი”
“შალკეს” რიგებში ჩატარებული მატჩი: 170
იულიან დრაქსლერი “შალკეს” მიერ წარმოებულ ერთ-ერთ ყველაზე მნიშვნელოვან პროდუქტად ითვლება. რომ არა ტრავმები, ის შესაძლოა გაცილებით უფრო მაღალ დონეზეც მდგარიყო.
თუმცა მას ყველაფერი წინ აქვს – ის მხოლოდ 22 წლის არის. მან გულშემატკივართა გული მალევე მოიგო, თუმცა 170 მატჩში თამაშის შემდგომ, მან “შალკე” “ვოლფსბურგში” გაცვალა.
მესუტ იოზილი
პოზიცია: შემტევი ნახევარმცველი
ასაკი: 27
ამჟამინდელი კლუბი: “არსენალი”
“შალკეს” რიგებში ჩატარებული მატჩი: 39
რაკიტიჩსა და იულიან დრაქსლერს ნახევარდაცვაში მესუტ იოზილიც შეუერთდებოდა “ვერდერში” რომ არ გადაბარგებულიყო 2006 წელს.
იოზილი “შალკეს” აკადემიაში 2005 წელს მივიდა და ერთწლიან კონტრაქტს მოაწერა ხელი. თუმცა კლუბის ხელმძღვანელობა, მისით ვერ მოიხიბლა და გერმანელ ნახევარმცველს გუნდის დატოვების საშუალება მისცა.
ლეროი სანე
პოზიცია: შემტევი ნახევარმცველი
ასაკი: 20
ამჟამინდელი კლუბი: “შალკე”
“შალკეს” რიგებში ჩატარებული მატჩი: 42
მიუხედავად იმისა, რომ ლერო სანე სულ რაღაც 20 წლისაა, ევროპის არცერთი ტოპ კლუბი არ იტყვის გუნდში მის ყოლაზე უარს. სანემ გერმანულ გუნდში 42 მატჩის ჩატარება მოახერხა, მან თავის გამოჩენა ჩემპიონთა ლიგაზეც მოახერხა.
კლუბის ახალგაზრდული აკადემიის კიდევ ერთი გასაოცარი პროდუქტის შენარჩუნება “შალკეს” ძალიან გაუჭირდება. დიდია იმის ალბათობა, რომ გერმანელი შემტევი ნახევარმცველი მომავალ სეზონში ინგლისში ან ესპანეთში ვიხილოთ.
კლას-იან ჰუნტელაარი
პოზიცია: თავდამსხმელი
ასაკი: 32
ამჟამინდელი კლუბი: “შალკე”
“შალკეს” რიგებში ჩატარებული მატჩი: 201
“რეალში” და “მილანში” გატარებული წლების შემდგომ, ჰოლანდიელმა შემტევმა კარიერის გაგრძელება გერმანიაში გადაწყვიტა. ის “შალკეს” 2010-ში შეუერთდა.
ჰოლანდიელ თავდამსხმელს საკმაოდ ადვილად გამოსდის გოლების გატანა, მითუმეტეს, თუ ისეთი ნახევარმცველები ეყოლება უკან, როგორებიც არიან: იოზილი, დრაქსლერი, სანე და რაკიტიჩი.
Daily Star-ის მიერ გავრცელებული ინფორამციის თანახმად, პეპ გუარდიოლა “ეტიჰად სტედიუმზე” ლეროი სანეს მიყვანით არის დაინტერესებული.
20 წლის სანემ, რომელიც მსოფლიოს ერთ-ერთ ყველაზე პერსპექტიულ ფეხბურთლად მიიჩნევა, “სიტისთან” ერთად კიდევ რამდენიმე ევროპული გრანდის ყურადღებაც მიიპყრო (“არსენალი”; “ლივერპული”).
პეპ გუარდიოლა არასდროს სცდილობდა დაემალა მისი სიმპატიები 40 მილიონად შეფასებული ნახევარმცველის მიმართ: “ ლეროი შესანიშნავი მოთამაშეა. ისღა დამრჩენია მივულოცო გერმანიის ნაკრებს, რომ ასეთი ფეხბურთელი ჰყავთ.”
განის ნაკრებისა და „შალკეს“ ნახევარმცველი კევინ პრინს-ბოატენგი ზამთრის სატრანსფერო ფანჯრის დროს „გალათასარაის“ მოთამაშე გახდება, რის შესახებაც Ghanasoccer.net-ი წერს.
წყაროს ინფორმაციით, თურქული კლუბის პრეზიდენტმა დურსუნ ოზბეკმა ფეხბურთელთან შეთანხმება დაადასტურა. მხარეები, სავარაუდოდ, ოთხწლიან კონტრაქტს გააფორმებენ.
გასული სეზონის ბოლოს ბოატენგი „შალკეს“ ძირითადი შემადგენლობიდან მოკვეთეს, ზაფხულში კი ფეხბურთელმა ლისაბონის „სპორტინგისა“ და საუდის არაბეთის კლუბ „ალ-იტიჰადის“ წინადადებები უარყო.
თემურ ქეცბაიას მიერ დამოძღვრილმა აპოელმა უეფას ევროპის ლიგის სასტარტო მატჩში გელზენკირხენის “შალკე” მიიღო და ანგარიშით 0:3 დამარცხდა.
კვიპროსელებმა შეხვედრა აქტიურად დაიწყეს, თუმცა “შალკემ” მალევე მოახერხა ტერიტორიული და სათამაშო უპირატესობის დაუფლება. გერმანელებმა მასპინძელთა კართან არაერთი სახიფათო მომენტი შექმნეს, ორჯერ შორეული დარტყმით ბურთი ხარიხასაც გაარტყეს, 28-ე წუთზე კი ანგარიში გახსნეს, როცა საჯარიმო დარტყმის შესრულების შემდეგ ჟოელ მატიპმა კარიდან გამოსულ მეკარესაც და მეურვესაც დაასწრო თავით თამაში და ბურთი ზუსტი მიმართულებით გადაგზავნა. მატჩამდე ქეცბაია სწორედ იმაზე ამახვილებდა ყურადღებას, რომ “შალკეს” ფეხბურთელები სტანდარტულ მომენტებს ძალიან კარგად იყენებენ და ამიტომ, კვიპროსელ მცველებს განსაკუთრებული ყურადღება მართებდათ.
ზუსტად შვიდ წუთში “შალკეს” თავდამსხმელმა კლას-იან ჰუნტელაარმა შორეული დარტყმით გერმანელთა უპირატესობა ორბურთიანი გახადა.
71-ე წუთზე ჰუნტელაარმა დუბლი შეასრულა და საბოლოო შედეგი დააფიქსირა — 0:3.
აღსანიშნავია, რომ მატჩის 77-ე წუთზე კვიპროსელები მოედანზე რიცხობრივ უმცირესობაში დარჩნენ: მთავარი არბიტრის სიტყვიერი შეურაცხყოფისა და ემოციური პროტესტის გამო მოედნიდან ტომას დე ვინსენტი გააძევეს.
ჯგუფის მეორე შეხვედრა, რომელიც ტრიპოლისის “ასტერასსა” და პრაღის “სპარტას” შორის გაიმართა, ფრედ, ანგარიშით 1:1 დასრულდა.
ორი კვირის შემდეგ ჯგუფის მეორე ტურის მატჩები შედგება: “სპარტა” აპოელს უმასპინძლებს, “შალკე” კი “ასტერასს” მიიღებს.
ევროპის ლიგა
K ჯგუფი
აპოელი — “შალკე” 0:3 (0:2)
გოლები: მატიპი 28′, ჰუნტელაარი 35′, 71′.
გაფრთხილებები: მაკრიდისი 50′, ვანდერი 72′ — გაისი 10′, დი სანტო 37′.
გაძევება: დე ვინსენტი 77′.
მთავარი არბიტრი: ტონი შაპრონი (საფრანგეთი).
დღეს უეფას ევროპის ლიგის ჯგუფური ეტაპი აიღებს სტარტს. K ჯგუფშია მოხვედრილი თემურ ქეცბაიას აპოელი, რომელიც დღეს, ნიქოზიაში გელზენკირხენის “შალკეს” უმასპინძლებს. ჯგუფში ტრიპოლისის “ასტერასი” და პრაღის “სპარტაც” არიან.
ქეცბაია დღევანდელ შეხვედრაში ფავორიტად “შალკეს” მიიჩნევს და იქვე აღნიშნავს, რომ ამ მატჩის შედეგს გადამწყვეტი მნიშვნელობა არ ექნება.
“თუ ფავორიტებთან კარგ შედეგებს ვაჩვებთ, დიდ ნაბიჯს გადავდგამთ საუკეთესო 32 გუნდს შორის მოსახვედრად. მომდევნო ეტაპზე თამაში გვსურს. ეს არ იქნება იოლი, მაგრამ გუნდმა უკვე აჩვენა, რომ აქვს პოტენციალი. თუ თავს კარგად წარმოვაჩენთ, დადებითი შედეგის ჩვენება შეგვიძლია. წინ მივიწევთ, მომენტებს ვქმნით, მაგრამ გარკვეული პრობლემები გვაქვს დაცვაში და იმედია, ამასაც გამოვასწორებთ.
“შალკე” ფავორიტია, მაგრამ ჩვენ შინ ვთამაშობთ. განსაკუთრებით ფრთხილად უნდა ვიყოთ დაცვაში. ძლიერი მეტოქე გვყავს, რომელიც განსაკუთრებით კარგად იყენებს სტანდარტულებს. ასე რომ, სიფრთხილე გვმართებს. ამ შეხვედრის შედეგზე არ არის დამოკიდებული ყველაფერი, რადგან წინ კიდევ ხუთი მატჩი გვექნება”, – ქეცბაიას კომენტარს cyprusscore.com-ი აქვეყნებს.
აპოელსა და “შალკეს” შორის შეხვედრა დღეს, თბილისის დროით 23:05 საათზე დაიწყება და მას ტონი შაპრონის თავკაცობით ფრანგ მსაჯთა ბრიგადა მოემსახურება.
ნახევარმცველმა იულიან დრაქსლერმა ის მიზეზი დაასახელა, რომლის გამო მან ტურინის „იუვენტუსში“ გადასვლას „ვოლფსბურგში“ ტრანსფერი ამჯობინა. 21 წლის გერმანელის თქმით, სამშობლოში მას თავისი პოტენციალის გამომჟღავნების გაცილებით დიდი შესაძლებლობა აქვს. გარდა ამისა, ფეხბურთელმა აღნიშნა, რომ კევინ დე ბრუინეს „მანჩესტერ სიტიში“ წასვლის გამო გულდაწყვეტილია.
„შალკე“ იმიტომ დავტოვე, რომ გარემოს შეცვლა მსურდა. ვფიქრობ, იტალიასთან შედარებით, გერმანიაში პროგრესის მეტი შესაძლებლობა გამაჩნია. ბუნდესლიგას კარგად ვიცნობ. ერთადერთი, რის გამოც გული დამწყდა, კევინ დე ბრუინეს „მანჩესტერ სიტიში“ ტრანსფერია. მასთან ერთ გუნდში თამაში კარგი იქნებოდა“, – განაცხადა დრაქსლერმა.
იტალიის ჩემპიონები “შალკეს” გამთამაშებლის ტრანსფერზე საბოლოოდ ცდიან ბედს.
Gazzetta dello Sport-ის ინფორმაციით, მომდევნო ორი დღის განმავლობაში “იუვენტუსი” გელზენკირხერულ გუნდს საბოლოო შეთავაზებას გაუკეთებს ახალგაზრდა შემტევის ტრანსფერზე.
გერმანულ კლუბს დრაქსლერში 30 მილიონის მიღება სურს, მაგრამ ნაკლებად სავარაუდოა, “შალკემ” ბოლო წინადადებაზე უარის თქმა შეძლოს.
რაც შეეხება “იუვენტუსისგან” პირად კონტრაქტს, მათ უკვე მოამზადეს ხუთწლიანი ხელშეკრულება, წელიწადში 3.2 მილიონი ევროთი.
გელზენკირხენის „შალკეს“ ხელმძღვანელობას იულიან დრაქსლერის შენარჩნება სურს, რომლითაც ტურინის „იუვენტუსი“ ინტერესდება.
„დრაქსლერის გაყიდვლას არ ვგეგმავთ, თუმცა ფინანსური მხარე პროგნოზების გაკეთების საშუალებას არ გვაძლევს. თუ რომელიმე სხვა კლუბი ასტრონონიური წინადადებით მოგვმართავს, მაშინ, ამ ვარიანტს, მინიმუმ, გადავხედავთ“, – განაცხადა კლუბის მენეჯერმა ხორსტ ხელდტმა.
გელზენკირხენის „შალკე 04“-ს ნახევარმცველი იულიან დრაქლერი ტურინის „იუვენტუსში“ გადასვლასთან ძალიან ახლოსაა.
როგორც ცნობილი იტალიელი სპორტული ჟურნალისტი ჯანლუკა დი მარციო წერს, ფეხბურთელმა „ბიანკონერის“ ხელმძღვანელობასთან კონტრაქტის დეტალებიც შეათანხმა, რომლის მიხედვით, მისი ხელფასი სეზონში 3,5 მილიონ ევროს შეადგენს.
იულიანის ტრანსფერი „იუვეს“, სავარაუდოდ, 30 მილიონი ევრო დაუჯდება.
იტალიურ პრესაში გავრცელებული ინფორმაციის თანახმად, გელზენკირხენის “შალკე” “ემპოლის” თავდამსხმელით, ლევან მჭედლიძით დაინტერესდა.
tuttomercatoweb-ი იუწყება, რომ გერმანელებს თავდასხმის ხაზის გაძლიერება სურთ და ამიტომ კლუბი 25 წლის ქართველი ფეხბურთელის ვარიანტს განიხილავს.
მჭელიძემ 2014-15 წლების სეზონში, იტალიის სერია A-ში მეტოქეთა კარი ოთხჯერ დალაშქრა, ხოლო ერთხელ იტალიის თასზე “ჯენოას” გაუტანა.
შეგახსენებთ, რომ “შალკეში” აქამდე ორ ქართველ ფეხბურთელს უთამაშია. ლევან კობიაშვილი ამ კლუბის ღირსებას 2003 წლიდან 2010 წლამდე, ხოლო ლევან ყენია 2008 წლიდან 2012 წლამდე იცავდა.
“შალკეს” მთავარ მწვრთნელად “პადერბორნის” ყოფილი თავკაცი, ანდრე ბრაიტენრაიტენი დაინიშნა.
მოსალოდნელია, რომ რობერტო დი მატეოს გათავისუფელბის შემდეგ, გელზენკირხენელები მარკუს ვაინცირლს მიიწვევდნენ, რომელსაც “აუგსბურგში” წარმტებული სეზონი ჰქონდა.
თუმცა, “შალკეს” მენეჯმენტმა არჩევანი ბრაიტენრაიტერზე შეაჩერა, რომლის “პადერბორნიც” გასული სეზონის შედეგებით მეორე ბუნდესლიგაში ავარდა.
