ამერიკულმა ტელეარხმა „BT Spor“-მა „ლოს-ანჯელეს გალაქსისა“ და ინგლისის ნაკრების ნახევარმცველთან სტივენ ჯერარდთან კონტაქტი გააფორმა.
ტელევიზიაში ინგლისელი ფეხბურთელები უეფას ჩემპოიონთა ლიგის მატჩების დროს ექსპერტად იმუშავებს. სტივი ჯის რეგულარული გადაფრენა მოუწევს და სეზონის მიმდინარეობისასაც იმუშავებს.
MLS-ის მიმდინარე გათამაშებაში ნახევარმცველმა სამი მატჩი ჩაატარა და ერთი გოლი გაიტანა.
„ლივერპულის“ ახალწვეული ჯეიმს მილნერი თვლის, რომ „ლოს-ანჯელეს გალაქსიში“ გადასული სტივენ ჯერარდის შეცვლა მერსესაიდულ კლუბში ლიონელ მესისაც ვერ გამოუვიდოდა.
„დედამიწაზე არ ცხოვრობს ადამიანი, რომელიც ჯერარდის შეცვლას მოახერხებდა. მისი დაკარგვა გუნდური თამაშით უნდა ავანაზღაუროთ. დარწმუნებული ვარ, ეს გამოგვივა. ყველამ თავისი სამუშაო უნდა შეასრულოს.
იქედან გამომდიანრე, თუ რა გააკეთა ბოლო წლებში „ლივერპულისთვის“ სტივმა, მას მესიც კი ვერ შეცვლიდა. როგორც მოედანზე, ისე მის გარეთ, გუნდის განვითარებაში მან დიდი წვლილი შეიტანა. ჯერარდის წასვლამ დიდი სიცარიელე შექმნა“, – განაცხადა მილნერმა.
18 ივლისს, ამერიკის MLS-ში, “ლოს ანჯელეს გალაქსიმ” საკუთარ მოედანზე “სან ხოსე” მიიღო და მეტოქე ანგარიშით 5:2 დაამარცხა.
შეხვედრის 37-ე წუთზე, მასპინძელთა ახალწვეულმა სტივენ ჯერარდმა ახალი კლუბის მაისურით პირველი გოლი გაიტანა და შეხვედრაში ანგარიში გაათანაბრა.
ამერიკული “ლოს ანჯელეს გალაქსის” ახალწვეულმა სტივენ ჯერარდმა განაცხადა, რომ არ ღირს მისი დევიდ ბექჰემთან შედარება, რომელიც თავის დროზე ასევე კალიფორნიული გუნდის ღირსებას იცავდა.
“მნიშვნელოვანია, ხალხმა გაიგოს, რომ მე არ ვარ ბექჰემი. მე არც ისე კარგი შესახედაობის ვარ, როგორც დევიდია და ალბათ, არც იმდენად გავლენიანი გახლავართ, როგორც ბექჰემია, თუმცა მინდა მჯეროდეს, რომ საფეხბურთო თვალსაზრისით ჩვენ ერთ დონეზე ვდგავართ.
სანამ აქ გადმოვიდოდი, MLS-ი სიღრმისეულად შევისწავლე. “გალაქსის” მატჩებს ვიწერდი და მეორე დილით ვუყურებდი, YouTube-ზე ვიდეოებსაც ვადევნებდი თვალყურს, ვაკვირდებოდი, როგორ თამაშობენ ფეხბურთელები”, – საუბრობს ჯერარდი ESPN-ისთვის მიცემულ ინტერვიუში.
“ყველაზე იოლი არჩევანი “ლივერპულში” კიდევ ერთი წლით დარჩენა იქნებოდა, – აგრძელებს ინგლისელი ფეხბურთელი. – კომფორტულად ვიქნებოდი, ჩემს სახელს გამოვიყენებდი ახალი მოთამაშეების მოსაზიდად ან კარიერას დავასრულებდი, თუმცა საკუთარი თავისთვის ახალი გამოწვევის დასახვა მსურდა. ვფიქრობ, ამ ასაკში დიდი გამოწვევა და შესანიშნავი შესაძლებლობა მომეცა. ერთი სული მაქვს, მოედანზე როდის გავალ”, – აღნიშნა ჯერარდმა .
“ლივერპულის” ყოფილი კაპიტანი და “ლოს ანჯელეს გალაქსის” ახალწვეული სტივენ ჯერარდი გამოტყდა, რომ კარიერის გაგრძელება რამდენიმე ევროპულ კლუბში შეეძლო, თუმცა მომგებიან წინადადებებზე უარი თქვა და კალიფორნიას მიაშურა.
“ევროპაში კარიერის გაგრძელების რამდენიმე კარგი ვარიანტი მქონდა, თუმცა ახალი გამოწვევის მიღება მინდოდა, რაც სამშობლოდან მოშორებით ცხოვრებასა და ახალი გამოცდილების მიღებას ნიშნავს. ავირჩიე ის ადგილი, სადაც ჩემი ოჯახი ცხოვრებით დატკბება.
კარიერის ბოლოს შემეძლება ვთქვა, რომ ერთ ადგილზე არ გავჩერებულვარ და რაღაც ახალიც გამოვცადე”, – განაცხადა ჯერარდმა კლუბის ოფიციალურ ტელეარხზე.
35 წლის ინგლისელი ნახევარმცველი “ლოს ანჯელეს გალაქსიში” პირველ ვარჯიშსა და პრესკონფერენციას 7 ივლისს გამართავს. შეგახსენებთ, რომ მხარეებს შორის 18-თვიანი კონტრაქტი გაფორმდა.
“ლივერპულის” ლეგენდად ქცეულ სტივენ ჯერარდს რამდენიმე დღის წინ იუბილე ჰქონდა. სტივი 35 წლის გახდა. მერსისაიდული კლუბი მომდევნო სეზონიდან არსებობას მის გარეშე გააგრძელებს. ჩვენ კი ჯერარდის კარიერის მთავარ მიღწევებს გავიხსენებთ.
მოიგო ჩემპიონთა ლიგა
სტივენ ჯერარდი კი დიდიე დეშამის შემდეგ ყველაზე ახალგაზრდა კაპიტანი გახდა, რომელმაც ჩემპიონთა ლიგის თასი მოიპოვა.
რეკორდსმენი
2006 წელს სტივენ ჯერარდი გახდა პირველი და ჯერჯერობით ერთადერთი ფეხბურთელი, რომელმაც ინგლისური კლუბის რიგებში ყველა სათასო ფინალში შეძლო გოლის გატანა. თავისი სერია სტივი ჯიმ 2001 წელს “ალავესთან” მოგებულ უეფას თასის ფინალში დაიწყო. ორ წელიწადში სტივიმ ლიგის თასის ფინალში “მანჩესტერის” კარი დალაშქრა. მოგვიანებით იყო ჩემპიონთა ლიგის ცნობილი ფინალი, ხოლო 2006-ში ინგილისის თასის ფინალში ჯერარდმა “ვესტ ჰემს” გაუტანა.
გახდა ნაკრების კაპიტანი
ეროვნულ ნაკრებშიც ჯერარდს ძალიან აფასებდნენ. ქვეყნის მთავარ გუნდში მისი დებიუტი 2000 წელს, კევინ კიგანის მწვრთნელობის დროს შედგა. ამავე წელს სტივენმა პირველი დიდი ტურნირი ითამაშა, თუმცა ჰოლანდიასა და ბელგიაში გამართულ ევროზე ინგლისელებმა ცუდი შთაბეჭდილება დატოვეს.
ჯერარდი საუკეთესო სანაკრებო პერიოდი 2006 წლის მუნდიალი იყო. ხსენებულ ტურნირზე ინგლისელები კვლავ საპრიზო ადგილების გარეშე დარჩნენ, თუმცა სტივენი 5 გოლით იმ ნაკრების საუკეთესო ბომბარდირი იყო.
2010 წლის მუნდიალს რიო ფერდინანდი ტრავმირებული შეხვდა, ჯონ ტერი კი სკანდალში გაეხვა, რის გამოც ჯერარდი ტურნირზე კაპიტნის რანგში გაემგზავრა. თუმცა, ნაკრებმა ის ჩემპიონატი ჩააგდო, ჯერარდმა კი მხოლოდ აშშ-სთან შეხვედრაში ითამაშა მისთვის დამახასიათებელ დონეზე.
დროულად წავიდა
ჯერარდი დროულად მიხვდა, რომ მისი შესაძლებლობები უკვე გუნდის ამბიციებს ვერ აკმაყოფილებდა. “ლივერპულის” შემადგენლობაში რვიანის მოვალეობები ჯორდან ჰენდერსონმა და ფელიპე კოუტინიომ გაინაწილეს, თავად სტივენის მოედანზე გამოსვლა კი უფრო სიმბოლურ ხასიათს ატარებდა და გუნდის საბრძოლო განწყობაზე თუ ახდენდა გავლენას. მან სწორად განსაზღვრა პრირიტეტები და წასვლის შესახებ განცხადება დროულად გააკეთა.
საწყენი მხოლოდ ის არის, რომ სტივი ტიტულით ან ლამაზი გამარჯვებით მაინც ვერ დაემშვიდობა მშობლიურ გუნდს.
გახდა ერთგულების მაგალითი
ჯერარდმა “ლივერპულს” 17 წელი მიუძღვნა და უამრავ სარფიან წინადადებაზე თქვა უარი. სტივენი ერთგულების ნამდვილი მაგალითია, რასაც უშუალო კონკურენტების ქომაგებიც აფასებენ. “ჩელსისთან” შეხვედრის შემდეგ ლონდონურმა პუბლიკამ სტივი ჯი აპლოდისმენებით გააცილა.
ჯერარდი “ლივერპულის” სიმბოლოდ და მამოძრავებელ ძალად იქცა. მის გარეშე წითლების წარმოადგენა ძალიან რთული იქნება.
ჩრდილოეთ ამერიკული პრესა ვარაუდობს, რომ „ლოს-ანჯელეს გალაქსიში“ ნახევარმცველ სტივენ ჯერარდის დებიუტი 11 ივლისს შედგება.
ამ დღეს კალიფორნიელები საერთაშორისო ჩემპიონთა თასის შეხვედრას ჩაატარებენ, რომელშიც მათი მეტოქე მექსიკის „ამერიკა“ იქნება.
„ველობით, რომ სტივენი 11 ივლისამდე შემოგვიერთდება. გუნდთან ერთად მან რამდენიმეჯერ უნდა ივარჯიშოს და თუ მისი მდგომარეობა დამაკმაყოფილებელი იქნება, სტივენს ამ მატჩში ვათამაშებდით“, – განაცხადა „გალაქსის“ მთავარმა მწვრთნელმა ბრიუს არენამ.
ცნობისთვის, ამჟამად „ლივერპულში“ თანაგუნდელებთან ერთად ჯერარდი დუბაიში ისვენებს.
ასევე იხილეთ: ჯერარდი “ლივერპულში” დაბრუნებას იმედოვნებს
მადრიდის “რეალისა” და საფრანგეთის ნაკრების ყოფილმა ნახევარმცველმა ზინედინ ზიდანმა “ლივერპულის” კაპიტნის სტივენ ჯერარდის შესახებ ისაუბრა.
“დიდი დრო მქონდა იმისთვის, რომ ჯერარდს დავკვირვებოდი და შემეფასებინა. რატომ მომწონს ის ასე ძალიან? შესაძლოა, მასში ვხედავ ისეთ რაღაცას, რაც ჩემ თავს მაგონებს. ჯერარდი მოედანზე დიდ ხმაურს იწვევდა, თუმცა მინდორს მიღმა წყნარი იყო. ეს იმას ნიშნავს, რომ ის მხოლოდ ფეხბურთზე ფიქრობდა და მხოლოდ მაშინ საუბრობდა, როცა ამის საჭიროება იყო.
ჯერარდი მოედანზე საუბარს საბრძოლო სულისკვეთების გამოხატვითა და ბურთთან ურთიერთობით ახერხებდა. ყოველთვის მინდოდა მასთან ერთად თამაში, მაგრამ ის კლუბის ერთგული იყო. მის გულში “ლივერპულია”. ეს კიდევ ერთი დამახასიათებელი ნიშანია, რაც მასზე ბევრს მეტყველებს. არა მგონია, ასეთი ფეხბურთელი ბევრი იყოს”, – ციტირებს ზიდანის სიტყვებს Goal.com-ი.
“ლივერპულის” კაპიტანმა სტივენ ჯერარდმა შაბათს მერსისაიდული გუნდის ფორმით “ენფილდზე” უკანასკნელი მატჩი ჩაატარა და ფანებს დაემშვიდობა. ინგლისელმა ფეხბურთელმა ქომაგებს ავტოგრაფიც დაუტოვა, თუმცა მომავალი კლუბის მაისურზე ხელის მოწერა არ ისურვა.
“სანამ აქ ვარ, “ლოს ანჯელეს გალაქსიში” არ გადავსულვარ”, – უთხრა ჯერარდმა ფანს, რომელმაც ამერიკული კლუბის მაისურზე ავტოგრაფის დატოვება სთხოვა.
ინგლისის პრემიერლიგის 37-ე ტურში “ლივერპულის” კაპიტანმა სტივენ ჯერარდმა “ენფილდზე” მერსისაიდული გუნდის ფორმით უკანასკნელი მატჩი ჩაატარა.
ინგლისელი ფეხბურთელი ფანებს შეხვედრის შემდეგ ამ სიტყვებით დაემშვიდობა:
“უცნაური გრძნობა დამეუფლა. ამ მომენტის ძალიან მეშინოდა, აქაურობა ძალიან მომენატრება. სრულად დაცლილი ვარ, რადგან თქვენ წინაშე ვეღარ ვითამაშებ.
“ლივერპულში” ჩემი პირველი თამაში ოცნების ახდენა იყო, დანარჩენი ყველაფერი კი ამის დამატება.
კლუბი საიმედო ხელშია. ჩვენ შესანიშნავი მფლობელები და არაჩვეულებრივი მწვრთნელი გვყავს. გუნდს დიდი პოტენციალი აქვს. ვფიქრობ, უახლოეს მომავალში გუნდს ახალწვეულებიც შეუერთდებიან. კლუბს წარმატებებს ვუსურვებ.
მადლობას ვუხდი ყველა თანამშრომელს, რომლებთან ერთადაც აქ 17 წლის განმავლობაში ვმუშაობდი. “ლივერპულის” ყოფილ მოთამაშეებსაც ვგულისხმობ.
ყველაზე დიდ მადლობას კი ფანებს ვუხდი. მსოფლიოს ბევრ სტადიონზე მითამაშია, თუმცა თქვენ საუკეთესონი ხართ”.
შეგახსენებთ, რომ სტივენ ჯერარდი მომდევნო სეზონიდან “ლოს ანჯელეს გალაქსიში” ითამაშებს.
დღეს “ლივერპულის” კაპიტანი სტივენ ჯერარდი მერსისაიდული გუნდის ფორმით “ენფილდზე” უკანასკნელ მატჩს ჩაატარებს. მისი გუნდი ინგლისის პრემიერლიგის 37-ე ტურში “კრისტალ პალასს” მასპინძლობს.
კომპანია “ადიდასმა” ჯერარდს ამ მატჩისთვის სპეციალური ბუცები დაუმზადა.
მარჯვენა ბუცის შიგა ნაწილში გაკეთებულია წარწერა: “შენ მიდიხარ ლეგენდად და დაბრუნდები გმირად. ქალაქი ლივერპული მუდამ შენ გვერდითაა. შენ არასოდეს იქნები მარტო”.
თავად ჯერარდმა სოციალურ ქსელში დაწერა: “დღეს ამ ბუცებს ჩავიცვამ. ამ დღეს არასდროს დავივიწყებ. ვიცი, რომ არასოდეს ვიქნები მარტო”.
მატჩი “ლივერპულსა” და “კრისტალ პალასს” შორის დღეს, თბილისის დროით 20:30 საათზე დაიწყება.
“დეილი ექსპრესის” ცნობით, მიუნხენის “ბაიერნის” ნახევარმცველმა ჩაბი ალონსომ შესაძლოა, კარიერა ტურინის “იუვენტუსში” გააგრძელოს.
წყაროს თანახმად, 33 წლის ბასკი ფეხბურთელი ტურინში შეიძლება იმ შემთხვევაში გადავიდეს, თუ ანდრეა პირლო “ბებერ სინიორას” დატოვებს. როგორც მოგეხსენებათ, იტალიელი ფეხბურთელით რამდენიმე ინგლისური გუნდია დაინტერესებული. კერძოდ, საუბარია პირლოს მიმართ “ლივერპულისა” და ლონდონის “ჩელსის” ინტერესზე.
“მეტრო” წერს, რომ მერსისაიდული გუნდის მთავარი მწვრთნელი ბრენდან როჯერსი პირლოს უკვე მოელაპარაკა და მას საკმაოდ სარფიანი წინადადებაც შესთავაზა. “წითლები” იტალიელ ნახევარმცველს სტივენ ჯერარდის შემცვლელად მოიაზრებენ. ეს უკანასკნელი მომავალი სეზონიდან “ლოს ანჯელეს გალაქსიში” ითამაშებს.
